১২. ফলঞাণনিদ্দেসো

৬৩. কথং পযোগপ্পটিপ্পস্সদ্ধিপঞ্ঞা ফলে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাদিট্ঠি. মগ্গস্সেতং ফলং.

অভিনিরোপনট্ঠেন সম্মাসঙ্কপ্পো মিচ্ছাসঙ্কপ্পা ৰুট্ঠাতি তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসঙ্কপ্পো. মগ্গস্সেতং ফলং.

পরিগ্গহট্ঠেন সম্মাৰাচা মিচ্ছাৰাচায ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাৰাচা. মগ্গস্সেতং ফলং.

সমুট্ঠানট্ঠেন সম্মাকম্মন্তো মিচ্ছাকম্মন্তা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাকম্মন্তো. মগ্গস্সেতং ফলং.

ৰোদানট্ঠেন সম্মাআজীৰো মিচ্ছাআজীৰা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাআজীৰো. মগ্গস্সেতং ফলং.

পগ্গহট্ঠেন সম্মাৰাযামো মিচ্ছাৰাযামা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাৰাযামো. মগ্গস্সেতং ফলং.

উপট্ঠানট্ঠেন সম্মাসতি মিচ্ছাসতিযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসতি. মগ্গস্সেতং ফলং.

অৰিক্খেপট্ঠেন সম্মাসমাধি মিচ্ছাসমাধিতো ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং.

সকদাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি ওল়ারিকা কামরাগসঞ্ঞোজনা পটিঘসঞ্ঞোজনা ওল়ারিকা কামরাগানুসযা পটিঘানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং.

অনাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি অনুসহগতা কামরাগসঞ্ঞোজনা পটিঘসঞ্ঞোজনা অনুসহগতা কামরাগানুসযা পটিঘানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং.

অরহত্তমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি রূপরাগা অরূপরাগা মানা উদ্ধচ্চা অৰিজ্জায মানানুসযা ভৰরাগানুসযা অৰিজ্জানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘পযোগপ্পটিপ্পস্সদ্ধিপঞ্ঞা ফলে ঞাণং’’.

ফলঞাণনিদ্দেসো দ্ৰাদসমো.