৫৩. পুব্বেনিৰাসানুস্সতিঞাণনিদ্দেসো

১০৫. কথং পচ্চযপৰত্তানং ধম্মানং নানত্তেকত্তকম্মৰিপ্ফারৰসেন পরিযোগাহণে পঞ্ঞা পুব্বেনিৰাসানুস্সতিঞাণং? ইধ ভিক্খু ছন্দসমাধি…পে… মুদুং করিত্ৰা কম্মনিযং এৰং পজানাতি – ‘‘ইমস্মিং সতি ইদং হোতি, ইমস্সুপ্পাদা ইদং উপ্পজ্জতি, যদিদং – অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি; এৰমেতস্স কেৰলস্স দুক্খক্খন্ধস্স সমুদযো হোতি’’.

সো তথাভাৰিতেন চিত্তেন পরিসুদ্ধেন পরিযোদাতেন পুব্বেনিৰাসানুস্সতিঞাণায চিত্তং অভিনীহরতি অভিনিন্নামেতি. সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো, জাতিসতম্পি জাতিসহস্সম্পি জাতিসতসহস্সম্পি, অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰম আযুপরিযন্তো, সো ততো চুতো ইধূপপন্নো’’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘পচ্চযপৰত্তানং ধম্মানং নানত্তেকত্তকম্মৰিপ্ফারৰসেন পরিযোগাহণে পঞ্ঞা পুব্বেনিৰাসানুস্সতিঞাণং’’.

পুব্বেনিৰাসানুস্সতিঞাণনিদ্দেসো তেপঞ্ঞাসমো.