৯. সঙ্খারুপেক্খাঞাণনিদ্দেসো

৫৪. কথং মুঞ্চিতুকম্যতাপটিসঙ্খাসন্তিট্ঠনা [মুচ্চিতুকম্যতাপটিসঙ্খাসন্তিট্ঠনা (ক.)] পঞ্ঞা সঙ্খারুপেক্খাসু ঞাণং? উপ্পাদং মুঞ্চিতুকম্যতাপটিসঙ্খাসন্তিট্ঠনা [উপ্পাদমুঞ্চিতুকম্যতা… (স্যা.)] পঞ্ঞা সঙ্খারুপেক্খাসু ঞাণং, পৰত্তং মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং, নিমিত্তং মুঞ্চিতুকম্যতা…পে… আযূহনং মুঞ্চিতুকম্যতা… পটিসন্ধিং মুঞ্চিতুকম্যতা… গতিং মুঞ্চিতুকম্যতা… নিব্বত্তিং মুঞ্চিতুকম্যতা… উপপত্তিং মুঞ্চিতুকম্যতা… জাতিং মুঞ্চিতুকম্যতা… জরং মুঞ্চিতুকম্যতা… ব্যাধিং মুঞ্চিতুকম্যতা… মরণং মুঞ্চিতুকম্যতা… সোকং মুঞ্চিতুকম্যতা… পরিদেৰং মুঞ্চিতুকম্যতা…পে… উপাযাসং মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং.

উপ্পাদো দুক্খন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. পৰত্তং দুক্খন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং…পে… উপাযাসো দুক্খন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং.

উপ্পাদো ভযন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. পৰত্তং ভযন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং…পে… উপাযাসো ভযন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং.

উপ্পাদো সামিসন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. পৰত্তং সামিসন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং…পে… উপাযাসো সামিসন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং.

উপ্পাদো সঙ্খারাতি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. পৰত্তং সঙ্খারাতি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং…পে… উপাযাসো সঙ্খারাতি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং.

উপ্পাদো সঙ্খারা, তে সঙ্খারে অজ্ঝুপেক্খতীতি – সঙ্খারুপেক্খা. যে চ সঙ্খারা যা চ উপেক্খা উভোপেতে সঙ্খারা, তে সঙ্খারে অজ্ঝুপেক্খতীতি – সঙ্খারুপেক্খা. পৰত্তং সঙ্খারা…পে… নিমিত্তং সঙ্খারা… আযূহনা সঙ্খারা… পটিসন্ধি সঙ্খারা… গতি সঙ্খারা… নিব্বত্তি সঙ্খারা… উপপত্তি সঙ্খারা… জাতি সঙ্খারা… জরা সঙ্খারা… ব্যাধি সঙ্খারা… মরণং সঙ্খারা… সোকো সঙ্খারা… পরিদেৰো সঙ্খারা…পে… উপাযাসো সঙ্খারা, তে সঙ্খারে অজ্ঝুপেক্খতীতি – সঙ্খারুপেক্খা. যে চ সঙ্খারা যা চ উপেক্খা উভোপেতে সঙ্খারা, তে সঙ্খারে অজ্ঝুপেক্খতীতি – সঙ্খারুপেক্খা.

৫৫. কতিহাকারেহি সঙ্খারুপেক্খায চিত্তস্স অভিনীহারো হোতি? অট্ঠহাকারেহি সঙ্খারুপেক্খায চিত্তস্স অভিনীহারো হোতি. পুথুজ্জনস্স কতিহাকারেহি সঙ্খারুপেক্খায চিত্তস্স অভিনীহারো হোতি? সেক্খস্স কতিহাকারেহি সঙ্খারুপেক্খায চিত্তস্স অভিনীহারো হোতি? ৰীতরাগস্স কতিহাকারেহি সঙ্খারুপেক্খায চিত্তস্স অভিনীহারো হোতি? পুথুজ্জনস্স দ্ৰীহাকারেহি সঙ্খারুপেক্খায চিত্তস্স অভিনীহারো হোতি. সেক্খস্স তীহাকারেহি সঙ্খারুপেক্খায চিত্তস্স অভিনীহারো হোতি. ৰীতরাগস্স তীহাকারেহি সঙ্খারুপেক্খায চিত্তস্স অভিনীহারো হোতি.

পুথুজ্জনস্স কতমেহি দ্ৰীহাকারেহি সঙ্খারুপেক্খায চিত্তস্স অভিনীহারো হোতি? পুথুজ্জনো সঙ্খারুপেক্খং অভিনন্দতি ৰা ৰিপস্সতি ৰা. পুথুজ্জনস্স ইমেহি দ্ৰীহাকারেহি সঙ্খারুপেক্খায চিত্তস্স অভিনীহারো হোতি. সেক্খস্স কতমেহি তীহাকারেহি সঙ্খারুপেক্খায চিত্তস্স অভিনীহারো হোতি? সেক্খো সঙ্খারুপেক্খং অভিনন্দতি ৰা ৰিপস্সতি ৰা পটিসঙ্খায ৰা ফলসমাপত্তিং সমাপজ্জতি. সেক্খস্স ইমেহি তীহাকারেহি সঙ্খারুপেক্খায চিত্তস্স অভিনীহারো হোতি. ৰীতরাগস্স কতমেহি তীহাকারেহি সঙ্খারুপেক্খায চিত্তস্স অভিনীহারো হোতি? ৰীতরাগো সঙ্খারুপেক্খং ৰিপস্সতি ৰা পটিসঙ্খায ৰা ফলসমাপত্তিং সমাপজ্জতি, তদজ্ঝুপেক্খিত্ৰা সুঞ্ঞতৰিহারেন ৰা অনিমিত্তৰিহারেন ৰা অপ্পণিহিতৰিহারেন ৰা ৰিহরতি. ৰীতরাগস্স ইমেহি তীহাকারেহি সঙ্খারুপেক্খায চিত্তস্স অভিনীহারো হোতি.

৫৬. কথং পুথুজ্জনস্স চ সেক্খস্স চ সঙ্খারুপেক্খায চিত্তস্স অভিনীহারো একত্তং হোতি? পুথুজ্জনস্স সঙ্খারুপেক্খং অভিনন্দতো চিত্তং কিলিস্সতি, ভাৰনায পরিপন্থো হোতি, পটিৰেধস্স অন্তরাযো হোতি, আযতিং পটিসন্ধিযা পচ্চযো হোতি. সেক্খস্সপি সঙ্খারুপেক্খং অভিনন্দতো চিত্তং কিলিস্সতি, ভাৰনায পরিপন্থো হোতি, উত্তরিপটিৰেধস্স অন্তরাযো হোতি, আযতিং পটিসন্ধিযা পচ্চযো হোতি. এৰং পুথুজ্জনস্স চ সেক্খস্স চ সঙ্খারুপেক্খায চিত্তস্স অভিনীহারো একত্তং হোতি অভিনন্দট্ঠেন.

কথং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো একত্তং হোতি? পুথুজ্জনো সঙ্খারুপেক্খং অনিচ্চতোপি দুক্খতোপি অনত্ততোপি ৰিপস্সতি. সেক্খোপি সঙ্খারুপেক্খং অনিচ্চতোপি দুক্খতোপি অনত্ততোপি ৰিপস্সতি. ৰীতরাগোপি সঙ্খারুপেক্খং অনিচ্চতোপি দুক্খতোপি অনত্ততোপি ৰিপস্সতি. এৰং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো একত্তং হোতি অনুপস্সনট্ঠেন.

কথং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি? পুথুজ্জনস্স সঙ্খারুপেক্খা কুসলা হোতি. সেক্খস্সপি সঙ্খারুপেক্খা কুসলা হোতি. ৰীতরাগস্স সঙ্খারুপেক্খা অব্যাকতা হোতি. এৰং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি কুসলাব্যাকতট্ঠেন.

কথং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি? পুথুজ্জনস্স সঙ্খারুপেক্খা কিঞ্চিকালে সুৰিদিতা হোতি, কিঞ্চিকালে ন সুৰিদিতা হোতি. সেক্খস্সপি সঙ্খারুপেক্খা কিঞ্চিকালে সুৰিদিতা হোতি, কিঞ্চিকালে ন সুৰিদিতা হোতি. ৰীতরাগস্স সঙ্খারুপেক্খা অচ্চন্তং সুৰিদিতা হোতি. এৰং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি ৰিদিতট্ঠেন চ অৰিদিতট্ঠেন চ.

কথং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি? পুথুজ্জনো সঙ্খারুপেক্খং অতিত্তত্তা ৰিপস্সতি. সেক্খোপি সঙ্খারুপেক্খং অতিত্তত্তা ৰিপস্সতি. ৰীতরাগো সঙ্খারুপেক্খং তিত্তত্তা ৰিপস্সতি. এৰং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি তিত্তট্ঠেন চ অতিত্তট্ঠেন চ.

কথং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি? পুথুজ্জনো সঙ্খারুপেক্খং তিণ্ণং সংযোজনানং পহানায সোতাপত্তিমগ্গং পটিলাভত্থায ৰিপস্সতি. সেক্খো সঙ্খারুপেক্খং তিণ্ণং সঞ্ঞোজনানং পহীনত্তা উত্তরিপটিলাভত্থায ৰিপস্সতি. ৰীতরাগো সঙ্খারুপেক্খং সব্বকিলেসানং পহীনত্তা দিট্ঠধম্মসুখৰিহারত্থায ৰিপস্সতি. এৰং পুথুজ্জনস্স চ সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি পহীনট্ঠেন চ অপ্পহীনট্ঠেন চ.

কথং সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি? সেক্খো সঙ্খারুপেক্খং অভিনন্দতি ৰা ৰিপস্সতি ৰা পটিসঙ্খায ৰা ফলসমাপত্তিং সমাপজ্জতি. ৰীতরাগো সঙ্খারুপেক্খং ৰিপস্সতি ৰা পটিসঙ্খায ৰা ফলসমাপত্তিং সমাপজ্জতি, তদজ্ঝুপেক্খিত্ৰা সুঞ্ঞতৰিহারেন ৰা অনিমিত্তৰিহারেন ৰা অপ্পণিহিতৰিহারেন ৰা ৰিহরতি. এৰং সেক্খস্স চ ৰীতরাগস্স চ সঙ্খারুপেক্খায চিত্তস্স অভিনীহারো নানত্তং হোতি ৰিহারসমাপত্তট্ঠেন.

৫৭. কতি সঙ্খারুপেক্খা সমথৰসেন উপ্পজ্জন্তি? কতি সঙ্খারুপেক্খা ৰিপস্সনাৰসেন উপ্পজ্জন্তি? অট্ঠ সঙ্খারুপেক্খা সমথৰসেন উপ্পজ্জন্তি. দস সঙ্খারুপেক্খা ৰিপস্সনাৰসেন উপ্পজ্জন্তি.

কতমা অট্ঠ সঙ্খারুপেক্খা সমথৰসেন উপ্পজ্জন্তি? পঠমং ঝানং পটিলাভত্থায নীৰরণে পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. দুতিযং ঝানং পটিলাভত্থায ৰিতক্কৰিচারে পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. ততিযং ঝানং পটিলাভত্থায পীতিং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. চতুত্থং ঝানং পটিলাভত্থায সুখদুক্খে পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. আকাসানঞ্চাযতনসমাপত্তিং পটিলাভত্থায রূপসঞ্ঞং পটিঘসঞ্ঞং নানত্তসঞ্ঞং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. ৰিঞ্ঞাণঞ্চাযতনসমাপত্তিং পটিলাভত্থায আকাসানঞ্চাযতনসঞ্ঞং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. আকিঞ্চঞ্ঞাযতনসমাপত্তিং পটিলাভত্থায ৰিঞ্ঞাণঞ্চাযতনসঞ্ঞং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. নেৰসঞ্ঞানাসঞ্ঞাযতনসমাপত্তিং পটিলাভত্থায আকিঞ্চঞ্ঞাযতনসঞ্ঞং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. ইমা অট্ঠ সঙ্খারুপেক্খা সমথৰসেন উপ্পজ্জন্তি.

কতমা দস সঙ্খারুপেক্খা ৰিপস্সনাৰসেন উপ্পজ্জন্তি? সোতাপত্তিমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. সোতাপত্তিফলসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং…পে… পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. সকদাগামিমগ্গং পটিলাভত্থায…পে… সকদাগামিফলসমাপত্তত্থায…পে… অনাগামিমগ্গং পটিলাভত্থায…পে… অনাগামিফলসমাপত্তত্থায …পে… অরহত্তমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. অরহত্তফলসমাপত্তত্থায…পে… সুঞ্ঞতৰিহারসমাপত্তত্থায…পে… অনিমিত্তৰিহারসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং…পে… পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং. ইমা দস সঙ্খারুপেক্খা ৰিপস্সনাৰসেন উপ্পজ্জন্তি.

৫৮. কতি সঙ্খারুপেক্খা কুসলা, কতি অকুসলা, কতি অব্যাকতা? পন্নরস সঙ্খারুপেক্খা কুসলা, তিস্সো সঙ্খারুপেক্খা অব্যাকতা. নত্থি সঙ্খারুপেক্খা অকুসলা.

পটিসঙ্খাসন্তিট্ঠনা পঞ্ঞা, অট্ঠ চিত্তস্স গোচরা;

পুথুজ্জনস্স দ্ৰে হোন্তি, তযো সেক্খস্স গোচরা;

তযো চ ৰীতরাগস্স, যেহি চিত্তং ৰিৰট্টতি.

অট্ঠ সমাধিস্স পচ্চযা, দস ঞাণস্স গোচরা;

অট্ঠারস সঙ্খারুপেক্খা, তিণ্ণং ৰিমোক্খান পচ্চযা.

ইমে অট্ঠারসাকারা, পঞ্ঞা যস্স পরিচ্চিতা;

কুসলো সঙ্খারুপেক্খাসু, নানাদিট্ঠীসু ন কম্পতীতি.

তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণং’’.

সঙ্খারুপেক্খাঞাণনিদ্দেসো নৰমো.