৫. সতোকারিঞাণনিদ্দেসো

১৬৩. কতমানি বাত্তিংস সতোকারিস্স ঞাণানি? ইধ ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো সতোৰ অস্সসতি সতো পস্সসতি. দীঘং ৰা অস্সসন্তো ‘‘দীঘং অস্সসামী’’তি পজানাতি. দীঘং ৰা পস্সসন্তো ‘‘দীঘং পস্সসামী’’তি পজানাতি. রস্সং ৰা অস্সসন্তো ‘‘রস্সং অস্সসামী’’তি পজানাতি. রস্সং ৰা পস্সসন্তো ‘‘রস্সং পস্সসামী’’তি পজানাতি. ‘‘সব্বকাযপটিসংৰেদী অস্সসিস্সামী’’তি সিক্খতি. ‘‘সব্বকাযপটিসংৰেদী পস্সসিস্সামী’’তি সিক্খতি. ‘‘পস্সম্ভযং কাযসঙ্খারং অস্সসিস্সামী’’তি সিক্খতি. ‘‘পস্সম্ভযং কাযসঙ্খারং পস্সসিস্সামী’’তি সিক্খতি. পীতিপটিসংৰেদী…পে… সুখপটিসংৰেদী… চিত্তসঙ্খারপটিসংৰেদী … পস্সম্ভযং চিত্তসঙ্খারং… চিত্তপটিসংৰেদী… অভিপ্পমোদযং চিত্তং… সমাদহং চিত্তং… ৰিমোচযং চিত্তং… অনিচ্চানুপস্সী… ৰিরাগানুপস্সী… নিরোধানুপস্সী… ‘‘পটিনিস্সগ্গানুপস্সী অস্সসিস্সামী’’তি সিক্খতি. ‘‘পটিনিস্সগ্গানুপস্সী পস্সসিস্সামী’’তি সিক্খতি.

১৬৪. ইধাতি ইমিস্সা দিট্ঠিযা, ইমিস্সা খন্তিযা, ইমিস্সা রুচিযা, ইমস্মিং আদাযে, ইমস্মিং ধম্মে, ইমস্মিং ৰিনযে, ইমস্মিং ধম্মৰিনযে, ইমস্মিং পাৰচনে, ইমস্মিং ব্রহ্মচরিযে, ইমস্মিং সত্থুসাসনে. তেন ৰুচ্চতি – ‘‘ইধা’’তি. ভিক্খূতি পুথুজ্জনকল্যাণকো ৰা হোতি ভিক্খু সেক্খো ৰা অরহা ৰা অকুপ্পধম্মো. অরঞ্ঞন্তি নিক্খমিত্ৰা বহি ইন্দখীলা সব্বমেতং অরঞ্ঞং. রুক্খমূলন্তি যত্থ ভিক্খুনো আসনং পঞ্ঞত্তং হোতি মঞ্চো ৰা পীঠং ৰা ভিসি ৰা তট্টিকা ৰা চম্মখণ্ডো ৰা তিণসন্থরো [তিণসণ্ঠরো (স্যা.)] ৰা পণ্ণসন্থরো ৰা পলালসন্থরো [পলাসসণ্ঠরো (স্যা.)] ৰা, তত্থ ভিক্খু চঙ্কমতি ৰা তিট্ঠতি ৰা নিসীদতি ৰা সেয্যং ৰা কপ্পেতি. সুঞ্ঞন্তি কেনচি অনাকিণ্ণং হোতি গহট্ঠেহি ৰা পব্বজিতেহি ৰা. অগারন্তি [আগারন্তি (স্যা.)] ৰিহারো অড্ঢযোগো পাসাদো হম্মিযং গুহা. নিসীদতি পল্লঙ্কং আভুজিত্ৰাতি নিসিন্নো হোতি পল্লঙ্কং আভুজিত্ৰা. উজুং কাযং পণিধাযাতি উজুকো হোতি কাযো ঠিতো [পনিধিতো (স্যা.)] সুপণিহিতো. পরিমুখং সতিং উপট্ঠপেত্ৰাতি. পরীতি পরিগ্গহট্ঠো. মুখন্তি নিয্যানট্ঠো. সতীতি উপট্ঠানট্ঠো. তেন ৰুচ্চতি – ‘‘পরিমুখং সতিং উপট্ঠপেত্ৰা’’তি.

১৬৫. সতোৰ অস্সসতি, সতো পস্সসতীতি বাত্তিংসায আকারেহি সতো কারী হোতি. দীঘং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সতো কারী হোতি. দীঘং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সতো কারী হোতি. রস্সং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সতো কারী হোতি. রস্সং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সতো কারী হোতি…পে… পটিনিস্সগ্গানুপস্সী অস্সাসৰসেন পটিনিস্সগ্গানুপস্সী পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সতো কারী হোতি.

পঠমচতুক্কনিদ্দেসো

১৬৬. কথং দীঘং অস্সসন্তো ‘‘দীঘং অস্সসামী’’তি পজানাতি, দীঘং পস্সসন্তো ‘‘দীঘং পস্সসামী’’তি পজানাতি? দীঘং অস্সাসং অদ্ধানসঙ্খাতে অস্সসতি, দীঘং পস্সাসং অদ্ধানসঙ্খাতে পস্সসতি, দীঘং অস্সাসপস্সাসং অদ্ধানসঙ্খাতে অস্সসতিপি পস্সসতিপি. দীঘং অস্সাসপস্সাসং অদ্ধানসঙ্খাতে অস্সসতোপি পস্সসতোপি ছন্দো উপ্পজ্জতি. ছন্দৰসেন ততো সুখুমতরং দীঘং অস্সাসং অদ্ধানসঙ্খাতে অস্সসতি, ছন্দৰসেন ততো সুখুমতরং দীঘং পস্সাসং অদ্ধানসঙ্খাতে পস্সসতি, ছন্দৰসেন ততো সুখুমতরং দীঘং অস্সাসপস্সাসং অদ্ধানসঙ্খাতে অস্সসতিপি পস্সসতিপি. ছন্দৰসেন ততো সুখুমতরং দীঘং অস্সাসপস্সাসং অদ্ধানসঙ্খাতে অস্সসতোপি পস্সসতোপি পামোজ্জং উপ্পজ্জতি. পামোজ্জৰসেন ততো সুখুমতরং দীঘং অস্সাসং অদ্ধানসঙ্খাতে অস্সসতি, পামোজ্জৰসেন ততো সুখুমতরং দীঘং পস্সাসং অদ্ধানসঙ্খাতে পস্সসতি, পামোজ্জৰসেন ততো সুখুমতরং দীঘং অস্সাসপস্সাসং অদ্ধানসঙ্খাতে অস্সসতিপি পস্সসতিপি. পামোজ্জৰসেন ততো সুখুমতরং দীঘং অস্সাসপস্সাসং অদ্ধানসঙ্খাতে অস্সসতোপি পস্সসতোপি দীঘং অস্সাসপস্সাসাপি চিত্তং ৰিৰত্ততি, উপেক্খা সণ্ঠাতি. ইমেহি নৰহাকারেহি দীঘং অস্সাসপস্সাসা কাযো. উপট্ঠানং সতি. অনুপস্সনা ঞাণং. কাযো উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং কাযং অনুপস্সতি. তেন ৰুচ্চতি – ‘‘কাযে কাযানুপস্সনাসতিপট্ঠানভাৰনা’’তি.

১৬৭. অনুপস্সতীতি কথং তং কাযং অনুপস্সতি? অনিচ্চতো অনুপস্সতি, নো নিচ্চতো. দুক্খতো অনুপস্সতি, নো সুখতো. অনত্ততো অনুপস্সতি, নো অত্ততো. নিব্বিন্দতি, নো নন্দতি. ৰিরজ্জতি, নো রজ্জতি. নিরোধেতি, নো সমুদেতি. পটিনিস্সজ্জতি, নো আদিযতি. অনিচ্চতো অনুপস্সন্তো নিচ্চসঞ্ঞং পজহতি. দুক্খতো অনুপস্সন্তো সুখসঞ্ঞং পজহতি. অনত্ততো অনুপস্সন্তো অত্তসঞ্ঞং পজহতি. নিব্বিন্দন্তো নন্দিং পজহতি. ৰিরজ্জন্তো রাগং পজহতি. নিরোধেন্তো সমুদযং পজহতি. পটিনিস্সজ্জন্তো আদানং পজহতি. এৰং তং কাযং অনুপস্সতি.

ভাৰনাতি চতস্সো ভাৰনা – তত্থ জাতানং ধম্মানং অনতিৰত্তনট্ঠেন ভাৰনা, ইন্দ্রিযানং একরসট্ঠেন ভাৰনা, তদুপগৰীরিযৰাহনট্ঠেন ভাৰনা, আসেৰনট্ঠেন ভাৰনা. দীঘং অস্সাসপস্সাসৰসেন চিত্তস্স একগ্গতং অৰিক্খেপং পজানতো ৰিদিতা ৰেদনা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি. ৰিদিতা সঞ্ঞা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি. ৰিদিতা ৰিতক্কা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি.

কথং ৰিদিতা ৰেদনা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি? কথং ৰেদনায উপ্পাদো ৰিদিতো হোতি? অৰিজ্জাসমুদযা ৰেদনাসমুদযোতি – পচ্চযসমুদযট্ঠেন ৰেদনায উপ্পাদো ৰিদিতো হোতি. তণ্হাসমুদযা ৰেদনাসমুদযোতি… কম্মসমুদযা ৰেদনাসমুদযোতি… ফস্সসমুদযা ৰেদনাসমুদযোতি পচ্চযসমুদযট্ঠেন ৰেদনায উপ্পাদো ৰিদিতো হোতি. নিব্বত্তিলক্খণং পস্সতোপি ৰেদনায উপ্পাদো ৰিদিতো হোতি. এৰং ৰেদনায উপ্পাদো ৰিদিতো হোতি.

কথং ৰেদনায উপট্ঠানং ৰিদিতং হোতি? অনিচ্চতো মনসিকরোতো খযতুপট্ঠানং ৰিদিতং হোতি. দুক্খতো মনসিকরোতো ভযতুপট্ঠানং ৰিদিতং হোতি. অনত্ততো মনসিকরোতো সুঞ্ঞতুপট্ঠানং ৰিদিতং হোতি. এৰং ৰেদনায উপট্ঠানং ৰিদিতং হোতি.

কথং ৰেদনায অত্থঙ্গমো ৰিদিতো হোতি? অৰিজ্জানিরোধা ৰেদনানিরোধোতি – পচ্চযনিরোধট্ঠেন ৰেদনায অত্থঙ্গমো ৰিদিতো হোতি. তণ্হানিরোধা ৰেদনানিরোধোতি …পে… কম্মনিরোধা ৰেদনানিরোধোতি…পে… ফস্সনিরোধা ৰেদনানিরোধোতি পচ্চযনিরোধট্ঠেন ৰেদনায অত্থঙ্গমো ৰিদিতো হোতি. ৰিপরিণামলক্খণং পস্সতোপি ৰেদনায অত্থঙ্গমো ৰিদিতো হোতি. এৰং ৰেদনায অত্থঙ্গমো ৰিদিতো হোতি. এৰং ৰিদিতা ৰেদনা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি.

কথং ৰিদিতা সঞ্ঞা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি? কথং সঞ্ঞায উপ্পাদো ৰিদিতো হোতি? অৰিজ্জাসমুদযা সঞ্ঞাসমুদযোতি – পচ্চযসমুদযট্ঠেন সঞ্ঞায উপ্পাদো ৰিদিতো হোতি. তণ্হাসমুদযা সঞ্ঞাসমুদযোতি…পে… কম্মসমুদযা সঞ্ঞাসমুদযোতি…পে… ফস্সসমুদযা সঞ্ঞাসমুদযোতি – পচ্চযসমুদযট্ঠেন সঞ্ঞায উপ্পাদো ৰিদিতো হোতি. নিব্বত্তিলক্খণং পস্সতোপি সঞ্ঞায উপ্পাদো ৰিদিতো হোতি. এৰং সঞ্ঞায উপ্পাদো ৰিদিতো হোতি.

কথং সঞ্ঞায উপট্ঠানং ৰিদিতং হোতি? অনিচ্চতো মনসিকরোতো খযতুপট্ঠানং ৰিদিতং হোতি. দুক্খতো মনসিকরোতো ভযতুপট্ঠানং ৰিদিতং হোতি. অনত্ততো মনসিকরোতো সুঞ্ঞতুপট্ঠানং ৰিদিতং হোতি. এৰং সঞ্ঞায উপট্ঠানং ৰিদিতং হোতি.

কথং সঞ্ঞায অত্থঙ্গমো ৰিদিতো হোতি? অৰিজ্জানিরোধা সঞ্ঞানিরোধোতি – পচ্চযনিরোধট্ঠেন সঞ্ঞায অত্থঙ্গমো ৰিদিতো হোতি. তণ্হানিরোধা সঞ্ঞানিরোধোতি…পে… কম্মনিরোধা সঞ্ঞানিরোধোতি…পে… ফস্সনিরোধা সঞ্ঞানিরোধোতি – পচ্চযনিরোধট্ঠেন সঞ্ঞায অত্থঙ্গমো ৰিদিতো হোতি. ৰিপরিণামলক্খণং পস্সতোপি সঞ্ঞায অত্থঙ্গমো ৰিদিতো হোতি. এৰং সঞ্ঞায অত্থঙ্গমো ৰিদিতো হোতি. এৰং ৰিদিতা সঞ্ঞা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি.

কথং ৰিদিতা ৰিতক্কা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি? কথং ৰিতক্কানং উপ্পাদো ৰিদিতো হোতি? অৰিজ্জাসমুদযা ৰিতক্কসমুদযোতি – পচ্চযসমুদযট্ঠেন ৰিতক্কানং উপ্পাদো ৰিদিতো হোতি. তণ্হাসমুদযা ৰিতক্কসমুদযোতি…পে… কম্মসমুদযা ৰিতক্কসমুদযোতি…পে… সঞ্ঞাসমুদযা ৰিতক্কসমুদযোতি – পচ্চযসমুদযট্ঠেন ৰিতক্কানং উপ্পাদো ৰিদিতো হোতি. নিব্বত্তিলক্খণং পস্সতোপি ৰিতক্কানং উপ্পাদো ৰিদিতো হোতি. এৰং ৰিতক্কানং উপ্পাদো ৰিদিতো হোতি.

কথং ৰিতক্কানং উপট্ঠানং ৰিদিতং হোতি? অনিচ্চতো মনসিকরোতো খযতুপট্ঠানং ৰিদিতং হোতি. দুক্খতো মনসিকরোতো ভযতুপট্ঠানং ৰিদিতং হোতি. অনত্ততো মনসিকরোতো সুঞ্ঞতুপট্ঠানং ৰিদিতং হোতি. এৰং ৰিতক্কানং উপট্ঠানং ৰিদিতং হোতি.

কথং ৰিতক্কানং অত্থঙ্গমো ৰিদিতো হোতি? অৰিজ্জানিরোধা ৰিতক্কনিরোধোতি – পচ্চযনিরোধট্ঠেন ৰিতক্কানং অত্থঙ্গমো ৰিদিতো হোতি. তণ্হানিরোধা ৰিতক্কনিরোধোতি…পে… কম্মনিরোধা ৰিতক্কনিরোধোতি…পে… সঞ্ঞানিরোধা ৰিতক্কনিরোধোতি – পচ্চযনিরোধট্ঠেন ৰিতক্কানং অত্থঙ্গমো ৰিদিতো হোতি. ৰিপরিণামলক্খণং পস্সতোপি ৰিতক্কানং অত্থঙ্গমো ৰিদিতো হোতি. এৰং ৰিতক্কানং অত্থঙ্গমো ৰিদিতো হোতি. এৰং ৰিদিতা ৰিতক্কা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি.

১৬৮. দীঘং অস্সাসপস্সাসৰসেন চিত্তস্স একগ্গতং অৰিক্খেপং পজানন্তো ইন্দ্রিযানি সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি…পে… মগ্গং সমোধানেতি, ধম্মে সমোধানেতি, গোচরঞ্চ পজানাতি, সমত্থঞ্চ পটিৰিজ্ঝতি.

ইন্দ্রিযানি সমোধানেতীতি কথং ইন্দ্রিযানি সমোধানেতি? অধিমোক্খট্ঠেন সদ্ধিন্দ্রিযং সমোধানেতি, পগ্গহট্ঠেন ৰীরিযিন্দ্রিযং সমোধানেতি, উপট্ঠানট্ঠেন সতিন্দ্রিযং সমোধানেতি, অৰিক্খেপট্ঠেন সমাধিন্দ্রিযং সমোধানেতি, দস্সনট্ঠেন পঞ্ঞিন্দ্রিযং সমোধানেতি. অযং পুগ্গলো ইমানি ইন্দ্রিযানি ইমস্মিং আরম্মণে সমোধানেতি. তেন ৰুচ্চতি – ‘‘ইন্দ্রিযানি সমোধানেতী’’তি.

গোচরঞ্চ পজানাতীতি যং তস্স আরম্মণং, তং তস্স গোচরং. যং তস্স গোচরং, তং তস্স আরম্মণং. পজানাতীতি পুগ্গলো. পজাননা পঞ্ঞা.

সমন্তি আরম্মণস্স উপট্ঠানং সমং, চিত্তস্স অৰিক্খেপো সমং, চিত্তস্স অধিট্ঠানং সমং, চিত্তস্স ৰোদানং সমং. অত্থোতি অনৰজ্জট্ঠো নিক্কিলেসট্ঠো ৰোদানট্ঠো পরমট্ঠো. পটিৰিজ্ঝতীতি আরম্মণস্স উপট্ঠানট্ঠং পটিৰিজ্ঝতি, চিত্তস্স অৰিক্খেপট্ঠং পটিৰিজ্ঝতি, চিত্তস্স অধিট্ঠানট্ঠং পটিৰিজ্ঝতি, চিত্তস্স ৰোদানট্ঠং পটিৰিজ্ঝতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

বলানি সমোধানেতীতি কথং বলানি সমোধানেতি? অস্সদ্ধিযে অকম্পিযট্ঠেন সদ্ধাবলং সমোধানেতি, কোসজ্জে অকম্পিযট্ঠেন ৰীরিযবলং সমোধানেতি, পমাদে অকম্পিযট্ঠেন সতিবলং সমোধানেতি, উদ্ধচ্চে অকম্পিযট্ঠেন সমাধিবলং সমোধানেতি, অৰিজ্জায অকম্পিযট্ঠেন পঞ্ঞাবলং সমোধানেতি. অযং পুগ্গলো ইমানি বলানি ইমস্মিং আরম্মণে সমোধানেতি. তেন ৰুচ্চতি – বলানি সমোধানেতীতি. গোচরঞ্চ পজানাতীতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

বোজ্ঝঙ্গে সমোধানেতীতি কথং বোজ্ঝঙ্গে সমোধানেতি? উপট্ঠানট্ঠেন সতিসম্বোজ্ঝঙ্গং সমোধানেতি, পৰিচযট্ঠেন ধম্মৰিচযসম্বোজ্ঝঙ্গং সমোধানেতি, পগ্গহট্ঠেন ৰীরিযসম্বোজ্ঝঙ্গং সমোধানেতি, ফরণট্ঠেন পীতিসম্বোজ্ঝঙ্গং সমোধানেতি, উপসমট্ঠেন পস্সদ্ধিসম্বোজ্ঝঙ্গং সমোধানেতি, অৰিক্খেপট্ঠেন সমাধিসম্বোজ্ঝঙ্গং সমোধানেতি, পটিসঙ্খানট্ঠেন উপেক্খাসম্বোজ্ঝঙ্গং সমোধানেতি. অযং পুগ্গলো ইমে বোজ্ঝঙ্গে ইমস্মিং আরম্মণে সমোধানেতি. তেন ৰুচ্চতি – ‘‘বোজ্ঝঙ্গে সমোধানেতী’’তি. গোচরঞ্চ পজানাতীতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

মগ্গং সমোধানেতীতি কথং মগ্গং সমোধানেতি? দস্সনট্ঠেন সম্মাদিট্ঠিং সমোধানেতি, অভিনিরোপনট্ঠেন সম্মাসঙ্কপ্পং সমোধানেতি, পরিগ্গহট্ঠেন সম্মাৰাচং সমোধানেতি, সমুট্ঠানট্ঠেন সম্মাকম্মন্তং সমোধানেতি, ৰোদানট্ঠেন সম্মাআজীৰং সমোধানেতি, পগ্গহট্ঠেন সম্মাৰাযামং সমোধানেতি, উপট্ঠানট্ঠেন সম্মাসতিং সমোধানেতি, অৰিক্খেপট্ঠেন সম্মাসমাধিং সমোধানেতি. অযং পুগ্গলো ইমং মগ্গং ইমস্মিং আরম্মণে সমোধানেতি. তেন ৰুচ্চতি – ‘‘মগ্গং সমোধানেতী’’তি. গোচরঞ্চ পজানাতীতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

ধম্মে সমোধানেতীতি কথং ধম্মে সমোধানেতি? আধিপতেয্যট্ঠেন ইন্দ্রিযানি সমোধানেতি, অকম্পিযট্ঠেন বলানি সমোধানেতি, নিয্যানট্ঠেন বোজ্ঝঙ্গে সমোধানেতি, হেতুট্ঠেন মগ্গং সমোধানেতি, উপট্ঠানট্ঠেন সতিপট্ঠানং সমোধানেতি, পদহনট্ঠেন সম্মপ্পধানং সমোধানেতি, ইজ্ঝনট্ঠেন ইদ্ধিপাদং সমোধানেতি তথট্ঠেন সচ্চং সমোধানেতি, অৰিক্খেপট্ঠেন সমথং সমোধানেতি, অনুপস্সনট্ঠেন ৰিপস্সনং সমোধানেতি, একরসট্ঠেন সমথৰিপস্সনং সমোধানেতি, অনতিৰত্তনট্ঠেন যুগনদ্ধং সমোধানেতি, সংৰরট্ঠেন সীলৰিসুদ্ধিং সমোধানেতি, অৰিক্খেপট্ঠেন চিত্তৰিসুদ্ধিং সমোধানেতি, দস্সনট্ঠেন দিট্ঠিৰিসুদ্ধিং সমোধানেতি, ৰিমুত্তট্ঠেন ৰিমোক্খং সমোধানেতি, পটিৰেধট্ঠেন ৰিজ্জং সমোধানেতি, পরিচ্চাগট্ঠেন ৰিমুত্তিং সমোধানেতি, সমুচ্ছেদট্ঠেন খযে ঞাণং সমোধানেতি, পটিপ্পস্সদ্ধট্ঠেন অনুপ্পাদে ঞাণং সমোধানেতি, ছন্দং মূলট্ঠেন সমোধানেতি, মনসিকারং সমুট্ঠানট্ঠেন সমোধানেতি, ফস্সং সমোধানট্ঠেন সমোধানেতি, ৰেদনং সমোসরণট্ঠেন সমোধানেতি, সমাধিং পমুখট্ঠেন সমোধানেতি, সতিং আধিপতেয্যট্ঠেন সমোধানেতি, পঞ্ঞং ততুত্তরট্ঠেন সমোধানেতি, ৰিমুত্তিং সারট্ঠেন সমোধানেতি, অমতোগধং নিব্বানং পরিযোসানট্ঠেন সমোধানেতি. অযং পুগ্গলো ইমে ধম্মে ইমস্মিং আরম্মণে সমোধানেতি. তেন ৰুচ্চতি – ‘‘ধম্মে সমোধানেতী’’তি.

গোচরঞ্চ পজানাতীতি যং তস্স আরম্মণং, তং তস্স গোচরং. যং তস্স গোচরং, তং তস্স আরম্মণং পজানাতীতি পুগ্গলো. পজাননা পঞ্ঞা. সমন্তি আরম্মণস্স উপট্ঠানং সমং, চিত্তস্স অৰিক্খেপো সমং, চিত্তস্স অধিট্ঠানং সমং, চিত্তস্স ৰোদানং সমং. অত্থোতি অনৰজ্জট্ঠো নিক্কিলেসট্ঠো ৰোদানট্ঠো পরমট্ঠো. পটিৰিজ্ঝতীতি আরম্মণস্স উপট্ঠানট্ঠং পটিৰিজ্ঝতি, চিত্তস্স অৰিক্খেপট্ঠং পটিৰিজ্ঝতি, চিত্তস্স অধিট্ঠানট্ঠং পটিৰিজ্ঝতি, চিত্তস্স ৰোদানট্ঠং পটিৰিজ্ঝতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৬৯. কথং রস্সং অস্সসন্তো ‘‘রস্সং অস্সসামী’’তি পজানাতি, রস্সং পস্সসন্তো ‘‘রস্সং পস্সসামী’’তি পজানাতি? রস্সং অস্সাসং ইত্তরসঙ্খাতে অস্সসতি, রস্সং পস্সাসং ইত্তরসঙ্খাতে পস্সসতি, রস্সং অস্সাসপস্সাসং ইত্তরসঙ্খাতে অস্সসতিপি পস্সসতিপি. রস্সং অস্সাসপস্সাসং ইত্তরসঙ্খাতে অস্সসতোপি পস্সসতোপি ছন্দো উপ্পজ্জতি. ছন্দৰসেন ততো সুখুমতরং রস্সং অস্সাসং ইত্তরসঙ্খাতে অস্সসতি. ছন্দৰসেন ততো সুখুমতরং রস্সং পস্সাসং ইত্তরসঙ্খাতে পস্সসতি. ছন্দৰসেন ততো সুখুমতরং রস্সং অস্সাসপস্সাসং ইত্তরসঙ্খাতে অস্সসতিপি পস্সসতিপি. ছন্দৰসেন ততো সুখুমতরং রস্সং অস্সাসপস্সাসং ইত্তরসঙ্খাতে অস্সসতোপি পস্সসতোপি পামোজ্জং উপ্পজ্জতি. পামোজ্জৰসেন ততো সুখুমতরং রস্সং অস্সাসং ইত্তরসঙ্খাতে অস্সসতি, পামোজ্জৰসেন ততো সুখুমতরং রস্সং পস্সাসং ইত্তরসঙ্খাতে পস্সসতি, পামোজ্জৰসেন ততো সুখুমতরং রস্সং অস্সাসপস্সাসং ইত্তরসঙ্খাতে অস্সসতিপি পস্সসতিপি. পামোজ্জৰসেন ততো সুখুমতরং রস্সং অস্সাসপস্সাসং ইত্তরসঙ্খাতে অস্সসতোপি পস্সসতোপি রস্সা অস্সাসপস্সাসা চিত্তং ৰিৰত্ততি, উপেক্খা সণ্ঠাতি. ইমেহি নৰহাকারেহি রস্সা অস্সাসপস্সাসা কাযো উপট্ঠানং সতি অনুপস্সনা ঞাণং. কাযো উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং কাযং অনুপস্সতি. তেন ৰুচ্চতি – ‘‘কাযে কাযানুপস্সনাসতিপট্ঠানভাৰনা’’তি.

অনুপস্সতীতি কথং তং কাযং অনুপস্সতি…পে… এৰং তং কাযং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. রস্সং অস্সাসপস্সাসৰসেন চিত্তস্স একগ্গতং অৰিক্খেপং পজানতো ৰিদিতা ৰেদনা উপ্পজ্জন্তি…পে… রস্সং অস্সাসপস্সাসৰসেন চিত্তস্স একগ্গতং অৰিক্খেপং পজানন্তো ইন্দ্রিযানি সমোধানেতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭০. কথং ‘‘সব্বকাযপটিসংৰেদী অস্সসিস্সামী’’তি সিক্খতি, ‘‘সব্বকাযপটিসংৰেদী পস্সসিস্সামী’’তি সিক্খতি? কাযোতি দ্ৰে কাযা – নামকাযো চ রূপকাযো চ. কতমো নামকাযো? ৰেদনা, সঞ্ঞা, চেতনা, ফস্সো, মনসিকারো, নামঞ্চ নামকাযো চ, যে চ ৰুচ্চন্তি চিত্তসঙ্খারা – অযং নামকাযো. কতমো রূপকাযো? চত্তারো চ মহাভূতা, চতুন্নঞ্চ মহাভূতানং উপাদাযরূপং, অস্সাসো চ পস্সাসো চ, নিমিত্তঞ্চ উপনিবন্ধনা, যে চ ৰুচ্চন্তি কাযসঙ্খারা – অযং রূপকাযো.

কথং তে কাযা পটিৰিদিতা হোন্তি? দীঘং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে কাযা পটিৰিদিতা হোন্তি. দীঘং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে কাযা পটিৰিদিতা হোন্তি. রস্সং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে কাযা পটিৰিদিতা হোন্তি. রস্সং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে কাযা পটিৰিদিতা হোন্তি.

আৰজ্জতো তে কাযা পটিৰিদিতা হোন্তি, পজানতো তে কাযা পটিৰিদিতা হোন্তি, পস্সতো তে কাযা পটিৰিদিতা হোন্তি, পচ্চৰেক্খতো তে কাযা পটিৰিদিতা হোন্তি, চিত্তং অধিট্ঠহতো তে কাযা পটিৰিদিতা হোন্তি, সদ্ধায অধিমুচ্চতো তে কাযা পটিৰিদিতা হোন্তি, ৰীরিযং পগ্গণ্হতো তে কাযা পটিৰিদিতা হোন্তি, সতিং উপট্ঠাপযতো তে কাযা পটিৰিদিতা হোন্তি, চিত্তং সমাদহতো তে কাযা পটিৰিদিতা হোন্তি, পঞ্ঞায পজানতো তে কাযা পটিৰিদিতা হোন্তি, অভিঞ্ঞেয্যং অভিজানতো তে কাযা পটিৰিদিতা হোন্তি, পরিঞ্ঞেয্যং পরিজানতো তে কাযা পটিৰিদিতা হোন্তি, পহাতব্বং পজহতো তে কাযা পটিৰিদিতা হোন্তি, ভাৰেতব্বং ভাৰযতো তে কাযা পটিৰিদিতা হোন্তি, সচ্ছিকাতব্বং সচ্ছিকরোতো তে কাযা পটিৰিদিতা হোন্তি. এৰং তে কাযা পটিৰিদিতা হোন্তি. সব্বকাযপটিসংৰেদী অস্সাসপস্সাসা কাযো উপট্ঠানং সতি অনুপস্সনা ঞাণং. কাযো উপট্ঠানং, নো সতি. সতি উপট্ঠানঞ্চেৰ সতি চ. তায সতিযা তেন ঞাণেন তং কাযং অনুপস্সতি. তেন ৰুচ্চতি – ‘‘কাযে কাযানুপস্সনাসতিপট্ঠানভাৰনা’’তি.

অনুপস্সতীতি কথং তং কাযং অনুপস্সতি…পে… এৰং তং কাযং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা.

সব্বকাযপটিসংৰেদী অস্সাসপস্সাসানং [অস্সাসপস্সাসা (স্যা.)] সংৰরট্ঠেন সীলৰিসুদ্ধি, অৰিক্খেপট্ঠেন চিত্তৰিসুদ্ধি, দস্সনট্ঠেন দিট্ঠিৰিসুদ্ধি. যো তত্থ সংৰরট্ঠো, অযং অধিসীলসিক্খা. যো তত্থ অৰিক্খেপট্ঠো, অযং অধিচিত্তসিক্খা. যো তত্থ দস্সনট্ঠো, অযং অধিপঞ্ঞাসিক্খা. ইমা তিস্সো সিক্খাযো আৰজ্জন্তো সিক্খতি, জানন্তো সিক্খতি, পস্সন্তো সিক্খতি, পচ্চৰেক্খন্তো সিক্খতি, চিত্তং অধিট্ঠহন্তো সিক্খতি, সদ্ধায অধিমুচ্চন্তো সিক্খতি, ৰীরিযং পগ্গণ্হন্তো সিক্খতি, সতিং উপট্ঠপেন্তো সিক্খতি, চিত্তং সমাদহন্তো সিক্খতি, পঞ্ঞায পজানন্তো সিক্খতি, অভিঞ্ঞেয্যং অভিজানন্তো সিক্খতি, পরিঞ্ঞেয্যং পরিজানন্তো সিক্খতি, পহাতব্বং পজহন্তো সিক্খতি, ভাৰেতব্বং ভাৰেন্তো সিক্খতি, সচ্ছিকাতব্বং সচ্ছিকরোন্তো সিক্খতি.

সব্বকাযপটিসংৰেদী অস্সাসপস্সাসৰসেন চিত্তস্স একগ্গতং অৰিক্খেপং পজানতো ৰিদিতা ৰেদনা উপ্পজ্জন্তি…পে… সব্বকাযপটিসংৰেদী অস্সাসপস্সাসৰসেন চিত্তস্স একগ্গতং অৰিক্খেপং পজানন্তো ইন্দ্রিযানি সমোধানেতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭১. কথং ‘‘পস্সম্ভযং কাযসঙ্খারং অস্সসিস্সামী’’তি সিক্খতি, ‘‘পস্সম্ভযং কাযসঙ্খারং পস্সসিস্সামী’’তি সিক্খতি? কতমো কাযসঙ্খারো? দীঘং অস্সাসা কাযিকা. এতে ধম্মা কাযপটিবদ্ধা কাযসঙ্খারা. তে কাযসঙ্খারে পস্সম্ভেন্তো নিরোধেন্তো ৰূপসমেন্তো সিক্খতি. দীঘং পস্সাসা কাযিকা. এতে ধম্মা কাযপটিবদ্ধা কাযসঙ্খারা. তে কাযসঙ্খারে পস্সম্ভেন্তো নিরোধেন্তো ৰূপসমেন্তো সিক্খতি. রস্সং অস্সাসা রস্সং পস্সাসা. সব্বকাযপটিসংৰেদী অস্সাসা সব্বকাযপটিসংৰেদী পস্সাসা কাযিকা. এতে ধম্মা কাযপটিবদ্ধা কাযসঙ্খারা. তে কাযসঙ্খারে পস্সম্ভেন্তো নিরোধেন্তো ৰূপসমেন্তো সিক্খতি.

যথারূপেহি কাযসঙ্খারেহি যা কাযস্স আনমনা ৰিনমনা সন্নমনা পণমনা ইঞ্জনা ফন্দনা চলনা পকম্পনা – পস্সম্ভযং কাযসঙ্খারং অস্সসিস্সামীতি সিক্খতি, পস্সম্ভযং কাযসঙ্খারং পস্সসিস্সামীতি সিক্খতি. যথারূপেহি কাযসঙ্খারেহি যা কাযস্স ন আনমনা ন ৰিনমনা ন সন্নমনা ন পণমনা অনিঞ্জনা অফন্দনা অচলনা অকম্পনা সন্তং সুখুমং পস্সম্ভযং কাযসঙ্খারং অস্সসিস্সামীতি সিক্খতি, পস্সম্ভযং কাযসঙ্খারং পস্সসিস্সামীতি সিক্খতি.

ইতি কির ‘‘পস্সম্ভযং কাযসঙ্খারং অস্সসিস্সামী’’তি সিক্খতি, ‘‘পস্সম্ভযং কাযসঙ্খারং পস্সসিস্সামী’’তি সিক্খতি. এৰং সন্তে ৰাতূপলদ্ধিযা চ পভাৰনা ন হোতি, অস্সাসপস্সাসানঞ্চ পভাৰনা ন হোতি, আনাপানস্সতিযা চ পভাৰনা ন হোতি, আনাপানস্সতিসমাধিস্স চ পভাৰনা ন হোতি; ন চ নং তং সমাপত্তিং পণ্ডিতা সমাপজ্জন্তিপি ৰুট্ঠহন্তিপি.

ইতি কির ‘‘পস্সম্ভযং কাযসঙ্খারং অস্সসিস্সামী’’তি সিক্খতি, ‘‘পস্সম্ভযং কাযসঙ্খারং পস্সসিস্সামী’’তি সিক্খতি. এৰং সন্তে ৰাতূপলদ্ধিযা চ পভাৰনা হোতি, অস্সাসপস্সাসানঞ্চ পভাৰনা হোতি, আনাপানস্সতিযা চ পভাৰনা হোতি. আনাপানস্সতিসমাধিস্স চ পভাৰনা হোতি; তঞ্চ নং সমাপত্তিং পণ্ডিতা সমাপজ্জন্তিপি ৰুট্ঠহন্তিপি. যথা কথং ৰিয? সেয্যথাপি কংসে আকোটিতে পঠমং ওল়ারিকা সদ্দা পৰত্তন্তি. ওল়ারিকানং সদ্দানং নিমিত্তং সুগ্গহিতত্তা সুমনসিকতত্তা সূপধারিতত্তা নিরুদ্ধেপি ওল়ারিকে সদ্দে, অথ পচ্ছা সুখুমকা সদ্দা পৰত্তন্তি. সুখুমকানং সদ্দানং নিমিত্তং সুগ্গহিতত্তা সুমনসিকতত্তা সূপধারিতত্তা নিরুদ্ধেপি সুখুমকে সদ্দে, অথ পচ্ছা সুখুমসদ্দনিমিত্তারম্মণতাপি চিত্তং পৰত্ততি. এৰমেৰং পঠমং ওল়ারিকা অস্সাসপস্সাসা পৰত্তন্তি; ওল়ারিকানং অস্সাসপস্সাসানং নিমিত্তং সুগ্গহিতত্তা সুমনসিকতত্তা সূপধারিতত্তা নিরুদ্ধেপি ওল়ারিকে অস্সাসপস্সাসে, অথ পচ্ছা সুখুমকা অস্সাসপস্সাসা পৰত্তন্তি. সুখুমকানং অস্সাসপস্সাসানং নিমিত্তং সুগ্গহিতত্তা সুমনসিকতত্তা সূপধারিতত্তা নিরুদ্ধেপি সুখুমকে অস্সাসপস্সাসে, অথ পচ্ছা সুখুমকঅস্সাসপস্সাসানং নিমিত্তারম্মণতাপি চিত্তং ন ৰিক্খেপং গচ্ছতি.

এৰং সন্তে ৰাতূপলদ্ধিযা চ পভাৰনা হোতি, অস্সাসপস্সাসানঞ্চ পভাৰনা হোতি, আনাপানস্সতিযা চ পভাৰনা হোতি, আনাপানস্সতিসমাধিস্স চ পভাৰনা হোতি; তঞ্চ নং সমাপত্তিং পণ্ডিতা সমাপজ্জন্তিপি ৰুট্ঠহন্তিপি. পস্সম্ভযং কাযসঙ্খারং অস্সাসপস্সাসা কাযো উপট্ঠানং সতি অনুপস্সনা ঞাণং. কাযো উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং কাযং অনুপস্সতি. তেন ৰুচ্চতি – ‘‘কাযে কাযানুপস্সনাসতিপট্ঠানভাৰনা’’তি.

অনুপস্সতীতি কথং তং কাযং অনুপস্সতি…পে… এৰং তং কাযং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. পস্সম্ভযং কাযসঙ্খারং, অস্সাসপস্সাসানং সংৰরট্ঠেন সীলৰিসুদ্ধি, অৰিক্খেপট্ঠেন চিত্তৰিসুদ্ধি, দস্সনট্ঠেন দিট্ঠিৰিসুদ্ধি. যো তত্থ সংৰরট্ঠো, অযং অধিসীলসিক্খা; যো তত্থ অৰিক্খেপট্ঠো, অযং অধিচিত্তসিক্খা; যো তত্থ দস্সনট্ঠো অযং অধিপঞ্ঞাসিক্খা. ইমা তিস্সো সিক্খাযো আৰজ্জন্তো সিক্খতি…পে… সচ্ছিকাতব্বং সচ্ছিকরোন্তো সিক্খতি, পস্সম্ভযং কাযসঙ্খারং অস্সাসপস্সাসৰসেন চিত্তস্স একগ্গতং অৰিক্খেপং পজানতো ৰিদিতা ৰেদনা উপ্পজ্জন্তি…পে… পস্সম্ভযং কাযসঙ্খারং অস্সাসপস্সাসৰসেন চিত্তস্স একগ্গতং অৰিক্খেপং পজানন্তো ইন্দ্রিযানি সমোধানেতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

অট্ঠ অনুপস্সনাঞাণানি, অট্ঠ চ উপট্ঠানানুস্সতিযো, চত্তারি সুত্তন্তিকৰত্থূনি কাযে কাযানুপস্সনায.

ভাণৰারো.

দুতিযচতুক্কনিদ্দেসো

১৭২. কথং ‘‘পীতিপটিসংৰেদী অস্সসিস্সামী’’তি সিক্খতি ‘‘পীতিপটিসংৰেদী পস্সসিস্সামী’’তি সিক্খতি? কতমা পীতি? দীঘং অস্সাসৰসেন চিত্তস্স একগ্গতং অৰিক্খেপং পজানতো উপ্পজ্জতি পীতি পামোজ্জং. যা পীতি পামোজ্জং আমোদনা পমোদনা হাসো পহাসো ৰিত্তি ওদগ্যং অত্তমনতা. চিত্তস্স দীঘং পস্সাসৰসেন চিত্তস্স একগ্গতং অৰিক্খেপং পজানতো উপ্পজ্জতি পীতি পামোজ্জং…পে… রস্সং অস্সাসৰসেন, রস্সং পস্সাসৰসেন, সব্বকাযপটিসংৰেদী অস্সাসৰসেন, সব্বকাযপটিসংৰেদী পস্সাসৰসেন, পস্সম্ভযং কাযসঙ্খারং অস্সাসৰসেন, পস্সম্ভযং কাযসঙ্খারং পস্সাসৰসেন চিত্তস্স একগ্গতং অৰিক্খেপং পজানতো উপ্পজ্জতি পীতি পামোজ্জং. যা পীতি পামোজ্জং আমোদনা পমোদনা হাসো পহাসো ৰিত্তি ওদগ্যং অত্তমনতা চিত্তস্স – অযং পীতি.

কথং সা পীতি পটিৰিদিতা হোতি? দীঘং অস্সাসপস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সা পীতি পটিৰিদিতা হোতি. দীঘং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সা পীতি পটিৰিদিতা হোতি. রস্সং অস্সাসৰসেন…পে… রস্সং পস্সাসৰসেন… সব্বকাযপটিসংৰেদী অস্সাসৰসেন… সব্বকাযপটিসংৰেদী পস্সাসৰসেন… পস্সম্ভযং কাযসঙ্খারং অস্সাসৰসেন… পস্সম্ভযং কাযসঙ্খারং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন সা পীতি পটিৰিদিতা হোতি. আৰজ্জতো সা পীতি পটিৰিদিতা হোতি, জানতো…পে… পস্সতো… পচ্চৰেক্খতো… চিত্তং অধিট্ঠহতো… সদ্ধায অধিমুচ্চতো… ৰীরিযং পগ্গণ্হতো… সতিং উপট্ঠাপযতো… চিত্তং সমাদহতো… পঞ্ঞায পজানতো… অভিঞ্ঞেয্যং অভিজানতো… পরিঞ্ঞেয্যং পরিজানতো… পহাতব্বং পজহতো… ভাৰেতব্বং ভাৰযতো… সচ্ছিকাতব্বং সচ্ছিকরোতো সা পীতি পটিৰিদিতা হোতি. এৰং সা পীতি পটিৰিদিতা হোতি.

পীতিপটিসংৰেদী অস্সাসপস্সাসৰসেন ৰেদনা উপট্ঠানং সতি অনুপস্সনা ঞাণং. ৰেদনা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং ৰেদনং অনুপস্সতি. তেন ৰুচ্চতি – ‘‘ৰেদনাসু ৰেদনানুপস্সনাসতিপট্ঠানভাৰনা’’তি.

অনুপস্সতীতি কথং তং ৰেদনং অনুপস্সতি? অনিচ্চতো অনুপস্সতি…পে… এৰং তং ৰেদনং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. পীতিপটিসংৰেদী অস্সাসপস্সাসানং সংৰরট্ঠেন সীলৰিসুদ্ধি…পে… পীতিপটিসংৰেদী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭৩. কথং ‘‘সুখপটিসংৰেদী অস্সসিস্সামী’’তি সিক্খতি, ‘‘সুখপটিসংৰেদী পস্সসিস্সামী’’তি সিক্খতি? সুখন্তি দ্ৰে সুখানি – কাযিকঞ্চ সুখং, চেতসিকঞ্চ সুখং. কতমং কাযিকং সুখং? যং কাযিকং সাতং কাযিকং সুখং, কাযসম্ফস্সজং সাতং সুখং ৰেদযিতং, কাযসম্ফস্সজা সাতা সুখা ৰেদনা – ইদং কাযিকং সুখং. কতমং চেতসিকং সুখং? যং চেতসিকং সাতং চেতসিকং সুখং, চেতোসম্ফস্সজং সাতং সুখং ৰেদযিতং, চেতোসম্ফস্সজা সাতা সুখা ৰেদনা – ইদং চেতসিকং সুখং.

কথং তে সুখা পটিৰিদিতা হোন্তি? দীঘং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে সুখা পটিৰিদিতা হোন্তি. দীঘং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে সুখা পটিৰিদিতা হোন্তি…পে… সচ্ছিকাতব্বং সচ্ছিকরোতো তে সুখা পটিৰিদিতা হোন্তি. এৰং তে সুখা পটিৰিদিতা হোন্তি. সুখপটিসংৰেদী অস্সাসপস্সাসৰসেন ৰেদনা উপট্ঠানং সতি অনুপস্সনা ঞাণং. ৰেদনা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং ৰেদনং অনুপস্সতি. তেন ৰুচ্চতি – ‘‘ৰেদনাসু ৰেদনানুপস্সনাসতিপট্ঠানভাৰনা’’তি.

অনুপস্সতীতি কথং তং ৰেদনং অনুপস্সতি. অনিচ্চতো অনুপস্সতি…পে… এৰং তং ৰেদনং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. সুখপটিসংৰেদী অস্সাসপস্সাসানং সংৰরট্ঠেন সীলৰিসুদ্ধি…পে… সুখপটিসংৰেদী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭৪. কথং ‘‘চিত্তসঙ্খারপটিসংৰেদী অস্সসিস্সামী’’তি সিক্খতি, ‘‘চিত্তসঙ্খারপটিসংৰেদী পস্সসিস্সামী’’তি সিক্খতি? কতমো চিত্তসঙ্খারো? দীঘং অস্সাসৰসেন সঞ্ঞা চ ৰেদনা চ চেতসিকা – এতে ধম্মা চিত্তপটিবদ্ধা চিত্তসঙ্খারা. দীঘং পস্সাসৰসেন সঞ্ঞা চ ৰেদনা চ চেতসিকা – এতে ধম্মা চিত্তপটিবদ্ধা চিত্তসঙ্খারা…পে… সুখপটিসংৰেদী অস্সাসৰসেন… সুখপটিসংৰেদী পস্সাসৰসেন সঞ্ঞা চ ৰেদনা চ চেতসিকা – এতে ধম্মা চিত্তপটিবদ্ধা চিত্তসঙ্খারা – অযং চিত্তসঙ্খারো.

কথং তে চিত্তসঙ্খারা পটিৰিদিতা হোন্তি? দীঘং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে চিত্তসঙ্খারা পটিৰিদিতা হোন্তি. দীঘং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তে চিত্তসঙ্খারা পটিৰিদিতা হোন্তি…পে… সচ্ছিকাতব্বং সচ্ছিকরোতো তে চিত্তসঙ্খারা পটিৰিদিতা হোন্তি. এৰং তে চিত্তসঙ্খারা পটিৰিদিতা হোন্তি. চিত্তসঙ্খারপটিসংৰেদী অস্সাসপস্সাসৰসেন ৰেদনা উপট্ঠানং সতি অনুপস্সনা ঞাণং ৰেদনা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তে ঞাণেন তং ৰেদনং অনুপস্সতি. তেন ৰুচ্চতি – ‘‘ৰেদনাসু ৰেদনানুপস্সনাসতিপট্ঠানভাৰনা’’তি.

অনুপস্সতীতি কথং তং ৰেদনং অনুপস্সতি? অনিচ্চতো অনুপস্সতি…পে… এৰং তং ৰেদনং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. চিত্তসঙ্খারপটিসংৰেদী অস্সাসপস্সাসানং সংৰরট্ঠেন সীলৰিসুদ্ধি…পে… চিত্তসঙ্খারপটিসংৰেদী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭৫. কথং ‘‘পস্সম্ভযং চিত্তসঙ্খারং অস্সসিস্সামী’’তি সিক্খতি, ‘‘পস্সম্ভযং চিত্তসঙ্খারং পস্সসিস্সামী’’তি সিক্খতি? কতমো চিত্তসঙ্খারো? দীঘং অস্সাসৰসেন সঞ্ঞা চ ৰেদনা চ চেতসিকা – এতে ধম্মা চিত্তপটিবদ্ধা চিত্তসঙ্খারা. তে চিত্তসঙ্খারে পস্সম্ভেন্তো নিরোধেন্তো ৰূপসমেন্তো সিক্খতি. দীঘং পস্সাসৰসেন সঞ্ঞা চ ৰেদনা চ চেতসিকা – এতে ধম্মা চিত্তপটিবদ্ধা চিত্তসঙ্খারা. তে চিত্তসঙ্খারে পস্সম্ভেন্তো নিরোধেন্তো ৰূপসমেন্তো সিক্খতি. চিত্তসঙ্খারপটিসংৰেদী অস্সাসৰসেন… চিত্তসঙ্খারপটিসংৰেদী পস্সাসৰসেন সঞ্ঞা চ ৰেদনা চ চেতসিকা – এতে ধম্মা চিত্তপটিবদ্ধা চিত্তসঙ্খারা. তে চিত্তসঙ্খারে পস্সম্ভেন্তো নিরোধেন্তো ৰূপসমেন্তো সিক্খতি. পস্সম্ভযং চিত্তসঙ্খারং অস্সাসপস্সাসৰসেন ৰেদনা উপট্ঠানং সতি অনুপস্সনা ঞাণং. ৰেদনা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং ৰেদনং অনুপস্সতি. তেন ৰুচ্চতি – ‘‘ৰেদনাসু ৰেদনানুপস্সনাসতিপট্ঠানভাৰনা’’তি.

অনুপস্সতীতি কথং তং ৰেদনং অনুপস্সতি…পে… এৰং তং ৰেদনং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. পস্সম্ভযং চিত্তসঙ্খারং অস্সাসপস্সাসানং সংৰরট্ঠেন সীলৰিসুদ্ধি…পে… পস্সম্ভযং চিত্তসঙ্খারং অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

অট্ঠ অনুপস্সনাঞাণানি অট্ঠ চ উপট্ঠানানুস্সতিযো চত্তারি সুত্তন্তিকৰত্থূনি ৰেদনাসু ৰেদনানুপস্সনায.

ততিযচতুক্কনিদ্দেসো

১৭৬. কথং ‘‘চিত্তপটিসংৰেদী অস্সসিস্সামী’’তি সিক্খতি, ‘‘চিত্তপটিসংৰেদী পস্সসিস্সামী’’তি সিক্খতি? কতমং তং চিত্তং? দীঘং অস্সাসৰসেন ৰিঞ্ঞাণং চিত্তং. যং চিত্তং মনো মানসং হদযং পণ্ডরং মনো মনাযতনং মনিন্দ্রিযং ৰিঞ্ঞাণং ৰিঞ্ঞাণক্খন্ধো তজ্জা মনোৰিঞ্ঞাণধাতু. দীঘং পস্সাসৰসেন …পে… পস্সম্ভযং চিত্তসঙ্খারং অস্সাসৰসেন… পস্সম্ভযং চিত্তসঙ্খারং পস্সাসৰসেন ৰিঞ্ঞাণং চিত্তং. যং চিত্তং মনো মানসং হদযং পণ্ডরং মনো মানযতনং মনিন্দ্রিযং ৰিঞ্ঞাণং ৰিঞ্ঞাণক্খন্ধো তজ্জা মনোৰিঞ্ঞাণধাতু – ইদং চিত্তং.

কথং তং চিত্তং পটিৰিদিতং হোতি? দীঘং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তং চিত্তং পটিৰিদিতং হোতি. দীঘং পস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি. তায সতিযা তেন ঞাণেন তং চিত্তং পটিৰিদিতং হোতি…পে… সচ্ছিকাতব্বং সচ্ছিকরোতো তং চিত্তং পটিৰিদিতং হোতি. এৰং তং চিত্তং পটিৰিদিতং হোতি. চিত্তপটিসংৰেদী অস্সাসপস্সাসৰসেন ৰিঞ্ঞাণং চিত্তং উপট্ঠানং সতি অনুপস্সনা ঞাণং. চিত্তং উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং চিত্তং অনুপস্সতি. তেন ৰুচ্চতি – ‘‘চিত্তে চিত্তানুপস্সনাসতিপট্ঠানভাৰনা’’তি.

অনুপস্সতীতি কথং তং চিত্তং অনুপস্সতি…পে… এৰং তং চিত্তং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. চিত্তপটিসংৰেদী অস্সাসপস্সাসানং সংৰরট্ঠেন সীলৰিসুদ্ধি…পে… চিত্তপটিসংৰেদী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭৭. কথং ‘‘অভিপ্পমোদযং চিত্তং অস্সসিস্সামী’’তি, ‘‘অভিপ্পমোদযং চিত্তং পস্সসিস্সামী’’তি সিক্খতি? কতমো চিত্তস্স অভিপ্পমোদো? দীঘং অস্সাসৰসেন চিত্তস্স একগ্গতং অৰিক্খেপং পজানতো উপ্পজ্জতি চিত্তস্স অভিপ্পমোদো. যা চিত্তস্স আমোদনা পমোদনা হাসো পহাসো ৰিত্তি ওদগ্যং অত্তমনতা. চিত্তস্স দীঘং অস্সাসপস্সাসৰসেন চিত্তস্স একগ্গতং অৰিক্খেপং পজানতো উপ্পজ্জতি চিত্তস্স অভিপ্পমোদো. যা চিত্তস্স আমোদনা পমোদনা হাসো পহাসো ৰিত্তি ওদগ্যং অত্তমনতা চিত্তস্স…পে… চিত্তপটিসংৰেদী অস্সাসৰসেন… চিত্তপটিসংৰেদী পস্সাসৰসেন চিত্তস্স একগ্গতং অৰিক্খেপং পজানতো উপ্পজ্জতি চিত্তস্স অভিপ্পমোদো. যা চিত্তস্স আমোদনা পমোদনা হাসো পহাসো ৰিত্তি ওদগ্যং অত্তমনতা চিত্তস্স – অযং চিত্তস্স অভিপ্পমোদো. অভিপ্পমোদযং চিত্তং অস্সাসপস্সাসৰসেন ৰিঞ্ঞাণং চিত্তং উপট্ঠানং সতি অনুপস্সনা ঞাণং. চিত্তং উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং চিত্তং অনুপস্সতি. তেন ৰুচ্চতি – ‘‘চিত্তে চিত্তানুপস্সনাসতিপট্ঠানভাৰনা’’তি.

অনুপস্সতীতি কথং তং চিত্তং অনুপস্সতি…পে… এৰং তং চিত্তং অনুপস্সতীতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. অভিপ্পমোদযং চিত্তং অস্সাসপস্সাসানং সংৰরট্ঠেন সীলৰিসুদ্ধি…পে… অভিপ্পমোদযং চিত্তং অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭৮. কথং ‘‘সমাদহং চিত্তং অস্সসিস্সামী’’তি সিক্খতি, ‘‘সমাদহং চিত্তং পস্সসিস্সামী’’তি সিক্খতি? কতমো সমাধি [কতমঞ্চ সমাধিন্দিযং (স্যা.)]? দীঘং অস্সাসৰসেন চিত্তস্স একগ্গতা অৰিক্খেপো সমাধি, যা চিত্তস্স ঠিতি সণ্ঠিতি অৰট্ঠিতি [অধিট্টিতি (স্যা.)] অৰিসাহারো অৰিক্খেপো অৰিসাহটমানসতা [অৰিসাহতমানসতা (স্যা. ক.)] সমথো সমাধিন্দ্রিযং সমাধিবলং সম্মাসমাধি. দীঘং পস্সাসৰসেন চিত্তস্স একগ্গতা অৰিক্খেপো সমাধি…পে… সমাদহং চিত্তং অস্সাসৰসেন…পে… সমাদহং চিত্তং পস্সাসৰসেন চিত্তস্স একগ্গতা অৰিক্খেপো সমাধি. যা চিত্তস্স ঠিতি সণ্ঠিতি অৰট্ঠিতি অৰিসাহারো অৰিক্খেপো অৰিসাহটমানসতা সমথো সমাধিন্দ্রিযং সমাধিবলং সম্মাসমাধি – অযং সমাধি. সমাদহং চিত্তং অস্সাসপস্সাসৰসেন ৰিঞ্ঞাণং চিত্তং উপট্ঠানং সতি অনুপস্সনা ঞাণং. চিত্তং উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তং চিত্তং অনুপস্সতি. তেন ৰুচ্চতি – ‘‘চিত্তে চিত্তানুপস্সনাসতিপট্ঠানভাৰনা’’তি.

অনুপস্সতীতি কথং তং চিত্তং অনুপস্সতি…পে… এৰং তং চিত্তং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. সমাদহং চিত্তং অস্সাসপস্সাসানং সংৰরট্ঠেন সীলৰিসুদ্ধি…পে… সমাদহং চিত্তং অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৭৯. কথং ‘‘ৰিমোচযং চিত্তং অস্সসিস্সামী’’তি সিক্খতি, ‘‘ৰিমোচযং চিত্তং পস্সসিস্সামী’’তি সিক্খতি? ‘‘রাগতো ৰিমোচযং চিত্তং অস্সসিস্সামী’’তি সিক্খতি, ‘‘রাগতো ৰিমোচযং চিত্তং পস্সসিস্সামী’’তি সিক্খতি. ‘‘দোসতো ৰিমোচযং চিত্তং অস্সসিস্সামী’’তি সিক্খতি, ‘‘দোসতো ৰিমোচযং চিত্তং পস্সসিস্সামী’’তি সিক্খতি. ‘‘মোহতো ৰিমোচযং চিত্তং অস্সসিস্সামী’’তি সিক্খতি…পে… মানতো ৰিমোচযং চিত্তং… দিট্ঠিযা ৰিমোচযং চিত্তং… ৰিচিকিচ্ছায ৰিমোচযং চিত্তং… থিনতো ৰিমোচযং চিত্তং… উদ্ধচ্চতো ৰিমোচযং চিত্তং… অহিরিকতো ৰিমোচযং চিত্তং… ‘‘অনোত্তপ্পতো ৰিমোচযং চিত্তং অস্সসিস্সামী’’তি সিক্খতি, ‘‘অনোত্তপ্পতো ৰিমোচযং চিত্তং পস্সসিস্সামী’’তি সিক্খতি. ৰিমোচযং চিত্তং অস্সাসপস্সাসৰসেন ৰিঞ্ঞাণং চিত্তং উপট্ঠানং সতি…পে….

অনুপস্সতীতি কথং তং চিত্তং অনুপস্সতি…পে… এৰং তং চিত্তং অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. ৰিমোচযং চিত্তং অস্সাসপস্সাসানং সংৰরট্ঠেন সীলৰিসুদ্ধি…পে… ৰিমোচযং চিত্তং অস্সাসপস্সাসৰসেন চিত্তস্স একগ্গতং অৰিক্খেপং পজানতো …পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

অট্ঠ অনুপস্সনাঞাণানি অট্ঠ চ উপট্ঠানানুস্সতিযো চত্তারি সুত্তন্তিকৰত্থূনি চিত্তে চিত্তানুপস্সনায.

চতুত্থচতুক্কনিদ্দেসো

১৮০. কথং ‘‘অনিচ্চানুপস্সী অস্সসিস্সামী’’তি সিক্খতি, ‘‘অনিচ্চানুপস্সী পস্সসিস্সামী’’তি সিক্খতি? অনিচ্চন্তি কিং অনিচ্চং? পঞ্চক্খন্ধা অনিচ্চা. কেনট্ঠেন অনিচ্চা? উপ্পাদৰযট্ঠেন অনিচ্চা. পঞ্চন্নং খন্ধানং উদযং পস্সন্তো কতি লক্খণানি পস্সতি, ৰযং পস্সন্তো কতি লক্খণানি পস্সতি, উদযব্বযং পস্সন্তো কতি লক্খণানি পস্সতি? পঞ্চন্নং খন্ধানং উদযং পস্সন্তো পঞ্চৰীসতি লক্খণানি পস্সতি, ৰযং পস্সন্তো পঞ্চৰীসতি লক্খণানি পস্সতি. পঞ্চন্নং খন্ধানং উদযব্বযং পস্সন্তো ইমানি পঞ্ঞাস লক্খণানি পস্সতি.

‘‘রূপে অনিচ্চানুপস্সী অস্সসিস্সামী’’তি সিক্খতি, ‘‘রূপে অনিচ্চানুপস্সী পস্সসিস্সামী’’তি সিক্খতি. ‘‘ৰেদনায…পে… সঞ্ঞায… সঙ্খারেসু… ৰিঞ্ঞাণে… চক্খুস্মিং…পে… জরামরণে অনিচ্চানুপস্সী অস্সসিস্সামী’’তি সিক্খতি, ‘‘জরামরণে অনিচ্চানুপস্সী পস্সসিস্সামী’’তি সিক্খতি. অনিচ্চানুপস্সী অস্সাসপস্সাসৰসেন ধম্মা উপট্ঠানং সতি অনুপস্সনা ঞাণং. ধম্মা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তে ধম্মে অনুপস্সতি. তেন ৰুচ্চতি – ‘‘ধম্মেসু ধম্মানুপস্সনাসতিপট্ঠানভাৰনা’’তি.

অনুপস্সতীতি কথং তে ধম্মে অনুপস্সতি…পে… এৰং তে ধম্মে অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. অনিচ্চানুপস্সী অস্সাসপস্সাসানং সংৰরট্ঠেন সীলৰিসুদ্ধি…পে… অনিচ্চানুপস্সী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

কথং ‘‘ৰিরাগানুপস্সী অস্সসিস্সামী’’তি সিক্খতি, ‘‘ৰিরাগানুপস্সী পস্সসিস্সামী’’তি সিক্খতি? রূপে আদীনৰং দিস্ৰা রূপৰিরাগে ছন্দজাতো হোতি সদ্ধাধিমুত্তো, চিত্তঞ্চস্স স্ৰাধিট্ঠিতং. ‘‘রূপে ৰিরাগানুপস্সী অস্সসিস্সামী’’তি সিক্খতি, ‘‘রূপে ৰিরাগানুপস্সী পস্সসিস্সামী’’তি সিক্খতি. ৰেদনায…পে… সঞ্ঞায… সঙ্খারেসু… ৰিঞ্ঞাণে… চক্খুস্মিং…পে… জরামরণে আদীনৰং দিস্ৰা জরামরণৰিরাগে ছন্দজাতো হোতি সদ্ধাধিমুত্তো, চিত্তঞ্চস্স স্ৰাধিট্ঠিতং. ‘‘জরামরণে ৰিরাগানুপস্সী অস্সসিস্সামী’’তি সিক্খতি, ‘‘জরামরণে ৰিরাগানুপস্সী পস্সসিস্সামী’’তি সিক্খতি. ৰিরাগানুপস্সী অস্সাসপস্সাসৰসেন ধম্মা উপট্ঠানং সতি অনুপস্সনা ঞাণং. ধম্মা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তে ধম্মে অনুপস্সতি. তেন ৰুচ্চতি – ‘‘ধম্মেসু ধম্মানুপস্সনাসতিপট্ঠানভাৰনা’’তি.

অনুপস্সতীতি কথং তে ধম্মে অনুপস্সতি…পে… এৰং তে ধম্মে অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. ৰিরাগানুপস্সী অস্সাসপস্সাসানং সংৰরট্ঠেন সীলৰিসুদ্ধি…পে… ৰিরাগানুপস্সী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

কথং ‘‘নিরোধানুপস্সী অস্সসিস্সামী’’তি সিক্খতি, ‘‘নিরোধানুপস্সী পস্সসিস্সামী’’তি সিক্খতি? রূপে আদীনৰং দিস্ৰা রূপনিরোধে ছন্দজাতো হোতি সদ্ধাধিমুত্তো, চিত্তঞ্চস্স স্ৰাধিট্ঠিতং. ‘‘রূপে নিরোধানুপস্সী অস্সসিস্সামী’’তি সিক্খতি, ‘‘রূপে নিরোধানুপস্সী পস্সসিস্সামী’’তি সিক্খতি. ৰেদনায…পে… সঞ্ঞায… সঙ্খারেসু… ৰিঞ্ঞাণে… চক্খুস্মিং…পে… জরামরণে আদীনৰং দিস্ৰা জরামরণনিরোধে ছন্দজাতো হোতি সদ্ধাধিমুত্তো, চিত্তঞ্চস্স স্ৰাধিট্ঠিতং. ‘‘জরামরণে নিরোধানুপস্সী অস্সসিস্সামী’’তি সিক্খতি, ‘‘জরামরণে নিরোধানুপস্সী পস্সসিস্সামী’’তি সিক্খতি.

১৮১. কতিহাকারেহি অৰিজ্জায আদীনৰো হোতি? কতিহাকারেহি অৰিজ্জা নিরুজ্ঝতি? পঞ্চহাকারেহি অৰিজ্জায আদীনৰো হোতি. অট্ঠহাকারেহি অৰিজ্জা নিরুজ্ঝতি.

কতমেহি পঞ্চহাকারেহি অৰিজ্জায আদীনৰো হোতি? অনিচ্চট্ঠেন অৰিজ্জায আদীনৰো হোতি, দুক্খট্ঠেন অৰিজ্জায আদীনৰো হোতি, অনত্তট্ঠেন অৰিজ্জায আদীনৰো হোতি, সন্তাপট্ঠেন অৰিজ্জায আদীনৰো হোতি, ৰিপরিণামট্ঠেন অৰিজ্জায আদীনৰো হোতি – ইমেহি পঞ্চহাকারেহি অৰিজ্জায আদীনৰো হোতি.

কতমেহি অট্ঠহাকারেহি অৰিজ্জা নিরুজ্ঝতি? নিদাননিরোধেন অৰিজ্জা নিরুজ্ঝতি, সমুদযনিরোধেন অৰিজ্জা নিরুজ্ঝতি, জাতিনিরোধেন অৰিজ্জা নিরুজ্ঝতি, পভৰনিরোধেন [আহারনিরোধেন (স্যা.)] অৰিজ্জা নিরুজ্ঝতি, হেতুনিরোধেন অৰিজ্জা নিরুজ্ঝতি, পচ্চযনিরোধেন অৰিজ্জা নিরুজ্ঝতি, ঞাণুপ্পাদেন অৰিজ্জা নিরুজ্ঝতি, নিরোধুপট্ঠানেন অৰিজ্জা নিরুজ্ঝতি – ইমেহি অট্ঠহাকারেহি অৰিজ্জা নিরুজ্ঝতি. ইমেহি পঞ্চহাকারেহি অৰিজ্জায আদীনৰং দিস্ৰা – ইমেহি অট্ঠহাকারেহি অৰিজ্জানিরোধে ছন্দজাতো হোতি সদ্ধাধিমুত্তো, চিত্তঞ্চস্স স্ৰাধিট্ঠিতং. ‘‘অৰিজ্জায নিরোধানুপস্সী অস্সসিস্সামী’’তি সিক্খতি, ‘‘অৰিজ্জায নিরোধানুপস্সী পস্সসিস্সামী’’তি সিক্খতি.

কতিহাকারেহি সঙ্খারেসু আদীনৰো হোতি, কতিহাকারেহি সঙ্খারা নিরুজ্ঝন্তি…পে… কতিহাকারেহি ৰিঞ্ঞাণে আদীনৰো হোতি, কতিহাকারেহি ৰিঞ্ঞাণং নিরুজ্ঝতি… কতিহাকারেহি নামরূপে আদীনৰো হোতি, কতিহাকারেহি নামরূপং নিরুজ্ঝতি… কতিহাকারেহি সল়াযতনে আদীনৰো হোতি, কতিহাকারেহি সল়াযতনং নিরুজ্ঝতি… কতিহাকারেহি ফস্সে আদীনৰো হোতি, কতিহাকারেহি ফস্সো নিরুজ্ঝতি… কতিহাকারেহি ৰেদনায আদীনৰো হোতি, কতিহাকারেহি ৰেদনা নিরুজ্ঝতি… কতিহাকারেহি তণ্হায আদীনৰো হোতি, কতিহাকারেহি তণ্হা নিরুজ্ঝতি… কতিহাকারেহি উপাদানে আদীনৰো হোতি, কতিহাকারেহি উপাদানং নিরুজ্ঝতি… কতিহাকারেহি ভৰে আদীনৰো হোতি, কতিহাকারেহি ভৰো নিরুজ্ঝতি… কতিহাকারেহি জাতিযা আদীনৰো হোতি, কতিহাকারেহি জাতি নিরুজ্ঝতি… কতিহাকারেহি জরামরণে আদীনৰো হোতি, কতিহাকারেহি জরামরণং নিরুজ্ঝতি? পঞ্চহাকারেহি জরামরণে আদীনৰো হোতি, অট্ঠহাকারেহি জরামরণং নিরুজ্ঝতি.

কতমেহি পঞ্চহাকারেহি জরামরণে আদীনৰো হোতি? অনিচ্চট্ঠেন জরামরণে আদীনৰো হোতি, দুক্খট্ঠেন…পে… অনত্তট্ঠেন…পে… সন্তাপট্ঠেন…পে… ৰিপরিণামট্ঠেন জরামরণে আদীনৰো হোতি – ইমেহি পঞ্চহাকারেহি জরামরণে আদীনৰো হোতি.

কতমেহি অট্ঠহাকারেহি জরামরণং নিরুজ্ঝতি? নিদাননিরোধেন জরামরণং নিরুজ্ঝতি, সমুদযনিরোধেন…পে… জাতিনিরোধেন…পে… পভৰনিরোধেন [ভৰনিরোধেন (স্যা.)] … হেতুনিরোধেন… পচ্চযনিরোধেন… ঞাণুপ্পাদেন…পে… নিরোধুপট্ঠানেন জরামরণং নিরুজ্ঝতি – ইমেহি অট্ঠহাকারেহি জরামরণং নিরুজ্ঝতি. ইমেহি পঞ্চহাকারেহি জরামরণে আদীনৰং দিস্ৰা ইমেহি অট্ঠহাকারেহি জরামরণনিরোধে ছন্দজাতো হোতি সদ্ধাধিমুত্তো, চিত্তঞ্চস্স স্ৰাধিট্ঠিতং. ‘‘জরামরণে নিরোধানুপস্সী অস্সসিস্সামী’’তি সিক্খতি, ‘‘জরামরণে নিরোধানুপস্সী পস্সসিস্সামী’’তি সিক্খতি. নিরোধানুপস্সী অস্সাসপস্সাসৰসেন ধম্মা উপট্ঠানং সতি অনুপস্সনা ঞাণং. ধম্মা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তে ধম্মে অনুপস্সতি. তেন ৰুচ্চতি – ‘‘ধম্মেসু ধম্মানুপস্সনাসতিপট্ঠানভাৰনা’’তি.

অনুপস্সতীতি কথং তে ধম্মে অনুপস্সতি…পে… এৰং তে ধম্মে অনুপস্সতি. ভাৰনাতি চতস্সো ভাৰনা…পে… আসেৰনট্ঠেন ভাৰনা. নিরোধানুপস্সী অস্সাসপস্সাসানং সংৰরট্ঠেন সীলৰিসুদ্ধি…পে… নিরোধানুপস্সী অস্সাসপস্সাসৰসেন চিত্তস্স একগ্গতং অৰিক্খেপং পজানতো…পে… পজানন্তো ইন্দ্রিযানি সমোধানেতি. তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

১৮২. কথং ‘‘পটিনিস্সগ্গানুপস্সী অস্সসিস্সামী’’তি সিক্খতি, ‘‘পটিনিস্সগ্গানুপস্সী পস্সসিস্সামী’’তি সিক্খতি? পটিনিস্সগ্গাতি দ্ৰে পটিনিস্সগ্গা – পরিচ্চাগপটিনিস্সগ্গো চ পক্খন্দনপটিনিস্সগ্গো চ. রূপং পরিচ্চজতীতি – পরিচ্চাগপটিনিস্সগ্গো. রূপনিরোধে নিব্বানে চিত্তং পক্খন্দতীতি – পক্খন্দনপটিনিস্সগ্গো. ‘‘রূপে পটিনিস্সগ্গানুপস্সী অস্সসিস্সামী’’তি সিক্খতি, ‘‘রূপে পটিনিস্সগ্গানুপস্সী পস্সসিস্সামী’’তি সিক্খতি. ৰেদনং…পে… সঞ্ঞং… সঙ্খারে… ৰিঞ্ঞাণং… চক্খুং…পে… জরামরণং পরিচ্চজতীতি – পরিচ্চাগপটিনিস্সগ্গো. জরামরণনিরোধে নিব্বানে চিত্তং পক্খন্দতীতি – পক্খন্দনপটিনিস্সগ্গো. ‘‘জরামরণে পটিনিস্সগ্গানুপস্সী অস্সসিস্সামী’’তি সিক্খতি, ‘‘জরামরণে পটিনিস্সগ্গানুপস্সী পস্সসিস্সামী’’তি সিক্খতি. পটিনিস্সগ্গানুপস্সী অস্সাসপস্সাসৰসেন ধম্মা উপট্ঠানং সতি অনুপস্সনা ঞাণং. ধম্মা উপট্ঠানং, নো সতি; সতি উপট্ঠানঞ্চেৰ সতি চ. তায সতিযা তেন ঞাণেন তে ধম্মে অনুপস্সতি. তেন ৰুচ্চতি – ‘‘ধম্মেসু ধম্মানুপস্সনাসতিপট্ঠানভাৰনা’’তি.

অনুপস্সতীতি কথং তে ধম্মে অনুপস্সতি? অনিচ্চতো অনুপস্সতি, নো নিচ্চতো…পে… পটিনিস্সজ্জতি, নো আদিযতি. অনিচ্চতো অনুপস্সন্তো নিচ্চসঞ্ঞং পজহতি…পে… পটিনিস্সজ্জন্তো আদানং পজহতি. এৰং তে ধম্মে অনুপস্সতি. ভাৰনাতি চতস্সো ভাৰনা. তত্থ জাতানং ধম্মানং অনতিৰত্তনট্ঠেন ভাৰনা…পে… আসেৰনট্ঠেন ভাৰনা. পটিনিস্সগ্গানুপস্সী অস্সাসপস্সাসানং সংৰরট্ঠেন সীলৰিসুদ্ধি, অৰিক্খেপট্ঠেন চিত্তৰিসুদ্ধি, দস্সনট্ঠেন দিট্ঠিৰিসুদ্ধি. যো তত্থ সংৰরট্ঠো, অযং অধিসীলসিক্খা; যো তত্থ অৰিক্খেপট্ঠো, অযং অধিচিত্তসিক্খা; যো তত্থ দস্সনট্ঠো, অযং অধিপঞ্ঞাসিক্খা – ইমা তিস্সো সিক্খাযো আৰজ্জন্তো সিক্খতি জানন্তো সিক্খতি…পে… সচ্ছিকাতব্বং সচ্ছিকরোন্তো সিক্খতি.

পটিনিস্সগ্গানুপস্সী অস্সাসপস্সাসৰসেন চিত্তস্স একগ্গতং অৰিক্খেপং পজানতো ৰিদিতা ৰেদনা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি …পে… পটিনিস্সগ্গানুপস্সী অস্সাসপস্সাসৰসেন চিত্তস্স একগ্গতং অৰিক্খেপং পজানন্তো ইন্দ্রিযানি সমোধানেতি গোচরঞ্চ পজানাতি সমত্থঞ্চ পটিৰিজ্ঝতি; বলানি সমোধানেতি… বোজ্ঝঙ্গে সমোধানেতি… মগ্গং সমোধানেতি… ধম্মে সমোধানেতি গোচরঞ্চ পজানাতি সমত্থঞ্চ পটিৰিজ্ঝতি.

ইন্দ্রিযানি সমোধানেতীতি কথং ইন্দ্রিযানি সমোধানেতি? অধিমোক্খট্ঠেন সদ্ধিন্দ্রিযং সমোধানেতি…পে… তেন ৰুচ্চতি – ‘‘সমত্থঞ্চ পটিৰিজ্ঝতী’’তি.

অট্ঠ অনুপস্সনে ঞাণানি অট্ঠ চ উপট্ঠানানুস্সতিযো চত্তারি সুত্তন্তিকৰত্থূনি ধম্মেসু ধম্মানুপস্সনায. ইমানি বাত্তিংস সতোকারিস্স ঞাণানি.

সতোকারিঞাণনিদ্দেসো পঞ্চমো.