১. পঠমসুত্তন্তনিদ্দেসো

১৮৪. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি [‘‘ভদ্দন্তে’’তি (ক.)] তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি’’ [সং. নি. ৫.৪৭১].

১৮৫. ইমানি পঞ্চিন্দ্রিযানি কতিহাকারেহি ৰিসুজ্ঝন্তি? ইমানি পঞ্চিন্দ্রিযানি পন্নরসহি আকারেহি ৰিসুজ্ঝন্তি. অস্সদ্ধে পুগ্গলে পরিৰজ্জযতো, সদ্ধে পুগ্গলে সেৰতো ভজতো পযিরুপাসতো, পসাদনীযে সুত্তন্তে পচ্চৰেক্খতো – ইমেহি তীহাকারেহি সদ্ধিন্দ্রিযং ৰিসুজ্ঝতি. কুসীতে পুগ্গলে পরিৰজ্জযতো, আরদ্ধৰীরিযে পুগ্গলে সেৰতো ভজতো পযিরুপাসতো, সম্মপ্পধানে পচ্চৰেক্খতো – ইমেহি তীহাকারেহি ৰীরিযিন্দ্রিযং ৰিসুজ্ঝতি. মুট্ঠস্সতী পুগ্গলে পরিৰজ্জযতো, উপট্ঠিতস্সতী পুগ্গলে সেৰতো ভজতো পযিরুপাসতো, সতিপট্ঠানে পচ্চৰেক্খতো – ইমেহি তীহাকারেহি সতিন্দ্রিযং ৰিসুজ্ঝতি. অসমাহিতে পুগ্গলে পরিৰজ্জযতো, সমাহিতে পুগ্গলে সেৰতো ভজতো পযিরুপাসতো, ঝানৰিমোক্খে পচ্চৰেক্খতো – ইমেহি তীহাকারেহি সমাধিন্দ্রিযং ৰিসুজ্ঝতি. দুপ্পঞ্ঞে পুগ্গলে পরিৰজ্জযতো, পঞ্ঞৰন্তে পুগ্গলে সেৰতো ভজতো পযিরুপাসতো, গম্ভীরঞাণচরিযং পচ্চৰেক্খতো – ইমেহি তীহাকারেহি পঞ্ঞিন্দ্রিযং ৰিসুজ্ঝতি. ইতি ইমে পঞ্চ পুগ্গলে পরিৰজ্জযতো, পঞ্চ পুগ্গলে সেৰতো ভজতো পযিরুপাসতো, পঞ্চ সুত্তন্তক্খন্ধে পচ্চৰেক্খতো – ইমেহি পন্নরসহি আকারেহি ইমানি পঞ্চিন্দ্রিযানি ৰিসুজ্ঝন্তি.

কতিহাকারেহি পঞ্চিন্দ্রিযানি ভাৰিযন্তি, কতিহাকারেহি পঞ্চন্নং ইন্দ্রিযানং ভাৰনা হোতি? দসহাকারেহি পঞ্চিন্দ্রিযানি ভাৰিযন্তি, দসহাকারেহি পঞ্চন্নং ইন্দ্রিযানং ভাৰনা হোতি. অস্সদ্ধিযং পজহন্তো সদ্ধিন্দ্রিযং ভাৰেতি, সদ্ধিন্দ্রিযং ভাৰেন্তো অস্সদ্ধিযং পজহতি; কোসজ্জং পজহন্তো ৰীরিযিন্দ্রিযং ভাৰেতি, ৰীরিযিন্দ্রিযং ভাৰেন্তো কোসজ্জং পজহতি; পমাদং পজহন্তো সতিন্দ্রিযং ভাৰেতি, সতিন্দ্রিযং ভাৰেন্তো পমাদং পজহতি; উদ্ধচ্চং পজহন্তো সমাধিন্দ্রিযং ভাৰেতি, সমাধিন্দ্রিযং ভাৰেন্তো উদ্ধচ্চং পজহতি; অৰিজ্জং পজহন্তো পঞ্ঞিন্দ্রিযং ভাৰেতি, পঞ্ঞিন্দ্রিযং ভাৰেন্তো অৰিজ্জং পজহতি. ইমেহি দসহাকারেহি পঞ্চিন্দ্রিযানি ভাৰিযন্তি, ইমেহি দসহাকারেহি পঞ্চন্নং ইন্দ্রিযানং ভাৰনা হোতি.

কতিহাকারেহি পঞ্চিন্দ্রিযানি ভাৰিতানি হোন্তি সুভাৰিতানি? দসহাকারেহি পঞ্চিন্দ্রিযানি ভাৰিতানি হোন্তি সুভাৰিতানি. অস্সদ্ধিযস্স পহীনত্তা সুপ্পহীনত্তা সদ্ধিন্দ্রিযং ভাৰিতং হোতি সুভাৰিতং; সদ্ধিন্দ্রিযস্স ভাৰিতত্তা সুভাৰিতত্তা অস্সদ্ধিযং পহীনং হোতি সুপ্পহীনং. কোসজ্জস্স পহীনত্তা সুপ্পহীনত্তা ৰীরিযিন্দ্রিযং ভাৰিতং হোতি সুভাৰিতং; ৰীরিযিন্দ্রিযস্স ভাৰিতত্তা সুভাৰিতত্তা কোসজ্জং পহীনং হোতি সুপ্পহীনং. পমাদস্স পহীনত্তা সুপ্পহীনত্তা সতিন্দ্রিযং ভাৰিতং হোতি সুভাৰিতং; সতিন্দ্রিযস্স ভাৰিতত্তা সুভাৰিতত্তা পমাদো পহীনো হোতি সুপ্পহীনো. উদ্ধচ্চস্স পহীনত্তা সুপ্পহীনত্তা সমাধিন্দ্রিযং ভাৰিতং হোতি সুভাৰিতং; সমাধিন্দ্রিযস্স ভাৰিতত্তা সুভাৰিতত্তা উদ্ধচ্চং পহীনং হোতি সুপ্পহীনং. অৰিজ্জায পহীনত্তা পঞ্ঞিন্দ্রিযং ভাৰিতং হোতি সুভাৰিতং; পঞ্ঞিন্দ্রিযস্স ভাৰিতত্তা সুভাৰিতত্তা অৰিজ্জা পহীনা হোতি সুপ্পহীনা. ইমেহি দসহাকারেহি পঞ্চিন্দ্রিযানি ভাৰিতানি হোন্তি সুভাৰিতানি.

১৮৬. কতিহাকারেহি পঞ্চিন্দ্রিযানি ভাৰিযন্তি, কতিহাকারেহি পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ? চতূহাকারেহি পঞ্চিন্দ্রিযানি ভাৰিযন্তি চতূহাকারেহি পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. সোতাপত্তিমগ্গক্খণে পঞ্চিন্দ্রিযানি ভাৰিযন্তি; সোতাপত্তিফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. সকদাগামিমগ্গক্খণে পঞ্চিন্দ্রিযানি ভাৰিযন্তি; সকদাগামিফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. অনাগামিমগ্গক্খণে পঞ্চিন্দ্রিযানি ভাৰিযন্তি; অনাগামিফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. অরহত্তমগ্গক্খণে পঞ্চিন্দ্রিযানি ভাৰিযন্তি; অরহত্তফলক্খণে পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ. ইতি চতস্সো মগ্গৰিসুদ্ধিযো, চতস্সো ফলৰিসুদ্ধিযো, চতস্সো সমুচ্ছেদৰিসুদ্ধিযো, চতস্সো পটিপ্পস্সদ্ধিৰিসুদ্ধিযো. ইমেহি চতূহাকারেহি পঞ্চিন্দ্রিযানি ভাৰিযন্তি; ইমেহি চতূহাকারেহি পঞ্চিন্দ্রিযানি ভাৰিতানি চেৰ হোন্তি সুভাৰিতানি চ পটিপ্পস্সদ্ধানি চ সুপ্পটিপ্পস্সদ্ধানি চ.

কতিনং পুগ্গলানং ইন্দ্রিযভাৰনা; কতি পুগ্গলা ভাৰিতিন্দ্রিযা? অট্ঠন্নং পুগ্গলানং ইন্দ্রিযভাৰনা; তযো পুগ্গলা ভাৰিতিন্দ্রিযা. কতমেসং অট্ঠন্নং পুগ্গলানং ইন্দ্রিযভাৰনা? সত্তন্নঞ্চ সেক্খানং, পুথুজ্জনকল্যাণকস্স চ – ইমেসং অট্ঠন্নং পুগ্গলানং ইন্দ্রিযভাৰনা. কতমে তযো পুগ্গলা ভাৰিতিন্দ্রিযা? সৰনেন বুদ্ধো তথাগতস্স সাৰকো খীণাসৰো ভাৰিতিন্দ্রিযো, সযং ভূতট্ঠেন পচ্চেকসম্বুদ্ধো ভাৰিতিন্দ্রিযো, অপ্পমেয্যট্ঠেন তথাগতো অরহং সম্মাসম্বুদ্ধো ভাৰিতিন্দ্রিযো – ইমে তযো পুগ্গলা ভাৰিতিন্দ্রিযা. ইতি ইমেসং অট্ঠন্নং পুগ্গলানং ইন্দ্রিযভাৰনা; ইমে তযো পুগ্গলা ভাৰিতিন্দ্রিযা.

সুত্তন্তনিদ্দেসো পঠমো.