৫. নল়মালিকাথেরীঅপদানং

৩৭. ‘‘চন্দভাগানদীতীরে, অহোসিং কিন্নরী তদা;

অদ্দসং ৰিরজং বুদ্ধং, সযম্ভুং অপরাজিতং.

৩৮. ‘‘পসন্নচিত্তা সুমনা, ৰেদজাতা কতঞ্জলী;

নল়মালং গহেত্ৰান, সযম্ভুং অভিপূজযিং.

৩৯. ‘‘তেন কম্মেন সুকতেন, চেতনাপণিধীহি চ;

জহিত্ৰা কিন্নরীদেহং, অগচ্ছিং তিদসং গতিং.

৪০. ‘‘ছত্তিংসদেৰরাজূনং, মহেসিত্তমকারযিং;

দসন্নং চক্কৰত্তীনং, মহেসিত্তমকারযিং;

সংৰেজেত্ৰান মে চিত্তং [ৰেদযিত্ৰান কুসলং (স্যা.), সংৰেদযিত্ৰা কুসলং (পী.)], পব্বজিং অনগারিযং.

৪১. ‘‘কিলেসা ঝাপিতা ময্হং, ভৰা সব্বে সমূহতা [ভৰা সংঘাতিতা মম (ক.)];

সব্বাসৰপরিক্খীণা, নত্থি দানি পুনব্ভৰো.

৪২. ‘‘চতুন্নৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফপূজাযিদং ফলং.

৪৩. ‘‘কিলেসা ঝাপিতা ময্হং…পে… ৰিহরামি অনাসৰা.

৪৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

৪৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং নল়মালিকা থেরী ইমা গাথাযো অভাসিত্থাতি.

নল়মালিকাথেরিযাপদানং পঞ্চমং.