১. মহামোগ্গল্লানত্থেরগাথা

১১৪৯. ‘‘আরঞ্ঞিকা পিণ্ডপাতিকা, উঞ্ছাপত্তাগতে রতা;

দালেমু মচ্চুনো সেনং, অজ্ঝত্তং সুসমাহিতা.

১১৫০. ‘‘আরঞ্ঞিকা পিণ্ডপাতিকা, উঞ্ছাপত্তাগতে রতা;

ধুনাম মচ্চুনো সেনং, নল়াগারংৰ কুঞ্জরো.

১১৫১. ‘‘রুক্খমূলিকা সাততিকা, উঞ্ছাপত্তাগতে রতা;

দালেমু মচ্চুনো সেনং, অজ্ঝত্তং সুসমাহিতা.

১১৫২. ‘‘রুক্খমূলিকা সাততিকা, উঞ্ছাপত্তাগতে রতা;

ধুনাম মচ্চুনো সেনং, নল়াগারংৰ কুঞ্জরো.

১১৫৩. ‘‘অট্ঠিকঙ্কলকুটিকে, মংসন্হারুপসিব্বিতে;

ধিরত্থু পুরে দুগ্গন্ধে, পরগত্তে মমাযসে.

১১৫৪. ‘‘গূথভস্তে তচোনদ্ধে, উরগণ্ডিপিসাচিনি;

নৰ সোতানি তে কাযে, যানি সন্দন্তি সব্বদা.

১১৫৫. ‘‘তৰ সরীরং নৰসোতং, দুগ্গন্ধকরং পরিবন্ধং;

ভিক্খু পরিৰজ্জযতে তং, মীল়্হং চ যথা সুচিকামো.

১১৫৬. ‘‘এৰঞ্চে তং জনো জঞ্ঞা, যথা জানামি তং অহং;

আরকা পরিৰজ্জেয্য, গূথট্ঠানংৰ পাৰুসে’’.

১১৫৭. ‘‘এৰমেতং মহাৰীর, যথা সমণ ভাসসি;

এত্থ চেকে ৰিসীদন্তি, পঙ্কম্হিৰ জরগ্গৰো.

১১৫৮. ‘‘আকাসম্হি হলিদ্দিযা, যো মঞ্ঞেথ রজেতৰে;

অঞ্ঞেন ৰাপি রঙ্গেন, ৰিঘাতুদযমেৰ তং.

১১৫৯. ‘‘তদাকাসসমং চিত্তং, অজ্ঝত্তং সুসমাহিতং;

মা পাপচিত্তে আসাদি, অগ্গিখন্ধংৰ পক্খিমা.

১১৬০. ‘‘পস্স চিত্তকতং বিম্বং, অরুকাযং সমুস্সিতং;

আতুরং বহুসঙ্কপ্পং, যস্স নত্থি ধুৰং ঠিতি.

১১৬১. ‘‘পস্স চিত্তকতং রূপং, মণিনা কুণ্ডলেন চ;

অট্ঠিং তচেন ওনদ্ধং, সহ ৰত্থেহি সোভতি.

১১৬২. ‘‘অলত্তককতা পাদা, মুখং চুণ্ণকমক্খিতং;

অলং বালস্স মোহায, নো চ পারগৰেসিনো.

১১৬৩. ‘‘অট্ঠপদকতা কেসা, নেত্তা অঞ্জনমক্খিতা;

অলং বালস্স মোহায, নো চ পারগৰেসিনো.

১১৬৪. ‘‘অঞ্জনীৰ নৰা চিত্তা, পূতিকাযো অলঙ্কতো;

অলং বালস্স মোহায, নো চ পারগৰেসিনো.

১১৬৫. ‘‘ওদহি মিগৰো পাসং, নাসদা ৰাগুরং মিগো;

ভুত্ৰা নিৰাপং গচ্ছাম, কদ্দন্তে মিগবন্ধকে.

১১৬৬. ‘‘ছিন্নো পাসো মিগৰস্স, নাসদা ৰাগুরং মিগো;

ভুত্ৰা নিৰাপং গচ্ছাম, সোচন্তে মিগলুদ্দকে.

১১৬৭. ‘‘তদাসি যং ভিংসনকং, তদাসি লোমহংসনং;

অনেকাকারসম্পন্নে, সারিপুত্তম্হি নিব্বুতে.

১১৬৮. [দী. নি. ২.২২১, ২৭২; সং. নি. ১.১৮৬; ২.১৪৩; অপ. থের ১.২.১১৫; জা. ১.১.৯৫] ‘‘অনিচ্চা ৰত সঙ্খারা উপ্পাদৰয ধম্মিনো.

উপজ্জিত্ৰা নিরুজ্ঝন্তি, তেসং ৰূপসমো সুখো.

১১৬৯. ‘‘সুখুমং তে পটিৰিজ্ঝন্তি, ৰালগ্গং উসুনা যথা;

যে পঞ্চক্খন্ধে পস্সন্তি, পরতো নো চ অত্ততো.

১১৭০. ‘‘যে চ পস্সন্তি সঙ্খারে, পরতো নো চ অত্ততো;

পচ্চব্যাধিংসু নিপুণং, ৰালগ্গং উসুনা যথা.

১১৭১. [সং. নি. ১.২১, ৯৭] ‘‘সত্তিযা ৰিয ওমট্ঠো, ডয্হমানোৰ মত্থকে;

কামরাগপ্পহানায, সতো ভিক্খু পরিব্বজে.

১১৭২. [সং. নি. ১.২১, ৯৭]‘‘সত্তিযা ৰিয ওমট্ঠো, ডয্হমানোৰ মত্থকে;

ভৰরাগপ্পহানায, সতো ভিক্খু পরিব্বজে’’.

১১৭৩. ‘‘চোদিতো ভাৰিতত্তেন, সরীরন্তিমধারিনা;

মিগারমাতুপাসাদং, পাদঙ্গুট্ঠেন কম্পযিং.

১১৭৪. ‘‘নযিদং সিথিলমারব্ভ, নযিদং অপ্পেন থামসা;

নিব্বানমধিগন্তব্বং, সব্বগন্থ-পমোচনং.

১১৭৫. ‘‘অযঞ্চ দহরো ভিক্খু, অযমুত্তমপোরিসো;

ধারেতি অন্তিমং দেহং, জেত্ৰা মারং সৰাহিনিং [সৰাহনং (ক.)].

১১৭৬. ‘‘ৰিৰরমনুপভন্তি ৰিজ্জুতা, ৰেভারস্স চ পণ্ডৰস্স চ;

নগৰিৰরগতো ঝাযতি, পুত্তো অপ্পটিমস্স তাদিনো.

১১৭৭. ‘‘উপসন্তো উপরতো, পন্তসেনাসনো মুনি;

দাযাদো বুদ্ধসেট্ঠস্স, ব্রহ্মুনা অভিৰন্দিতো.

১১৭৮. ‘‘উপসন্তং উপরতং, পন্তসেনাসনং মুনিং;

দাযাদং বুদ্ধসেট্ঠস্স, ৰন্দ ব্রাহ্মণ কস্সপং.

১১৭৯. ‘‘যো চ জাতিসতং গচ্ছে, সব্বা ব্রাহ্মণজাতিযো;

সোত্তিযো ৰেদসম্পন্নো, মনুস্সেসু পুনপ্পুনং.

১১৮০. ‘‘অজ্ঝাযকোপি চে অস্স, তিণ্ণং ৰেদান পারগূ;

এতস্স ৰন্দনাযেতং, কলং নাগ্ঘতি সোল়সিং.

১১৮১. ‘‘যো সো অট্ঠ ৰিমোক্খানি, পুরেভত্তং অফস্সযি [অপস্সযি (সী. ক.), অফুস্সযি (স্যা.)];

অনুলোমং পটিলোমং, ততো পিণ্ডায গচ্ছতি.

১১৮২. ‘‘তাদিসং ভিক্খুং মাসাদি [মা হনি (সী.)], মাত্তানং খণি ব্রাহ্মণ;

অভিপ্পসাদেহি মনং, অরহন্তম্হি তাদিনে;

খিপ্পং পঞ্জলিকো ৰন্দ, মা তে ৰিজটি মত্থকং.

১১৮৩. ‘‘নেসো পস্সতি সদ্ধম্মং, সংসারেন পুরক্খতো;

অধোগমং জিম্হপথং, কুম্মগ্গমনুধাৰতি.

১১৮৪. ‘‘কিমীৰ মীল়্হসল্লিত্তো, সঙ্খারে অধিমুচ্ছিতো;

পগাল়্হো লাভসক্কারে, তুচ্ছো গচ্ছতি পোট্ঠিলো.

১১৮৫. ‘‘ইমঞ্চ পস্স আযন্তং, সারিপুত্তং সুদস্সনং;

ৰিমুত্তং উভতোভাগে, অজ্ঝত্তং সুসমাহিতং.

১১৮৬. ‘‘ৰিসল্লং খীণসংযোগং, তেৰিজ্জং মচ্চুহাযিনং;

দক্খিণেয্যং মনুস্সানং, পুঞ্ঞক্খেত্তং অনুত্তরং.

১১৮৭. ‘‘এতে সম্বহুলা দেৰা, ইদ্ধিমন্তো যসস্সিনো;

দস দেৰসহস্সানি, সব্বে ব্রহ্মপুরোহিতা;

মোগ্গল্লানং নমস্সন্তা, তিট্ঠন্তি পঞ্জলীকতা.

১১৮৮. ‘‘‘নমো তে পুরিসাজঞ্ঞ, নমো তে পুরিসুত্তম;

যস্স তে আসৰা খীণা, দক্খিণেয্যোসি মারিস’.

১১৮৯. ‘‘পূজিতো নরদেৰেন, উপ্পন্নো মরণাভিভূ;

পুণ্ডরীকংৰ তোযেন, সঙ্খারেনুপলিপ্পতি.

১১৯০. ‘‘যস্স মুহুত্তেন সহস্সধা লোকো, সংৰিদিতো সব্রহ্মকপ্পো ৰসি;

ইদ্ধিগুণে চুতুপপাতে কালে, পস্সতি দেৰতা স ভিক্খু.

১১৯১. ‘‘সারিপুত্তোৰ পঞ্ঞায, সীলেন উপসমেন চ;

যোপি পারঙ্গতো ভিক্খু, এতাৰপরমো সিযা.

১১৯২. ‘‘কোটিসতসহস্সস্স, অত্তভাৰং খণেন নিম্মিনে;

অহং ৰিকুব্বনাসু কুসলো, ৰসীভূতোম্হি ইদ্ধিযা.

১১৯৩. ‘‘সমাধিৰিজ্জাৰসিপারমীগতো, মোগ্গল্লানগোত্তো অসিতস্স সাসনে;

ধীরো সমুচ্ছিন্দি সমাহিতিন্দ্রিযো, নাগো যথা পূতিলতংৰ বন্ধনং.

১১৯৪. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

১১৯৫. ‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

১১৯৬. [ম. নি. ১.৫১৩] ‘‘কীদিসো নিরযো আসি, যত্থ দুস্সী অপচ্চথ;

ৰিধুরং সাৰকমাসজ্জ, ককুসন্ধঞ্চ ব্রাহ্মণং.

১১৯৭. ‘‘সতং আসি অযোসঙ্কূ, সব্বে পচ্চত্তৰেদনা;

ঈদিসো নিরযো আসি, যত্থ দুস্সী অপচ্চথ;

ৰিধুরং সাৰকমাসজ্জ, ককুসন্ধঞ্চ ব্রাহ্মণং.

১১৯৮. ‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

১১৯৯. ‘‘মজ্ঝেসরস্মিং [সরস্স (সী.), সাগরস্মিং (ক.)] তিট্ঠন্তি, ৰিমানা কপ্পঠাযিনো;

ৰেল়ুরিযৰণ্ণা রুচিরা, অচ্চিমন্তো পভস্সরা;

অচ্ছরা তত্থ নচ্চন্তি, পুথু নানত্তৰণ্ণিযো.

১২০০. ‘‘যো এতমভিজানাতি…পে… কণ্হ দুক্খং নিগচ্ছসি.

১২০১. ‘‘যো ৰে বুদ্ধেন চোদিতো, ভিক্খুসঙ্ঘস্স পেক্খতো;

মিগারমাতুপাসাদং, পাদঙ্গুট্ঠেন কম্পযি.

১২০২. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৩. ‘‘যো ৰেজযন্তপাসাদং, পাদঙ্গুট্ঠেন কম্পযি;

ইদ্ধিবলেনুপত্থদ্ধো, সংৰেজেসি চ দেৰতা.

১২০৪. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৪. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৫. ‘‘যো ৰেজযন্তপাসাদে, সক্কং সো পরিপুচ্ছতি;

অপি আৰুসো জানাসি, তণ্হক্খযৰিমুত্তিযো;

তস্স সক্কো ৰিযাকাসি, পঞ্হং পুট্ঠো যথাতথং.

১২০৬. ‘‘যো এতমভিজানাতি…পে… কণ্হ দুক্খং নিগচ্ছসি.

১২০৭. ‘‘যো ব্রহ্মানং পরিপুচ্ছতি, সুধম্মাযং ঠিতো [সুধম্মাযা’ভিতো (স্যা.)] সভং;

অজ্জাপি ত্যাৰুসো সা দিট্ঠি, যা তে দিট্ঠি পুরে অহু;

পস্সসি ৰীতিৰত্তন্তং, ব্রহ্মলোকে পভস্সরং.

১২০৮. ‘‘তস্স ব্রহ্মা ৰিযাকাসি, পঞ্হং পুট্ঠো যথাতথং;

ন মে মারিস সা দিট্ঠি, যা মে দিট্ঠি পুরে অহু.

১২০৯. ‘‘পস্সামি ৰীতিৰত্তন্তং, ব্রহ্মলোকে পভস্সরং;

সোহং অজ্জ কথং ৰজ্জং, অহং নিচ্চোম্হি সস্সতো.

১২১০. ‘‘যো এতমভিজানাতি…পে… কণ্হ দুক্খং নিগচ্ছসি.

১২১১. ‘‘যো মহানেরুনো কূটং, ৰিমোক্খেন অফস্সযি [অপস্সযি (সী. ক.)];

ৰনং পুব্বৰিদেহানং, যে চ ভূমিসযা নরা.

১২১২. ‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

১২১৩. ‘‘ন ৰে অগ্গি চেতযতি, অহং বালং ডহামীতি;

বালোৰ জলিতং অগ্গিং, আসজ্জ নং পডয্হতি.

১২১৪. ‘‘এৰমেৰ তুৰং মার, আসজ্জ নং তথাগতং;

সযং ডহিস্সসি অত্তানং, বালো অগ্গিংৰ সম্ফুসং.

১২১৫. ‘‘অপুঞ্ঞং পসৰী মারো, আসজ্জ নং তথাগতং;

কিং নু মঞ্ঞসি পাপিম, ন মে পাপং ৰিপচ্চতি.

১২১৬. ‘‘করতো তে চীযতে [মিয্যতে (সব্বত্থ) ম. নি. ১.৫১৩ পস্সিতব্বং] পাপং, চিররত্তায অন্তক;

মার নিব্বিন্দ বুদ্ধম্হা, আসং মাকাসি ভিক্খুসু.

১২১৭. ‘‘ইতি মারং অতজ্জেসি, ভিক্খু ভেসকল়াৰনে;

ততো সো দুম্মনো যক্খো, তত্থেৰন্তরধাযথা’’তি.

ইত্থং সুদং আযস্মা মহামোগ্গল্লানো [মহামোগ্গলানো (ক.)] থেরো গাথাযো অভাসিত্থাতি.

সট্ঠিনিপাতো নিট্ঠিতো.