২. সচ্চকথা

৮. পুরিমনিদানং. ‘‘চত্তারিমানি, ভিক্খৰে [সং. নি. ৫.১০৯০], তথানি অৰিতথানি অনঞ্ঞথানি. কতমানি চত্তারি? ‘ইদং দুক্খ’ন্তি, ভিক্খৰে, তথমেতং অৰিতথমেতং অনঞ্ঞথমেতং; ‘অযং দুক্খসমুদযো’তি তথমেতং অৰিতথমেতং অনঞ্ঞথমেতং, ‘অযং দুক্খনিরোধো’তি তথমেতং অৰিতথমেতং অনঞ্ঞথমেতং, ‘অযং দুক্খনিরোধগামিনী পটিপদা’তি তথমেতং অৰিতথমেতং অনঞ্ঞথমেতং. ইমানি খো, ভিক্খৰে, চত্তারি তথানি অৰিতথানি অনঞ্ঞথানি’’.

১. পঠমসুত্তন্তনিদ্দেসো

কথং দুক্খং তথট্ঠেন সচ্চং? চত্তারো দুক্খস্স দুক্খট্ঠা তথা অৰিতথা অনঞ্ঞথা. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো – ইমে চত্তারো দুক্খস্স দুক্খট্ঠা তথা অৰিতথা অনঞ্ঞথা. এৰং দুক্খং তথট্ঠেন সচ্চং.

কথং সমুদযো তথট্ঠেন সচ্চং? চত্তারো সমুদযস্স সমুদযট্ঠা তথা অৰিতথা অনঞ্ঞথা. সমুদযস্স আযূহনট্ঠো, নিদানট্ঠো, সংযোগট্ঠো পলিবোধট্ঠো – ইমে চত্তারো সমুদযস্স সমুদযট্ঠা তথা অৰিতথা অনঞ্ঞথা. এৰং সমুদযো তথট্ঠেন সচ্চং.

কথং নিরোধো তথট্ঠেন সচ্চং? চত্তারো নিরোধস্স নিরোধট্ঠা তথা অৰিতথা অনঞ্ঞথা. নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো – ইমে চত্তারো নিরোধস্স নিরোধট্ঠা তথা অৰিতথা অনঞ্ঞথা. এৰং নিরোধো তথট্ঠেন সচ্চং.

কথং মগ্গো তথট্ঠেন সচ্চং? চত্তারো মগ্গস্স মগ্গট্ঠা তথা অৰিতথা অনঞ্ঞথা. মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো – ইমে চত্তারো মগ্গস্স মগ্গট্ঠা তথা অৰিতথা অনঞ্ঞথা. এৰং মগ্গো তথট্ঠেন সচ্চং.

৯. কতিহাকারেহি চত্তারি সচ্চানি একপ্পটিৰেধানি? চতূহাকারেহি চত্তারি সচ্চানি একপ্পটিৰেধানি. তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন – ইমেহি চতূহাকারেহি চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং তথট্ঠেন চত্তারি সচ্চানি একপ্পটিৰেধানি? চতূহাকারেহি তথট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো তথট্ঠো, সমুদযস্স সমুদযট্ঠো তথট্ঠো, নিরোধস্স নিরোধট্ঠো তথট্ঠো, মগ্গস্স মগ্গট্ঠো তথট্ঠো – ইমেহি চতূহাকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং অনত্তট্ঠেন চত্তারি সচ্চানি একপ্পটিৰেধানি? চতূহাকারেহি অনত্তট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো অনত্তট্ঠো, সমুদযস্স সমুদযট্ঠো অনত্তট্ঠো, নিরোধস্স নিরোধট্ঠো অনত্তট্ঠো, মগ্গস্স মগ্গট্ঠো অনত্তট্ঠো – ইমেহি চতূহাকারেহি অনত্তট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং সচ্চট্ঠেন চত্তারি সচ্চানি একপ্পটিৰেধানি? চতূহাকারেহি সচ্চট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো সচ্চট্ঠো, সমুদযস্স সমুদযট্ঠো সচ্চট্ঠো, নিরোধস্স নিরোধট্ঠো সচ্চট্ঠো, মগ্গস্স মগ্গট্ঠো সচ্চট্ঠো – ইমেহি চতূহাকারেহি সচ্চট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং পটিৰেধট্ঠেন চত্তারি সচ্চানি একপ্পটিৰেধানি? চতূহাকারেহি পটিৰেধট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো পটিৰেধট্ঠো, সমুদযস্স সমুদযট্ঠো পটিৰেধট্ঠো নিরোধস্স নিরোধট্ঠো পটিৰেধট্ঠো, মগ্গস্স মগ্গট্ঠো পটিৰেধট্ঠো – ইমেহি চতূহাকারেহি পটিৰেধট্ঠেন চত্তারি সচ্চানি একসঙ্গহিতানি যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

১০. কতিহাকারেহি চত্তারি সচ্চানি একপ্পটিৰেধানি? যং অনিচ্চং তং দুক্খং, যং দুক্খং তং অনিচ্চং, যং অনিচ্চঞ্চ দুক্খঞ্চ তং অনত্তা. যং অনিচ্চঞ্চ দুক্খঞ্চ অনত্তা চ তং তথং. যং অনিচ্চং চ দুক্খঞ্চ অনত্তা চ তথঞ্চ তং সচ্চং. যং অনিচ্চঞ্চ দুক্খঞ্চ অনত্তা চ তথঞ্চ সচ্চঞ্চ তং একসঙ্গহিতং. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কতিহাকারেহি চত্তারি সচ্চানি একপ্পটিৰেধানি? নৰহাকারেহি চত্তারি সচ্চানি একপ্পটিৰেধানি. তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিঞ্ঞট্ঠেন, পরিঞ্ঞট্ঠেন, পহানট্ঠেন, ভাৰনট্ঠেন, সচ্ছিকিরিযট্ঠেন – ইমেহি নৰহাকারেহি চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং তথট্ঠেন চত্তারি সচ্চানি একপ্পটিৰেধানি? নৰহাকারেহি তথট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো তথট্ঠো, সমুদযস্স সমুদযট্ঠো তথট্ঠো, নিরোধস্স নিরোধট্ঠো তথট্ঠো, মগ্গস্স মগ্গট্ঠো তথট্ঠো, অভিঞ্ঞায অভিঞ্ঞট্ঠো তথট্ঠো, পরিঞ্ঞায পরিঞ্ঞট্ঠো তথট্ঠো, পহানস্স পহানট্ঠো তথট্ঠো, ভাৰনায ভাৰনট্ঠো তথট্ঠো, সচ্ছিকিরিযায সচ্ছিকিরিযট্ঠো তথট্ঠো – ইমেহি নৰহাকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং অনত্তট্ঠেন… সচ্চট্ঠেন… পটিৰেধট্ঠেন চত্তারি সচ্চানি একপ্পটিৰেধানি? নৰহাকারেহি পটিৰেধট্ঠেন চত্তারি সচ্চানি একপ্পটিৰেধানি. দুক্খস্স দুক্খট্ঠো পটিৰেধট্ঠো, সমুদযস্স সমুদযট্ঠো পটিৰেধট্ঠো, নিরোধস্স নিরোধট্ঠো পটিৰেধট্ঠো, মগ্গস্স মগ্গট্ঠো পটিৰেধট্ঠো, অভিঞ্ঞায অভিঞ্ঞট্ঠো পটিৰেধট্ঠো, পরিঞ্ঞায পরিঞ্ঞট্ঠো পটিৰেধট্ঠো, পহানস্স পহানট্ঠো পটিৰেধট্ঠো, ভাৰনায ভাৰনট্ঠো পটিৰেধট্ঠো, সচ্ছিকিরিযায সচ্ছিকিরিযট্ঠো পটিৰেধট্ঠো – ইমেহি নৰহাকারেহি পটিৰেধট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

১১. কতিহাকারেহি চত্তারি সচ্চানি একপ্পটিৰেধানি? দ্ৰাদসহি আকারেহি চত্তারি সচ্চানি একপ্পটিৰেধানি. তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিজাননট্ঠেন, পরিজাননট্ঠেন, ধম্মট্ঠেন, তথট্ঠেন, ঞাতট্ঠেন, সচ্ছিকিরিযট্ঠেন, ফস্সনট্ঠেন, অভিসমযট্ঠেন – ইমেহি দ্ৰাদসহি আকারেহি চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং তথট্ঠেন চত্তারি সচ্চানি একপ্পটিৰেধানি? সোল়সহি আকারেহি তথট্ঠেন চত্তারি সচ্চানি একপ্পটিৰেধানি. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, তথট্ঠো; সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো তথট্ঠো; নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো তথট্ঠো; মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো তথট্ঠো – ইমেহি সোল়সহি আকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

কথং অনত্তট্ঠেন…পে… সচ্চট্ঠেন… পটিৰেধট্ঠেন… অভিজাননট্ঠেন… পরিজাননট্ঠেন… ধম্মট্ঠেন… তথট্ঠেন… ঞাতট্ঠেন… সচ্ছিকিরিযট্ঠেন… ফস্সনট্ঠেন… অভিসমযট্ঠেন চত্তারি সচ্চানি একপ্পটিৰেধানি? সোল়সহি আকারেহি অভিসমযট্ঠেন চত্তারি সচ্চানি একপ্পটিৰেধানি. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, অভিসমযট্ঠো; সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো, অভিসমযট্ঠো; নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো, অভিসমযট্ঠো; মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো, অভিসমযট্ঠো – ইমেহি সোল়সহি আকারেহি অভিসমযট্ঠেন চত্তারি সচ্চানি একসঙ্গহিতানি. যং একসঙ্গহিতং তং একত্তং. একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি.

১২. সচ্চানং কতি লক্খণানি? সচ্চানং দ্ৰে লক্খণানি. সঙ্খতলক্খণঞ্চ, অসঙ্খতলক্খণঞ্চ – সচ্চানং ইমানি দ্ৰে লক্খণানি.

সচ্চানং কতি লক্খণানি? সচ্চানং ছ লক্খণানি. সঙ্খতানং সচ্চানং উপ্পাদো পঞ্ঞাযতি, ৰযো পঞ্ঞাযতি, ঠিতানং অঞ্ঞথত্তং পঞ্ঞাযতি অসঙ্খতস্স সচ্চস্স ন উপ্পাদো পঞ্ঞাযতি, ন ৰযো পঞ্ঞাযতি, ন ঠিতস্স অঞ্ঞথত্তং পঞ্ঞাযতি – সচ্চানং ইমানি ছ লক্খণানি.

সচ্চানং কতি লক্খণানি? সচ্চানং দ্ৰাদস লক্খণানি. দুক্খসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; সমুদযসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; মগ্গসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; নিরোধসচ্চস্স ন উপ্পাদো পঞ্ঞাযতি, ন ৰযো পঞ্ঞাযতি, ন ঠিতস্স অঞ্ঞথত্তং পঞ্ঞাযতি – সচ্চানং ইমানি দ্ৰাদস লক্খণানি.

চতুন্নং সচ্চানং কতি কুসলা, কতি অকুসলা, কতি অব্যাকতা? সমুদযসচ্চং অকুসলং, মগ্গসচ্চং কুসলং, নিরোধসচ্চং অব্যাকতং. দুক্খসচ্চং সিযা কুসলং, সিযা অকুসলং, সিযা অব্যাকতং.

সিযা তীণি সচ্চানি একসচ্চেন সঙ্গহিতানি, একসচ্চং তীহি সচ্চেহি সঙ্গহিতং? ৰত্থুৰসেন পরিযাযেন সিযাতি. কথঞ্চ সিযা? যং দুক্খসচ্চং অকুসলং, সমুদযসচ্চং অকুসলং – এৰং অকুসলট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং. যং দুক্খসচ্চং কুসলং, মগ্গসচ্চং কুসলং – এৰং কুসলট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং. যং দুক্খসচ্চং অব্যাকতং, নিরোধসচ্চং অব্যাকতং – এৰং অব্যাকতট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং. এৰং সিযা তীণি সচ্চানি একসচ্চেন সঙ্গহিতানি, একসচ্চং তীহি সচ্চেহি সঙ্গহিতং ৰত্থুৰসেন পরিযাযেনাতি.

২. দুতিযসুত্তন্তপাল়ি

১৩. ‘‘পুব্বে মে, ভিক্খৰে [সং. নি. ৩.২৬], সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কো নু খো রূপস্স অস্সাদো, কো আদীনৰো, কিং নিস্সরণং; কো ৰেদনায অস্সাদো, কো আদীনৰো, কিং নিস্সরণং; কো সঞ্ঞায অস্সাদো, কো আদীনৰো, কিং নিস্সরণং; কো সঙ্খারানং অস্সাদো, কো আদীনৰো, কিং নিস্সরণং; কো ৰিঞ্ঞাণস্স অস্সাদো, কো আদীনৰো, কিং নিস্সরণ’ন্তি? তস্স ময্হং, ভিক্খৰে, এতদহোসি – ‘যং খো রূপং পটিচ্চ উপ্পজ্জতি সুখং সোমনস্সং – অযং রূপস্স অস্সাদো. যং রূপং অনিচ্চং, তং দুক্খং ৰিপরিণামধম্মং – অযং রূপস্স আদীনৰো. যো রূপস্মিং ছন্দরাগৰিনযো ছন্দরাগপ্পহানং – ইদং রূপস্স নিস্সরণং. যং ৰেদনং পটিচ্চ…পে… যং সঞ্ঞং পটিচ্চ… যং সঙ্খারে পটিচ্চ… যং ৰিঞ্ঞাণং পটিচ্চ উপ্পজ্জতি সুখং সোমনস্সং – অযং ৰিঞ্ঞাণস্স অস্সাদো. যং ৰিঞ্ঞাণং অনিচ্চং তং দুক্খং ৰিপরিণামধম্মং – অযং ৰিঞ্ঞাণস্স আদীনৰো. যো ৰিঞ্ঞাণস্মিং ছন্দরাগৰিনযো ছন্দরাগপ্পহানং – ইদং ৰিঞ্ঞাণস্স নিস্সরণং’’.

‘‘যাৰকীৰঞ্চাহং, ভিক্খৰে, ইমেসং পঞ্চন্নং উপাদানক্খন্ধানং এৰং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং নাব্ভঞ্ঞাসিং, নেৰ তাৰাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং [অভিসম্বুদ্ধো পচ্চঞ্ঞাসিং (স্যা.) সং. নি. ৩.২৬ পস্সিতব্বা] যতো চ খ্ৰাহং, ভিক্খৰে, ইমেসং পঞ্চন্নং উপাদানক্খন্ধানং এৰং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, ‘সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি [চেতোৰিমুত্তি (স্যা. ক.) সং. নি. ৩.২৭ পস্সিতব্বা]. অযমন্তিমা জাতি, নত্থি দানি পুনব্ভৰো’’’তি.

৩. দুতিযসুত্তন্তনিদ্দেসো

১৪. যং রূপং পটিচ্চ উপ্পজ্জতি সুখং সোমনস্সং, অযং রূপস্স অস্সাদোতি – পহানপ্পটিৰেধো সমুদযসচ্চং. যং রূপং অনিচ্চং তং দুক্খং ৰিপরিণামধম্মং, অযং রূপস্স আদীনৰোতি – পরিঞ্ঞাপটিৰেধো দুক্খসচ্চং. যো রূপস্মিং ছন্দরাগৰিনযো ছন্দরাগপ্পহানং, ইদং রূপস্স নিস্সরণন্তি – সচ্ছিকিরিযাপটিৰেধো নিরোধসচ্চং. যা ইমেসু তীসু ঠানেসু দিট্ঠি সঙ্কপ্পো ৰাচা কম্মন্তো আজীৰো ৰাযামো সতি সমাধি – ভাৰনাপটিৰেধো মগ্গসচ্চং.

যং ৰেদনং পটিচ্চ…পে… যং সঞ্ঞং পটিচ্চ… যং সঙ্খারে পটিচ্চ… যং ৰিঞ্ঞাণং পটিচ্চ উপ্পজ্জতি সুখং সোমনস্সং, অযং ৰিঞ্ঞাণস্স অস্সাদোতি – পহানপ্পটিৰেধো সমুদযসচ্চং. যং ৰিঞ্ঞাণং অনিচ্চং তং দুক্খং ৰিপরিণামধম্মং, অযং ৰিঞ্ঞাণস্স আদীনৰোতি – পরিঞ্ঞাপটিৰেধো দুক্খসচ্চং. যো ৰিঞ্ঞাণস্মিং ছন্দরাগৰিনযো ছন্দরাগপ্পহানং, ইদং ৰিঞ্ঞাণস্স নিস্সরণন্তি – সচ্ছিকিরিযাপটিৰেধো নিরোধসচ্চং. যা ইমেসু তীসু ঠানেসু দিট্ঠি সঙ্কপ্পো ৰাচা কম্মন্তো আজীৰো ৰাযামো সতি সমাধি – ভাৰনাপটিৰেধো মগ্গসচ্চং.

১৫. সচ্চন্তি কতিহাকারেহি সচ্চং? এসনট্ঠেন, পরিগ্গহট্ঠেন, পটিৰেধট্ঠেন. কথং এসনট্ঠেন সচ্চং? জরামরণং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. জরামরণং জাতিনিদানং, জাতিসমুদযং, জাতিজাতিকং, জাতিপ্পভৰন্তি – এৰং পরিগ্গহট্ঠেন সচ্চং. জরামরণঞ্চ পজানাতি, জরামরণসমুদযঞ্চ পজানাতি, জরামরণনিরোধঞ্চ পজানাতি, জরামরণনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

জাতি কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. জাতি ভৰনিদানা, ভৰসমুদযা, ভৰজাতিকা, ভৰপ্পভৰাতি – এৰং পরিগ্গহট্ঠেন সচ্চং. জাতিঞ্চ পজানাতি, জাতিসমুদযঞ্চ পজানাতি, জাতিনিরোধঞ্চ পজানাতি, জাতিনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ভৰো কিংনিদানো, কিংসমুদযো, কিংজাতিকো, কিংপভৰোতি – এৰং এসনট্ঠেন সচ্চং. ভৰো উপাদাননিদানো, উপাদানসমুদযো, উপাদানজাতিকো, উপাদানপ্পভৰোতি – এৰং পরিগ্গহট্ঠেন সচ্চং. ভৰং চ পজানাতি, ভৰসমুদযঞ্চ পজানাতি, ভৰনিরোধঞ্চ পজানাতি, ভৰনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

উপাদানং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. উপাদানং তণ্হানিদানং, তণ্হাসমুদযং, তণ্হাজাতিকং, তণ্হাপভৰন্তি – এৰং পরিগ্গহট্ঠেন সচ্চং. উপাদানঞ্চ পজানাতি, উপাদানসমুদযঞ্চ পজানাতি, উপাদাননিরোধঞ্চ পজানাতি উপাদাননিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

তণ্হা কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. তণ্হা ৰেদনানিদানা, ৰেদনাসমুদযা, ৰেদনাজাতিকা, ৰেদনাপভৰাতি – এৰং পরিগ্গহট্ঠেন সচ্চং. তণ্হঞ্চ পজানাতি, তণ্হাসমুদযঞ্চ পজানাতি, তণ্হানিরোধঞ্চ পজানাতি, তণ্হানিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ৰেদনা কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. ৰেদনা ফস্সনিদানা, ফস্সসমুদযা, ফস্সজাতিকা, ফস্সপ্পভৰাতি – এৰং পরিগ্গহট্ঠেন সচ্চং. ৰেদনঞ্চ পজানাতি, ৰেদনাসমুদযঞ্চ পজানাতি, ৰেদনানিরোধঞ্চ পজানাতি, ৰেদনানিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ফস্সো কিংনিদানো, কিংসমুদযো, কিংজাতিকো, কিংপভৰোতি – এৰং এসনট্ঠেন সচ্চং. ফস্সো সল়াযতননিদানো, সল়াযতনসমুদযো, সল়াযতনজাতিকো, সল়াযতনপ্পভৰোতি – এৰং পরিগ্গহট্ঠেন সচ্চং. ফস্সঞ্চ পজানাতি, ফস্সসমুদযঞ্চ পজানাতি, ফস্সনিরোধঞ্চ পজানাতি, ফস্সনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

সল়াযতনং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. সল়াযতনং নামরূপনিদানং, নামরূপসমুদযং, নামরূপজাতিকং, নামরূপপ্পভৰন্তি – এৰং পরিগ্গহট্ঠেন সচ্চং. সল়াযতনঞ্চ পজানাতি, সল়াযতনসমুদযঞ্চ পজানাতি, সল়াযতননিরোধঞ্চ পজানাতি, সল়াযতননিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

নামরূপং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. নামরূপং ৰিঞ্ঞাণনিদানং, ৰিঞ্ঞাণসমুদযং, ৰিঞ্ঞাণজাতিকং, ৰিঞ্ঞাণপ্পভৰন্তি – এৰং পরিগ্গহট্ঠেন সচ্চং. নামরূপঞ্চ পজানাতি, নামরূপসমুদযঞ্চ পজানাতি, নামরূপনিরোধঞ্চ পজানাতি, নামরূপনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

ৰিঞ্ঞাণং কিংনিদানং, কিংসমুদযং, কিংজাতিকং, কিংপভৰন্তি – এৰং এসনট্ঠেন সচ্চং. ৰিঞ্ঞাণং সঙ্খারনিদানং, সঙ্খারসমুদযং, সঙ্খারজাতিকং, সঙ্খারপ্পভৰন্তি – এৰং পরিগ্গহট্ঠেন সচ্চং. ৰিঞ্ঞাণঞ্চ পজানাতি, ৰিঞ্ঞাণসমুদযঞ্চ পজানাতি, ৰিঞ্ঞাণনিরোধঞ্চ পজানাতি, ৰিঞ্ঞাণনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

সঙ্খারা কিংনিদানা, কিংসমুদযা, কিংজাতিকা, কিংপভৰাতি – এৰং এসনট্ঠেন সচ্চং. সঙ্খারা অৰিজ্জানিদানা, অৰিজ্জাসমুদযা, অৰিজ্জাজাতিকা, অৰিজ্জাপভৰাতি – এৰং পরিগ্গহট্ঠেন সচ্চং. সঙ্খারে চ পজানাতি, সঙ্খারসমুদযঞ্চ পজানাতি, সঙ্খারনিরোধঞ্চ পজানাতি, সঙ্খারনিরোধগামিনিং পটিপদঞ্চ পজানাতি – এৰং পটিৰেধট্ঠেন সচ্চং.

১৬. জরামরণং দুক্খসচ্চং, জাতি সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. জাতি দুক্খসচ্চং, ভৰো সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ভৰো দুক্খসচ্চং, উপাদানং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. উপাদানং দুক্খসচ্চং, তণ্হা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. তণ্হা দুক্খসচ্চং, ৰেদনা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ৰেদনা দুক্খসচ্চং, ফস্সো সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ফস্সো দুক্খসচ্চং, সল়াযতনং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. সল়াযতনং দুক্খসচ্চং, নামরূপং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. নামরূপং দুক্খসচ্চং, ৰিঞ্ঞাণং সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. ৰিঞ্ঞাণং দুক্খসচ্চং, সঙ্খারা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. সঙ্খারা দুক্খসচ্চং, অৰিজ্জা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং.

জরামরণং সিযা দুক্খসচ্চং, সিযা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চং. জাতি সিযা দুক্খসচ্চং, সিযা সমুদযসচ্চং…পে… ভৰো সিযা দুক্খসচ্চং, সিযা সমুদযসচ্চং, উভিন্নম্পি নিস্সরণং নিরোধসচ্চং, নিরোধপ্পজাননা মগ্গসচ্চন্তি.

ভাণৰারো.

সচ্চকথা নিট্ঠিতা.