১০. গোত্রভুঞাণনিদ্দেসো

৫৯. কথং বহিদ্ধা ৰুট্ঠানৰিৰট্টনে পঞ্ঞা গোত্রভুঞাণং? উপ্পাদং অভিভুয্যতীতি – গোত্রভু. পৰত্তং অভিভুয্যতীতি – গোত্রভু. নিমিত্তং অভিভুয্যতীতি – গোত্রভু. আযূহনং অভিভুয্যতীতি – গোত্রভু. পটিসন্ধিং অভিভুয্যতীতি – গোত্রভু. গতিং অভিভুয্যতীতি – গোত্রভু. নিব্বত্তিং অভিভুয্যতীতি – গোত্রভু. উপপত্তিং অভিভুয্যতীতি – গোত্রভু. জাতিং অভিভুয্যতীতি – গোত্রভু. জরং অভিভুয্যতীতি – গোত্রভু. ব্যাধিং অভিভুয্যতীতি – গোত্রভু. মরণং অভিভুয্যতীতি – গোত্রভু. সোকং অভিভুয্যতীতি – গোত্রভু. পরিদেৰং অভিভুয্যতীতি – গোত্রভু. উপাযাসং অভিভুয্যতীতি – গোত্রভু. বহিদ্ধা সঙ্খারনিমিত্তং অভিভুয্যতীতি – গোত্রভু. অনুপ্পাদং পক্খন্দতীতি – গোত্রভু. অপ্পৰত্তং পক্খন্দতীতি – গোত্রভু…পে… নিরোধং নিব্বানং পক্খন্দতীতি – গোত্রভু.

উপ্পাদং অভিভুয্যিত্ৰা অনুপ্পাদং পক্খন্দতীতি – গোত্রভু. পৰত্তং অভিভুয্যিত্ৰা অপ্পৰত্তং পক্খন্দতীতি – গোত্রভু. নিমিত্তং অভিভুয্যিত্ৰা অনিমিত্তং পক্খন্দতীতি – গোত্রভু …পে… বহিদ্ধা সঙ্খারনিমিত্তং অভিভুয্যিত্ৰা নিরোধং নিব্বানং পক্খন্দতীতি – গোত্রভু.

উপ্পাদা ৰুট্ঠাতীতি – গোত্রভু. পৰত্তা ৰুট্ঠাতীতি – গোত্রভু. নিমিত্তা ৰুট্ঠাতীতি – গোত্রভু. আযূহনা ৰুট্ঠাতীতি – গোত্রভু. পটিসন্ধিযা ৰুট্ঠাতীতি – গোত্রভু. গতিযা ৰুট্ঠাতীতি – গোত্রভু. নিব্বত্তিযা ৰুট্ঠাতীতি – গোত্রভু. উপপত্তিযা ৰুট্ঠাতীতি – গোত্রভু. জাতিযা ৰুট্ঠাতীতি – গোত্রভু. জরায ৰুট্ঠাতীতি – গোত্রভু. ব্যাধিম্হা ৰুট্ঠাতীতি – গোত্রভু. মরণা ৰুট্ঠাতীতি – গোত্রভু. সোকা ৰুট্ঠাতীতি – গোত্রভু. পরিদেৰা ৰুট্ঠাতীতি – গোত্রভু. উপাযাসা ৰুট্ঠাতীতি – গোত্রভু. বহিদ্ধা সঙ্খারনিমিত্তা ৰুট্ঠাতীতি – গোত্রভু. অনুপ্পাদং পক্খন্দতীতি – গোত্রভু. অপ্পৰত্তং পক্খন্দতীতি – গোত্রভু…পে… নিরোধং নিব্বানং পক্খন্দতীতি – গোত্রভু.

উপ্পাদা ৰুট্ঠহিত্ৰা [ৰুট্ঠিত্ৰা (স্যা. ক.)] অনুপ্পাদং পক্খন্দতীতি – গোত্রভু. পৰত্তা ৰুট্ঠহিত্ৰা অপ্পৰত্তং পক্খন্দতীতি – গোত্রভু. নিমিত্তা ৰুট্ঠহিত্ৰা অনিমিত্তং পক্খন্দতীতি – গোত্রভু. আযূহনা ৰুট্ঠহিত্ৰা অনাযূহনং পক্খন্দতীতি – গোত্রভু. পটিসন্ধিযা ৰুট্ঠহিত্ৰা অপ্পটিসন্ধিং পক্খন্দতীতি – গোত্রভু. গতিযা ৰুট্ঠহিত্ৰা অগতিং পক্খন্দতীতি – গোত্রভু. নিব্বত্তিযা ৰুট্ঠহিত্ৰা অনিব্বত্তিং পক্খন্দতীতি – গোত্রভু. উপপত্তিযা ৰুট্ঠহিত্ৰা অনুপপত্তিং পক্খন্দতীতি – গোত্রভু. জাতিযা ৰুট্ঠহিত্ৰা অজাতিং পক্খন্দতীতি – গোত্রভু. জরায ৰুট্ঠহিত্ৰা অজরং পক্খন্দতীতি – গোত্রভু. ব্যাধিম্হা ৰুট্ঠহিত্ৰা অব্যাধিং পক্খন্দতীতি – গোত্রভু. মরণা ৰুট্ঠহিত্ৰা অমতং পক্খন্দতীতি – গোত্রভু. সোকা ৰুট্ঠহিত্ৰা অসোকং পক্খন্দতীতি – গোত্রভু. পরিদেৰা ৰুট্ঠহিত্ৰা অপরিদেৰং পক্খন্দতীতি – গোত্রভু. উপাযাসা ৰুট্ঠহিত্ৰা অনুপাযাসং পক্খন্দতীতি – গোত্রভু. বহিদ্ধা সঙ্খারনিমিত্তা ৰুট্ঠহিত্ৰা নিরোধং নিব্বানং পক্খন্দতীতি – গোত্রভু.

উপ্পাদা ৰিৰট্টতীতি – গোত্রভু. পৰত্তা ৰিৰট্টতীতি – গোত্রভু…পে… বহিদ্ধা সঙ্খারনিমিত্তা ৰিৰট্টতীতি – গোত্রভু. অনুপ্পাদং পক্খন্দতীতি – গোত্রভু. অপ্পৰত্তং পক্খন্দতীতি – গোত্রভু…পে… নিরোধং নিব্বানং পক্খন্দতীতি – গোত্রভু.

উপ্পাদা ৰিৰট্টিত্ৰা অনুপ্পাদং পক্খন্দতীতি – গোত্রভু. পৰত্তা ৰিৰট্টিত্ৰা অপ্পৰত্তং পক্খন্দতীতি – গোত্রভু…পে… বহিদ্ধা সঙ্খারনিমিত্তা ৰিৰট্টিত্ৰা নিরোধং নিব্বানং পক্খন্দতীতি – গোত্রভু.

৬০. কতি গোত্রভূ ধম্মা সমথৰসেন উপ্পজ্জন্তি? কতি গোত্রভূ ধম্মা ৰিপস্সনাৰসেন উপ্পজ্জন্তি? অট্ঠ গোত্রভূ ধম্মা সমথৰসেন উপ্পজ্জন্তি. দস গোত্রভূ ধম্মা ৰিপস্সনাৰসেন উপ্পজ্জন্তি.

কতমে অট্ঠ গোত্রভূ ধম্মা সমথৰসেন উপ্পজ্জন্তি? পঠমং ঝানং পটিলাভত্থায নীৰরণে অভিভুয্যতীতি – গোত্রভু. দুতিযং ঝানং পটিলাভত্থায ৰিতক্কৰিচারে অভিভুয্যতীতি – গোত্রভু. ততিযং ঝানং পটিলাভত্থায পীতিং অভিভুয্যতীতি – গোত্রভু. চতুত্থং ঝানং পটিলাভত্থায সুখদুক্খে অভিভুয্যতীতি – গোত্রভু. আকাসানঞ্চাযতনসমাপত্তিং পটিলাভত্থায রূপসঞ্ঞং পটিঘসঞ্ঞং নানত্তসঞ্ঞং অভিভুয্যতীতি – গোত্রভু. ৰিঞ্ঞাণঞ্চাযতনসমাপত্তিং পটিলাভত্থায আকাসানঞ্চাযতনসঞ্ঞং অভিভুয্যতীতি – গোত্রভু. আকিঞ্চঞ্ঞাযতনসমাপত্তিং পটিলাভত্থায ৰিঞ্ঞাণঞ্চাযতনসঞ্ঞং অভিভুয্যতীতি – গোত্রভু. নেৰসঞ্ঞানাসঞ্ঞাযতনসমাপত্তিং পটিলাভত্থায আকিঞ্চঞ্ঞাযতনসঞ্ঞং অভিভুয্যতীতি – গোত্রভু. ইমে অট্ঠ গোত্রভূ ধম্মা সমথৰসেন উপ্পজ্জন্তি.

কতমে দস গোত্রভূ ধম্মা ৰিপস্সনাৰসেন উপ্পজ্জন্তি? সোতাপত্তিমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং বহিদ্ধা সঙ্খারনিমিত্তং অভিভুয্যতীতি – গোত্রভু. সোতাপত্তিফলসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং…পে… অভিভুয্যতীতি – গোত্রভু. সকদাগামিমগ্গং পটিলাভত্থায…পে… সকদাগামিফলসমাপত্তত্থায… অনাগামিমগ্গং পটিলাভত্থায… অনাগামিফলসমাপত্তত্থায… অরহত্তমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং বহিদ্ধা সঙ্খারনিমিত্তং অভিভুয্যতীতি – গোত্রভু. অরহত্তফলসমাপত্তত্থায… সুঞ্ঞতৰিহারসমাপত্তত্থায… অনিমিত্তৰিহারসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং…পে… অভিভুয্যতীতি – গোত্রভু. ইমে দস গোত্রভূ ধম্মা ৰিপস্সনাৰসেন উপ্পজ্জন্তি.

কতি গোত্রভূ ধম্মা কুসলা, কতি অকুসলা, কতি অব্যাকতা? পন্নরস গোত্রভূ ধম্মা কুসলা, তযো গোত্রভূ ধম্মা অব্যাকতা. নত্থি গোত্রভূ ধম্মা অকুসলাতি.

সামিসঞ্চ নিরামিসং, পণিহিতঞ্চ অপ্পণিহিতং;

সঞ্ঞুত্তঞ্চ ৰিসঞ্ঞুত্তং, ৰুট্ঠিতঞ্চ অৰুট্ঠিতং.

অট্ঠ সমাধিস্স পচ্চযা, দস ঞাণস্স গোচরা;

অট্ঠারস গোত্রভূ ধম্মা, তিণ্ণং ৰিমোক্খান পচ্চযা.

ইমে অট্ঠারসাকারা, পঞ্ঞা যস্স পরিচ্চিতা;

কুসলো ৰিৰট্টে ৰুট্ঠানে, নানাদিট্ঠীসু ন কম্পতীতি.

তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘বহিদ্ধা ৰুট্ঠানৰিৰট্টনে পঞ্ঞা গোত্রভুঞাণং’’.

গোত্রভুঞাণনিদ্দেসো দসমো.