৭. মিগলুদ্দকপেতৰত্থু

৪৭৮. ‘‘নরনারিপুরক্খতো যুৰা, রজনীযেহি কামগুণেহি [কামেহি (ক.)] সোভসি;

দিৰসং অনুভোসি কারণং, কিমকাসি পুরিমায জাতিযা’’তি.

৪৭৯. ‘‘অহং রাজগহে রম্মে, রমণীযে গিরিব্বজে;

মিগলুদ্দো পুরে আসিং, লোহিতপাণি দারুণো.

৪৮০. ‘‘অৰিরোধকরেসু পাণিসু, পুথুসত্তেসু পদুট্ঠমানসো;

ৰিচরিং অতিদারুণো সদা [তদা (সী.)], পরহিংসায রতো অসঞ্ঞতো.

৪৮১. ‘‘তস্স মে সহাযো সুহদযো [সুহদো (সী.)], সদ্ধো আসি উপাসকো;

সোপি [সো হি (স্যা.)] মং অনুকম্পন্তো, নিৰারেসি পুনপ্পুনং.

৪৮২. ‘‘‘মাকাসি পাপকং কম্মং, মা তাত দুগ্গতিং অগা;

সচে ইচ্ছসি পেচ্চ সুখং, ৰিরম পাণৰধা অসংযমা’.

৪৮৩. ‘‘তস্সাহং ৰচনং সুত্ৰা, সুখকামস্স হিতানুকম্পিনো;

নাকাসিং সকলানুসাসনিং, চিরপাপাভিরতো অবুদ্ধিমা.

৪৮৪. ‘‘সো মং পুন ভূরিসুমেধসো, অনুকম্পায সংযমে নিৰেসযি;

‘সচে দিৰা হনসি পাণিনো, অথ তে রত্তিং ভৰতু সংযমো’.

৪৮৫. ‘‘স্ৰাহং দিৰা হনিত্ৰা পাণিনো, ৰিরতো রত্তিমহোসি সঞ্ঞতো;

রত্তাহং পরিচারেমি, দিৰা খজ্জামি দুগ্গতো.

৪৮৬. ‘‘তস্স কম্মস্স কুসলস্স, অনুভোমি রত্তিং অমানুসিং;

দিৰা পটিহতাৰ [পটিহতা চ (ক.)] কুক্কুরা, উপধাৰন্তি সমন্তা খাদিতুং.

৪৮৭. ‘‘যে চ তে সততানুযোগিনো, ধুৰং পযুত্তা সুগতস্স সাসনে;

মঞ্ঞামি তে অমতমেৰ কেৰলং, অধিগচ্ছন্তি পদং অসঙ্খত’’ন্তি.

মিগলুদ্দকপেতৰত্থু সত্তমং.