৬. উপসীৰমাণৰপুচ্ছা

১০৭৫. ‘‘একো অহং সক্ক মহন্তমোঘং, (ইচ্চাযস্মা উপসীৰো)

অনিস্সিতো নো ৰিসহামি তারিতুং;

আরম্মণং ব্রূহি সমন্তচক্খু, যং নিস্সিতো ওঘমিমং তরেয্যং’’.

১০৭৬. ‘‘আকিঞ্চঞ্ঞং পেক্খমানো সতিমা, (উপসীৰাতি ভগৰা)

নত্থীতি নিস্সায তরস্সু ওঘং;

কামে পহায ৰিরতো কথাহি, তণ্হক্খযং নত্তমহাভিপস্স’’ [রত্তমহাভিপস্স (স্যা.), রত্তমহং ৰিপস্স (ক.)].

১০৭৭. ‘‘সব্বেসু কামেসু যো ৰীতরাগো, (ইচ্চাযস্মা উপসীৰো)

আকিঞ্চঞ্ঞং নিস্সিতো হিত্ৰা মঞ্ঞং;

সঞ্ঞাৰিমোক্খে পরমে ৰিমুত্তো [ধিমুত্তো (ক.)], তিট্ঠে নু সো তত্থ অনানুযাযী’’ [অনানুৰাযী (স্যা. ক.)].

১০৭৮. ‘‘সব্বেসু কামেসু যো ৰীতরাগো, (উপসীৰাতি ভগৰা)

আকিঞ্চঞ্ঞং নিস্সিতো হিত্ৰা মঞ্ঞং;

সঞ্ঞাৰিমোক্খে পরমে ৰিমুত্তো, তিট্ঠেয্য সো তত্থ অনানুযাযী’’.

১০৭৯. ‘‘তিট্ঠে চে সো তত্থ অনানুযাযী, পূগম্পি ৰস্সানং সমন্তচক্খু;

তত্থেৰ সো সীতিসিযা ৰিমুত্তো, চৰেথ ৰিঞ্ঞাণং তথাৰিধস্স’’.

১০৮০. ‘‘অচ্চী যথা ৰাতৰেগেন খিত্তা [খিত্তং (স্যা.), খিত্তো (পী.)], (উপসীৰাতি ভগৰা)

অত্থং পলেতি ন উপেতি সঙ্খং;

এৰং মুনী নামকাযা ৰিমুত্তো, অত্থং পলেতি ন উপেতি সঙ্খং’’.

১০৮১. ‘‘অত্থঙ্গতো সো উদ ৰা সো নত্থি, উদাহু ৰে সস্সতিযা অরোগো;

তং মে মুনী সাধু ৰিযাকরোহি, তথা হি তে ৰিদিতো এস ধম্মো’’.

১০৮২. ‘‘অত্থঙ্গতস্স ন পমাণমত্থি, (উপসীৰাতি ভগৰা)

যেন নং ৰজ্জুং তং তস্স নত্থি;

সব্বেসু ধম্মেসু সমূহতেসু, সমূহতা ৰাদপথাপি সব্বে’’তি.

উপসীৰমাণৰপুচ্ছা ছট্ঠী নিট্ঠিতা.