১১. মগ্গঞাণনিদ্দেসো

৬১. কথং দুভতো ৰুট্ঠানৰিৰট্টনে পঞ্ঞা মগ্গে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’. অভিনিরোপনট্ঠেন সম্মাসঙ্কপ্পো মিচ্ছাসঙ্কপ্পা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

পরিগ্গহট্ঠেন সম্মাৰাচা মিচ্ছাৰাচায ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

সমুট্ঠানট্ঠেন সম্মাকম্মন্তো মিচ্ছাকম্মন্তা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

ৰোদানট্ঠেন সম্মাআজীৰো মিচ্ছাআজীৰা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

পগ্গহট্ঠেন সম্মাৰাযামো মিচ্ছাৰাযামা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

উপট্ঠানট্ঠেন সম্মাসতি মিচ্ছাসতিযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

অৰিক্খেপট্ঠেন সম্মাসমাধি মিচ্ছাসমাধিতো ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

সকদাগামিমগ্গক্খণে দস্সনট্ঠেন সম্মাদিট্ঠি …পে… অৰিক্খেপট্ঠেন সম্মাসমাধি ওল়ারিকা কামরাগসঞ্ঞোজনা পটিঘসঞ্ঞোজনা ওল়ারিকা কামরাগানুসযা পটিঘানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

অনাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি অনুসহগতা কামরাগসঞ্ঞোজনা পটিঘসঞ্ঞোজনা অনুসহগতা কামরাগানুসযা পটিঘানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

অরহত্তমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি রূপরাগা অরূপরাগা মানা উদ্ধচ্চা অৰিজ্জায মানানুসযা ভৰরাগানুসযা অৰিজ্জানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

৬২. অজাতং ঝাপেতি জাতেন, ঝানং তেন পৰুচ্চতি;

ঝানৰিমোক্খে কুসলতা, নানাদিট্ঠীসু ন কম্পতি.

সমাদহিত্ৰা যথা চে ৰিপস্সতি, ৰিপস্সমানো তথা চে সমাদহে;

ৰিপস্সনা চ সমথো তদা অহু, সমানভাগা যুগনদ্ধা ৰত্তরে.

দুক্খা সঙ্খারা সুখো, নিরোধো ইতি দস্সনং [নিরোধোতি দস্সনং (স্যা. ক.)];

দুভতো ৰুট্ঠিতা পঞ্ঞা, ফস্সেতি অমতং পদং.

ৰিমোক্খচরিযং জানাতি, নানত্তেকত্তকোৰিদো;

দ্ৰিন্নং ঞাণানং কুসলতা, নানাদিট্ঠীসু ন কম্পতীতি.

তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘দুভতো ৰুট্ঠানৰিৰট্টনে পঞ্ঞা মগ্গে ঞাণং’’.

মগ্গঞাণনিদ্দেসো একাদসমো.