৪৪-৪৯. ছৰিৰট্টঞাণনিদ্দেসো

৯৫. কথং অধিপতত্তা পঞ্ঞা সঞ্ঞাৰিৰট্টে ঞাণং? নেক্খম্মাধিপতত্তা পঞ্ঞা কামচ্ছন্দতো সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. অব্যাপাদাধিপতত্তা পঞ্ঞা ব্যাপাদতো সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. আলোকসঞ্ঞাধিপতত্তা পঞ্ঞা থিনমিদ্ধতো সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. অৰিক্খেপাধিপতত্তা পঞ্ঞা উদ্ধচ্চতো সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. ধম্মৰৰত্থানাধিপতত্তা পঞ্ঞা ৰিচিকিচ্ছায সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. ঞাণাধিপতত্তা পঞ্ঞা অৰিজ্জায সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. পামোজ্জাধিপতত্তা পঞ্ঞা অরতিযা সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. পঠমজ্ঝানাধিপতত্তা পঞ্ঞা নীৰরণেহি সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং…পে… অরহত্তমগ্গাধিপতত্তা পঞ্ঞা সব্বকিলেসেহি সঞ্ঞায ৰিৰট্টতীতি – অধিপতত্তা পঞ্ঞা সঞ্ঞাৰিৰট্টে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘অধিপতত্তা পঞ্ঞা সঞ্ঞাৰিৰট্টে ঞাণং’’.

৯৬. কথং নানত্তে পঞ্ঞা চেতোৰিৰট্টে ঞাণং? কামচ্ছন্দো নানত্তং, নেক্খম্মং একত্তং. নেক্খম্মেকত্তং চেতযতো কামচ্ছন্দতো চিত্তং ৰিৰট্টতীতি – নানত্তে পঞ্ঞা চেতোৰিৰট্টে ঞাণং. ব্যাপাদো নানত্তং, অব্যাপাদো একত্তং. অব্যাপাদেকত্তং চেতযতো ব্যাপাদতো চিত্তং ৰিৰট্টতীতি – নানত্তে পঞ্ঞা চেতোৰিৰট্টে ঞাণং. থিনমিদ্ধং নানত্তং, আলোকসঞ্ঞা একত্তং. আলোকসঞ্ঞেকত্তং চেতযতো থিনমিদ্ধতো চিত্তং ৰিৰট্টতীতি – নানত্তে পঞ্ঞা চেতোৰিৰট্টে ঞাণং…পে… সব্বকিলেসা নানত্তং, অরহত্তমগ্গো একত্তং. অরহত্তমগ্গেকত্তং চেতযতো সব্বকিলেসেহি চিত্তং ৰিৰট্টতীতি – নানত্তে পঞ্ঞা চেতোৰিৰট্টে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘নানত্তে পঞ্ঞা চেতোৰিৰট্টে ঞাণং’’.

৯৭. কথং অধিট্ঠানে পঞ্ঞা চিত্তৰিৰট্টে ঞাণং? কামচ্ছন্দং পজহন্তো নেক্খম্মৰসেন চিত্তং অধিট্ঠাতীতি – অধিট্ঠানে পঞ্ঞা চিত্তৰিৰট্টে ঞাণং. ব্যাপাদং পজহন্তো অব্যাপাদৰসেন চিত্তং অধিট্ঠাতীতি – অধিট্ঠানে পঞ্ঞা চিত্তৰিৰট্টে ঞাণং. থিনমিদ্ধং পজহন্তো আলোকসঞ্ঞাৰসেন চিত্তং অধিট্ঠাতীতি – অধিট্ঠানে পঞ্ঞা চিত্তৰিৰট্টে ঞাণং…পে… সব্বকিলেসে পজহন্তো অরহত্তমগ্গৰসেন চিত্তং অধিট্ঠাতীতি – অধিট্ঠানে পঞ্ঞা চিত্তৰিৰট্টে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘অধিট্ঠানে পঞ্ঞা চিত্তৰিৰট্টে ঞাণং’’.

৯৮. কথং সুঞ্ঞতে পঞ্ঞা ঞাণৰিৰট্টে ঞাণং? ‘‘চক্খু সুঞ্ঞং অত্তেন ৰা অত্তনিযেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা’’তি যথাভূতং জানতো [পজানতো (স্যা.)] পস্সতো চক্খাভিনিৰেসতো [কামাভিনিৰেসতো (স্যা.) অট্ঠকথা ওলোকেতব্বা] ঞাণং ৰিৰট্টতীতি – সুঞ্ঞতে পঞ্ঞা ঞাণৰিৰট্টে ঞাণং. ‘‘সোতং সুঞ্ঞং…পে… ঘানং সুঞ্ঞং… জিৰ্হা সুঞ্ঞা… কাযো সুঞ্ঞো… মনো সুঞ্ঞো অত্তেন ৰা অত্তনিযেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা’’তি যথাভূতং জানতো পস্সতো মনাভিনিৰেসতো ঞাণং ৰিৰট্টতীতি – সুঞ্ঞতে পঞ্ঞা ঞাণৰিৰট্টে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘সুঞ্ঞতে পঞ্ঞা ঞাণৰিৰট্টে ঞাণং’’.

৯৯. কথং ৰোসগ্গে পঞ্ঞা ৰিমোক্খৰিৰট্টে ঞাণং? নেক্খম্মেন কামচ্ছন্দং ৰোসজ্জতীতি – ৰোসগ্গে পঞ্ঞা ৰিমোক্খৰিৰট্টে ঞাণং. অব্যাপাদেন ব্যাপাদং ৰোসজ্জতীতি – ৰোসগ্গে পঞ্ঞা ৰিমোক্খৰিৰট্টে ঞাণং. আলোকসঞ্ঞায থিনমিদ্ধং ৰোসজ্জতীতি – ৰোসগ্গে পঞ্ঞা ৰিমোক্খৰিৰট্টে ঞাণং. অৰিক্খেপেন উদ্ধচ্চং ৰোসজ্জতীতি – ৰোসগ্গে পঞ্ঞা ৰিমোক্খৰিৰট্টে ঞাণং. ধম্মৰৰত্থানেন ৰিচিকিচ্ছং ৰোসজ্জতীতি – ৰোসগ্গে পঞ্ঞা ৰিমোক্খৰিৰট্টে ঞাণং…পে… অরহত্তমগ্গেন সব্বকিলেসে ৰোসজ্জতীতি – ৰোসগ্গে পঞ্ঞা ৰিমোক্খৰিৰট্টে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘ৰোসগ্গে পঞ্ঞা ৰিমোক্খৰিৰট্টে ঞাণং’’.

১০০. কথং তথট্ঠে পঞ্ঞা সচ্চৰিৰট্টে ঞাণং? দুক্খস্স পীল়নট্ঠং সঙ্খতট্ঠং সন্তাপট্ঠং ৰিপরিণামট্ঠং পরিজানন্তো ৰিৰট্টতীতি – তথট্ঠে পঞ্ঞা সচ্চৰিৰট্টে ঞাণং. সমুদযস্স আযূহনট্ঠং নিদানট্ঠং সঞ্ঞোগট্ঠং পলিবোধট্ঠং পজহন্তো ৰিৰট্টতীতি – তথট্ঠে পঞ্ঞা সচ্চৰিৰট্টে ঞাণং. নিরোধস্স নিস্সরণট্ঠং ৰিৰেকট্ঠং অসঙ্খতট্ঠং অমতট্ঠং সচ্ছিকরোন্তো ৰিৰট্টতীতি – তথট্ঠে পঞ্ঞা সচ্চৰিৰট্টে ঞাণং. মগ্গস্স নিয্যানট্ঠং হেতুট্ঠং দস্সনট্ঠং আধিপতেয্যট্ঠং ভাৰেন্তো ৰিৰট্টতীতি – তথট্ঠে পঞ্ঞা সচ্চৰিৰট্টে ঞাণং.

সঞ্ঞাৰিৰট্টো, চেতোৰিৰট্টো, চিত্তৰিৰট্টো, ঞাণৰিৰট্টো, ৰিমোক্খৰিৰট্টো, সচ্চৰিৰট্টো. সঞ্জানন্তো ৰিৰট্টতীতি – সঞ্ঞাৰিৰট্টো. চেতযন্তো ৰিৰট্টতীতি – চেতোৰিৰট্টো. ৰিজানন্তো ৰিৰট্টতীতি – চিত্তৰিৰট্টো. ঞাণং করোন্তো ৰিৰট্টতীতি – ঞাণৰিৰট্টো. ৰোসজ্জন্তো ৰিৰট্টতীতি – ৰিমোক্খৰিৰট্টো. তথট্ঠে ৰিৰট্টতীতি – সচ্চৰিৰট্টো.

যত্থ সঞ্ঞাৰিৰট্টো, তত্থ চেতোৰিৰট্টো. যত্থ চেতোৰিৰট্টো, তত্থ সঞ্ঞাৰিৰট্টো. যত্থ সঞ্ঞাৰিৰট্টো চেতোৰিৰট্টো তত্থ চিত্তৰিৰট্টো. যত্থ চিত্তৰিৰট্টো, তত্থ সঞ্ঞাৰিৰট্টো চেতোৰিৰট্টো. যত্থ সঞ্ঞাৰিৰট্টো চেতোৰিৰট্টো চিত্তৰিৰট্টো, তত্থ ঞাণৰিৰট্টো. যত্থ ঞাণৰিৰট্টো, তত্থ সঞ্ঞাৰিৰট্টো চেতোৰিৰট্টো চিত্তৰিৰট্টো. যত্থ সঞ্ঞাৰিৰট্টো চেতোৰিৰট্টো চিত্তৰিৰট্টো ঞাণৰিৰট্টো, তত্থ ৰিমোক্খৰিৰট্টো. যত্থ ৰিমোক্খৰিৰট্টো, তত্থ সঞ্ঞাৰিৰট্টো চেতোৰিৰট্টো চিত্তৰিৰট্টো ঞাণৰিৰট্টো. যত্থ সঞ্ঞাৰিৰট্টো চেতোৰিৰট্টো চিত্তৰিৰট্টো ঞাণৰিৰট্টো ৰিমোক্খৰিৰট্টো, তত্থ সচ্চৰিৰট্টো. যত্থ সচ্চৰিৰট্টো, তত্থ সঞ্ঞাৰিৰট্টো চেতোৰিৰট্টো চিত্তৰিৰট্টো ঞাণৰিৰট্টো ৰিমোক্খৰিৰট্টো. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘তথট্ঠে পঞ্ঞা সচ্চৰিৰট্টে ঞাণং’’.

ছৰিৰট্টঞাণনিদ্দেসো নৰচত্তালীসমো.