৪. ইন্দ্রিযকথা

১. পঠমসুত্তন্তনিদ্দেসো

১৮৪. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি [‘‘ভদ্দন্তে’’তি (ক.)] তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি’’ [সং. নি. ৫.৪৭১].

১৮৫. ইমানি পঞ্চিন্দ্রিযানি কতিহাকারেহি ৰিসুজ্ঝন্তি? ইমানি পঞ্চিন্দ্রিযানি পন্নরসহি আকারেহি ৰিসুজ্ঝন্তি. অস্সদ্ধে পুগ্গলে পরিৰজ্জযতো, সদ্ধে পুগ্গলে সেৰতো ভজতো পযিরুপাসতো, পসাদনীযে সুত্তন্তে পচ্চৰেক্খতো – ইমেহি তীহাকারেহি সদ্ধিন্দ্রিযং ৰিসুজ্ঝতি. কুসীতে পুগ্গলে পরিৰজ্জযতো, আরদ্ধৰীরিযে পুগ্গলে সেৰতো ভজতো পযিরুপাসতো, সম্মপ্পধানে পচ্চৰেক্খতো – ইমেহি তীহাকারেহি ৰীরিযিন্দ্রিযং ৰিসুজ্ঝতি. মুট্ঠস্সতী পুগ্গলে পরিৰজ্জযতো, উপট্ঠিতস্সতী পুগ্গলে সেৰতো ভজতো পযিরুপাসতো, সতিপট্ঠানে পচ্চৰেক্খতো – ইমেহি তীহাকারেহি সতিন্দ্রিযং ৰিসুজ্ঝতি. অসমাহিতে পুগ্গলে পরিৰজ্জযতো, সমাহিতে পুগ্গলে সেৰতো ভজতো পযিরুপাসতো, ঝানৰিমোক্খে পচ্চৰেক্খতো – ইমেহি তীহাকারেহি সমাধিন্দ্রিযং ৰিসুজ্ঝতি. দুপ্পঞ্ঞে পুগ্গলে পরিৰজ্জযতো, পঞ্ঞৰন্তে পুগ্গলে সেৰতো ভজতো পযিরুপাসতো, গম্ভীরঞাণচরিযং পচ্চৰেক্খতো – ইমেহি তীহাকারেহি পঞ্ঞিন্দ্রিযং ৰিসুজ্ঝতি. ইতি ইমে পঞ্চ পুগ্গলে পরিৰজ্জযতো, পঞ্চ পুগ্গলে সেৰতো ভজতো পযিরুপাসতো, পঞ্চ সুত্তন্তক্খন্ধে পচ্চৰেক্খতো – ইমেহি পন্নরসহি আকারেহি ইমানি পঞ্চিন্দ্রিযানি ৰিসুজ্ঝন্তি.

কতিহাকারেহি পঞ্চিন্দ্রিযানি ভাৰিযন্তি, কতিহাকারেহি পঞ্চন্নং ইন্দ্রিযানং ভাৰনা হোতি? দসহাকারেহি পঞ্চিন্দ্রিযানি ভাৰিযন্তি, দসহাকারেহি পঞ্চন্নং ইন্দ্রিযানং ভাৰনা হোতি. অস্সদ্ধিযং পজহন্তো সদ্ধিন্দ্রিযং ভাৰেতি, সদ্ধিন্দ্রিযং ভাৰেন্তো অস্সদ্ধিযং পজহতি; কোসজ্জং পজহন্তো ৰীরিযিন্দ্রিযং ভাৰেতি, ৰীরিযিন্দ্রিযং ভাৰেন্তো কোসজ্জং পজহতি; পমাদং পজহন্তো সতিন্দ্রিযং ভাৰেতি, সতিন্দ্রিযং ভাৰেন্তো পমাদং পজহতি; উদ্ধচ্চং পজহন্তো সমাধিন্দ্রিযং ভাৰেতি, সমাধিন্দ্রিযং ভাৰেন্তো উদ্ধচ্চং পজহতি; অৰিজ্জং পজহন্তো পঞ্ঞিন্দ্রিযং ভাৰেতি, পঞ্ঞিন্দ্রিযং ভাৰেন্তো অৰিজ্জং পজহতি. ইমেহি দসহাকারেহি পঞ্চিন্দ্রিযানি ভাৰিযন্তি, ইমেহি দসহাকারেহি পঞ্চন্নং ইন্দ্রিযানং ভাৰনা হোতি.

কতিহাকারেহি পঞ্চিন্দ্রিযানি ভাৰিতানি হোন্তি সুভাৰিতানি? দসহাকারেহি পঞ্চিন্দ্রিযানি ভাৰিতানি হোন্তি সুভাৰিতানি. অস্সদ্ধিযস্স পহীনত্তা সুপ্পহীনত্তা সদ্ধিন্দ্রিযং ভাৰিতং হোতি সুভাৰিতং; সদ্ধিন্দ্রিযস্স ভাৰিতত্তা সুভাৰিতত্তা অস্সদ্ধিযং পহীনং হোতি সুপ্পহীনং. কোসজ্জস্স পহীনত্তা সুপ্পহীনত্তা ৰীরিযিন্দ্রিযং ভাৰিতং হোতি সুভাৰিতং; ৰীরিযিন্দ্রিযস্স ভাৰিতত্তা সুভাৰিতত্তা কোসজ্জং পহীনং হোতি সুপ্পহীনং. পমাদস্স পহীনত্তা সুপ্পহীনত্তা সতিন্দ্রিযং ভাৰিতং হোতি সুভাৰিতং; সতিন্দ্রিযস্স ভাৰিতত্তা সুভাৰিতত্তা পমাদো পহীনো হোতি সুপ্পহীনো. উদ্ধচ্চস্স পহীনত্তা সুপ্পহীনত্তা সমাধিন্দ্রিযং ভাৰিতং হোতি সুভাৰিতং; সমাধিন্দ্রিযস্স ভাৰিতত্তা সুভাৰিতত্তা উদ্ধচ্চং পহীনং হোতি সুপ্পহীনং. অৰিজ্জায পহীনত্তা পঞ্ঞিন্দ্রিযং ভাৰিতং হোতি সুভাৰিতং; পঞ্ঞিন্দ্রিযস্স ভাৰিতত্তা সুভাৰিতত্তা অৰিজ্জা পহীনা হোতি সুপ্পহীনা. ইমেহি দসহাকারেহি পঞ্চিন্দ্রিযানি ভাৰিতানি হোন্তি সুভাৰিতানি.

১৮৬. কতিহাকারেহি পঞ্চিন্দ্রিযানি ভাৰিযন্তি, কতিহাকারেহি পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ? চতূহাকারেহি পঞ্চিন্দ্রিযানি ভাৰিযন্তি চতূহাকারেহি পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. সোতাপত্তিমগ্গক্খণে পঞ্চিন্দ্রিযানি ভাৰিযন্তি; সোতাপত্তিফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. সকদাগামিমগ্গক্খণে পঞ্চিন্দ্রিযানি ভাৰিযন্তি; সকদাগামিফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. অনাগামিমগ্গক্খণে পঞ্চিন্দ্রিযানি ভাৰিযন্তি; অনাগামিফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. অরহত্তমগ্গক্খণে পঞ্চিন্দ্রিযানি ভাৰিযন্তি; অরহত্তফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. ইতি চতস্সো মগ্গৰিসুদ্ধিযো, চতস্সো ফলৰিসুদ্ধিযো, চতস্সো সমুচ্ছেদৰিসুদ্ধিযো, চতস্সো পটিপ্পস্সদ্ধিৰিসুদ্ধিযো. ইমেহি চতূহাকারেহি পঞ্চিন্দ্রিযানি ভাৰিযন্তি; ইমেহি চতূহাকারেহি পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ.

কতিনং পুগ্গলানং ইন্দ্রিযভাৰনা; কতি পুগ্গলা ভাৰিতিন্দ্রিযা? অট্ঠন্নং পুগ্গলানং ইন্দ্রিযভাৰনা; তযো পুগ্গলা ভাৰিতিন্দ্রিযা. কতমেসং অট্ঠন্নং পুগ্গলানং ইন্দ্রিযভাৰনা? সত্তন্নঞ্চ সেক্খানং, পুথুজ্জনকল্যাণকস্স চ – ইমেসং অট্ঠন্নং পুগ্গলানং ইন্দ্রিযভাৰনা. কতমে তযো পুগ্গলা ভাৰিতিন্দ্রিযা? সৰনেন বুদ্ধো তথাগতস্স সাৰকো খীণাসৰো ভাৰিতিন্দ্রিযো, সযং ভূতট্ঠেন পচ্চেকসম্বুদ্ধো ভাৰিতিন্দ্রিযো, অপ্পমেয্যট্ঠেন তথাগতো অরহং সম্মাসম্বুদ্ধো ভাৰিতিন্দ্রিযো – ইমে তযো পুগ্গলা ভাৰিতিন্দ্রিযা. ইতি ইমেসং অট্ঠন্নং পুগ্গলানং ইন্দ্রিযভাৰনা; ইমে তযো পুগ্গলা ভাৰিতিন্দ্রিযা.

সুত্তন্তনিদ্দেসো পঠমো.

২. দুতিযসুত্তন্তনিদ্দেসো

১৮৭. সাৰত্থিনিদানং. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং. যে হি কেচি, ভিক্খৰে, সমণা ৰা ব্রাহ্মণা ৰা ইমেসং পঞ্চন্নং ইন্দ্রিযানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানন্তি, ন মে তে, ভিক্খৰে, সমণা ৰা ব্রাহ্মণা ৰা সমণেসু [চেৰ (ক.) সং. নি. ৫.৪৭৬] ৰা সমণসম্মতা, ব্রাহ্মণেসু ৰা ব্রাহ্মণসম্মতা; ন চ পনেতে আযস্মন্তা [আযস্মন্তো সং. নি. ৫.৪৭৬] সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি. যে চ খো কেচি [যে কেচি খো (স্যা.), যে হি কেচি খো (ক.) সং. নি. ৫.৪৭৬ পস্সিতব্বা] ভিক্খৰে সমণা ৰা ব্রাহ্মণা ৰা ইমেসং পঞ্চন্নং ইন্দ্রিযানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং পজানন্তি, তে খো মে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা, ব্রাহ্মণেসু ৰা ব্রাহ্মণসম্মতা; তে চ পনাযস্মন্তা সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি.

১৮৮. কতিহাকারেহি পঞ্চন্নং ইন্দ্রিযানং সমুদযো হোতি; কতিহাকারেহি পঞ্চন্নং ইন্দ্রিযানং সমুদযং পজানাতি? কতিহাকারেহি পঞ্চন্নং ইন্দ্রিযানং অত্থঙ্গমো হোতি; কতিহাকারেহি পঞ্চন্নং ইন্দ্রিযানং অত্থঙ্গমং পজানাতি? কতিহাকারেহি পঞ্চন্নং ইন্দ্রিযানং অস্সাদো হোতি, কতিহাকারেহি পঞ্চন্নং ইন্দ্রিযানং অস্সাদং পজানাতি? কতিহাকারেহি পঞ্চন্নং ইন্দ্রিযানং আদীনৰো হোতি; কতিহাকারেহি পঞ্চন্নং ইন্দ্রিযানং আদীনৰং পজানাতি? কতিহাকারেহি পঞ্চন্নং ইন্দ্রিযানং নিস্সরণং হোতি; কতিহাকারেহি পঞ্চন্নং ইন্দ্রিযানং নিস্সরণং পজানাতি?

চত্তারীসায আকারেহি পঞ্চন্নং ইন্দ্রিযানং সমুদযো হোতি; চত্তারীসায আকারেহি পঞ্চন্নং ইন্দ্রিযানং সমুদযং পজানাতি. চত্তারীসায আকারেহি পঞ্চন্নং ইন্দ্রিযানং অত্থঙ্গমো হোতি; চত্তারীসায আকারেহি পঞ্চন্নং ইন্দ্রিযানং অত্থঙ্গমং পজানাতি. পঞ্চৰীসতিযা আকারেহি পঞ্চন্নং ইন্দ্রিযানং অস্সাদো হোতি; পঞ্চৰীসতিযা আকারেহি পঞ্চন্নং ইন্দ্রিযানং অস্সাদং পজানাতি. পঞ্চৰীসতিযা আকারেহি পঞ্চন্নং ইন্দ্রিযানং আদীনৰো হোতি; পঞ্চৰীসতিযা আকারেহি পঞ্চন্নং ইন্দ্রিযানং আদীনৰং পজানাতি. অসীতিসতং আকারেহি [অসীতিসতাকারেহি (স্যা.)] পঞ্চন্নং ইন্দ্রিযানং নিস্সরণং হোতি; অসীতিসতং আকারেহি পঞ্চন্নং ইন্দ্রিযানং নিস্সরণং পজানাতি.

কতমেহি চত্তারীসায আকারেহি পঞ্চন্নং ইন্দ্রিযানং সমুদযো হোতি; কতমেহি চত্তারীসায আকারেহি পঞ্চন্নং ইন্দ্রিযানং সমুদযং পজানাতি? অধিমোক্খত্থায আৰজ্জনায সমুদযো সদ্ধিন্দ্রিযস্স সমুদযো হোতি, অধিমোক্খৰসেন ছন্দস্স সমুদযো সদ্ধিন্দ্রিযস্স সমুদযো হোতি, অধিমোক্খৰসেন মনসিকারস্স সমুদযো সদ্ধিন্দ্রিযস্স সমুদযো হোতি, সদ্ধিন্দ্রিযস্স ৰসেন একত্তুপট্ঠানং সদ্ধিন্দ্রিযস্স সমুদযো হোতি; পগ্গহত্থায আৰজ্জনায সমুদযো ৰীরিযিন্দ্রিযস্স সমুদযো হোতি, পগ্গহৰসেন ছন্দস্স সমুদযো ৰীরিযিন্দ্রিযস্স সমুদযো হোতি, পগ্গহৰসেন মনসিকারস্স সমুদযো ৰীরিযিন্দ্রিযস্স সমুদযো হোতি, ৰীরিযিন্দ্রিযস্স ৰসেন একত্তুপট্ঠানং ৰীরিযিন্দ্রিযস্স সমুদযো হোতি; উপট্ঠানত্থায আৰজ্জনায সমুদযো সতিন্দ্রিযস্স সমুদযো হোতি, উপট্ঠানৰসেন ছন্দস্স সমুদযো সতিন্দ্রিযস্স সমুদযো হোতি, উপট্ঠানৰসেন মনসিকারস্স সমুদযো সতিন্দ্রিযস্স সমুদযো হোতি, সতিন্দ্রিযস্স ৰসেন একত্তুপট্ঠানং সতিন্দ্রিযস্স সমুদযো হোতি; অৰিক্খেপত্থায আৰজ্জনায সমুদযো সমাধিন্দ্রিযস্স সমুদযো হোতি, অৰিক্খেপৰসেন ছন্দস্স সমুদযো সমাধিন্দ্রিযস্স সমুদযো হোতি, অৰিক্খেপৰসেন মনসিকারস্স সমুদযো সমাধিন্দ্রিযস্স সমুদযো হোতি, সমাধিন্দ্রিযস্স ৰসেন একত্তুপট্ঠানং সমাধিন্দ্রিযস্স সমুদযো হোতি; দস্সনত্থায আৰজ্জনায সমুদযো পঞ্ঞিন্দ্রিযস্স সমুদযো হোতি, দস্সনৰসেন ছন্দস্স সমুদযো পঞ্ঞিন্দ্রিযস্স সমুদযো হোতি, দস্সনৰসেন মনসিকারস্স সমুদযো পঞ্ঞিন্দ্রিযস্স সমুদযো হোতি, পঞ্ঞিন্দ্রিযস্স ৰসেন একত্তুপট্ঠানং পঞ্ঞিন্দ্রিযস্স সমুদযো হোতি. অধিমোক্খত্থায আৰজ্জনায সমুদযো সদ্ধিন্দ্রিযস্স সমুদযো হোতি, পগ্গহত্থায আৰজ্জনায সমুদযো ৰীরিযিন্দ্রিযস্স সমুদযো হোতি, উপট্ঠানত্থায আৰজ্জনায সমুদযো সতিন্দ্রিযস্স সমুদযো হোতি, অৰিক্খেপত্থায আৰজ্জনায সমুদযো সমাধিন্দ্রিযস্স সমুদযো হোতি, দস্সনত্থায আৰজ্জনায সমুদযো পঞ্ঞিন্দ্রিযস্স সমুদযো হোতি. অধিমোক্খৰসেন ছন্দস্স সমুদযো সদ্ধিন্দ্রিযস্স সমুদযো হোতি, পগ্গহৰসেন ছন্দস্স সমুদযো ৰীরিযিন্দ্রিযস্স সমুদযো হোতি, উপট্ঠানৰসেন ছন্দস্স সমুদযো সতিন্দ্রিযস্স সমুদযো হোতি, অৰিক্খেপৰসেন ছন্দস্স সমুদযো সমাধিন্দ্রিযস্স সমুদযো হোতি, দস্সনৰসেন ছন্দস্স সমুদযো পঞ্ঞিন্দ্রিযস্স সমুদযো হোতি. অধিমোক্খৰসেন মনসিকারস্স সমুদযো সদ্ধিন্দ্রিযস্স সমুদযো হোতি, পগ্গহৰসেন মনসিকারস্স সমুদযো ৰীরিযিন্দ্রিযস্স সমুদযো হোতি, উপট্ঠানৰসেন মনসিকারস্স সমুদযো সতিন্দ্রিযস্স সমুদযো হোতি, অৰিক্খেপৰসেন মনসিকারস্স সমুদযো সমাধিন্দ্রিযস্স সমুদযো হোতি, দস্সনৰসেন মনসিকারস্স সমুদযো পঞ্ঞিন্দ্রিযস্স সমুদযো হোতি. সদ্ধিন্দ্রিযস্স ৰসেন একত্তুপট্ঠানং সদ্ধিন্দ্রিযস্স সমুদযো হোতি ৰীরিযিন্দ্রিযস্স ৰসেন একত্তুপট্ঠানং ৰীরিযিন্দ্রিযস্স সমুদযো হোতি, সতিন্দ্রিযস্স ৰসেন একত্তুপট্ঠানং সতিন্দ্রিযস্স সমুদযো হোতি, সমাধিন্দ্রিযস্স ৰসেন একত্তুপট্ঠানং সমাধিন্দ্রিযস্স সমুদযো হোতি, পঞ্ঞিন্দ্রিযস্স ৰসেন একত্তুপট্ঠানং পঞ্ঞিন্দ্রিযস্স সমুদযো হোতি.

ইমেহি চত্তারীসায আকারেহি পঞ্চন্নং ইন্দ্রিযানং সমুদযো হোতি, ইমেহি চত্তারীসায আকারেহি পঞ্চন্নং ইন্দ্রিযানং সমুদযং পজানাতি.

কতমেহি চত্তারীসায আকারেহি পঞ্চন্নং ইন্দ্রিযানং অত্থঙ্গমো হোতি; কতমেহি চত্তারীসায আকারেহি পঞ্চন্নং ইন্দ্রিযানং অত্থঙ্গমং পজানাতি? অধিমোক্খত্থায আৰজ্জনায অত্থঙ্গমো সদ্ধিন্দ্রিযস্স অত্থঙ্গমো হোতি, অধিমোক্খৰসেন ছন্দস্স অত্থঙ্গমো সদ্ধিন্দ্রিযস্স অত্থঙ্গমো হোতি, অধিমোক্খৰসেন মনসিকারস্স অত্থঙ্গমো সদ্ধিন্দ্রিযস্স অত্থঙ্গমো হোতি, সদ্ধিন্দ্রিযস্স ৰসেন একত্তঅনুপট্ঠানং [একত্তং অনুপট্ঠানং (স্যা.)] সদ্ধিন্দ্রিযস্স ৰসেন অত্থঙ্গমো হোতি; পগ্গহত্থায আৰজ্জনায অত্থঙ্গমো ৰীরিযিন্দ্রিযস্স অত্থঙ্গমো হোতি, পগ্গহৰসেন ছন্দস্স অত্থঙ্গমো ৰীরিযিন্দ্রিযস্স অত্থঙ্গমো হোতি, পগ্গহৰসেন মনসিকারস্স অত্থঙ্গমো ৰীরিযিন্দ্রিযস্স অত্থঙ্গমো হোতি, ৰীরিযিন্দ্রিযস্স ৰসেন একত্তঅনুপট্ঠানং ৰীরিযিন্দ্রিযস্স অত্থঙ্গমো হোতি; উপট্ঠানত্থায আৰজ্জনায অত্থঙ্গমো সতিন্দ্রিযস্স অত্থঙ্গমো হোতি, উপট্ঠানৰসেন ছন্দস্স অত্থঙ্গমো সতিন্দ্রিযস্স অত্থঙ্গমো হোতি, উপট্ঠানৰসেন মনসিকারস্স অত্থঙ্গমো সতিন্দ্রিযস্স অত্থঙ্গমো হোতি, সতিন্দ্রিযস্স ৰসেন একত্তঅনুপট্ঠানং সতিন্দ্রিযস্স অত্থঙ্গমো হোতি; অৰিক্খেপত্থায আৰজ্জনায অত্থঙ্গমো সমাধিন্দ্রিযস্স অত্থঙ্গমো হোতি, অৰিক্খেপৰসেন ছন্দস্স অত্থঙ্গমো সমাধিন্দ্রিযস্স অত্থঙ্গমো হোতি, অৰিক্খেপৰসেন মনসিকারস্স অত্থঙ্গমো সমাধিন্দ্রিযস্স অত্থঙ্গমো হোতি, সমাধিন্দ্রিযস্স ৰসেন একত্তঅনুপট্ঠানং সমাধিন্দ্রিযস্স অত্থঙ্গমো হোতি; দস্সনত্থায আৰজ্জনায অত্থঙ্গমো পঞ্ঞিন্দ্রিযস্স অত্থঙ্গমো হোতি, দস্সনৰসেন ছন্দস্স অত্থঙ্গমো পঞ্ঞিন্দ্রিযস্স অত্থঙ্গমো হোতি, দস্সনৰসেন মনসিকারস্স অত্থঙ্গমো পঞ্ঞিন্দ্রিযস্স অত্থঙ্গমো হোতি, পঞ্ঞিন্দ্রিযস্স ৰসেন একত্তঅনুপট্ঠানং পঞ্ঞিন্দ্রিযস্স অত্থঙ্গমো হোতি.

অধিমোক্খত্থায আৰজ্জনায অত্থঙ্গমো সদ্ধিন্দ্রিযস্স অত্থঙ্গমো হোতি, পগ্গহত্থায আৰজ্জনায অত্থঙ্গমো ৰীরিযিন্দ্রিযস্স অত্থঙ্গমো হোতি, উপট্ঠানত্থায আৰজ্জনায অত্থঙ্গমো সতিন্দ্রিযস্স অত্থঙ্গমো হোতি, অৰিক্খেপত্থায আৰজ্জনায অত্থঙ্গমো সমাধিন্দ্রিযস্স অত্থঙ্গমো হোতি, দস্সনত্থায আৰজ্জনায অত্থঙ্গমো পঞ্ঞিন্দ্রিযস্স অত্থঙ্গমো হোতি. অধিমোক্খৰসেন ছন্দস্স অত্থঙ্গমো সদ্ধিন্দ্রিযস্স অত্থঙ্গমো হোতি, পগ্গহৰসেন ছন্দস্স অত্থঙ্গমো ৰীরিযিন্দ্রিযস্স অত্থঙ্গমো হোতি, উপট্ঠানৰসেন ছন্দস্স অত্থঙ্গমো সতিন্দ্রিযস্স অত্থঙ্গমো হোতি, অৰিক্খেপৰসেন ছন্দস্স অত্থঙ্গমো সমাধিন্দ্রিযস্স অত্থঙ্গমো হোতি, দস্সনৰসেন ছন্দস্স অত্থঙ্গমো পঞ্ঞিন্দ্রিযস্স অত্থঙ্গমো হোতি. অধিমোক্খৰসেন মনসিকারস্স অত্থঙ্গমো সদ্ধিন্দ্রিযস্স অত্থঙ্গমো হোতি, পগ্গহৰসেন মনসিকারস্স অত্থঙ্গমো ৰীরিযিন্দ্রিযস্স অত্থঙ্গমো হোতি, উপট্ঠানৰসেন মনসিকারস্স অত্থঙ্গমো সতিন্দ্রিযস্স অত্থঙ্গমো হোতি, অৰিক্খেপৰসেন মনসিকারস্স অত্থঙ্গমো সমাধিন্দ্রিযস্স অত্থঙ্গমো হোতি, দস্সনৰসেন মনসিকারস্স অত্থঙ্গমো পঞ্ঞিন্দ্রিযস্স অত্থঙ্গমো হোতি. সদ্ধিন্দ্রিযস্স ৰসেন একত্তঅনুপট্ঠানং সদ্ধিন্দ্রিযস্স অত্থঙ্গমো হোতি, ৰীরিযিন্দ্রিযস্স ৰসেন একত্তঅনুপট্ঠানং ৰীরিযিন্দ্রিযস্স অত্থঙ্গমো হোতি, সতিন্দ্রিযস্স ৰসেন একত্তঅনুপট্ঠানং সতিন্দ্রিযস্স অত্থঙ্গমো হোতি, সমাধিন্দ্রিযস্স ৰসেন একত্তঅনুপট্ঠানং সমাধিন্দ্রিযস্স অত্থঙ্গমো হোতি, পঞ্ঞিন্দ্রিযস্স ৰসেন একত্তঅনুপট্ঠানং পঞ্ঞিন্দ্রিযস্স অত্থঙ্গমো হোতি.

ইমেহি চত্তারীসায আকারেহি পঞ্চন্নং ইন্দ্রিযানং অত্থঙ্গমো হোতি; ইমেহি চত্তারীসায আকারেহি পঞ্চন্নং ইন্দ্রিযানং অত্থঙ্গমং পজানাতি.

ক. অস্সাদনিদ্দেসো

১৮৯. কতমেহি পঞ্চৰীসতিযা আকারেহি পঞ্চন্নং ইন্দ্রিযানং অস্সাদো হোতি; কতমেহি পঞ্চৰীসতিযা আকারেহি পঞ্চন্নং ইন্দ্রিযানং অস্সাদং পজানাতি? অস্সদ্ধিযস্স অনুপট্ঠানং সদ্ধিন্দ্রিযস্স অস্সাদো হোতি, অস্সদ্ধিযপরিল়াহস্স অনুপট্ঠানং সদ্ধিন্দ্রিযস্স অস্সাদো হোতি, অধিমোক্খচরিযায ৰেসারজ্জং সদ্ধিন্দ্রিযস্স অস্সাদো হোতি, সন্তো চ ৰিহারাধিগমো সদ্ধিন্দ্রিযস্স অস্সাদো হোতি, যং সদ্ধিন্দ্রিযং পটিচ্চ উপ্পজ্জতি সুখং সোমনস্সং অযং সদ্ধিন্দ্রিযস্স অস্সাদো.

কোসজ্জস্স অনুপট্ঠানং ৰীরিযিন্দ্রিযস্স অস্সাদো হোতি, কোসজ্জপরিল়াহস্স অনুপট্ঠানং ৰীরিযিন্দ্রিযস্স অস্সাদো হোতি, পগ্গহচরিযায ৰেসারজ্জং ৰীরিযিন্দ্রিযস্স অস্সাদো হোতি, সন্তো চ ৰিহারাধিগমো ৰীরিযিন্দ্রিযস্স অস্সাদো হোতি, যং ৰীরিযিন্দ্রিযং পটিচ্চ উপ্পজ্জতি সুখং সোমনস্সং অযং ৰীরিযিন্দ্রিযস্স অস্সাদো.

পমাদস্স অনুপট্ঠানং সতিন্দ্রিযস্স অস্সাদো হোতি, পমাদপরিল়াহস্স অনুপট্ঠানং সতিন্দ্রিযস্স অস্সাদো হোতি, উপট্ঠানচরিযায ৰেসারজ্জং সতিন্দ্রিযস্স অস্সাদো হোতি, সন্তো চ ৰিহারাধিগমো সতিন্দ্রিযস্স অস্সাদো হোতি, যং সতিন্দ্রিযং পটিচ্চ উপ্পজ্জতি সুখং সোমনস্সং অযং সতিন্দ্রিযস্স অস্সাদো.

উদ্ধচ্চস্স অনুপট্ঠানং সমাধিন্দ্রিযস্স অস্সাদো হোতি, উদ্ধচ্চপরিল়াহস্স অনুপট্ঠানং সমাধিন্দ্রিযস্স অস্সাদো হোতি, অৰিক্খেপচরিযায ৰেসারজ্জং সমাধিন্দ্রিযস্স অস্সাদো হোতি, সন্তো চ ৰিহারাধিগমো সমাধিন্দ্রিযস্স অস্সাদো হোতি, যং সমাধিন্দ্রিযং পটিচ্চ উপ্পজ্জতি সুখং সোমনস্সং অযং সমাধিন্দ্রিযস্স অস্সাদো.

অৰিজ্জায অনুপট্ঠানং পঞ্ঞিন্দ্রিযস্স অস্সাদো হোতি, অৰিজ্জাপরিল়াহস্স অনুপট্ঠানং পঞ্ঞিন্দ্রিযস্স অস্সাদো হোতি, দস্সনচরিযায ৰেসারজ্জং পঞ্ঞিন্দ্রিযস্স অস্সাদো হোতি, সন্তো চ ৰিহারাধিগমো পঞ্ঞিন্দ্রিযস্স অস্সাদো হোতি, যং পঞ্ঞিন্দ্রিযং পটিচ্চ উপ্পজ্জতি সুখং সোমনস্সং অযং পঞ্ঞিন্দ্রিযস্স অস্সাদো.

ইমেহি পঞ্চৰীসতিযা আকারেহি পঞ্চন্নং ইন্দ্রিযানং অস্সাদো হোতি; ইমেহি পঞ্চৰীসতিযা আকারেহি পঞ্চন্নং ইন্দ্রিযানং অস্সাদং পজানাতি.

খ. আদীনৰনিদ্দেসো

১৯০. কতমেহি পঞ্চৰীসতিযা আকারেহি পঞ্চন্নং ইন্দ্রিযানং আদীনৰো হোতি; কতমেহি পঞ্চৰীসতিযা আকারেহি পঞ্চন্নং ইন্দ্রিযানং আদীনৰং পজানাতি? অস্সদ্ধিযস্স উপট্ঠানং সদ্ধিন্দ্রিযস্স আদীনৰো হোতি, অস্সদ্ধিযপরিল়াহস্স উপট্ঠানং সদ্ধিন্দ্রিযস্স আদীনৰো হোতি, অনিচ্চট্ঠেন সদ্ধিন্দ্রিযস্স আদীনৰো হোতি, দুক্খট্ঠেন সদ্ধিন্দ্রিযস্স আদীনৰো হোতি, অনত্তট্ঠেন সদ্ধিন্দ্রিযস্স আদীনৰো হোতি.

কোসজ্জস্স উপট্ঠানং ৰীরিযিন্দ্রিযস্স আদীনৰো হোতি, কোসজ্জপরিল়াহস্স উপট্ঠানং ৰীরিযিন্দ্রিযস্স আদীনৰো হোতি, অনিচ্চট্ঠেন ৰীরিযিন্দ্রিযস্স আদীনৰো হোতি, দুক্খট্ঠেন…পে… অনত্তট্ঠেন ৰীরিযিন্দ্রিযস্স আদীনৰো হোতি.

পমাদস্স উপট্ঠানং সতিন্দ্রিযস্স আদীনৰো হোতি, পমাদপরিল়াহস্স উপট্ঠানং সতিন্দ্রিযস্স আদীনৰো হোতি, অনিচ্চট্ঠেন সতিন্দ্রিযস্স আদীনৰো হোতি, দুক্খট্ঠেন…পে… অনত্তট্ঠেন সতিন্দ্রিযস্স আদীনৰো হোতি.

উদ্ধচ্চস্স উপট্ঠানং সমাধিন্দ্রিযস্স আদীনৰো হোতি, উদ্ধচ্চপরিল়াহস্স উপট্ঠানং সমাধিন্দ্রিযস্স আদীনৰো হোতি, অনিচ্চট্ঠেন সমাধিন্দ্রিযস্স আদীনৰো হোতি, দুক্খট্ঠেন…পে… অনত্তট্ঠেন সমাধিন্দ্রিযস্স আদীনৰো হোতি.

অৰিজ্জায উপট্ঠানং পঞ্ঞিন্দ্রিযস্স আদীনৰো হোতি, অৰিজ্জাপরিল়াহস্স উপট্ঠানং পঞ্ঞিন্দ্রিযস্স আদীনৰো হোতি, অনিচ্চট্ঠেন পঞ্ঞিন্দ্রিযস্স আদীনৰো হোতি, দুক্খট্ঠেন পঞ্ঞিন্দ্রিযস্স আদীনৰো হোতি, অনত্তট্ঠেন পঞ্ঞিন্দ্রিযস্স আদীনৰো হোতি.

ইমেহি পঞ্চৰীসতিযা আকারেহি পঞ্চন্নং ইন্দ্রিযানং আদীনৰো হোতি; ইমেহি পঞ্চৰীসতিযা আকারেহি পঞ্চন্নং ইন্দ্রিযানং আদীনৰং পজানাতি.

গ. নিস্সরণনিদ্দেসো

১৯১. কতমেহি অসীতিসতং আকারেহি পঞ্চন্নং ইন্দ্রিযানং নিস্সরণং হোতি; কতমেহি অসীতিসতং আকারেহি পঞ্চন্নং ইন্দ্রিযানং নিস্সরণং পজানাতি? অধিমোক্খট্ঠেন সদ্ধিন্দ্রিযং অস্সদ্ধিযা নিস্সটং হোতি, অস্সদ্ধিযপরিল়াহা নিস্সটং হোতি, তদনুৰত্তককিলেসেহি চ খন্ধেহি চ নিস্সটং হোতি, বহিদ্ধা চ সব্বনিমিত্তেহি নিস্সটং হোতি, ততো পণীততরসদ্ধিন্দ্রিযস্স পটিলাভা পুরিমতরসদ্ধিন্দ্রিযা নিস্সটং হোতি; পগ্গহট্ঠেন ৰীরিযিন্দ্রিযং কোসজ্জা নিস্সটং হোতি, কোসজ্জপরিল়াহা নিস্সটং হোতি, তদনুৰত্তককিলেসেহি চ খন্ধেহি চ নিস্সটং হোতি, বহিদ্ধা চ সব্বনিমিত্তেহি নিস্সটং হোতি, ততো পণীততরৰীরিযিন্দ্রিযস্স পটিলাভা পুরিমতরৰীরিযিন্দ্রিযা নিস্সটং হোতি; উপট্ঠানট্ঠেন সতিন্দ্রিযং পমাদা নিস্সটং হোতি, পমাদপরিল়াহা নিস্সটং হোতি, তদনুৰত্তককিলেসেহি চ খন্ধেহি চ নিস্সটং হোতি, বহিদ্ধা চ সব্বনিমিত্তেহি নিস্সটং হোতি, ততো পণীততরসতিন্দ্রিযস্স পটিলাভা পুরিমতরসতিন্দ্রিযা নিস্সটং হোতি; অৰিক্খেপট্ঠেন সমাধিন্দ্রিযং উদ্ধচ্চা নিস্সটং হোতি, উদ্ধচ্চপরিল়াহা নিস্সটং হোতি, তদনুৰত্তককিলেসেহি চ খন্ধেহি চ নিস্সটং হোতি, বহিদ্ধা চ সব্বনিমিত্তেহি নিস্সটং হোতি, ততো পণীততরসমাধিন্দ্রিযস্স পটিলাভা পুরিমতরসমাধিন্দ্রিযা নিস্সটং হোতি; দস্সনট্ঠেন পঞ্ঞিন্দ্রিযং অৰিজ্জায নিস্সটং হোতি, অৰিজ্জাপরিল়াহা নিস্সটং হোতি, তদনুৰত্তককিলেসেহি চ খন্ধেহি চ নিস্সটং হোতি, বহিদ্ধা চ সব্বনিমিত্তেহি নিস্সটং হোতি, ততো পণীততরপঞ্ঞিন্দ্রিযস্স পটিলাভা পুরিমতরপঞ্ঞিন্দ্রিযা নিস্সটং হোতি.

১৯২. পুব্বভাগে পঞ্চহি ইন্দ্রিযেহি পঠমজ্ঝানৰসেন পঞ্চিন্দ্রিযানি নিস্সটানি হোন্তি, পঠমে ঝানে পঞ্চহিন্দ্রিযেহি দুতিযজ্ঝানৰসেন পঞ্চিন্দ্রিযানি নিস্সটানি হোন্তি, দুতিযে ঝানে পঞ্চহিন্দ্রিযেহি ততিযজ্ঝানৰসেন পঞ্চিন্দ্রিযানি নিস্সটানি হোন্তি, ততিযে ঝানে পঞ্চহিন্দ্রিযেহি চতুত্থজ্ঝানৰসেন পঞ্চিন্দ্রিযানি নিস্সটানি হোন্তি, চতুত্থে ঝানে পঞ্চহিন্দ্রিযেহি আকাসানঞ্চাযতনসমাপত্তিৰসেন পঞ্চিন্দ্রিযানি নিস্সটানি হোন্তি, আকাসানঞ্চাযতনসমাপত্তিযা পঞ্চহিন্দ্রিযেহি ৰিঞ্ঞাণঞ্চাযতনসমাপত্তিৰসেন পঞ্চিন্দ্রিযানি নিস্সটানি হোন্তি, ৰিঞ্ঞাণঞ্চাযতনসমাপত্তিযা পঞ্চহিন্দ্রিযেহি আকিঞ্চঞ্ঞাযতনসমাপত্তিৰসেন পঞ্চিন্দ্রিযানি নিস্সটানি হোন্তি, আকিঞ্চঞ্ঞাযতনসমাপত্তিযা পঞ্চহিন্দ্রিযেহি নেৰসঞ্ঞানাসঞ্ঞাযতনসমাপত্তিৰসেন পঞ্চিন্দ্রিযানি নিস্সটানি হোন্তি, নেৰসঞ্ঞানাসঞ্ঞাযতনসমাপত্তিযা পঞ্চহিন্দ্রিযেহি অনিচ্চানুপস্সনাৰসেন পঞ্চিন্দ্রিযানি নিস্সটানি হোন্তি.

অনিচ্চানুপস্সনা পঞ্চহিন্দ্রিযেহি দুক্খানুপস্সনাৰসে পঞ্চিন্দ্রিযানি নিস্সটানি হোন্তি, দুক্খানুপস্সনা পঞ্চহিন্দ্রিযেহি অনত্তানুপস্সনাৰসে পঞ্চিন্দ্রিযানি নিস্সটানি হোন্তি, অনত্তানুপস্সনা পঞ্চহিন্দ্রিযেহি নিব্বিদানুপস্সনাৰসেন পঞ্চিন্দ্রিযানি নিস্সটানি হোন্তি, নিব্বিদানুপস্সনায পঞ্চহিন্দ্রিযেহি ৰিরাগানুপস্সনাৰসেন পঞ্চিন্দ্রিযানি নিস্সটানি হোন্তি, ৰিরাগানুপস্সনায পঞ্চহিন্দ্রিযেহি নিরোধানুপস্সনাৰসেন পঞ্চিন্দ্রিযানি নিস্সটানি হোন্তি, নিরোধানুপস্সনায পঞ্চহিন্দ্রিযেহি পটিনিস্সগ্গানুপস্সনাৰসেন পঞ্চিন্দ্রিযানি নিস্সটানি হোন্তি, পটিনিস্সগ্গানুপস্সনায পঞ্চহিন্দ্রিযেহি খযানুপস্সনাৰসেন পঞ্চিন্দ্রিযানি নিস্সটানি হোন্তি, খযানুপস্সনায পঞ্চহিন্দ্রিযেহি ৰযানুপস্সনাৰসেন পঞ্চিন্দ্রিযানি নিস্সটানি হোন্তি, ৰযানুপস্সনায পঞ্চহিন্দ্রিযেহি ৰিপরিণামানুপস্সনাৰসেন পঞ্চিন্দ্রিযানি নিস্সটানি হোন্তি, ৰিপরিণামানুপস্সনায পঞ্চহিন্দ্রিযেহি অনিমিত্তানুপস্সনাৰসেন পঞ্চিন্দ্রিযানি নিস্সটানি হোন্তি, অনিমিত্তানুপস্সনায পঞ্চহিন্দ্রিযেহি অপ্পণিহিতানুপস্সনাৰসেন পঞ্চিন্দ্রিযানি নিস্সটানি হোন্তি, অপ্পণিহিতানুপস্সনায পঞ্চহিন্দ্রিযেহি সুঞ্ঞতানুপস্সনাৰসেন পঞ্চিন্দ্রিযানি নিস্সটানি হোন্তি সুঞ্ঞতানুপস্সনায পঞ্চহিন্দ্রিযেহি অধিপঞ্ঞাধম্মৰিপস্সনাৰসেন পঞ্চিন্দ্রিযানি নিস্সটানি হোন্তি. অধিপঞ্ঞাধম্মৰিপস্সনায পঞ্চহিন্দ্রিযেহি যথাভূতঞাণদস্সনৰসেন পঞ্চিন্দ্রিযানি নিস্সটানি হোন্তি, যথাভূতঞাণদস্সনে পঞ্চহিন্দ্রিযেহি আদীনৰানুপস্সনাৰসেন পঞ্চিন্দ্রিযানি নিস্সটানি হোন্তি, আদীনৰানুপস্সনায পঞ্চহিন্দ্রিযেহি পটিসঙ্খানুপস্সনাৰসেন পঞ্চিন্দ্রিযানি নিস্সটানি হোন্তি, পটিসঙ্খানুপস্সনায পঞ্চহিন্দ্রিযেহি ৰিৰট্টনানুপস্সনাৰসেন পঞ্চিন্দ্রিযানি নিস্সটানি হোন্তি. ৰিৰট্টনানুপস্সনায পঞ্চহিন্দ্রিযেহি সোতাপত্তিমগ্গৰসেন পঞ্চিন্দ্রিযানি নিস্সটানি হোন্তি.

সোতাপত্তিমগ্গে পঞ্চহিন্দ্রিযেহি সোতাপত্তিফলসমাপত্তিৰসেন পঞ্চিন্দ্রিযানি নিস্সটানি হোন্তি, সোতাপত্তিফলসমাপত্তিযা পঞ্চহিন্দ্রিযেহি সকদাগামিমগ্গৰসেন পঞ্চিন্দ্রিযানি নিস্সটানি হোন্তি, সকদাগামিমগ্গে পঞ্চহিন্দ্রিযেহি সকদাগামিফলসমাপত্তিৰসেন পঞ্চিন্দ্রিযানি নিস্সটানি হোন্তি, সকদাগামিফলসমাপত্তিযা পঞ্চহিন্দ্রিযেহি অনাগামিমগ্গৰসেন পঞ্চিন্দ্রিযানি নিস্সটানি হোন্তি, অনাগামিমগ্গে পঞ্চহিন্দ্রিযেহি অনাগামিফলসমাপত্তিৰসেন পঞ্চিন্দ্রিযানি নিস্সটানি হোন্তি, অনাগামিফলসমাপত্তিযা পঞ্চহিন্দ্রিযেহি অরহত্তমগ্গৰসেন পঞ্চিন্দ্রিযানি নিস্সটানি হোন্তি, অরহত্তমগ্গে পঞ্চহিন্দ্রিযেহি অরহত্তফলসমাপত্তিৰসেন পঞ্চিন্দ্রিযানি নিস্সটানি হোন্তি.

নেক্খম্মে পঞ্চিন্দ্রিযানি কামচ্ছন্দতো নিস্সটানি হোন্তি, অব্যাপাদে পঞ্চিন্দ্রিযানি ব্যাপাদতো নিস্সটানি হোন্তি, আলোকসঞ্ঞায পঞ্চিন্দ্রিযানি থিনমিদ্ধতো নিস্সটানি হোন্তি, অৰিক্খেপে পঞ্চিন্দ্রিযানি উদ্ধচ্চতো নিস্সটানি হোন্তি, ধম্মৰৰত্থানে পঞ্চিন্দ্রিযানি ৰিচিকিচ্ছায নিস্সটানি হোন্তি, ঞাণে পঞ্চিন্দ্রিযানি অৰিজ্জায নিস্সটানি হোন্তি, পামোজ্জে পঞ্চিন্দ্রিযানি অরতিযা নিস্সটানি হোন্তি.

১৯৩. পঠমে ঝানে পঞ্চিন্দ্রিযানি নীৰরণেহি নিস্সটানি হোন্তি, দুতিযে ঝানে পঞ্চিন্দ্রিযানি ৰিতক্কৰিচারেহি নিস্সটানি হোন্তি, ততিযে ঝানে পঞ্চিন্দ্রিযানি পীতিযা নিস্সটানি হোন্তি, চতুত্থে ঝানে পঞ্চিন্দ্রিযানি সুখদুক্খেহি নিস্সটানি হোন্তি, আকাসানঞ্চাযতনসমাপত্তিযা পঞ্চিন্দ্রিযানি রূপসঞ্ঞায পটিঘসঞ্ঞায নানত্তসঞ্ঞায নিস্সটানি হোন্তি, ৰিঞ্ঞাণঞ্চাযতনসমাপত্তিযা পঞ্চিন্দ্রিযানি আকাসানঞ্চাযতনসঞ্ঞায নিস্সটানি হোন্তি, আকিঞ্চঞ্ঞাযতনসমাপত্তিযা পঞ্চিন্দ্রিযানি ৰিঞ্ঞাণঞ্চাযতনসঞ্ঞায নিস্সটানি হোন্তি, নেৰসঞ্ঞানাসঞ্ঞাযতনসমাপত্তিযা পঞ্চিন্দ্রিযানি আকিঞ্চঞ্ঞাযতনসঞ্ঞায নিস্সটানি হোন্তি.

অনিচ্চানুপস্সনা পঞ্চিন্দ্রিযানি নিচ্চসঞ্ঞায নিস্সটানি হোন্তি, দুক্খানুপস্সনা পঞ্চিন্দ্রিযানি সুখসঞ্ঞায নিস্সটানি হোন্তি, অনত্তানুপস্সনা পঞ্চিন্দ্রিযানি অত্তসঞ্ঞায নিস্সটানি হোন্তি, নিব্বিদানুপস্সনায পঞ্চিন্দ্রিযানি নন্দিযা নিস্সটানি হোন্তি, ৰিরাগানুপস্সনায পঞ্চিন্দ্রিযানি রাগতো নিস্সটানি হোন্তি, নিরোধানুপস্সনায পঞ্চিন্দ্রিযানি সমুদযতো নিস্সটানি হোন্তি, পটিনিস্সগ্গানুপস্সনায পঞ্চিন্দ্রিযানি আদানতো নিস্সটানি হোন্তি, খযানুপস্সনায পঞ্চিন্দ্রিযানি ঘনসঞ্ঞায নিস্সটানি হোন্তি, ৰযানুপস্সনায পঞ্চিন্দ্রিযানি আযূহনতো নিস্সটানি হোন্তি, ৰিপরিণামানুপস্সনায পঞ্চিন্দ্রিযানি ধুৰসঞ্ঞায নিস্সটানি হোন্তি, অনিমিত্তানুপস্সনায পঞ্চিন্দ্রিযানি নিমিত্ততো নিস্সটানি হোন্তি, অপ্পণিহিতানুপস্সনায পঞ্চিন্দ্রিযানি পণিধিযা নিস্সটানি হোন্তি, সুঞ্ঞতানুপস্সনায পঞ্চিন্দ্রিযানি অভিনিৰেসতো নিস্সটানি হোন্তি. অধিপঞ্ঞাধম্মৰিপস্সনায পঞ্চিন্দ্রিযানি সারাদানাভিনিৰেসতো নিস্সটানি হোন্তি, যথাভূতঞাণদস্সনে পঞ্চিন্দ্রিযানি সম্মোহাভিনিৰেসতো নিস্সটানি হোন্তি, আদীনৰানুপস্সনায পঞ্চিন্দ্রিযানি আলযাভিনিৰেসতো নিস্সটানি হোন্তি, পটিসঙ্খানুপস্সনায পঞ্চিন্দ্রিযানি অপ্পটিসঙ্খায নিস্সটানি হোন্তি, ৰিৰট্টনানুপস্সনায পঞ্চিন্দ্রিযানি সঞ্ঞোগাভিনিৰেসতো নিস্সটানি হোন্তি.

সোতাপত্তিমগ্গে পঞ্চিন্দ্রিযানি দিট্ঠেকট্ঠেহি কিলেসেহি নিস্সটানি হোন্তি, সকদাগামিমগ্গে পঞ্চিন্দ্রিযানি ওল়ারিকেহি কিলেসেহি নিস্সটানি হোন্তি, অনাগামিমগ্গে পঞ্চিন্দ্রিযানি অনুসহগতেহি কিলেসেহি নিস্সটানি হোন্তি, অরহত্তমগ্গে পঞ্চিন্দ্রিযানি সব্বকিলেসেহি নিস্সটানি হোন্তি, সব্বেসঞ্ঞেৰ খীণাসৰানং তত্থ তত্থ পঞ্চিন্দ্রিযানি নিস্সটানি চেৰ হোন্তি সুনিস্সটানি চ পটিপ্পস্সদ্ধানি চ সুপ্পটিপ্পস্সদ্ধানি চ.

ইমেহি অসীতিসতং আকারেহি পঞ্চন্নং ইন্দ্রিযানং নিস্সরণং হোতি; ইমেহি অসীতিসতং আকারেহি পঞ্চন্নং ইন্দ্রিযানং নিস্সরণং পজানাতি.

সুত্তন্তনিদ্দেসো দুতিযো.

পঠমভাণৰারো.

৩. ততিযসুত্তন্তনিদ্দেসো

১৯৪. সাৰত্থিনিদানং [সং. নি. ৫.৪৭৮-৪৭৯ পস্সিতব্বা]. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং. কত্থ চ, ভিক্খৰে, সদ্ধিন্দ্রিযং দট্ঠব্বং? চতূসু সোতাপত্তিযঙ্গেসু – এত্থ সদ্ধিন্দ্রিযং দট্ঠব্বং. কত্থ চ, ভিক্খৰে, ৰীরিযিন্দ্রিযং দট্ঠব্বং? চতূসু সম্মপ্পধানেসু – এত্থ ৰীরিযিন্দ্রিযং দট্ঠব্বং. কত্থ চ, ভিক্খৰে, সতিন্দ্রিযং দট্ঠব্বং? চতূসু সতিপট্ঠানেসু – এত্থ সতিন্দ্রিযং দট্ঠব্বং. কত্থ চ, ভিক্খৰে, সমাধিন্দ্রিযং দট্ঠব্বং? চতূসু ঝানেসু – এত্থ সমাধিন্দ্রিযং দট্ঠব্বং. কত্থ চ, ভিক্খৰে, পঞ্ঞিন্দ্রিযং দট্ঠব্বং? চতূসু অরিযসচ্চেসু – এত্থ পঞ্ঞিন্দ্রিযং দট্ঠব্বং’’.

চতূসু সোতাপত্তিযঙ্গেসু সদ্ধিন্দ্রিযস্স ৰসেন কতিহাকারেহি পঞ্চিন্দ্রিযানি দট্ঠব্বানি? চতূসু সম্মপ্পধানেসু ৰীরিযিন্দ্রিযস্স ৰসেন কতিহাকারেহি পঞ্চিন্দ্রিযানি দট্ঠব্বানি? চতূসু সতিপট্ঠানেসু সতিন্দ্রিযস্স ৰসেন কতিহাকারেহি পঞ্চিন্দ্রিযানি দট্ঠব্বানি? চতূসু ঝানেসু সমাধিন্দ্রিযস্স ৰসেন কতিহাকারেহি পঞ্চিন্দ্রিযানি দট্ঠব্বানি? চতূসু অরিযসচ্চেসু পঞ্ঞিন্দ্রিযস্স ৰসেন কতিহাকারেহি পঞ্চিন্দ্রিযানি দট্ঠব্বানি?

চতূসু সোতাপত্তিযঙ্গেসু সদ্ধিন্দ্রিযস্স ৰসেন ৰীসতিযা আকারেহি পঞ্চিন্দ্রিযানি দট্ঠব্বানি. চতূসু সম্মপ্পধানেসু ৰীরিযিন্দ্রিযস্স ৰসেন ৰীসতিযা আকারেহি পঞ্চিন্দ্রিযানি দট্ঠব্বানি. চতূসু সতিপট্ঠানেসু সতিন্দ্রিযস্স ৰসেন ৰীসতিযা আকারেহি পঞ্চিন্দ্রিযানি দট্ঠব্বানি. চতূসু ঝানেসু সমাধিন্দ্রিযস্স ৰসেন ৰীসতিযা আকারেহি পঞ্চিন্দ্রিযানি দট্ঠব্বানি. চতূসু অরিযসচ্চেসু পঞ্ঞিন্দ্রিযস্স ৰসেন ৰীসতিযা আকারেহি পঞ্চিন্দ্রিযানি দট্ঠব্বানি.

ক. পভেদগণননিদ্দেসো

১৯৫. চতূসু সোতাপত্তিযঙ্গেসু সদ্ধিন্দ্রিযস্স ৰসেন কতমেহি ৰীসতিযা আকারেহি পঞ্চিন্দ্রিযানি দট্ঠব্বানি? সপ্পুরিসসংসেৰে সোতাপত্তিযঙ্গে অধিমোক্খাধিপতেয্যট্ঠেন সদ্ধিন্দ্রিযং দট্ঠব্বং, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং; সদ্ধম্মসৰনে সোতাপত্তিযঙ্গে… যোনিসোমনসিকারে সোতাপত্তিযঙ্গে… ধম্মানুধম্মপটিপত্তিযা সোতাপত্তিযঙ্গে অধিমোক্খাধিপতেয্যট্ঠেন সদ্ধিন্দ্রিযং দট্ঠব্বং, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং. চতূসু সোতাপত্তিযঙ্গেসু সদ্ধিন্দ্রিযস্স ৰসেন ইমেহি ৰীসতিযা আকারেহি পঞ্চিন্দ্রিযানি দট্ঠব্বানি.

চতূসু সম্মপ্পধানেসু ৰীরিযিন্দ্রিযস্স ৰসেন কতমেহি ৰীসতিযা আকারেহি পঞ্চিন্দ্রিযানি দট্ঠব্বানি? অনুপ্পন্নানং পাপকানং অকুসলানং ধম্মানং অনুপ্পাদায সম্মপ্পধানে পগ্গহাধিপতেয্যট্ঠেন ৰীরিযিন্দ্রিযং দট্ঠব্বং, ৰীরিযিন্দ্রিযস্স ৰসেন উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং. উপ্পন্নানং পাপকানং অকুসলানং ধম্মানং পহানায সম্মপ্পধানে…পে… অনুপ্পন্নানং কুসলানং ধম্মানং উপ্পাদায সম্মপ্পধানে…পে… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা সম্মপ্পধানে পগ্গহাধিপতেয্যট্ঠেন ৰীরিযিন্দ্রিযং দট্ঠব্বং, ৰীরিযিন্দ্রিযস্স ৰসেন উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং. চতূসু সম্মপ্পধানেসু ৰীরিযিন্দ্রিযস্স ৰসেন ইমেহি ৰীসতিযা আকারেহি পঞ্চিন্দ্রিযানি দট্ঠব্বানি.

চতূসু সতিপট্ঠানেসু সতিন্দ্রিযস্স ৰসেন কতমেহি ৰীসতিযা আকারেহি পঞ্চিন্দ্রিযানি দট্ঠব্বানি? কাযে কাযানুপস্সনাসতিপট্ঠানে উপট্ঠানাধিপতেয্যট্ঠেন সতিন্দ্রিযং দট্ঠব্বং, সতিন্দ্রিযস্স ৰসেন অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং. ৰেদনাসু ৰেদনানুপস্সনাসতিপট্ঠানে…পে… চিত্তে চিত্তানুপস্সনাসতিপট্ঠানে… ধম্মেসু ধম্মানুপস্সনাসতিপট্ঠানে উপট্ঠানাধিপতেয্যট্ঠেন সতিন্দ্রিযং দট্ঠব্বং, সতিন্দ্রিযস্স ৰসেন অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং. চতূসু সতিপট্ঠানেসু সতিন্দ্রিযস্স ৰসেন ইমেহি ৰীসতিযা আকারেহি পঞ্চিন্দ্রিযানি দট্ঠব্বানি.

চতূসু ঝানেসু সমাধিন্দ্রিযস্স ৰসেন কতমেহি ৰীসতিযা আকারেহি পঞ্চিন্দ্রিযানি দট্ঠব্বানি? পঠমে ঝানে অৰিক্খেপাধিপতেয্যট্ঠেন সমাধিন্দ্রিযং দট্ঠব্বং, সমাধিন্দ্রিযস্স ৰসেন দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং. দুতিযে ঝানে…পে… ততিযে ঝানে… চতুত্থে ঝানে অৰিক্খেপাধিপতেয্যট্ঠেন সমাধিন্দ্রিযং দট্ঠব্বং, সমাধিন্দ্রিযস্স ৰসেন দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং. চতূসু ঝানেসু সমাধিন্দ্রিযস্স ৰসেন ইমেহি ৰীসতিযা আকারেহি পঞ্চিন্দ্রিযানি দট্ঠব্বানি.

চতূসু অরিযসচ্চেসু পঞ্ঞিন্দ্রিযস্স ৰসেন কতমেহি ৰীসতিযা আকারেহি পঞ্চিন্দ্রিযানি দট্ঠব্বানি? দুক্খে অরিযসচ্চে দস্সনাধিপতেয্যট্ঠেন পঞ্ঞিন্দ্রিযং দট্ঠব্বং, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং. দুক্খসমুদযে অরিযসচ্চে…পে… দুক্খনিরোধে অরিযসচ্চে… দুক্খনিরোধগামিনিযা পটিপদায অরিযসচ্চে দস্সনাধিপতেয্যট্ঠেন পঞ্ঞিন্দ্রিযং দট্ঠব্বং, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং. চতূসু অরিযসচ্চেসু পঞ্ঞিন্দ্রিযস্স ৰসেন ইমেহি ৰীসতিযা আকারেহি পঞ্চিন্দ্রিযানি দট্ঠব্বানি.

খ. চরিযৰারো

১৯৬. চতূসু সোতাপত্তিযঙ্গেসু সদ্ধিন্দ্রিযস্স ৰসেন কতিহাকারেহি পঞ্চন্নং ইন্দ্রিযানং চরিযা দট্ঠব্বা?

চতূসু সম্মপ্পধানেসু…পে… চতূসু সতিপট্ঠানেসু… চতূসু ঝানেসু… চতূসু অরিযসচ্চেসু পঞ্ঞিন্দ্রিযস্স ৰসেন কতিহাকারেহি পঞ্চন্নং ইন্দ্রিযানং চরিযা দট্ঠব্বা? চতূসু সোতাপত্তিযঙ্গেসু সদ্ধিন্দ্রিযস্স ৰসেন ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা. চতূসু সম্মপ্পধানেসু…পে… চতূসু সতিপট্ঠানেসু… চতূসু ঝানেসু… চতূসু অরিযসচ্চেসু পঞ্ঞিন্দ্রিযস্স ৰসেন ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা.

চতূসু সোতাপত্তিযঙ্গেসু সদ্ধিন্দ্রিযস্স ৰসেন কতমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা? সপ্পুরিসসংসেৰে সোতাপত্তিযঙ্গে অধিমোক্খাধিপতেয্যট্ঠেন সদ্ধিন্দ্রিযস্স চরিযা দট্ঠব্বা, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযস্স চরিযা দট্ঠব্বা, উপট্ঠানট্ঠেন সতিন্দ্রিযস্স চরিযা দট্ঠব্বা, অৰিক্খেপট্ঠেন সমাধিন্দ্রিযস্স চরিযা দট্ঠব্বা, দস্সনট্ঠেন পঞ্ঞিন্দ্রিযস্স চরিযা দট্ঠব্বা. সদ্ধম্মসৰনে সোতাপত্তিযঙ্গে…পে… যোনিসো মনসিকারে সোতাপত্তিযঙ্গে… ধম্মানুধম্মপটিপত্তিযা সোতাপত্তিযঙ্গে অধিমোক্খাধিপতেয্যট্ঠেন সদ্ধিন্দ্রিযস্স চরিযা দট্ঠব্বা, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযস্স চরিযা দট্ঠব্বা, উপট্ঠানট্ঠেন সতিন্দ্রিযস্স চরিযা দট্ঠব্বা, অৰিক্খেপট্ঠেন সমাধিন্দ্রিযস্স চরিযা দট্ঠব্বা, দস্সনট্ঠেন পঞ্ঞিন্দ্রিযস্স চরিযা দট্ঠব্বা. চতূসু সোতাপত্তিযঙ্গেসু সদ্ধিন্দ্রিযস্স ৰসেন ইমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা.

চতূসু সম্মপ্পধানেসু ৰীরিযিন্দ্রিযস্স ৰসেন কতমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা? অনুপ্পন্নানং পাপকানং অকুসলানং ধম্মানং অনুপ্পাদায সম্মপ্পধানে পগ্গহাধিপতেয্যট্ঠেন ৰীরিযিন্দ্রিযস্স চরিযা দট্ঠব্বা, ৰীরিযিন্দ্রিযস্স ৰসেন উপট্ঠানট্ঠেন সতিন্দ্রিযস্স চরিযা দট্ঠব্বা, অৰিক্খেপট্ঠেন সমাধিন্দ্রিযস্স চরিযা দট্ঠব্বা, দস্সনট্ঠেন পঞ্ঞিন্দ্রিযস্স চরিযা দট্ঠব্বা, অধিমোক্খট্ঠেন সদ্ধিন্দ্রিযস্স চরিযা দট্ঠব্বা. উপ্পন্নানং পাপকানং অকুসলানং ধম্মানং পহানায সম্মপ্পধানে…পে… অনুপ্পন্নানং কুসলানং ধম্মানং উপ্পাদায সম্মপ্পধানে…পে… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা সম্মপ্পধানে পগ্গহাধিপতেয্যট্ঠেন ৰীরিযিন্দ্রিযস্স চরিযা দট্ঠব্বা…পে… চতূসু সম্মপ্পধানেসু ৰীরিযিন্দ্রিযস্স ৰসেন ইমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা.

চতূসু সতিপট্ঠানেসু সতিন্দ্রিযস্স ৰসেন কতমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা? কাযে কাযানুপস্সনাসতিপট্ঠানে উপট্ঠানাধিপতেয্যট্ঠেন সতিন্দ্রিযস্স চরিযা দট্ঠব্বা, সতিন্দ্রিযস্স ৰসেন অৰিক্খেপট্ঠেন সমাধিন্দ্রিযস্স চরিযা দট্ঠব্বা, দস্সনট্ঠেন পঞ্ঞিন্দ্রিযস্স চরিযা দট্ঠব্বা, অধিমোক্খট্ঠেন সদ্ধিন্দ্রিযস্স চরিযা দট্ঠব্বা, পগ্গহট্ঠেন ৰীরিযিন্দ্রিযস্স চরিযা দট্ঠব্বা. ৰেদনাসু ৰেদনানুপস্সনাসতিপট্ঠানে…পে… চিত্তে চিত্তানুপস্সনাসতিপট্ঠানে…পে… ধম্মেসু ধম্মানুপস্সনাসতিপট্ঠানে উপট্ঠানাধিপতেয্যট্ঠেন সতিন্দ্রিযস্স চরিযা দট্ঠব্বা…পে… চতূসু সতিপট্ঠানেসু সতিন্দ্রিযস্স ৰসেন ইমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা.

চতূসু ঝানেসু সমাধিন্দ্রিযস্স ৰসেন কতমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা? পঠমে ঝানে অৰিক্খেপাধিপতেয্যট্ঠেন সমাধিন্দ্রিযস্স চরিযা দট্ঠব্বা, সমাধিন্দ্রিযস্স ৰসেন দস্সনট্ঠেন পঞ্ঞিন্দ্রিযস্স চরিযা দট্ঠব্বা, অধিমোক্খট্ঠেন সদ্ধিন্দ্রিযস্স চরিযা দট্ঠব্বা, পগ্গহট্ঠেন ৰীরিযিন্দ্রিযস্স চরিযা দট্ঠব্বা, উপট্ঠানট্ঠেন সতিন্দ্রিযস্স চরিযা দট্ঠব্বা. দুতিযে ঝানে…পে… ততিযে ঝানে…পে… চতুত্থে ঝানে অৰিক্খেপাধিপতেয্যট্ঠেন সমাধিন্দ্রিযস্স চরিযা দট্ঠব্বা…পে… চতূসু ঝানেসু সমাধিন্দ্রিযস্স ৰসেন ইমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা.

চতূসু অরিযসচ্চেসু পঞ্ঞিন্দ্রিযস্স ৰসেন কতমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা? দুক্খে অরিযসচ্চে দস্সনাধিপতেয্যট্ঠেন পঞ্ঞিন্দ্রিযস্স চরিযা দট্ঠব্বা, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযস্স চরিযা দট্ঠব্বা, পগ্গহট্ঠেন ৰীরিযিন্দ্রিযস্স চরিযা দট্ঠব্বা, উপট্ঠানট্ঠেন সতিন্দ্রিযস্স চরিযা দট্ঠব্বা, অৰিক্খেপট্ঠেন সমাধিন্দ্রিযস্স চরিযা দট্ঠব্বা. দুক্খসমুদযে অরিযসচ্চে…পে… দুক্খনিরোধে অরিযসচ্চে… দুক্খনিরোধগামিনিযা পটিপদায অরিযসচ্চে দস্সনাধিপতেয্যট্ঠেন পঞ্ঞিন্দ্রিযস্স চরিযা দট্ঠব্বা, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযস্স চরিযা দট্ঠব্বা, পগ্গহট্ঠেন ৰীরিযিন্দ্রিযস্স চরিযা দট্ঠব্বা, উপট্ঠানট্ঠেন সতিন্দ্রিযস্স চরিযা দট্ঠব্বা, অৰিক্খেপট্ঠেন সমাধিন্দ্রিযস্স চরিযা দট্ঠব্বা. চতূসু অরিযসচ্চেসু পঞ্ঞিন্দ্রিযস্স ৰসেন ইমেহি ৰীসতিযা আকারেহি পঞ্চন্নং ইন্দ্রিযানং চরিযা দট্ঠব্বা.

গ. চারৰিহারনিদ্দেসো

১৯৭. চারো চ ৰিহারো চ অনুবুদ্ধো হোতি পটিৰিদ্ধো, যথাচরন্তং যথাৰিহরন্তং ৰিঞ্ঞূ সব্রহ্মচারী গম্ভীরেসু ঠানেসু ওকপ্পেয্যুং – ‘‘অদ্ধা, অযমাযস্মা পত্তো ৰা পাপুণিস্সতি ৰা’’.

চরিযাতি অট্ঠ চরিযাযো – ইরিযাপথচরিযা, আযতনচরিযা, সতিচরিযা, সমাধিচরিযা, ঞাণচরিযা, মগ্গচরিযা, পত্তিচরিযা, লোকত্থচরিযাতি. ইরিযাপথচরিযাতি চতূসু ইরিযাপথেসু. আযতনচরিযাতি ছসু অজ্ঝত্তিকবাহিরেসু আযতনেসু. সতিচরিযাতি চতূসু সতিপট্ঠানেসু. সমাধিচরিযাতি চতূসু ঝানেসু. ঞাণচরিযাতি চতূসু অরিযসচ্চেসু. মগ্গচরিযাতি চতূসু অরিযমগ্গেসু. পত্তিচরিযাতি চতূসু সামঞ্ঞফলেসু. লোকত্থচরিযাতি তথাগতেসু অরহন্তেসু সম্মাসম্বুদ্ধেসু, পদেসে পচ্চেকবুদ্ধেসু, পদেসে সাৰকেসু. ইরিযাপথচরিযা চ পণিধিসম্পন্নানং, আযতনচরিযা চ ইন্দ্রিযেসু গুত্তদ্ৰারানং, সতিচরিযা চ অপ্পমাদৰিহারীনং, সমাধিচরিযা চ অধিচিত্তমনুযুত্তানং, ঞাণচরিযা চ বুদ্ধিসম্পন্নানং, মগ্গচরিযা চ সম্মাপটিপন্নানং, পত্তিচরিযা চ অধিগতফলানং, লোকত্থচরিযা চ তথাগতানং অরহন্তানং সম্মাসম্বুদ্ধানং, পদেসে পচ্চেকবুদ্ধানং, পদেসে সাৰকানং. ইমা অট্ঠ চরিযাযো.

অপরাপি অট্ঠ চরিযাযো. অধিমুচ্চন্তো সদ্ধায চরতি, পগ্গণ্হন্তো ৰীরিযেন চরতি, উপট্ঠাপেন্তো সতিযা চরতি, অৰিক্খেপং করোন্তো সমাধিনা চরতি, পজানন্তো পঞ্ঞায চরতি, ৰিজানন্তো ৰিঞ্ঞাণচরিযায চরতি, এৰং পটিপন্নস্স কুসলা ধম্মা আযাপেন্তীতি আযতনচরিযায চরতি, এৰং পটিপন্নো ৰিসেসমধিগচ্ছতীতি ৰিসেসচরিযায চরতি – ইমা অট্ঠ চরিযাযো.

অপরাপি অট্ঠ চরিযাযো. দস্সনচরিযা চ সম্মাদিট্ঠিযা, অভিনিরোপনচরিযা চ সম্মাসঙ্কপ্পস্স, পরিগ্গহচরিযা চ সম্মাৰাচায, সমুট্ঠানচরিযা চ সম্মাকম্মন্তস্স, ৰোদানচরিযা চ সম্মাআজীৰস্স, পগ্গহচরিযা চ সম্মাৰাযামস্স, উপট্ঠানচরিযা চ সম্মাসতিযা, অৰিক্খেপচরিযা চ সম্মাসমাধিস্স – ইমা অট্ঠ চরিযাযো.

ৰিহারোতি অধিমুচ্চন্তো সদ্ধায ৰিহরতি, পগ্গণ্হন্তো ৰীরিযেন ৰিহরতি, উপট্ঠাপেন্তো সতিযা ৰিহরতি, অৰিক্খেপং করোন্তো সমাধিনা ৰিহরতি, পজানন্তো পঞ্ঞায ৰিহরতি.

অনুবুদ্ধোতি সদ্ধিন্দ্রিযস্স অধিমোক্খট্ঠো অনুবুদ্ধো হোতি, ৰীরিযিন্দ্রিযস্স পগ্গহট্ঠো অনুবুদ্ধো হোতি, সতিন্দ্রিযস্স উপট্ঠানট্ঠো অনুবুদ্ধো হোতি, সমাধিন্দ্রিযস্স অৰিক্খেপট্ঠো অনুবুদ্ধো হোতি, পঞ্ঞিন্দ্রিযস্স দস্সনট্ঠো অনুবুদ্ধো হোতি.

পটিৰিদ্ধোতি সদ্ধিন্দ্রিযস্স অধিমোক্খট্ঠো পটিৰিদ্ধো হোতি, ৰীরিযিন্দ্রিযস্স পগ্গহট্ঠো পটিৰিদ্ধো হোতি, সতিন্দ্রিযস্স উপট্ঠানট্ঠো পটিৰিদ্ধো হোতি, সমাধিন্দ্রিযস্স অৰিক্খেপট্ঠো পটিৰিদ্ধো হোতি, পঞ্ঞিন্দ্রিযস্স দস্সনট্ঠো পটিৰিদ্ধো হোতি. যথাচরন্তন্তি এৰং সদ্ধায চরন্তং, এৰং ৰীরিযেন চরন্তং, এৰং সতিযা চরন্তং, এৰং সমাধিনা চরন্তং, এৰং পঞ্ঞায চরন্তং. যথাৰিহরন্তন্তি এৰং সদ্ধায ৰিহরন্তং, এৰং ৰীরিযেন ৰিহরন্তং, এৰং সতিযা ৰিহরন্তং, এৰং সমাধিনা ৰিহরন্তং, এৰং পঞ্ঞায ৰিহরন্তং. ৰিঞ্ঞূতি ৰিঞ্ঞূ ৰিভাৰী মেধাৰী পণ্ডিতা বুদ্ধিসম্পন্না. সব্রহ্মচারীতি এককম্মং একুদ্দেসো সমসিক্খতা. গম্ভীরেসু ঠানেসূতি গম্ভীরানি ঠানানি ৰুচ্চন্তি ঝানা চ ৰিমোক্খা চ সমাধী চ সমাপত্তিযো চ মগ্গা চ ফলানি চ অভিঞ্ঞাযো চ পটিসম্ভিদা চ. ওকপ্পেয্যুন্তি সদ্দহেয্যুং অধিমুচ্চেয্যুং. অদ্ধাতি একংসৰচনমেতং নিস্সংসযৰচনমেতং নিক্কঙ্খৰচনমেতং অদ্ৰেজ্ঝৰচনমেতং অদ্ৰেল়্হকৰচনমেতং নিযোগৰচনমেতং অপণ্ণকৰচনমেতং অৰত্থাপনৰচনমেতং – অদ্ধাতি. আযস্মাতি পিযৰচনমেতং গরুৰচনমেতং সগারৰসপ্পতিস্সাধিৰচনমেতং – আযস্মাতি. পত্তো ৰাতি অধিগতো ৰা. পাপুণিস্সতি ৰাতি অধিগমিস্সতি ৰা.

সুত্তন্তনিদ্দেসো ততিযো.

৪. চতুত্থসুত্তন্তনিদ্দেসো

১৯৮. পুরিমনিদানং [পরিপুণ্ণনিদানং (স্যা. ক.)]. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমানি পঞ্চিন্দ্রিযানি কতিহাকারেহি কেনট্ঠেন দট্ঠব্বানি? ইমানি পঞ্চিন্দ্রিযানি ছহাকারেহি তেনট্ঠেন দট্ঠব্বানি – আধিপতেয্যট্ঠেন আদিৰিসোধনট্ঠেন অধিমত্তট্ঠেন, অধিট্ঠানট্ঠেন, পরিযাদানট্ঠেন, পতিট্ঠাপকট্ঠেন’’.

ক. আধিপতেয্যট্ঠনিদ্দেসো

১৯৯. কথং আধিপতেয্যট্ঠেন ইন্দ্রিযানি দট্ঠব্বানি? অস্সদ্ধিযং পজহতো অধিমোক্খাধিপতেয্যট্ঠেন সদ্ধিন্দ্রিযং দট্ঠব্বং, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং. কোসজ্জং পজহতো পগ্গহাধিপতেয্যট্ঠেন ৰীরিযিন্দ্রিযং দট্ঠব্বং, ৰীরিযিন্দ্রিযস্স ৰসেন উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং. পমাদং পজহতো উপট্ঠানাধিপতেয্যট্ঠেন সতিন্দ্রিযং দট্ঠব্বং, সতিন্দ্রিযস্স ৰসেন অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং. উদ্ধচ্চং পজহতো অৰিক্খেপাধিপতেয্যট্ঠেন সমাধিন্দ্রিযং দট্ঠব্বং, সমাধিন্দ্রিযস্স ৰসেন দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং. অৰিজ্জং পজহতো দস্সনাধিপতেয্যট্ঠেন পঞ্ঞিন্দ্রিযং দট্ঠব্বং, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং.

কামচ্ছন্দং পজহতো নেক্খম্মৰসেন অধিমোক্খাধিপতেয্যট্ঠেন সদ্ধিন্দ্রিযং দট্ঠব্বং, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং. কামচ্ছন্দং পজহতো নেক্খম্মৰসেন পগ্গহাধিপতেয্যট্ঠেন ৰীরিযিন্দ্রিযং দট্ঠব্বং, ৰীরিযিন্দ্রিযস্স ৰসেন উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং. কামচ্ছন্দং পজহতো নেক্খম্মৰসেন উপট্ঠানাধিপতেয্যট্ঠেন সতিন্দ্রিযং দট্ঠব্বং, সতিন্দ্রিযস্স ৰসেন অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং. কামচ্ছন্দং পজহতো নেক্খম্মৰসেন অৰিক্খেপাধিপতেয্যট্ঠেন সমাধিন্দ্রিযং দট্ঠব্বং, সমাধিন্দ্রিযস্স ৰসেন দস্সনট্ঠেন পঞ্ঞিন্দ্রিযং দট্ঠব্বং, অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং. কামচ্ছন্দং পজহতো নেক্খম্মৰসেন দস্সনাধিপতেয্যট্ঠেন পঞ্ঞিন্দ্রিযং দট্ঠব্বং, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং.

ব্যাপাদং পজহতো অব্যাপাদৰসেন…পে… থিনমিদ্ধং পজহতো আলোকসঞ্ঞাৰসেন…পে… সব্বকিলেসে পজহতো অরহত্তমগ্গৰসেন অধিমোক্খাধিপতেয্যট্ঠেন সদ্ধিন্দ্রিযং দট্ঠব্বং, সদ্ধিন্দ্রিযস্স ৰসেন পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং, দস্সনট্ঠেন পঞ্ঞিন্দ্রিযং দট্ঠব্বং…পে… সব্বকিলেসে পজহতো অরহত্তমগ্গৰসেন দস্সনাধিপতেয্যট্ঠেন পঞ্ঞিন্দ্রিযং দট্ঠব্বং, পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং দট্ঠব্বং, পগ্গহট্ঠেন ৰীরিযিন্দ্রিযং দট্ঠব্বং, উপট্ঠানট্ঠেন সতিন্দ্রিযং দট্ঠব্বং, অৰিক্খেপট্ঠেন সমাধিন্দ্রিযং দট্ঠব্বং. এৰং আধিপতেয্যট্ঠেন ইন্দ্রিযানি দট্ঠব্বানি.

খ. আদিৰিসোধনট্ঠনিদ্দেসো

২০০. কথং আদিৰিসোধনট্ঠেন ইন্দ্রিযানি দট্ঠব্বানি? অধিমোক্খট্ঠেন সদ্ধিন্দ্রিযং, অস্সদ্ধিযসংৰরট্ঠেন [অস্সদ্ধিযং সংৰরট্ঠেন (স্যা. ক.) এৰমীদিসেসু পদেসুপি] সীলৰিসুদ্ধি – সদ্ধিন্দ্রিযস্স আদিৰিসোধনা. পগ্গহট্ঠেন ৰীরিযিন্দ্রিযং, কোসজ্জসংৰরট্ঠেন সীলৰিসুদ্ধি – ৰীরিযিন্দ্রিযস্স আদিৰিসোধনা. উপট্ঠানট্ঠেন সতিন্দ্রিযং, পমাদসংৰরট্ঠেন সীলৰিসুদ্ধি – সতিন্দ্রিযস্স আদিৰিসোধনা. অৰিক্খেপট্ঠেন সমাধিন্দ্রিযং, উদ্ধচ্চসংৰরট্ঠেন সীলৰিসুদ্ধি – সমাধিন্দ্রিযস্স আদিৰিসোধনা. দস্সনট্ঠেন পঞ্ঞিন্দ্রিযং, অৰিজ্জাসংৰরট্ঠেন সীলৰিসুদ্ধি – পঞ্ঞিন্দ্রিযস্স আদিৰিসোধনা. নেক্খম্মে পঞ্চিন্দ্রিযানি, কামচ্ছন্দসংৰরট্ঠেন সীলৰিসুদ্ধি – পঞ্চন্নং ইন্দ্রিযানং আদিৰিসোধনা. অব্যাপাদে পঞ্চিন্দ্রিযানি, ব্যাপাদসংৰরট্ঠেন সীলৰিসুদ্ধি – পঞ্চন্নং ইন্দ্রিযানং আদিৰিসোধনা…পে… অরহত্তমগ্গে পঞ্চিন্দ্রিযানি, সব্বকিলেসসংৰরট্ঠেন সীলৰিসুদ্ধি – পঞ্চন্নং ইন্দ্রিযানং আদিৰিসোধনা. এৰং আদিৰিসোধনট্ঠেন ইন্দ্রিযানি দট্ঠব্বানি.

গ. অধিমত্তট্ঠনিদ্দেসো

২০১. কথং অধিমত্তট্ঠেন ইন্দ্রিযানি দট্ঠব্বানি? সদ্ধিন্দ্রিযস্স ভাৰনায ছন্দো উপ্পজ্জতি – ছন্দৰসেন সদ্ধাৰসেন সদ্ধিন্দ্রিযং অধিমত্তং হোতি. ছন্দৰসেন পামোজ্জং উপ্পজ্জতি – পামোজ্জৰসেন সদ্ধাৰসেন সদ্ধিন্দ্রিযং অধিমত্তং হোতি. পামোজ্জৰসেন পীতি উপ্পজ্জতি – পীতিৰসেন সদ্ধাৰসেন সদ্ধিন্দ্রিযং অধিমত্তং হোতি. পীতিৰসেন পস্সদ্ধি উপ্পজ্জতি – পস্সদ্ধিৰসেন সদ্ধাৰসেন সদ্ধিন্দ্রিযং অধিমত্তং হোতি. পস্সদ্ধিৰসেন সুখং উপ্পজ্জতি – সুখৰসেন সদ্ধাৰসেন সদ্ধিন্দ্রিযং অধিমত্তং হোতি. সুখৰসেন ওভাসো উপ্পজ্জতি – ওভাসৰসেন সদ্ধাৰসেন সদ্ধিন্দ্রিযং অধিমত্তং হোতি. ওভাসৰসেন সংৰেগো উপ্পজ্জতি – সংৰেগৰসেন সদ্ধাৰসেন সদ্ধিন্দ্রিযং অধিমত্তং হোতি. সংৰেজেত্ৰা চিত্তং সমাদহতি – সমাধিৰসেন সদ্ধাৰসেন সদ্ধিন্দ্রিযং অধিমত্তং হোতি. তথা সমাহিতং চিত্তং সাধুকং পগ্গণ্হাতি – পগ্গহৰসেন সদ্ধাৰসেন সদ্ধিন্দ্রিযং অধিমত্তং হোতি. তথাপগ্গহিতং চিত্তং সাধুকং অজ্ঝুপেক্খতি – উপেক্খাৰসেন সদ্ধাৰসেন সদ্ধিন্দ্রিযং অধিমত্তং হোতি. উপেক্খাৰসেন নানত্তকিলেসেহি চিত্তং ৰিমুচ্চতি – ৰিমোক্খৰসেন সদ্ধাৰসেন সদ্ধিন্দ্রিযং অধিমত্তং হোতি. ৰিমুত্তত্তা তে ধম্মা একরসা হোন্তি – একরসট্ঠেন ভাৰনাৰসেন সদ্ধাৰসেন সদ্ধিন্দ্রিযং অধিমত্তং হোতি. ভাৰিতত্তা ততো পণীততরে ৰিৰট্টন্তি – ৰিৰট্টনাৰসেন সদ্ধাৰসেন সদ্ধিন্দ্রিযং অধিমত্তং হোতি. ৰিৰট্টিতত্তা ততো ৰোসজ্জতি [ৰোস্সজ্জতি (স্যা. ক.)] – ৰোসগ্গৰসেন সদ্ধাৰসেন সদ্ধিন্দ্রিযং অধিমত্তং হোতি. ৰোসজ্জিতত্তা ততো নিরুজ্ঝন্তি – নিরোধৰসেন সদ্ধাৰসেন সদ্ধিন্দ্রিযং অধিমত্তং হোতি. নিরোধৰসেন দ্ৰে ৰোসগ্গা – পরিচ্চাগৰোসগ্গো চ, পক্খন্দনৰোসগ্গো চ. কিলেসে চ খন্ধে চ পরিচ্চজতীতি – পরিচ্চাগৰোসগ্গো. নিরোধনিব্বানধাতুযা চিত্তং পক্খন্দতীতি – পক্খন্দনৰোসগ্গো. নিরোধৰসেন ইমে দ্ৰে ৰোসগ্গা.

অস্সদ্ধিযস্স পহানায ছন্দো উপ্পজ্জতি…পে… অস্সদ্ধিযপরিল়াহস্স পহানায ছন্দো উপ্পজ্জতি… দিট্ঠেকট্ঠানং কিলেসানং পহানায ছন্দো উপ্পজ্জতি… ওল়ারিকানং কিলেসানং পহানায ছন্দো উপ্পজ্জতি… অনুসহগতানং কিলেসানং পহানায ছন্দো উপ্পজ্জতি… সব্বকিলেসানং পহানায ছন্দো উপ্পজ্জতি – ছন্দৰসেন সদ্ধাৰসেন সদ্ধিন্দ্রিযং অধিমত্তং হোতি…পে… ৰীরিযিন্দ্রিযস্স ভাৰনায ছন্দো উপ্পজ্জতি…পে… কোসজ্জস্স পহানায ছন্দো উপ্পজ্জতি… কোসজ্জপরিল়াহস্স পহানায ছন্দো উপ্পজ্জতি… দিট্ঠেকট্ঠানং কিলেসানং পহানায ছন্দো উপ্পজ্জতি…পে… সব্বকিলেসানং পহানায ছন্দো উপ্পজ্জতি… সতিন্দ্রিযস্স ভাৰনায ছন্দো উপ্পজ্জতি…পে… পমাদস্স পহানায ছন্দো উপ্পজ্জতি… পমাদপরিল়াহস্স পহানায ছন্দো উপ্পজ্জতি…পে… সব্বকিলেসানং পহানায ছন্দো উপ্পজ্জতি… সমাধিন্দ্রিযস্স ভাৰনায ছন্দো উপ্পজ্জতি…পে… উদ্ধচ্চস্স পহানায ছন্দো উপ্পজ্জতি উদ্ধচ্চপরিল়াহস্স পহানায ছন্দো উপ্পজ্জতি…পে… সব্বকিলেসানং পহানায ছন্দো উপ্পজ্জতি… পঞ্ঞিন্দ্রিযস্স ভাৰনায ছন্দো উপ্পজ্জতি…পে… অৰিজ্জায পহানায ছন্দো উপ্পজ্জতি… অৰিজ্জাপরিল়াহস্স পহানায ছন্দো উপ্পজ্জতি… দিট্ঠেকট্ঠানং কিলেসানং পহানায ছন্দো উপ্পজ্জতি… ওল়ারিকানং কিলেসানং পহানায ছন্দো উপ্পজ্জতি… অনুসহগতানং কিলেসানং পহানায ছন্দো উপ্পজ্জতি… সব্বকিলেসানং পহানায ছন্দো উপ্পজ্জতি – ছন্দৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. ছন্দৰসেন পামোজ্জং উপ্পজ্জতি – পামোজ্জৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. পামোজ্জৰসেন পীতি উপ্পজ্জতি – পীতিৰসেন পঞ্ঞা ৰসেন পঞ্ঞিন্দ্রিযং অধিমত্তং হোতি. পীতিৰসেন পস্সদ্ধি উপ্পজ্জতি – পস্সদ্ধিৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. পস্সদ্ধিৰসেন সুখং উপ্পজ্জতি – সুখৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. সুখৰসেন ওভাসো উপ্পজ্জতি – ওভাসৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. ওভাসৰসেন সংৰেগো উপ্পজ্জতি – সংৰেগৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. সংৰেজেত্ৰা চিত্তং সমাদহতি – সমাধিৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. তথাসমাহিতং চিত্তং সাধুকং পগ্গণ্হাতি – পগ্গহৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. তথাপগ্গহিতং চিত্তং সাধুকং অজ্ঝুপেক্খতি – উপেক্খাৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. উপেক্খাৰসেন নানত্তকিলেসেহি চিত্তং ৰিমুচ্চতি – ৰিমোক্খৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. ৰিমুত্তত্তা তে ধম্মা একরসা হোন্তি – ভাৰনাৰসেন [একরসট্ঠেন ভাৰনাৰসেন (স্যা. ক.) অট্ঠকথা ওলোকেতব্বো] পঞ্ঞাৰসেন পঞ্ঞিন্দ্রিযং অধিমত্তং হোতি. ভাৰিতত্তা ততো পণীততরে ৰিৰট্টন্তি – ৰিৰট্টনাৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. ৰিৰট্টিতত্তা ততো ৰোসজ্জতি – ৰোসগ্গৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. ৰোসজ্জিতত্তা ততো নিরুজ্ঝন্তি – নিরোধৰসেন পঞ্ঞাৰসেন পঞ্ঞিন্দ্রিযং অধিমত্তং হোতি. নিরোধৰসেন দ্ৰে ৰোসগ্গা – পরিচ্চাগৰোসগ্গো চ, পক্খন্দনৰোসগ্গো চ. কিলেসে চ খন্ধে চ পরিচ্চজতীতি – পরিচ্চাগৰোসগ্গো. নিরোধনিব্বানধাতুযা চিত্তং পক্খন্দতীতি – পক্খন্দনৰোসগ্গো. নিরোধৰসেন ইমে দ্ৰে ৰোসগ্গা. এৰং অধিমত্তট্ঠেন ইন্দ্রিযানি দট্ঠব্বানি.

দুতিযভাণৰারো.

ঘ. অধিট্ঠানট্ঠনিদ্দেসো

২০২. কথং অধিট্ঠানট্ঠেন ইন্দ্রিযানি দট্ঠব্বানি? সদ্ধিন্দ্রিযস্স ভাৰনায ছন্দো উপ্পজ্জতি – ছন্দৰসেন সদ্ধাৰসেন সদ্ধিন্দ্রিযং অধিট্ঠাতি. ছন্দৰসেন পামোজ্জং উপ্পজ্জতি – পামোজ্জৰসেন সদ্ধাৰসেন সদ্ধিন্দ্রিযং অধিট্ঠাতি…পে… এৰং অধিট্ঠানট্ঠেন ইন্দ্রিযানি দট্ঠব্বানি.

ঙ. পরিযাদানট্ঠনিদ্দেসো

কথং পরিযাদানট্ঠেন ইন্দ্রিযানি দট্ঠব্বানি? অধিমোক্খট্ঠেন সদ্ধিন্দ্রিযং অস্সদ্ধিযং পরিযাদিযতি, অস্সদ্ধিযপরিল়াহং পরিযাদিযতি. পগ্গহট্ঠেন ৰীরিযিন্দ্রিযং কোসজ্জং পরিযাদিযতি, কোসজ্জপরিল়াহং পরিযাদিযতি. উপট্ঠানট্ঠেন সতিন্দ্রিযং পমাদং পরিযাদিযতি, পমাদপরিল়াহং পরিযাদিযতি. অৰিক্খেপট্ঠেন সমাধিন্দ্রিযং উদ্ধচ্চং পরিযাদিযতি, উদ্ধচ্চপরিল়াহং পরিযাদিযতি. দস্সনট্ঠেন পঞ্ঞিন্দ্রিযং অৰিজ্জং পরিযাদিযতি, অৰিজ্জাপরিল়াহং পরিযাদিযতি. নেক্খম্মে পঞ্চিন্দ্রিযানি কামচ্ছন্দং পরিযাদিযন্তি. অব্যাপাদে পঞ্চিন্দ্রিযানি ব্যাপাদং পরিযাদিযন্তি. আলোকসঞ্ঞায পঞ্চিন্দ্রিযানি থিনমিদ্ধং পরিযাদিযন্তি. অৰিক্খেপে পঞ্চিন্দ্রিযানি উদ্ধচ্চং পরিযাদিযন্তি…পে… অরহত্তমগ্গে পঞ্চিন্দ্রিযানি সব্বকিলেসে পরিযাদিযন্তি. এৰং পরিযাদানট্ঠেন ইন্দ্রিযানি দট্ঠব্বানি.

চ. পতিট্ঠাপকট্ঠনিদ্দেসো

২০৩. কথং পতিট্ঠাপকট্ঠেন ইন্দ্রিযানি দট্ঠব্বানি? সদ্ধো সদ্ধিন্দ্রিযং অধিমোক্খে পতিট্ঠাপেতি, সদ্ধস্স সদ্ধিন্দ্রিযং অধিমোক্খে পতিট্ঠাপেতি. ৰীরিযৰা ৰীরিযিন্দ্রিযং পগ্গহে পতিট্ঠাপেতি, ৰীরিযৰতো ৰীরিযিন্দ্রিযং পগ্গহে পতিট্ঠাপেতি. সতিমা সতিন্দ্রিযং উপট্ঠানে পতিট্ঠাপেতি, সতিমতো সতিন্দ্রিযং উপট্ঠানে পতিট্ঠাপেতি. সমাহিতো সমাধিন্দ্রিযং অৰিক্খেপে পতিট্ঠাপেতি, সমাহিতস্স সমাধিন্দ্রিযং অৰিক্খেপে পতিট্ঠাপেতি. পঞ্ঞৰা পঞ্ঞিন্দ্রিযং দস্সনে পতিট্ঠাপেতি, পঞ্ঞৰতো পঞ্ঞিন্দ্রিযং দস্সনে পতিট্ঠাপেতি. যোগাৰচরো পঞ্চিন্দ্রিযানি নেক্খম্মে পতিট্ঠাপেতি, যোগাৰচরস্স পঞ্চিন্দ্রিযানি নেক্খম্মে পতিট্ঠাপেন্তি. যোগাৰচরো পঞ্চিন্দ্রিযানি অব্যাপাদে পতিট্ঠাপেতি, যোগাৰচরস্স পঞ্চিন্দ্রিযানি অব্যাপাদে পতিট্ঠাপেন্তি. যোগাৰচরো পঞ্চিন্দ্রিযানি আলোকসঞ্ঞায পতিট্ঠাপেতি, যোগাৰচরস্স পঞ্চিন্দ্রিযানি আলোকসঞ্ঞায পতিট্ঠাপেন্তি. যোগাৰচরো পঞ্চিন্দ্রিযানি অৰিক্খেপে পতিট্ঠাপেতি, যোগাৰচরস্স পঞ্চিন্দ্রিযানি অৰিক্খেপে পতিট্ঠাপেন্তি…পে… যোগাৰচরো পঞ্চিন্দ্রিযানি অরহত্তমগ্গে পতিট্ঠাপেতি, যোগাৰচরস্স পঞ্চিন্দ্রিযানি অরহত্তমগ্গে পতিট্ঠাপেন্তি. এৰং পতিট্ঠাপকট্ঠেন ইন্দ্রিযানি দট্ঠব্বানি.

সুত্তন্তনিদ্দেসো চতুত্থো.

৫. ইন্দ্রিযসমোধানং

২০৪. পুথুজ্জনো সমাধিং ভাৰেন্তো কতিহাকারেহি উপট্ঠানকুসলো হোতি? সেক্খো সমাধিং ভাৰেন্তো কতিহাকারেহি উপট্ঠানকুসলো হোতি? ৰীতরাগো সমাধিং ভাৰেন্তো কতিহাকারেহি উপট্ঠানকুসলো হোতি? পুথুজ্জনো সমাধিং ভাৰেন্তো সত্তহি আকারেহি উপট্ঠানকুসলো হোতি. সেক্খো সমাধিং ভাৰেন্তো অট্ঠহি আকারেহি উপট্ঠানকুসলো হোতি. ৰীতরাগো সমাধিং ভাৰেন্তো দসহি আকারেহি উপট্ঠানকুসলো হোতি.

পুথুজ্জনো সমাধিং ভাৰেন্তো কতমেহি সত্তহাকারেহি উপট্ঠানকুসলো হোতি? আৰজ্জিতত্তা আরম্মণূপট্ঠানকুসলো হোতি, সমথনিমিত্তূপট্ঠানকুসলো হোতি, পগ্গহনিমিত্তূপট্ঠানকুসলো হোতি, অৰিক্খেপূপট্ঠানকুসলো হোতি, ওভাসূপট্ঠানকুসলো হোতি, সম্পহংসনূপট্ঠানকুসলো হোতি, উপেক্খূপট্ঠানকুসলো হোতি – পুথুজ্জনো সমাধিং ভাৰেন্তো ইমেহি সত্তহি আকারেহি উপট্ঠানকুসলো হোতি.

সেক্খো সমাধিং ভাৰেন্তো কতমেহি অট্ঠহি আকারেহি উপট্ঠানকুসলো হোতি? আৰজ্জিতত্তা আরম্মণূপট্ঠানকুসলো হোতি, সমথনিমিত্তূপট্ঠানকুসলো হোতি, পগ্গহনিমিত্তূপট্ঠানকুসলো হোতি, অৰিক্খেপূপট্ঠানকুসলো হোতি, ওভাসূপট্ঠানকুসলো হোতি, সম্পহংসনূপট্ঠানকুসলো হোতি, উপেক্খূপট্ঠানকুসলো হোতি, একত্তূপট্ঠানকুসলো হোতি – সেক্খো সমাধিং ভাৰেন্তো ইমেহি অট্ঠহি আকারেহি উপট্ঠানকুসলো হোতি.

ৰীতরাগো সমাধিং ভাৰেন্তো কতমেহি দসহি আকারেহি উপট্ঠানকুসলো হোতি? আৰজ্জিতত্তা আরম্মণূপট্ঠানকুসলো হোতি…পে… একত্তূপট্ঠানকুসলো হোতি, ঞাণূপট্ঠানকুসলো হোতি, ৰিমুত্তূপট্ঠানকুসলো হোতি – ৰীতরাগো সমাধিং ভাৰেন্তো ইমেহি দসহি আকারেহি উপট্ঠানকুসলো হোতি.

২০৫. পুথুজ্জনো ৰিপস্সনং ভাৰেন্তো কতিহাকারেহি উপট্ঠানকুসলো হোতি, কতিহাকারেহি অনুপট্ঠানকুসলো হোতি? সেক্খো ৰিপস্সনং ভাৰেন্তো কতিহাকারেহি উপট্ঠানকুসলো হোতি, কতিহাকারেহি অনুপট্ঠানকুসলো হোতি? ৰীতরাগো ৰিপস্সনং ভাৰেন্তো কতিহাকারেহি উপট্ঠানকুসলো হোতি, কতিহাকারেহি অনুপট্ঠানকুসলো হোতি?

পুথুজ্জনো ৰিপস্সনং ভাৰেন্তো নৰহি আকারেহি উপট্ঠানকুসলো হোতি, নৰহি আকারেহি অনুপট্ঠানকুসলো হোতি. সেক্খো ৰিপস্সনং ভাৰেন্তো দসহি আকারেহি উপট্ঠানকুসলো হোতি, দসহি আকারেহি অনুপট্ঠানকুসলো হোতি. ৰীতরাগো ৰিপস্সনং ভাৰেন্তো দ্ৰাদসহি আকারেহি উপট্ঠানকুসলো হোতি, দ্ৰাদসহি আকারেহি অনুপট্ঠানকুসলো হোতি.

পুথুজ্জনো ৰিপস্সনং ভাৰেন্তো কতমেহি নৰহি আকারেহি উপট্ঠানকুসলো হোতি, কতমেহি নৰহি আকারেহি অনুপট্ঠানকুসলো হোতি? অনিচ্চতো উপট্ঠানকুসলো হোতি, নিচ্চতো অনুপট্ঠানকুসলো হোতি. দুক্খতো উপট্ঠানকুসলো হোতি, সুখতো অনুপট্ঠানকুসলো হোতি. অনত্ততো উপট্ঠানকুসলো হোতি, অত্ততো অনুপট্ঠানকুসলো হোতি. খযতো উপট্ঠানকুসলো হোতি, ঘনতো অনুপট্ঠানকুসলো হোতি. ৰযতো উপট্ঠানকুসলো হোতি, আযূহনানুপট্ঠানকুসলো হোতি. ৰিপরিণামূপট্ঠানকুসলো হোতি, ধুৰতো অনুপট্ঠানকুসলো হোতি. অনিমিত্তূপট্ঠানকুসলো হোতি, নিমিত্তানুপট্ঠানকুসলো হোতি. অপ্পণিহিতূপট্ঠানকুসলো হোতি, পণিধিঅনুপট্ঠানকুসলো [পণিধানুপট্ঠানকুসলো (স্যা.)] হোতি. সুঞ্ঞতূপট্ঠানকুসলো হোতি, অভিনিৰেসানুপট্ঠানকুসলো হোতি – পুথুজ্জনো ৰিপস্সনং ভাৰেন্তো ইমেহি নৰহি আকারেহি উপট্ঠানকুসলো হোতি, ইমেহি নৰহি আকারেহি অনুপট্ঠানকুসলো হোতি.

২০৬. সেক্খো ৰিপস্সনং ভাৰেন্তো কতমেহি দসহি আকারেহি উপট্ঠানকুসলো হোতি, কতমেহি দসহি আকারেহি অনুপট্ঠানকুসলো হোতি? অনিচ্চতো উপট্ঠানকুসলো হোতি, নিচ্চতো অনুপট্ঠানকুসলো হোতি…পে… সুঞ্ঞতূপট্ঠানকুসলো হোতি, অভিনিৰেসানূপট্ঠানকুসলো হোতি. ঞাণূপট্ঠানকুসলো হোতি, অঞাণঅনুপট্ঠানকুসলো হোতি – সেক্খো ৰিপস্সনং ভাৰেন্তো ইমেহি দসহি আকারেহি উপট্ঠানকুসলো হোতি, ইমেহি দসহি আকারেহি অনুপট্ঠানকুসলো হোতি.

ৰীতরাগো ৰিপস্সনং ভাৰেন্তো কতমেহি দ্ৰাদসহি আকারেহি উপট্ঠানকুসলো হোতি, কতমেহি দ্ৰাদসহি আকারেহি অনুপট্ঠানকুসলো হোতি? অনিচ্চতো উপট্ঠানকুসলো হোতি, নিচ্চতো অনুপট্ঠানকুসলো হোতি…পে… ঞাণূপট্ঠানকুসলো হোতি, অঞাণানুপট্ঠানকুসলো হোতি. ৰিসঞ্ঞোগূপট্ঠানকুসলো হোতি, সঞ্ঞোগানুপট্ঠানকুসলো হোতি. নিরোধূপট্ঠানকুসলো হোতি, সঙ্খারানুপট্ঠানকুসলো হোতি – ৰীতরাগো ৰিপস্সনং ভাৰেন্তো ইমেহি দ্ৰাদসহি আকারেহি উপট্ঠানকুসলো হোতি, ইমেহি দ্ৰাদসহি আকারেহি অনুপট্ঠানকুসলো হোতি.

আৰজ্জিতত্তা আরম্মণূপট্ঠানকুসলৰসেন ইন্দ্রিযানি সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি…পে… ধম্মে সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি. ইন্দ্রিযানি সমোধানেতীতি কথং ইন্দ্রিযানি সমোধানেতি? অধিমোক্খট্ঠেন সদ্ধিন্দ্রিযং সমোধানেতি…পে… সমথনিমিত্তূপট্ঠানকুসলৰসেন, পগ্গহনিমিত্তূপট্ঠানকুসলৰসেন, অৰিক্খেপূপট্ঠানকুসলৰসেন, ওভাসূপট্ঠানকুসলৰসেন, সম্পহংসনূপট্ঠানকুসলৰসেন, উপেক্খূপট্ঠানকুসলৰসেন, একত্তূপট্ঠানকুসলৰসেন, ঞাণূপট্ঠানকুসলৰসেন, ৰিমুত্তূপট্ঠানকুসলৰসেন.

অনিচ্চতো উপট্ঠানকুসলৰসেন, নিচ্চতো অনুপট্ঠানকুসলৰসেন, দুক্খতো উপট্ঠানকুসলৰসেন, সুখতো অনুপট্ঠানকুসলৰসেন, অনত্ততো উপট্ঠানকুসলৰসেন, অত্ততো অনুপট্ঠানকুসলৰসেন, খযতো উপট্ঠানকুসলৰসেন, ঘনতো অনুপট্ঠানকুসলৰসেন, ৰযতো উপট্ঠানকুসলৰসেন, আযূহনানুপট্ঠানকুসলৰসেন, ৰিপরিণামূপট্ঠানকুসলৰসেন, ধুৰতো অনুপট্ঠানকুসলৰসেন, অনিমিত্তূপট্ঠানকুসলৰসেন, নিমিত্তানুপট্ঠানকুসলৰসেন, অপ্পণিহিতূপট্ঠানকুসলৰসেন, পণিধিঅনুপট্ঠানকুসলৰসেন, সুঞ্ঞতূপট্ঠানকুসলৰসেন, অভিনিৰেসানুপট্ঠানকুসলৰসেন, ঞাণূপট্ঠানকুসলৰসেন, অঞাণানুপট্ঠানকুসলৰসেন, ৰিসঞ্ঞোগূপট্ঠানকুসলৰসেন, সঞ্ঞোগানুপট্ঠানকুসলৰসেন, নিরোধূপট্ঠানকুসলৰসেন, সঙ্খারানুপট্ঠানকুসলৰসেন ইন্দ্রিযানি সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি.

২০৭. চতুসট্ঠিযা আকারেহি তিণ্ণন্নং ইন্দ্রিযানং ৰসীভাৰতাপঞ্ঞা আসৰানং খযে ঞাণং. কতমেসং তিণ্ণন্নং ইন্দ্রিযানং? অনঞ্ঞাতঞ্ঞস্সামীতিন্দ্রিযস্স, অঞ্ঞিন্দ্রিযস্স, অঞ্ঞাতাৰিন্দ্রিযস্স.

অনঞ্ঞাতঞ্ঞস্সামীতিন্দ্রিযং কতি ঠানানি গচ্ছতি? অঞ্ঞিন্দ্রিযং কতি ঠানানি গচ্ছতি? অঞ্ঞাতাৰিন্দ্রিযং কতি ঠানানি গচ্ছতি? অনঞ্ঞাতঞ্ঞস্সামীতিন্দ্রিযং একং ঠানং গচ্ছতি – সোতাপত্তিমগ্গং. অঞ্ঞিন্দ্রিযং ছ ঠানানি গচ্ছতি – সোতাপত্তিফলং, সকদাগামিমগ্গং, সকদাগামিফলং, অনাগামিমগ্গং, অনাগামিফলং, অরহত্তমগ্গং. অঞ্ঞাতাৰিন্দ্রিযং একং ঠানং গচ্ছতি – অরহত্তফলং.

সোতাপত্তিমগ্গক্খণে অনঞ্ঞাতঞ্ঞস্সামীতিন্দ্রিযস্স সদ্ধিন্দ্রিযং অধিমোক্খপরিৰারং হোতি, ৰীরিযিন্দ্রিযং পগ্গহপরিৰারং হোতি, সতিন্দ্রিযং উপট্ঠানপরিৰারং হোতি, সমাধিন্দ্রিযং অৰিক্খেপপরিৰারং হোতি, পঞ্ঞিন্দ্রিযং দস্সনপরিৰারং হোতি, মনিন্দ্রিযং ৰিজাননপরিৰারং হোতি, সোমনস্সিন্দ্রিযং অভিসন্দনপরিৰারং হোতি, জীৰিতিন্দ্রিযং পৰত্তসন্ততাধিপতেয্যপরিৰারং হোতি. সোতাপত্তিমগ্গক্খণে জাতা ধম্মা, ঠপেত্ৰা চিত্তসমুট্ঠানং রূপং, সব্বেৰ কুসলা হোন্তি, সব্বেৰ অনাসৰা হোন্তি, সব্বেৰ নিয্যানিকা হোন্তি, সব্বেৰ অপচযগামিনো হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি. সোতাপত্তিমগ্গক্খণে অনঞ্ঞাতঞ্ঞস্সামীতিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি, অঞ্ঞমঞ্ঞপরিৰারা হোন্তি, নিস্সযপরিৰারা হোন্তি, সম্পযুত্তপরিৰারা হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি. তেৰ তস্স আকারা চেৰ হোন্তি পরিৰারা চ.

সোতাপত্তিফলক্খণে…পে… অরহত্তফলক্খণে অঞ্ঞাতাৰিন্দ্রিযস্স সদ্ধিন্দ্রিযং অধিমোক্খপরিৰারং হোতি…পে… জীৰিতিন্দ্রিযং পৰত্তসন্ততাধিপতেয্যপরিৰারং হোতি. অরহত্তফলক্খণে জাতা ধম্মা সব্বেৰ অব্যাকতা হোন্তি, ঠপেত্ৰা চিত্তসমুট্ঠানং রূপং সব্বেৰ অনাসৰা হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি. অরহত্তফলক্খণে অঞ্ঞাতাৰিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি. তেৰ তস্স আকারা চেৰ হোন্তি পরিৰারা চ. ইতি ইমানি অট্ঠ অট্ঠকানি চতুসট্ঠি হোন্তি.

আসৰাতি কতমে তে আসৰা? কামাসৰো, ভৰাসৰো, দিট্ঠাসৰো, অৰিজ্জাসৰো. কত্থেতে আসৰা খীযন্তি [খিয্যন্তি (ক.)]? সোতাপত্তিমগ্গেন অনৰসেসো দিট্ঠাসৰো খীযতি. অপাযগমনীযো কামাসৰো খীযতি, অপাযগমনীযো ভৰাসৰো খীযতি, অপাযগমনীযো অৰিজ্জাসৰো খীযতি. এত্থেতে আসৰা খীযন্তি. সকদাগামিমগ্গেন ওল়ারিকো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি. এত্থেতে আসৰা খীযন্তি. অনাগামিমগ্গেন অনৰসেসো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি. এত্থেতে আসৰা খীযন্তি. অরহত্তমগ্গেন অনৰসেসো ভৰাসৰো খীযতি, অনৰসেসো অৰিজ্জাসৰো খীযতি. এত্থেতে আসৰা খীযন্তি.

২০৮. ন তস্স অদ্দিট্ঠমিধত্থি কিঞ্চি, অথো অৰিঞ্ঞাতমজানিতব্বং;

সব্বং অভিঞ্ঞাসি যদত্থি নেয্যং, তথাগতো তেন সমন্তচক্খূতি.

সমন্তচক্খূতি কেনট্ঠেন সমন্তচক্খু? চুদ্দস বুদ্ধঞাণানি – দুক্খে ঞাণং বুদ্ধঞাণং, দুক্খসমুদযে ঞাণং বুদ্ধঞাণং…পে… সব্বঞ্ঞুতঞাণং বুদ্ধঞাণং, অনাৰরণঞাণং বুদ্ধঞাণং. ইমানি চুদ্দস বুদ্ধঞাণানি. ইমেসং চুদ্দসন্নং বুদ্ধঞাণানং অট্ঠ ঞাণানি সাৰকসাধারণানি, ছ ঞাণানি অসাধারণানি সাৰকেহি.

যাৰতা দুক্খস্স দুক্খট্ঠো ঞাতো, অঞ্ঞাতো দুক্খট্ঠো নত্থীতি – সমন্তচক্খু. যং সমন্তচক্খু তং পঞ্ঞিন্দ্রিযং. পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং. যাৰতা দুক্খস্স দুক্খট্ঠো দিট্ঠো ৰিদিতো সচ্ছিকতো ফস্সিতো পঞ্ঞায; অফস্সিতো পঞ্ঞায দুক্খট্ঠো নত্থীতি – সমন্তচক্খু. যং সমন্তচক্খু তং পঞ্ঞিন্দ্রিযং. পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং. যাৰতা সমুদযস্স সমুদযট্ঠো…পে… যাৰতা নিরোধস্স নিরোধট্ঠো… যাৰতা মগ্গস্স মগ্গট্ঠো… যাৰতা অত্থপটিসম্ভিদায অত্থপটিসম্ভিদট্ঠো… যাৰতা ধম্মপটিসম্ভিদায ধম্মপটিসম্ভিদট্ঠো… যাৰতা নিরুত্তিপটিসম্ভিদায নিরুত্তিপটিসম্ভিদট্ঠো… যাৰতা পটিভানপটিসম্ভিদায পটিভানপটিসম্ভিদট্ঠো… যাৰতা ইন্দ্রিযপরোপরিযত্তে ঞাণং… যাৰতা সত্তানং আসযানুসযে ঞাণং… যাৰতা যমকপাটিহীরে ঞাণং… যাৰতা মহাকরুণাসমাপত্তিযা ঞাণং… যাৰতা সদেৰকস্স লোকস্স সমারকস্স সব্রহ্মকস্স সস্সমণব্রাহ্মণিযা পজায সদেৰমনুস্সায দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, তং ঞাতং দিট্ঠং ৰিদিতং সচ্ছিকতং ফস্সিতং পঞ্ঞায. অফস্সিতং পঞ্ঞায নত্থীতি – সমন্তচক্খু. যং সমন্তচক্খু তং পঞ্ঞিন্দ্রিযং. পঞ্ঞিন্দ্রিযস্স ৰসেন অধিমোক্খট্ঠেন সদ্ধিন্দ্রিযং, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং.

সদ্দহন্তো পগ্গণ্হাতি, পগ্গণ্হন্তো সদ্দহতি. সদ্দহন্তো উপট্ঠাপেতি, উপট্ঠাপেন্তো সদ্দহতি. সদ্দহন্তো সমাদহতি, সমাদহন্তো সদ্দহতি. সদ্দহন্তো পজানাতি, পজানন্তো সদ্দহতি. পগ্গণ্হন্তো উপট্ঠাপেতি, উপট্ঠাপেন্তো পগ্গণ্হাতি. পগ্গণ্হন্তো সমাদহতি, সমাদহন্তো পগ্গণ্হাতি. পগ্গণ্হন্তো পজানাতি, পজানন্তো পগ্গণ্হাতি. পগ্গণ্হন্তো সদ্দহতি, সদ্দহন্তো পগ্গণ্হাতি. উপট্ঠাপেন্তো সমাদহতি, সমাদহন্তো উপট্ঠাপেতি. উপট্ঠাপেন্তো পজানাতি, পজানন্তো উপট্ঠাপেতি. উপট্ঠাপেন্তো সদ্দহতি, সদ্দহন্তো উপট্ঠাপেতি. উপট্ঠাপেন্তো পগ্গণ্হাতি, পগ্গণ্হন্তো উপট্ঠাপেতি. সমাদহন্তো পজানাতি, পজানন্তো সমাদহতি. সমাদহন্তো সদ্দহতি, সদ্দহন্তো সমাদহতি. সমাদহন্তো পগ্গণ্হাতি, পগ্গণ্হন্তো সমাদহতি. সমাদহন্তো উপট্ঠাপেতি, উপট্ঠাপেন্তো সমাদহতি. পজানন্তো সদ্দহতি, সদ্দহন্তো পজানাতি. পজানন্তো পগ্গণ্হাতি, পগ্গণ্হন্তো পজানাতি. পজানন্তো উপট্ঠাপেতি, উপট্ঠাপেন্তো পজানাতি. পজানন্তো সমাদহতি, সমাদহন্তো পজানাতি.

সদ্দহিতত্তা পগ্গহিতং, পগ্গহিতত্তা সদ্দহিতং. সদ্দহিতত্তা উপট্ঠাপিতং, উপট্ঠাপিতত্তা সদ্দহিতং. সদ্দহিতত্তা সমাদহিতং, সমাদহিতত্তা সদ্দহিতং. সদ্দহিতত্তা পজানিতং, পজানিতত্তা সদ্দহিতং. পগ্গহিতত্তা উপট্ঠাপিতং, উপট্ঠাপিতত্তা পগ্গহিতং. পগ্গহিতত্তা সমাদহিতং, সমাদহিতত্তা পগ্গহিতং. পগ্গহিতত্তা পজানিতং পজানিতত্তা পগ্গহিতং. পগ্গহিতত্তা সদ্দহিতং, সদ্দহিতত্তা পগ্গহিতং. উপট্ঠাপিতত্তা সমাদহিতং, সমাদহিতত্তা উপট্ঠাপিতং. উপট্ঠাপিতত্তা পজানিতং, পজানিতত্তা উপট্ঠাপিতং. উপট্ঠাপিতত্তা সদ্দহিতং, সদ্দহিতত্তা উপট্ঠাপিতং. উপট্ঠাপিতত্তা পগ্গহিতং, পগ্গহিতত্তা উপট্ঠাপিতং. সমাদহিতত্তা পজানিতং, পজানিতত্তা সমাদহিতং. সমাদহিতত্তা সদ্দহিতং, সদ্দহিতত্তা সমাদহিতং. সমাদহিতত্তা পগ্গহিতং, পগ্গহিতত্তা সমাদহিতং. সমাদহিতত্তা উপট্ঠাপিতং, উপট্ঠাপিতত্তা সমাদহিতং. পজানিতত্তা সদ্দহিতং, সদ্দহিতত্তা পজানিতং. পজানিতত্তা পগ্গহিতং, পগ্গহিতত্তা পজানিতং. পজানিতত্তা উপট্ঠাপিতং, উপট্ঠাপিতত্তা পজানিতং. পজানিতত্তা সমাদহিতং, সমাদহিতত্তা পজানিতং.

যং বুদ্ধচক্খু তং বুদ্ধঞাণং, যং বুদ্ধঞাণং তং বুদ্ধচক্খু, যেন চক্খুনা তথাগতো সত্তে পস্সতি অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো [পরলোকৰজ্জভযদস্সাৰিনে (স্যা. ক.)], অপ্পেকচ্চে নপরলোকৰজ্জভযদস্সাৰিনো.

অপ্পরজক্খে মহারজক্খেতি সদ্ধো পুগ্গলো অপ্পরজক্খো, অস্সদ্ধো পুগ্গলো মহারজক্খো. আরদ্ধৰীরিযো পুগ্গলো অপ্পরজক্খো, কুসীতো পুগ্গলো মহারজক্খো. উপট্ঠিতস্সতি পুগ্গলো অপ্পরজক্খো, মুট্ঠস্সতি পুগ্গলো মহারজক্খো. সমাহিতো পুগ্গলো অপ্পরজক্খো, অসমাহিতো পুগ্গলো মহারজক্খো. পঞ্ঞৰা পুগ্গলো অপ্পরজক্খো, দুপ্পঞ্ঞো পুগ্গলো মহারজক্খো.

তিক্খিন্দ্রিযে মুদিন্দ্রিযেতি সদ্ধো পুগ্গলো তিক্খিন্দ্রিযো, অস্সদ্ধো পুগ্গলো মুদিন্দ্রিযো…পে… পঞ্ঞৰা পুগ্গলো তিক্খিন্দ্রিযো, দুপ্পঞ্ঞো পুগ্গলো মুদিন্দ্রিযো. স্ৰাকারে দ্ৰাকারেতি সদ্ধো পুগ্গলো স্ৰাকারো, অস্সদ্ধো পুগ্গলো দ্ৰাকারো…পে… পঞ্ঞৰা পুগ্গলো স্ৰাকারো, দুপ্পঞ্ঞো পুগ্গলো দ্ৰাকারো. সুৰিঞ্ঞাপযে দুৰিঞ্ঞাপযেতি সদ্ধো পুগ্গলো সুৰিঞ্ঞাপযো, অস্সদ্ধো পুগ্গলো দুৰিঞ্ঞাপযো…পে… পঞ্ঞৰা পুগ্গলো সুৰিঞ্ঞাপযো, দুপ্পঞ্ঞো পুগ্গলো দুৰিঞ্ঞাপযো.

অপ্পেকচ্চে পরলোকৰজ্জভযদস্সাৰিনো, অপ্পেকচ্চে নপরলোকৰজ্জভযদস্সাৰিনোতি সদ্ধো পুগ্গলো পরলোকৰজ্জভযদস্সাৰী, অস্সদ্ধো পুগ্গলো নপরলোকৰজ্জভযদস্সাৰী. আরদ্ধৰীরিযো পুগ্গলো পরলোকৰজ্জভযদস্সাৰী, কুসীতো পুগ্গলো নপরলোকৰজ্জভযদস্সাৰী…পে… পঞ্ঞৰা পুগ্গলো পরলোকৰজ্জভযদস্সাৰী, দুপ্পঞ্ঞো পুগ্গলো নপরলোকৰজ্জভযদস্সাৰী.

লোকোতি খন্ধলোকো ধাতুলোকো আযতনলোকো ৰিপত্তিভৰলোকো ৰিপত্তিসম্ভৰলোকো সম্পত্তিভৰলোকো সম্পত্তিসম্ভৰলোকো.

একো লোকো – সব্বে সত্তা আহারট্ঠিতিকা. দ্ৰে লোকা – নামঞ্চ রূপঞ্চ. তযো লোকা – তিস্সো ৰেদনা. চত্তারো লোকা – চত্তারো আহারা. পঞ্চ লোকা – পঞ্চুপাদানক্খন্ধা. ছ লোকা – ছ অজ্ঝত্তিকানি আযতনানি. সত্ত লোকা – সত্ত ৰিঞ্ঞাণট্ঠিতিযো. অট্ঠ লোকা – অট্ঠ লোকধম্মা. নৰ লোকা – নৰ সত্তাৰাসা. দস লোকা – দসাযতনানি. দ্ৰাদস লোকা – দ্ৰাদসাযতনানি. অট্ঠারস লোকা – অট্ঠারস ধাতুযো.

ৰজ্জন্তি সব্বে কিলেসা ৰজ্জা, সব্বে দুচ্চরিতা ৰজ্জা, সব্বে অভিসঙ্খারা ৰজ্জা, সব্বে ভৰগামিকম্মা ৰজ্জা. ইতি ইমস্মিঞ্চ লোকে ইমস্মিঞ্চ ৰজ্জে তিব্বা ভযসঞ্ঞা পচ্চুপট্ঠিতা হোন্তি, সেয্যথাপি উক্খিত্তাসিকে ৰধকে. ইমেহি পঞ্ঞাসায আকারেহি ইমানি পঞ্চিন্দ্রিযানি জানাতি পস্সতি অঞ্ঞাতি পটিৰিজ্ঝতীতি.

ইন্দ্রিযসমোধানো পঞ্চমো.

ততিযভাণৰারো.

ইন্দ্রিযকথা নিট্ঠিতা.