৪. চতুত্থৰগ্গো

১. মিগসিরত্থেরগাথা

১৮১. ‘‘যতো অহং পব্বজিতো, সম্মাসম্বুদ্ধসাসনে;

ৰিমুচ্চমানো উগ্গচ্ছিং, কামধাতুং উপচ্চগং.

১৮২. ‘‘ব্রহ্মুনো পেক্খমানস্স, ততো চিত্তং ৰিমুচ্চি মে;

অকুপ্পা মে ৰিমুত্তীতি, সব্বসংযোজনক্খযা’’তি.

… মিগসিরো থেরো….

২. সিৰকত্থেরগাথা

১৮৩. ‘‘অনিচ্চানি গহকানি, তত্থ তত্থ পুনপ্পুনং;

গহকারং [গহকারকং (সী. পী.)] গৰেসন্তো, দুক্খা জাতি পুনপ্পুনং.

১৮৪. ‘‘গহকারক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, থূণিকা [থূণিরা (পী. ক.), ধুণিরা (স্যা.)] চ ৰিদালিতা [পদালিতা (সী. স্যা.)];

ৰিমরিযাদিকতং চিত্তং, ইধেৰ ৰিধমিস্সতী’’তি.

… সিৰকো [সীৰকো (সী.)] থেরো….

৩. উপৰাণত্থেরগাথা

১৮৫. ‘‘অরহং সুগতো লোকে, ৰাতেহাবাধিতো [… বাধিতো (ক.)] মুনি;

সচে উণ্হোদকং অত্থি, মুনিনো দেহি ব্রাহ্মণ.

১৮৬. ‘‘পূজিতো পূজনেয্যানং [পূজনীযানং (সী.)], সক্করেয্যান সক্কতো;

অপচিতোপচেয্যানং [অপচনীযানং (সী.), অপচিনেয্যানং (স্যা.)], তস্স ইচ্ছামি হাতৰে’’তি.

… উপৰাণো থেরো….

৪. ইসিদিন্নত্থেরগাথা

১৮৭. ‘‘দিট্ঠা মযা ধম্মধরা উপাসকা, কামা অনিচ্চা ইতি ভাসমানা;

সারত্তরত্তা মণিকুণ্ডলেসু, পুত্তেসু দারেসু চ তে অপেক্খা.

১৮৮. ‘‘অদ্ধা ন জানন্তি যতোধ ধম্মং, কামা অনিচ্চা ইতি চাপি আহু;

রাগঞ্চ তেসং ন বলত্থি ছেত্তুং, তস্মা সিতা পুত্তদারং ধনঞ্চা’’তি.

… ইসিদিন্নো থেরো….

৫. সম্বুলকচ্চানত্থেরগাথা

১৮৯. ‘‘দেৰো চ ৰস্সতি দেৰো চ গল়গল়াযতি,

এককো চাহং ভেরৰে বিলে ৰিহরামি;

তস্স ময্হং এককস্স ভেরৰে বিলে ৰিহরতো,

নত্থি ভযং ৰা ছম্ভিতত্তং ৰা লোমহংসো ৰা.

১৯০. ‘‘ধম্মতা মমসা যস্স মে, এককস্স ভেরৰে বিলে;

ৰিহরতো নত্থি ভযং ৰা, ছম্ভিতত্তং ৰা লোমহংসো ৰা’’তি.

… সম্বুলকচ্চানো [সম্বহুলকচ্চানো (ক.)] থেরো….

৬. নিতকত্থেরগাথা

১৯১. [উদা. ৩৪ উদানেপি] ‘‘কস্স সেলূপমং চিত্তং, ঠিতং নানুপকম্পতি;

ৰিরত্তং রজনীযেসু, কুপ্পনীযে ন কুপ্পতি;

যস্সেৰং ভাৰিতং চিত্তং, কুতো তং দুক্খমেস্সতি.

১৯২. ‘‘মম সেলূপমং চিত্তং, ঠিতং নানুপকম্পতি;

ৰিরত্তং রজনীযেসু, কুপ্পনীযে ন কুপ্পতি;

মমেৰং ভাৰিতং চিত্তং, কুতো মং দুক্খমেস্সতী’’তি.

… নিতকো [খিতকো (সী. স্যা.)] থেরো….

৭. সোণপোটিরিযত্থেরগাথা

১৯৩. ‘‘ন তাৰ সুপিতুং হোতি, রত্তি নক্খত্তমালিনী;

পটিজগ্গিতুমেৰেসা, রত্তি হোতি ৰিজানতা.

১৯৪. ‘‘হত্থিক্খন্ধাৰপতিতং, কুঞ্জরো চে অনুক্কমে;

সঙ্গামে মে মতং সেয্যো, যঞ্চে জীৰে পরাজিতো’’তি.

… সোণো পোটিরিযো [সেলিস্সরিযো (সী.), পোট্টিরিযপুত্তো (স্যা.)] থেরো ….

৮. নিসভত্থেরগাথা

১৯৫. ‘‘পঞ্চ কামগুণে হিত্ৰা, পিযরূপে মনোরমে;

সদ্ধায ঘরা নিক্খম্ম, দুক্খস্সন্তকরো ভৰে.

১৯৬. ‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, সম্পজানো পতিস্সতো’’তি.

… নিসভো থেরো….

৯. উসভত্থেরগাথা

১৯৭. ‘‘অম্বপল্লৰসঙ্কাসং, অংসে কত্ৰান চীৰরং;

নিসিন্নো হত্থিগীৰাযং, গামং পিণ্ডায পাৰিসিং.

১৯৮. ‘‘হত্থিক্খন্ধতো ওরুয্হ, সংৰেগং অলভিং তদা;

সোহং দিত্তো তদা সন্তো, পত্তো মে আসৰক্খযো’’তি.

… উসভো থেরো….

১০. কপ্পটকুরত্থেরগাথা

১৯৯. ‘‘অযমিতি কপ্পটো কপ্পটকুরো, অচ্ছায অতিভরিতায [অতিভরিযায (সী. ক.), অচ্চং ভরায (স্যা.)];

অমতঘটিকাযং ধম্মকটমত্তো [ধম্মকটপত্তো (স্যা. ক. অট্ঠ.), ধম্মকটমগ্গো (সী. অট্ঠ.)], কতপদং ঝানানি ওচেতুং.

২০০. ‘‘মা খো ত্ৰং কপ্পট পচালেসি, মা ত্ৰং উপকণ্ণম্হি তাল়েস্সং;

ন হি [ন ৰা (ক.)] ত্ৰং কপ্পট মত্তমঞ্ঞাসি, সঙ্ঘমজ্ঝম্হি পচলাযমানোতি.

… কপ্পটকুরো থেরো….

ৰগ্গো চতুত্থো নিট্ঠিতো.

তস্সুদ্দানং –

মিগসিরো সিৰকো চ, উপৰানো চ পণ্ডিতো;

ইসিদিন্নো চ কচ্চানো, নিতকো চ মহাৰসী;

পোটিরিযপুত্তো নিসভো, উসভো কপ্পটকুরোতি.