৬. ঞাণরাসিছক্কনিদ্দেসো

১৮৩. কতমানি চতুৰীসতি সমাধিৰসেন ঞাণানি? দীঘং অস্সাসৰসেন চিত্তস্স একগ্গতা অৰিক্খেপো সমাধি, দীঘং পস্সাসৰসেন চিত্তস্স একগ্গতা অৰিক্খেপো সমাধি…পে… ৰিমোচযং চিত্তং অস্সাসৰসেন চিত্তস্স একগ্গতা অৰিক্খেপো সমাধি, ৰিমোচযং চিত্তং পস্সাসৰসেন চিত্তস্স একগ্গতা অৰিক্খেপো সমাধি. ইমানি চতুৰীসতি সমাধিৰসেন ঞাণানি.

কতমানি দ্ৰেসত্ততি ৰিপস্সনাৰসেন ঞাণানি? দীঘং অস্সাসং অনিচ্চতো অনুপস্সনট্ঠেন ৰিপস্সনা, দুক্খতো অনুপস্সনট্ঠেন ৰিপস্সনা, অনত্ততো অনুপস্সনট্ঠেন ৰিপস্সনা, দীঘং পস্সাসং অনিচ্চতো অনুপস্সনট্ঠেন ৰিপস্সনা, দুক্খতো অনুপস্সনট্ঠেন ৰিপস্সনা, অনত্ততো অনুপস্সনট্ঠেন ৰিপস্সনা…পে… ৰিমোচযং চিত্তং অস্সাসং, ৰিমোচযং চিত্তং পস্সাসং অনিচ্চতো অনুপস্সনট্ঠেন ৰিপস্সনা, দুক্খতো অনুপস্সনট্ঠেন ৰিপস্সনা, অনত্ততো অনুপস্সনট্ঠেন ৰিপস্সনা. ইমানি দ্ৰেসত্ততি ৰিপস্সনাৰসেন ঞাণানি.

কতমানি অট্ঠ নিব্বিদাঞাণানি? অনিচ্চানুপস্সী অস্সাসং যথাভূতং জানাতি পস্সতীতি – নিব্বিদাঞাণং, অনিচ্চানুপস্সী পস্সাসং যথাভূতং জানাতি পস্সতীতি – নিব্বিদাঞাণং…পে… পটিনিস্সগ্গানুপস্সী অস্সাসং যথাভূতং জানাতি পস্সতীতি – নিব্বিদাঞাণং, পটিনিস্সগ্গানুপস্সী পস্সাসং যথাভূতং জানাতি পস্সতীতি – নিব্বিদাঞাণং. ইমানি অট্ঠ নিব্বিদাঞাণানি.

কতমানি অট্ঠ নিব্বিদানুলোমে ঞাণানি? অনিচ্চানুপস্সী অস্সাসং ভযতুপট্ঠানে পঞ্ঞা নিব্বিদানুলোমে ঞাণং, অনিচ্চানুপস্সী পস্সাসং ভযতুপট্ঠানে পঞ্ঞা নিব্বিদানুলোমে ঞাণং…পে… পটিনিস্সগ্গানুপস্সী অস্সাসং ভযতুপট্ঠানে পঞ্ঞা নিব্বিদানুলোমে ঞাণং, পটিনিস্সগ্গানুপস্সী পস্সাসং ভযতুপট্ঠানে পঞ্ঞা নিব্বিদানুলোমে ঞাণং – ইমানি অট্ঠ নিব্বিদানুলোমে ঞাণানি.

কতমানি অট্ঠ নিব্বিদাপটিপ্পস্সদ্ধিঞাণানি? অনিচ্চানুপস্সী অস্সাসং পটিসঙ্খা সন্তিট্ঠনা পঞ্ঞা নিব্বিদাপটিপ্পস্সদ্ধিঞাণং, অনিচ্চানুপস্সী পস্সাসং পটিসঙ্খা সন্তিট্ঠনা পঞ্ঞা নিব্বিদাপটিপ্পস্সদ্ধিঞাণং…পে… পটিনিস্সগ্গানুপস্সী অস্সাসং পটিসঙ্খা সন্তিট্ঠনা পঞ্ঞা নিব্বিদাপটিপ্পস্সদ্ধিঞাণং, পটিনিস্সগ্গানুপস্সী পস্সাসং পটিসঙ্খা সন্তিট্ঠনা পঞ্ঞা নিব্বিদাপটিপ্পস্সদ্ধিঞাণং – ইমানি অট্ঠ নিব্বিদাপটিপ্পস্সদ্ধিঞাণানি.

কতমানি একৰীসতি ৰিমুত্তিসুখে ঞাণানি? সোতাপত্তিমগ্গেন সক্কাযদিট্ঠিযা পহীনত্তা সমুচ্ছিন্নত্তা উপ্পজ্জতি ৰিমুত্তিসুখে ঞাণং, ৰিচিকিচ্ছায পহীনত্তা সমুচ্ছিন্নত্তা উপ্পজ্জতি ৰিমুত্তিসুখে ঞাণং, সীলব্বতপরামাসস্স…পে… দিট্ঠানুসযস্স, ৰিচিকিচ্ছানুসযস্স পহীনত্তা সমুচ্ছিন্নত্তা উপ্পজ্জতি ৰিমুত্তিসুখে ঞাণং, সকদাগামিমগ্গেন ওল়ারিকস্স, কামরাগসঞ্ঞোজনস্স…পে… পটিঘসঞ্ঞোজনস্স, ওল়ারিকস্স কামরাগানুসযস্স, পটিঘানুসযস্স পহীনত্তা সমুচ্ছিন্নত্তা উপ্পজ্জতি ৰিমুত্তিসুখে ঞাণং, অনাগামিমগ্গেন অনুসহগতস্স কামরাগসঞ্ঞোজনস্স…পে… পটিঘসঞ্ঞোজনস্স, অনুসহগতস্স কামরাগানুসযস্স, পটিঘানুসযস্স পহীনত্তা সমুচ্ছিন্নত্তা উপ্পজ্জতি ৰিমুত্তিসুখে ঞাণং, অরহত্তমগ্গেন, রূপরাগস্স…পে… অরূপরাগস্স, মানস্স, উদ্ধচ্চস্স, অৰিজ্জায, মানানুসযস্স, ভৰরাগানুসযস্স, অৰিজ্জানুসযস্স পহীনত্তা সমুচ্ছিন্নত্তা উপ্পজ্জতি ৰিমুত্তিসুখে ঞাণং. ইমানি একৰীসতি ৰিমুত্তিসুখে ঞাণানি. সোল়সৰত্থুকং আনাপানস্সতিসমাধিং ভাৰযতো সমধিকানি ইমানি দ্ৰে ঞাণসতানি উপ্পজ্জন্তি.

ঞাণরাসিছক্কনিদ্দেসো ছট্ঠো.

আনাপানস্সতিকথা [আনাপানকথা (স্যা. ক.)] নিট্ঠিতা.