২. মেখলাদাযিকাথেরীঅপদানং

২০. ‘‘সিদ্ধত্থস্স ভগৰতো, থূপকারাপিকা অহুং [থূপকার মকাসহং (স্যা.)];

মেখলিকা মযা দিন্না, নৰকম্মায সত্থুনো.

২১. ‘‘নিট্ঠিতে চ মহাথূপে, মেখলং পুনদাসহং;

লোকনাথস্স মুনিনো, পসন্না সেহি পাণিভি.

২২. ‘‘চতুন্নৰুতিতো কপ্পে, যং মেখলমদং তদা;

দুগ্গতিং নাভিজানামি, থূপকারস্সিদং ফলং.

২৩. ‘‘কিলেসা ঝাপিতা ময্হং…পে… ৰিহরামি অনাসৰা.

২৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং মেখলাদাযিকা ভিক্খুনী ইমা গাথাযো অভাসিত্থাতি.

মেখলাদাযিকাথেরিযাপদানং দুতিযং.