১০. উদকদাযিকাথেরীঅপদানং

১১৬. ‘‘নগরে বন্ধুমতিযা, অহোসিং উদহারিকা;

উদহারেন জীৰামি, তেন পোসেমি দারকে.

১১৭. ‘‘দেয্যধম্মো চ মে নত্থি, পুঞ্ঞক্খেত্তে অনুত্তরে;

কোট্ঠকং উপসঙ্কম্ম, উদকং পট্ঠপেসহং.

১১৮. ‘‘তেন কম্মেন সুকতেন, তাৰতিংসমগচ্ছহং;

তত্থ মে সুকতং ব্যম্হং, উদহারেন নিম্মিতং.

১১৯. ‘‘অচ্ছরানং সহস্সস্স, অহঞ্হি পৰরা তদা;

দসট্ঠানেহি তা সব্বা, অভিভোমি সদা অহং.

১২০. ‘‘পঞ্ঞাসং দেৰরাজূনং, মহেসিত্তমকারযিং;

ৰীসতিচক্কৰত্তীনং, মহেসিত্তমকারযিং.

১২১. ‘‘দুৰে ভৰে সংসরামি, দেৰত্তে অথ মানুসে;

দুগ্গতিং নাভিজানামি, দকদানস্সিদং ফলং.

১২২. ‘‘পব্বতগ্গে দুমগ্গে ৰা, অন্তলিক্খে চ ভূমিযং;

যদা উদকমিচ্ছামি, খিপ্পং পটিলভামহং.

১২৩. ‘‘অৰুট্ঠিকা দিসা নত্থি, সন্তত্তা কুথিতাপি [সন্তত্তা কুথিতা ন চ (সী. পী.), সন্তত্তা খুপ্পিতা হি মে (স্যা.)] চ;

মম সঙ্কপ্পমঞ্ঞায, মহামেঘো পৰস্সতি.

১২৪. ‘‘কদাচি নীযমানায, ঞাতিসঙ্ঘেন মে তদা;

যদা ইচ্ছামহং ৰস্সং, মহামেঘো অজাযথ.

১২৫. ‘‘উণ্হং ৰা পরিল়াহো ৰা, সরীরে মে ন ৰিজ্জতি;

কাযে চ মে রজো নত্থি, দকদানস্সিদং ফলং.

১২৬. ‘‘ৰিসুদ্ধমনসা অজ্জ, অপেতমনপাপিকা;

সব্বাসৰপরিক্খীণা, নত্থি দানি পুনব্ভৰো.

১২৭. ‘‘একনৰুতিতো কপ্পে, যং দকং অদদিং তদা;

দুগ্গতিং নাভিজানামি, দকদানস্সিদং ফলং.

১২৮. ‘‘কিলেসা ঝাপিতা ময্হং…পে… ৰিহরামি অনাসৰা.

১২৯. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং উদকদাযিকা ভিক্খুনী ইমা গাথাযো অভাসিত্থাতি.

উদকদাযিকাথেরিযাপদানং দসমং.

সুমেধাৰগ্গো পঠমো.