১. একূপোসথিকাথেরীঅপদানং

১. ‘‘নগরে বন্ধুমতিযা, বন্ধুমা নাম খত্তিযো;

দিৰসে পুণ্ণমায সো, উপৰসি উপোসথং.

২. ‘‘অহং তেন সমযেন, কুম্ভদাসী অহং তহিং;

দিস্ৰা সরাজকং সেনং, এৰাহং চিন্তযিং তদা.

৩. ‘রাজাপি রজ্জং ছড্ডেত্ৰা, উপৰসি উপোসথং;

সফলং নূন তং কম্মং, জনকাযো পমোদিতো’.

৪. ‘‘যোনিসো পচ্চৰেক্খিত্ৰা, দুগ্গচ্চঞ্চ [দুগ্গতিঞ্চ (স্যা.)] দলিদ্দতং [দল়িদ্দতং (সী.)];

মানসং সম্পহংসিত্ৰা, উপৰসিং উপোসথং.

৫. ‘‘অহং উপোসথং কত্ৰা, সম্মাসম্বুদ্ধসাসনে;

তেন কম্মেন সুকতেন, তাৰতিংসমগচ্ছহং.

৬. ‘‘তত্থ মে সুকতং ব্যম্হং, উব্ভযোজনমুগ্গতং [উদ্ধং যোজনমুগ্গতং (সী. স্যা. পী.)];

কূটাগারৰরূপেতং, মহাসনসুভূসিতং.

৭. ‘‘অচ্ছরা সতসহস্সা, উপতিট্ঠন্তি মং সদা;

অঞ্ঞে দেৰে অতিক্কম্ম, অতিরোচামি সব্বদা.

৮. ‘‘চতুসট্ঠি দেৰরাজূনং, মহেসিত্তমকারযিং;

তেসট্ঠি চক্কৰত্তীনং, মহেসিত্তমকারযিং.

৯. ‘‘সুৰণ্ণৰণ্ণা হুত্ৰান, ভৰেসু সংসরামহং;

সব্বত্থ পৰরা হোমি, উপোসথস্সিদং ফলং.

১০. ‘‘হত্থিযানং অস্সযানং, রথযানঞ্চ সীৰিকং [কেৰলং (সী. স্যা. পী.)];

লভামি সব্বমেৰেতং, উপোসথস্সিদং ফলং.

১১. ‘‘সোণ্ণমযং রূপিমযং, অথোপি ফলিকামযং;

লোহিতঙ্গমযঞ্চেৰ, সব্বং পটিলভামহং.

১২. ‘‘কোসেয্যকম্বলিযানি, খোমকপ্পাসিকানি চ;

মহগ্ঘানি চ ৰত্থানি, সব্বং পটিলভামহং.

১৩. ‘‘অন্নং পানং খাদনীযং, ৰত্থসেনাসনানি চ;

সব্বমেতং পটিলভে, উপোসথস্সিদং ফলং.

১৪. ‘‘ৰরগন্ধঞ্চ মালঞ্চ, চুণ্ণকঞ্চ ৰিলেপনং;

সব্বমেতং পটিলভে, উপোসথস্সিদং ফলং.

১৫. ‘‘কূটাগারঞ্চ পাসাদং, মণ্ডপং হম্মিযং গুহং;

সব্বমেতং পটিলভে, উপোসথস্সিদং ফলং.

১৬. ‘‘জাতিযা সত্তৰস্সাহং, পব্বজিং অনগারিযং;

অড্ঢমাসে অসম্পত্তে, অরহত্তমপাপুণিং.

১৭. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰপরিক্খীণা, নত্থি দানি পুনব্ভৰো.

১৮. ‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, উপোসথস্সিদং ফলং.

১৯. ‘‘কিলেসা ঝাপিতা ময্হং…পে… ৰিহরামি অনাসৰা.

২০. ‘‘স্ৰাগতং ৰত মে আসি…পে… কতং বুদ্ধস্স সাসনং.

২১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং একূপোসথিকা ভিক্খুনী ইমা গাথাযো অভাসিত্থাতি.

একূপোসথিকাথেরিযাপদানং পঠমং.