৫. ইন্দ্রিযসমোধানং

২০৪. পুথুজ্জনো সমাধিং ভাৰেন্তো কতিহাকারেহি উপট্ঠানকুসলো হোতি? সেক্খো সমাধিং ভাৰেন্তো কতিহাকারেহি উপট্ঠানকুসলো হোতি? ৰীতরাগো সমাধিং ভাৰেন্তো কতিহাকারেহি উপট্ঠানকুসলো হোতি? পুথুজ্জনো সমাধিং ভাৰেন্তো সত্তহি আকারেহি উপট্ঠানকুসলো হোতি. সেক্খো সমাধিং ভাৰেন্তো অট্ঠহি আকারেহি উপট্ঠানকুসলো হোতি. ৰীতরাগো সমাধিং ভাৰেন্তো দসহি আকারেহি উপট্ঠানকুসলো হোতি.

পুথুজ্জনো সমাধিং ভাৰেন্তো কতমেহি সত্তহাকারেহি উপট্ঠানকুসলো হোতি? আৰজ্জিতত্তা আরম্মণূপট্ঠানকুসলো হোতি, সমথনিমিত্তূপট্ঠানকুসলো হোতি, পগ্গহনিমিত্তূপট্ঠানকুসলো হোতি, অৰিক্খেপূপট্ঠানকুসলো হোতি, ওভাসূপট্ঠানকুসলো হোতি, সম্পহংসনূপট্ঠানকুসলো হোতি, উপেক্খূপট্ঠানকুসলো হোতি – পুথুজ্জনো সমাধিং ভাৰেন্তো ইমেহি সত্তহি আকারেহি উপট্ঠানকুসলো হোতি.

সেক্খো সমাধিং ভাৰেন্তো কতমেহি অট্ঠহি আকারেহি উপট্ঠানকুসলো হোতি? আৰজ্জিতত্তা আরম্মণূপট্ঠানকুসলো হোতি, সমথনিমিত্তূপট্ঠানকুসলো হোতি, পগ্গহনিমিত্তূপট্ঠানকুসলো হোতি, অৰিক্খেপূপট্ঠানকুসলো হোতি, ওভাসূপট্ঠানকুসলো হোতি, সম্পহংসনূপট্ঠানকুসলো হোতি, উপেক্খূপট্ঠানকুসলো হোতি, একত্তূপট্ঠানকুসলো হোতি – সেক্খো সমাধিং ভাৰেন্তো ইমেহি অট্ঠহি আকারেহি উপট্ঠানকুসলো হোতি.

ৰীতরাগো সমাধিং ভাৰেন্তো কতমেহি দসহি আকারেহি উপট্ঠানকুসলো হোতি? আৰজ্জিতত্তা আরম্মণূপট্ঠানকুসলো হোতি…পে… একত্তূপট্ঠানকুসলো হোতি, ঞাণূপট্ঠানকুসলো হোতি, ৰিমুত্তূপট্ঠানকুসলো হোতি – ৰীতরাগো সমাধিং ভাৰেন্তো ইমেহি দসহি আকারেহি উপট্ঠানকুসলো হোতি.

২০৫. পুথুজ্জনো ৰিপস্সনং ভাৰেন্তো কতিহাকারেহি উপট্ঠানকুসলো হোতি, কতিহাকারেহি অনুপট্ঠানকুসলো হোতি? সেক্খো ৰিপস্সনং ভাৰেন্তো কতিহাকারেহি উপট্ঠানকুসলো হোতি, কতিহাকারেহি অনুপট্ঠানকুসলো হোতি? ৰীতরাগো ৰিপস্সনং ভাৰেন্তো কতিহাকারেহি উপট্ঠানকুসলো হোতি, কতিহাকারেহি অনুপট্ঠানকুসলো হোতি?

পুথুজ্জনো ৰিপস্সনং ভাৰেন্তো নৰহি আকারেহি উপট্ঠানকুসলো হোতি, নৰহি আকারেহি অনুপট্ঠানকুসলো হোতি. সেক্খো ৰিপস্সনং ভাৰেন্তো দসহি আকারেহি উপট্ঠানকুসলো হোতি, দসহি আকারেহি অনুপট্ঠানকুসলো হোতি. ৰীতরাগো ৰিপস্সনং ভাৰেন্তো দ্ৰাদসহি আকারেহি উপট্ঠানকুসলো হোতি, দ্ৰাদসহি আকারেহি অনুপট্ঠানকুসলো হোতি.

পুথুজ্জনো ৰিপস্সনং ভাৰেন্তো কতমেহি নৰহি আকারেহি উপট্ঠানকুসলো হোতি, কতমেহি নৰহি আকারেহি অনুপট্ঠানকুসলো হোতি? অনিচ্চতো উপট্ঠানকুসলো হোতি, নিচ্চতো অনুপট্ঠানকুসলো হোতি. দুক্খতো উপট্ঠানকুসলো হোতি, সুখতো অনুপট্ঠানকুসলো হোতি. অনত্ততো উপট্ঠানকুসলো হোতি, অত্ততো অনুপট্ঠানকুসলো হোতি. খযতো উপট্ঠানকুসলো হোতি, ঘনতো অনুপট্ঠানকুসলো হোতি. ৰযতো উপট্ঠানকুসলো হোতি, আযূহনানুপট্ঠানকুসলো হোতি. ৰিপরিণামূপট্ঠানকুসলো হোতি, ধুৰতো অনুপট্ঠানকুসলো হোতি. অনিমিত্তূপট্ঠানকুসলো হোতি, নিমিত্তানুপট্ঠানকুসলো হোতি. অপ্পণিহিতূপট্ঠানকুসলো হোতি, পণিধিঅনুপট্ঠানকুসলো [পণিধানুপট্ঠানকুসলো (স্যা.)] হোতি. সুঞ্ঞতূপট্ঠানকুসলো হোতি, অভিনিৰেসানুপট্ঠানকুসলো হোতি – পুথুজ্জনো ৰিপস্সনং ভাৰেন্তো ইমেহি নৰহি আকারেহি উপট্ঠানকুসলো হোতি, ইমেহি নৰহি আকারেহি অনুপট্ঠানকুসলো হোতি.

২০৬. সেক্খো ৰিপস্সনং ভাৰেন্তো কতমেহি দসহি আকারেহি উপট্ঠানকুসলো হোতি, কতমেহি দসহি আকারেহি অনুপট্ঠানকুসলো হোতি? অনিচ্চতো উপট্ঠানকুসলো হোতি, নিচ্চতো অনুপট্ঠানকুসলো হোতি…পে… সুঞ্ঞতূপট্ঠানকুসলো হোতি, অভিনিৰেসানূপট্ঠানকুসলো হোতি. ঞাণূপট্ঠানকুসলো হোতি, অঞাণঅনুপট্ঠানকুসলো হোতি – সেক্খো ৰিপস্সনং ভাৰেন্তো ইমেহি দসহি আকারেহি উপট্ঠানকুসলো হোতি, ইমেহি দসহি আকারেহি অনুপট্ঠানকুসলো হোতি.

ৰীতরাগো ৰিপস্সনং ভাৰেন্তো কতমেহি দ্ৰাদসহি আকারেহি উপট্ঠানকুসলো হোতি, কতমেহি দ্ৰাদসহি আকারেহি অনুপট্ঠানকুসলো হোতি? অনিচ্চতো উপট্ঠানকুসলো হোতি, নিচ্চতো অনুপট্ঠানকুসলো হোতি…পে… ঞাণূপট্ঠানকুসলো হোতি, অঞাণানুপট্ঠানকুসলো হোতি. ৰিসঞ্ঞোগূপট্ঠানকুসলো হোতি, সঞ্ঞোগানুপট্ঠানকুসলো হোতি. নিরোধূপট্ঠানকুসলো হোতি, সঙ্খারানুপট্ঠানকুসলো হোতি – ৰীতরাগো ৰিপস্সনং ভাৰেন্তো ইমেহি দ্ৰাদসহি আকারেহি উপট্ঠানকুসলো হোতি, ইমেহি দ্ৰাদসহি আকারেহি অনুপট্ঠানকুসলো হোতি.

আৰজ্জিতত্তা আরম্মণূপট্ঠানকুসলৰসেন ইন্দ্রিযানি সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি…পে… ধম্মে সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি. ইন্দ্রিযানি সমোধানেতীতি কথং ইন্দ্রিযানি সমোধানেতি? অধিমোক্খট্ঠেন সদ্ধিন্দ্রিযং সমোধানেতি…পে… সমথনিমিত্তূপট্ঠানকুসলৰসেন, পগ্গহনিমিত্তূপট্ঠানকুসলৰসেন, অৰিক্খেপূপট্ঠানকুসলৰসেন, ওভাসূপট্ঠানকুসলৰসেন, সম্পহংসনূপট্ঠানকুসলৰসেন, উপেক্খূপট্ঠানকুসলৰসেন, একত্তূপট্ঠানকুসলৰসেন, ঞাণূপট্ঠানকুসলৰসেন, ৰিমুত্তূপট্ঠানকুসলৰসেন.

অনিচ্চতো উপট্ঠানকুসলৰসেন, নিচ্চতো অনুপট্ঠানকুসলৰসেন, দুক্খতো উপট্ঠানকুসলৰসেন, সুখতো অনুপট্ঠানকুসলৰসেন, অনত্ততো উপট্ঠানকুসলৰসেন, অত্ততো অনুপট্ঠানকুসলৰসেন, খযতো উপট্ঠানকুসলৰসেন, ঘনতো অনুপট্ঠানকুসলৰসেন, ৰযতো উপট্ঠানকুসলৰসেন, আযূহনানুপট্ঠানকুসলৰসেন, ৰিপরিণামূপট্ঠানকুসলৰসেন, ধুৰতো অনুপট্ঠানকুসলৰসেন, অনিমিত্তূপট্ঠানকুসলৰসেন, নিমিত্তানুপট্ঠানকুসলৰসেন, অপ্পণিহিতূপট্ঠানকুসলৰসেন, পণিধিঅনুপট্ঠানকুসলৰসেন, সুঞ্ঞতূপট্ঠানকুসলৰসেন, অভিনিৰেসানুপট্ঠানকুসলৰসেন, ঞাণূপট্ঠানকুসলৰসেন, অঞাণানুপট্ঠানকুসলৰসেন, ৰিসঞ্ঞোগূপট্ঠানকুসলৰসেন, সঞ্ঞোগানুপট্ঠানকুসলৰসেন, নিরোধূপট্ঠানকুসলৰসেন, সঙ্খারানুপট্ঠানকুসলৰসেন ইন্দ্রিযানি সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি.

২০৭. চতুসট্ঠিযা আকারেহি তিণ্ণন্নং ইন্দ্রিযানং ৰসীভাৰতাপঞ্ঞা আসৰানং খযে ঞাণং. কতমেসং তিণ্ণন্নং ইন্দ্রিযানং? অনঞ্ঞাতঞ্ঞস্সামীতিন্দ্রিযস্স, অঞ্ঞিন্দ্রিযস্স, অঞ্ঞাতাৰিন্দ্রিযস্স.

অনঞ্ঞাতঞ্ঞস্সামীতিন্দ্রিযং কতি ঠানানি গচ্ছতি? অঞ্ঞিন্দ্রিযং কতি ঠানানি গচ্ছতি? অঞ্ঞাতাৰিন্দ্রিযং কতি ঠানানি গচ্ছতি? অনঞ্ঞাতঞ্ঞস্সামীতিন্দ্রিযং একং ঠানং গচ্ছতি – সোতাপত্তিমগ্গং. অঞ্ঞিন্দ্রিযং ছ ঠানানি গচ্ছতি – সোতাপত্তিফলং, সকদাগামিমগ্গং, সকদাগামিফলং, অনাগামিমগ্গং, অনাগামিফলং, অরহত্তমগ্গং. অঞ্ঞাতাৰিন্দ্রিযং একং ঠানং গচ্ছতি – অরহত্তফলং.

সোতাপত্তিমগ্গক্খণে অনঞ্ঞাতঞ্ঞস্সামীতিন্দ্রিযস্স সদ্ধিন্দ্রিযং অধিমোক্খপরিৰারং হোতি, ৰীরিযিন্দ্রিযং পগ্গহপরিৰারং হোতি, সতিন্দ্রিযং উপট্ঠানপরিৰারং হোতি, সমাধিন্দ্রিযং অৰিক্খেপপরিৰারং হোতি, পঞ্ঞিন্দ্রিযং দস্সনপরিৰারং হোতি, মনিন্দ্রিযং ৰিজাননপরিৰারং হোতি, সোমনস্সিন্দ্রিযং অভিসন্দনপরিৰারং হোতি, জীৰিতিন্দ্রিযং পৰত্তসন্ততাধিপতেয্যপরিৰারং হোতি. সোতাপত্তিমগ্গক্খণে জাতা ধম্মা, ঠপেত্ৰা চিত্তসমুট্ঠানং রূপং, সব্বেৰ কুসলা হোন্তি, সব্বেৰ অনাসৰা হোন্তি, সব্বেৰ নিয্যানিকা হোন্তি, সব্বেৰ অপচযগামিনো হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি. সোতাপত্তিমগ্গক্খণে অনঞ্ঞাতঞ্ঞস্সামীতিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি, অঞ্ঞমঞ্ঞপরিৰারা হোন্তি, নিস্সযপরিৰারা হোন্তি, সম্পযুত্তপরিৰারা হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি. তেৰ তস্স আকারা চেৰ হোন্তি পরিৰারা চ.

সোতাপত্তিফলক্খণে…পে… অরহত্তফলক্খণে অঞ্ঞাতাৰিন্দ্রিযস্স সদ্ধিন্দ্রিযং অধিমোক্খপরিৰারং হোতি…পে… জীৰিতিন্দ্রিযং পৰত্তসন্ততাধিপতেয্যপরিৰারং হোতি. অরহত্তফলক্খণে জাতা ধম্মা সব্বেৰ অব্যাকতা হোন্তি, ঠপেত্ৰা চিত্তসমুট্ঠানং রূপং সব্বেৰ অনাসৰা হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি. অরহত্তফলক্খণে অঞ্ঞাতাৰিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি. তেৰ তস্স আকারা চেৰ হোন্তি পরিৰারা চ. ইতি ইমানি অট্ঠ অট্ঠকানি চতুসট্ঠি হোন্তি.

আসৰাতি কতমে তে আসৰা? কামাসৰো, ভৰাসৰো, দিট্ঠাসৰো, অৰিজ্জাসৰো. কত্থেতে আসৰা খীযন্তি [খিয্যন্তি (ক.)]? সোতাপত্তিমগ্গেন অনৰসেসো দিট্ঠাসৰো খীযতি. অপাযগমনীযো কামাসৰো খীযতি, অপাযগমনীযো ভৰাসৰো খীযতি, অপাযগমনীযো অৰিজ্জাসৰো খীযতি. এত্থেতে আসৰা খীযন্তি. সকদাগামিমগ্গেন ওল়ারিকো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি. এত্থেতে আসৰা খীযন্তি. অনাগামিমগ্গেন অনৰসেসো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি. এত্থেতে আসৰা খীযন্তি. অরহত্তমগ্গেন অনৰসেসো ভৰাসৰো খীযতি, অনৰসেসো অৰিজ্জাসৰো খীযতি. এত্থেতে আসৰা খীযন্তি.

২০৮. ন তস্স অদ্দিট্ঠমিধত্থি কিঞ্চি, অথো অৰিঞ্ঞাতমজানিতব্বং;

সব্বং অভিঞ্ঞাসি যদত্থি নেয্যং, তথাগতো তেন সমন্তচক্খূতি.

সমন্তচক্খূতি কেনট্ঠেন সমন্তচক্খু? চুদ্দস বুদ্ধঞাণানি – দুক্খে ঞাণং বুদ্ধঞাণং, দুক্খসমুদযে ঞাণং বুদ্ধঞাণং…পে… সব্বঞ্ঞুতঞাণং বুদ্ধঞাণং, অনাৰরণঞাণং বুদ্ধঞাণং. ইমানি চুদ্দস বুদ্ধঞাণানি. ইমেসং চুদ্দসন্নং বুদ্ধঞাণানং অট্ঠ ঞাণানি সাৰকসাধারণানি, ছ ঞাণানি অসাধারণানি সাৰকেহি.

যাৰতা দুক্খস্স দুক্খট্ঠো ঞাতো, অঞ্ঞাতো দুক্খট্ঠো নত্থীতি – সমন্তচক্খু. যং সমন্তচক্খু তং পঞ্ঞিন্দ্রিযং. পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং. যাৰতা দুক্খস্স দুক্খট্ঠো দিট্ঠো ৰিদিতো সচ্ছিকতো ফস্সিতো পঞ্ঞায; অফস্সিতো পঞ্ঞায দুক্খট্ঠো নত্থীতি – সমন্তচক্খু. যং সমন্তচক্খু তং পঞ্ঞিন্দ্রিযং. পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং. যাৰতা সমুদযস্স সমুদযট্ঠো…পে… যাৰতা নিরোধস্স নিরোধট্ঠো… যাৰতা মগ্গস্স মগ্গট্ঠো… যাৰতা অত্থপটিসম্ভিদায অত্থপটিসম্ভিদট্ঠো… যাৰতা ধম্মপটিসম্ভিদায ধম্মপটিসম্ভিদট্ঠো… যাৰতা নিরুত্তিপটিসম্ভিদায নিরুত্তিপটিসম্ভিদট্ঠো… যাৰতা পটিভানপটিসম্ভিদায পটিভানপটিসম্ভিদট্ঠো… যাৰতা ইন্দ্রিযপরোপরিযত্তে ঞাণং… যাৰতা সত্তানং আসযানুসযে ঞাণং… যাৰতা যমকপাটিহীরে ঞাণং… যাৰতা মহাকরুণাসমাপত্তিযা ঞাণং… যাৰতা সদেৰকস্স লোকস্স সমারকস্স সব্রহ্মকস্স সস্সমণব্রাহ্মণিযা পজায সদেৰমনুস্সায দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, তং ঞাতং দিট্ঠং ৰিদিতং সচ্ছিকতং ফস্সিতং পঞ্ঞায. অফস্সিতং পঞ্ঞায নত্থীতি – সমন্তচক্খু. যং সমন্তচক্খু তং পঞ্ঞিন্দ্রিযং. পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং.

সদ্দহন্তো পগ্গণ্হাতি, পগ্গণ্হন্তো সদ্দহতি. সদ্দহন্তো উপট্ঠাপেতি, উপট্ঠাপেন্তো সদ্দহতি. সদ্দহন্তো সমাদহতি, সমাদহন্তো সদ্দহতি. সদ্দহন্তো পজানাতি, পজানন্তো সদ্দহতি. পগ্গণ্হন্তো উপট্ঠাপেতি, উপট্ঠাপেন্তো পগ্গণ্হাতি. পগ্গণ্হন্তো সমাদহতি, সমাদহন্তো পগ্গণ্হাতি. পগ্গণ্হন্তো পজানাতি, পজানন্তো পগ্গণ্হাতি. পগ্গণ্হন্তো সদ্দহতি, সদ্দহন্তো পগ্গণ্হাতি. উপট্ঠাপেন্তো সমাদহতি, সমাদহন্তো উপট্ঠাপেতি. উপট্ঠাপেন্তো পজানাতি, পজানন্তো উপট্ঠাপেতি. উপট্ঠাপেন্তো সদ্দহতি, সদ্দহন্তো উপট্ঠাপেতি. উপট্ঠাপেন্তো পগ্গণ্হাতি, পগ্গণ্হন্তো উপট্ঠাপেতি. সমাদহন্তো পজানাতি, পজানন্তো সমাদহতি. সমাদহন্তো সদ্দহতি, সদ্দহন্তো সমাদহতি. সমাদহন্তো পগ্গণ্হাতি, পগ্গণ্হন্তো সমাদহতি. সমাদহন্তো উপট্ঠাপেতি, উপট্ঠাপেন্তো সমাদহতি. পজানন্তো সদ্দহতি, সদ্দহন্তো পজানাতি. পজানন্তো পগ্গণ্হাতি, পগ্গণ্হন্তো পজানাতি. পজানন্তো উপট্ঠাপেতি, উপট্ঠাপেন্তো পজানাতি. পজানন্তো সমাদহতি, সমাদহন্তো পজানাতি.

সদ্দহিতত্তা পগ্গহিতং, পগ্গহিতত্তা সদ্দহিতং. সদ্দহিতত্তা উপট্ঠাপিতং, উপট্ঠাপিতত্তা সদ্দহিতং. সদ্দহিতত্তা সমাদহিতং, সমাদহিতত্তা সদ্দহিতং. সদ্দহিতত্তা পজানিতং, পজানিতত্তা সদ্দহিতং. পগ্গহিতত্তা উপট্ঠাপিতং, উপট্ঠাপিতত্তা পগ্গহিতং. পগ্গহিতত্তা সমাদহিতং, সমাদহিতত্তা পগ্গহিতং. পগ্গহিতত্তা পজানিতং পজানিতত্তা পগ্গহিতং. পগ্গহিতত্তা সদ্দহিতং, সদ্দহিতত্তা পগ্গহিতং. উপট্ঠাপিতত্তা সমাদহিতং, সমাদহিতত্তা উপট্ঠাপিতং. উপট্ঠাপিতত্তা পজানিতং, পজানিতত্তা উপট্ঠাপিতং. উপট্ঠাপিতত্তা সদ্দহিতং, সদ্দহিতত্তা উপট্ঠাপিতং. উপট্ঠাপিতত্তা পগ্গহিতং, পগ্গহিতত্তা উপট্ঠাপিতং. সমাদহিতত্তা পজানিতং, পজানিতত্তা সমাদহিতং. সমাদহিতত্তা সদ্দহিতং, সদ্দহিতত্তা সমাদহিতং. সমাদহিতত্তা পগ্গহিতং, পগ্গহিতত্তা সমাদহিতং. সমাদহিতত্তা উপট্ঠাপিতং, উপট্ঠাপিতত্তা সমাদহিতং. পজানিতত্তা সদ্দহিতং, সদ্দহিতত্তা পজানিতং. পজানিতত্তা পগ্গহিতং, পগ্গহিতত্তা পজানিতং. পজানিতত্তা উপট্ঠাপিতং, উপট্ঠাপিতত্তা পজানিতং. পজানিতত্তা সমাদহিতং, সমাদহিতত্তা পজানিতং.

যং বুদ্ধচক্খু তং বুদ্ধঞাণং, যং বুদ্ধঞাণং তং বুদ্ধচক্খু, যেন চক্খুনা তথাগতো সত্তে পস্সতি অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো [পরলোকৰজ্জভযদস্সাৰিনে (স্যা. ক.)], অপ্পেকচ্চে নপরলোকৰজ্জভযদস্সাৰিনো.

অপ্পরজক্খে মহারজক্খেতি সদ্ধো পুগ্গলো অপ্পরজক্খো, অস্সদ্ধো পুগ্গলো মহারজক্খো. আরদ্ধৰীরিযো পুগ্গলো অপ্পরজক্খো, কুসীতো পুগ্গলো মহারজক্খো. উপট্ঠিতস্সতি পুগ্গলো অপ্পরজক্খো, মুট্ঠস্সতি পুগ্গলো মহারজক্খো. সমাহিতো পুগ্গলো অপ্পরজক্খো, অসমাহিতো পুগ্গলো মহারজক্খো. পঞ্ঞৰা পুগ্গলো অপ্পরজক্খো, দুপ্পঞ্ঞো পুগ্গলো মহারজক্খো.

তিক্খিন্দ্রিযে মুদিন্দ্রিযেতি সদ্ধো পুগ্গলো তিক্খিন্দ্রিযো, অস্সদ্ধো পুগ্গলো মুদিন্দ্রিযো…পে… পঞ্ঞৰা পুগ্গলো তিক্খিন্দ্রিযো, দুপ্পঞ্ঞো পুগ্গলো মুদিন্দ্রিযো. স্ৰাকারে দ্ৰাকারেতি সদ্ধো পুগ্গলো স্ৰাকারো, অস্সদ্ধো পুগ্গলো দ্ৰাকারো…পে… পঞ্ঞৰা পুগ্গলো স্ৰাকারো, দুপ্পঞ্ঞো পুগ্গলো দ্ৰাকারো. সুৰিঞ্ঞাপযে দুৰিঞ্ঞাপযেতি সদ্ধো পুগ্গলো সুৰিঞ্ঞাপযো, অস্সদ্ধো পুগ্গলো দুৰিঞ্ঞাপযো…পে… পঞ্ঞৰা পুগ্গলো সুৰিঞ্ঞাপযো, দুপ্পঞ্ঞো পুগ্গলো দুৰিঞ্ঞাপযো.

অপ্পেকচ্চে পরলোকৰজ্জভযদস্সাৰিনো, অপ্পেকচ্চে নপরলোকৰজ্জভযদস্সাৰিনোতি সদ্ধো পুগ্গলো পরলোকৰজ্জভযদস্সাৰী, অস্সদ্ধো পুগ্গলো নপরলোকৰজ্জভযদস্সাৰী. আরদ্ধৰীরিযো পুগ্গলো পরলোকৰজ্জভযদস্সাৰী, কুসীতো পুগ্গলো নপরলোকৰজ্জভযদস্সাৰী…পে… পঞ্ঞৰা পুগ্গলো পরলোকৰজ্জভযদস্সাৰী, দুপ্পঞ্ঞো পুগ্গলো নপরলোকৰজ্জভযদস্সাৰী.

লোকোতি খন্ধলোকো ধাতুলোকো আযতনলোকো ৰিপত্তিভৰলোকো ৰিপত্তিসম্ভৰলোকো সম্পত্তিভৰলোকো সম্পত্তিসম্ভৰলোকো.

একো লোকো – সব্বে সত্তা আহারট্ঠিতিকা. দ্ৰে লোকা – নামঞ্চ রূপঞ্চ. তযো লোকা – তিস্সো ৰেদনা. চত্তারো লোকা – চত্তারো আহারা. পঞ্চ লোকা – পঞ্চুপাদানক্খন্ধা. ছ লোকা – ছ অজ্ঝত্তিকানি আযতনানি. সত্ত লোকা – সত্ত ৰিঞ্ঞাণট্ঠিতিযো. অট্ঠ লোকা – অট্ঠ লোকধম্মা. নৰ লোকা – নৰ সত্তাৰাসা. দস লোকা – দসাযতনানি. দ্ৰাদস লোকা – দ্ৰাদসাযতনানি. অট্ঠারস লোকা – অট্ঠারস ধাতুযো.

ৰজ্জন্তি সব্বে কিলেসা ৰজ্জা, সব্বে দুচ্চরিতা ৰজ্জা, সব্বে অভিসঙ্খারা ৰজ্জা, সব্বে ভৰগামিকম্মা ৰজ্জা. ইতি ইমস্মিঞ্চ লোকে ইমস্মিঞ্চ ৰজ্জে তিব্বা ভযসঞ্ঞা পচ্চুপট্ঠিতা হোন্তি, সেয্যথাপি উক্খিত্তাসিকে ৰধকে. ইমেহি পঞ্ঞাসায আকারেহি ইমানি পঞ্চিন্দ্রিযানি জানাতি পস্সতি অঞ্ঞাতি পটিৰিজ্ঝতীতি.

ইন্দ্রিযসমোধানো পঞ্চমো.

ততিযভাণৰারো.

ইন্দ্রিযকথা নিট্ঠিতা.