৪. মেত্তগূমাণৰপুচ্ছা

১০৫৫. ‘‘পুচ্ছামি তং ভগৰা ব্রূহি মে তং, (ইচ্চাযস্মা মেত্তগূ)

মঞ্ঞামি তং ৰেদগুং ভাৰিতত্তং;

কুতো নু দুক্খা সমুদাগতা ইমে, যে কেচি লোকস্মিমনেকরূপা’’.

১০৫৬. ‘‘দুক্খস্স ৰে মং পভৰং অপুচ্ছসি, (মেত্তগূতি ভগৰা)

তং তে পৰক্খামি যথা পজানং;

উপধিনিদানা পভৰন্তি দুক্খা, যে কেচি লোকস্মিমনেকরূপা.

১০৫৭. ‘‘যো ৰে অৰিদ্ৰা উপধিং করোতি, পুনপ্পুনং দুক্খমুপেতি মন্দো;

তস্মা পজানং উপধিং ন কযিরা, দুক্খস্স জাতিপ্পভৰানুপস্সী’’.

১০৫৮. ‘‘যং তং অপুচ্ছিম্হ অকিত্তযী নো, অঞ্ঞং তং পুচ্ছাম [পুচ্ছামি (সী. পী.)] তদিঙ্ঘ ব্রূহি;

কথং নু ধীরা ৰিতরন্তি ওঘং, জাতিং জরং সোকপরিদ্দৰঞ্চ;

তং মে মুনি সাধু ৰিযাকরোহি, তথা হি তে ৰিদিতো এস ধম্মো’’.

১০৫৯. ‘‘কিত্তযিস্সামি তে ধম্মং, (মেত্তগূতি ভগৰা)

দিট্ঠে ধম্মে অনীতিহং;

যং ৰিদিত্ৰা সতো চরং, তরে লোকে ৰিসত্তিকং’’.

১০৬০. ‘‘তঞ্চাহং অভিনন্দামি, মহেসি ধম্মমুত্তমং;

যং ৰিদিত্ৰা সতো চরং, তরে লোকে ৰিসত্তিকং’’.

১০৬১. ‘‘যং কিঞ্চি সম্পজানাসি, (মেত্তগূতি ভগৰা)

উদ্ধং অধো তিরিযঞ্চাপি মজ্ঝে;

এতেসু নন্দিঞ্চ নিৰেসনঞ্চ, পনুজ্জ ৰিঞ্ঞাণং ভৰে ন তিট্ঠে.

১০৬২. ‘‘এৰংৰিহারী সতো অপ্পমত্তো, ভিক্খু চরং হিত্ৰা মমাযিতানি;

জাতিং জরং সোকপরিদ্দৰঞ্চ, ইধেৰ ৰিদ্ৰা পজহেয্য দুক্খং’’.

১০৬৩. ‘‘এতাভিনন্দামি ৰচো মহেসিনো, সুকিত্তিতং গোতমনূপধীকং;

অদ্ধা হি ভগৰা পহাসি দুক্খং, তথা হি তে ৰিদিতো এস ধম্মো.

১০৬৪. ‘‘তে চাপি নূনপ্পজহেয্যু দুক্খং, যে ত্ৰং মুনি অট্ঠিতং ওৰদেয্য;

তং তং নমস্সামি সমেচ্চ নাগ, অপ্পেৰ মং ভগৰা অট্ঠিতং ওৰদেয্য’’.

১০৬৫. ‘‘যং ব্রাহ্মণং ৰেদগুমাভিজঞ্ঞা, অকিঞ্চনং কামভৰে অসত্তং;

অদ্ধা হি সো ওঘমিমং অতারি, তিণ্ণো চ পারং অখিলো অকঙ্খো.

১০৬৬. ‘‘ৰিদ্ৰা চ যো [সো (সী. স্যা. পী.)] ৰেদগূ নরো ইধ, ভৰাভৰে সঙ্গমিমং ৰিসজ্জ;

সো ৰীততণ্হো অনীঘো নিরাসো, অতারি সো জাতিজরন্তি ব্রূমী’’তি.

মেত্তগূমাণৰপুচ্ছা চতুত্থী নিট্ঠিতা.