৯. কূটৰিনিচ্ছযিকপেতৰত্থু

৪৯৯. ‘‘মালী কিরিটী কাযূরী [কেযূরী (সী.)], গত্তা তে চন্দনুস্সদা;

পসন্নমুখৰণ্ণোসি, সূরিযৰণ্ণোৰ সোভসি.

৫০০. ‘‘অমানুসা পারিসজ্জা, যে তেমে পরিচারকা;

দস কঞ্ঞাসহস্সানি, যা তেমা পরিচারিকা;

তা [কা (ক.)] কম্বুকাযূরধরা, কঞ্চনাৰেল়ভূসিতা.

৫০১. ‘‘মহানুভাৰোসি তুৰং, লোমহংসনরূপৰা;

পিট্ঠিমংসানি অত্তনো, সামং উক্কচ্চ [উক্কড্ঢ (সী.)] খাদসি.

৫০২. ‘‘কিং নু কাযেন ৰাচায, মনসা দুক্কুটং কতং;

কিস্স কম্মৰিপাকেন, পিট্ঠিমংসানি অত্তনো;

সামং উক্কচ্চ খাদসী’’তি.

৫০৩. ‘‘অত্তনোহং অনত্থায, জীৰলোকে অচারিসং;

পেসুঞ্ঞমুসাৰাদেন, নিকতিৰঞ্চনায চ.

৫০৪. ‘‘তত্থাহং পরিসং গন্ত্ৰা, সচ্চকালে উপট্ঠিতে;

অত্থং ধম্মং নিরাকত্ৰা [নিরংকত্ৰা (ক.) নি + আ + কর + ত্ৰা = নিরাকত্ৰা], অধম্মমনুৰত্তিসং.

৫০৫. ‘‘এৰং সো খাদতত্তানং, যো হোতি পিট্ঠিমংসিকো;

যথাহং অজ্জ খাদামি, পিট্ঠিমংসানি অত্তনো.

৫০৬. ‘‘তযিদং তযা নারদ সামং দিট্ঠং, অনুকম্পকা যে কুসলা ৰদেয্যুং;

মা পেসুণং মা চ মুসা অভাণি, মা খোসি পিট্ঠিমংসিকো তুৰ’’ন্তি.

কূটৰিনিচ্ছযিকপেতৰত্থু নৰমং.