১. উদ্দেসো

২০৯. পুরিমনিদানং. ‘‘তযোমে, ভিক্খৰে, ৰিমোক্খা. কতমে তযো? সুঞ্ঞতো ৰিমোক্খো, অনিমিত্তো ৰিমোক্খো, অপ্পণিহিতো ৰিমোক্খো – ইমে খো, ভিক্খৰে, তযো ৰিমোক্খা.

‘‘অপি চ, অট্ঠসট্ঠি ৰিমোক্খা – সুঞ্ঞতো ৰিমোক্খো, অনিমিত্তো ৰিমোক্খো, অপ্পণিহিতো ৰিমোক্খো; অজ্ঝত্তৰুট্ঠানো ৰিমোক্খো, বহিদ্ধাৰুট্ঠানো ৰিমোক্খো, দুভতো ৰুট্ঠানো ৰিমোক্খো; অজ্ঝত্তৰুট্ঠানা চত্তারো ৰিমোক্খা, বহিদ্ধাৰুট্ঠানা চত্তারো ৰিমোক্খা, দুভতো ৰুট্ঠানা চত্তারো ৰিমোক্খা; অজ্ঝত্তৰুট্ঠানানং অনুলোমা চত্তারো ৰিমোক্খা, বহিদ্ধাৰুট্ঠানানং অনুলোমা চত্তারো ৰিমোক্খা, দুভতো ৰুট্ঠানানং অনুলোমা চত্তারো ৰিমোক্খা; অজ্ঝত্তৰুট্ঠানপটিপ্পস্সদ্ধী [অজ্ঝত্তৰুট্ঠানা পটিপ্পস্সদ্ধী (স্যা.)] চত্তারো ৰিমোক্খা, বহিদ্ধাৰুট্ঠানপটিপ্পস্সদ্ধী চত্তারো ৰিমোক্খা, দুভতো ৰুট্ঠানপটিপ্পস্সদ্ধী চত্তারো ৰিমোক্খা; রূপী রূপানি পস্সতীতি ৰিমোক্খো, অজ্ঝত্তং অরূপসঞ্ঞী বহিদ্ধা রূপানি পস্সতীতি ৰিমোক্খো, সুভং তেৰ অধিমুত্তো হোতীতি ৰিমোক্খো; আকাসানঞ্চাযতনসমাপত্তি ৰিমোক্খো, ৰিঞ্ঞাণঞ্চাযতনসমাপত্তি ৰিমোক্খো, আকিঞ্চঞ্ঞাযতনসমাপত্তি ৰিমোক্খো; নেৰসঞ্ঞানাসঞ্ঞাযতনসমাপত্তি ৰিমোক্খো, সঞ্ঞাৰেদযিতনিরোধসমাপত্তি ৰিমোক্খো; সমযৰিমোক্খো, অসমযৰিমোক্খো; সামযিকো ৰিমোক্খো, অসামযিকো ৰিমোক্খো; কুপ্পো ৰিমোক্খো, অকুপ্পো ৰিমোক্খো; লোকিযো ৰিমোক্খো, লোকুত্তরো ৰিমোক্খো; সাসৰো ৰিমোক্খো, অনাসৰো ৰিমোক্খো; সামিসো ৰিমোক্খো, নিরামিসো ৰিমোক্খো; নিরামিসানিরামিসতরো ৰিমোক্খো, পণিহিতো ৰিমোক্খো, অপ্পণিহিতো ৰিমোক্খো, পণিহিতপ্পটিপ্পস্সদ্ধি ৰিমোক্খো; সঞ্ঞুত্তো ৰিমোক্খো, ৰিসঞ্ঞুত্তো ৰিমোক্খো; একত্তৰিমোক্খো, নানত্তৰিমোক্খো, সঞ্ঞাৰিমোক্খো, ঞাণৰিমোক্খো; সীতিসিযাৰিমোক্খো [সীতীসিযাৰিমোক্খো (সী. অট্ঠ.)], ঝানৰিমোক্খো, অনুপাদাচিত্তস্স ৰিমোক্খো’’.