৫০. ইদ্ধিৰিধঞাণনিদ্দেসো

১০১. কথং কাযম্পি চিত্তম্পি একৰৰত্থানতা সুখসঞ্ঞঞ্চ লহুসঞ্ঞঞ্চ অধিট্ঠানৰসেন ইজ্ঝনট্ঠে পঞ্ঞা ইদ্ধিৰিধে ঞাণং? ইধ ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি, ৰীরিযসমাধিপধানসঙ্খারসমন্নাগতং ইদ্ধিপাদং ভাৰেতি, চিত্তসমাধিপধানসঙ্খারসমন্নাগতং ইদ্ধিপাদং ভাৰেতি, ৰীমংসাসমাধিপধানসঙ্খারসমন্নাগতং ইদ্ধিপাদং ভাৰেতি. সো ইমেসু চতূসু ইদ্ধিপাদেসু চিত্তং পরিভাৰেতি পরিদমেতি, মুদুং করোতি কম্মনিযং. সো ইমেসু চতূসু ইদ্ধিপাদেসু চিত্তং পরিভাৰেত্ৰা পরিদমেত্ৰা মুদুং করিত্ৰা কম্মনিযং কাযম্পি চিত্তে সমোদহতি, চিত্তম্পি কাযে সমোদহতি, কাযৰসেন চিত্তং পরিণামেতি, চিত্তৰসেন কাযং পরিণামেতি, কাযৰসেন চিত্তং অধিট্ঠাতি, চিত্তৰসেন কাযং অধিট্ঠাতি; কাযৰসেন চিত্তং পরিণামেত্ৰা চিত্তৰসেন কাযং পরিণামেত্ৰা কাযৰসেন চিত্তং অধিট্ঠহিত্ৰা চিত্তৰসেন কাযং অধিট্ঠহিত্ৰা সুখসঞ্ঞঞ্চ লহুসঞ্ঞঞ্চ কাযে ওক্কমিত্ৰা ৰিহরতি. সো তথাভাৰিতেন চিত্তেন পরিসুদ্ধেন পরিযোদাতেন ইদ্ধিৰিধঞাণায চিত্তং অভিনীহরতি অভিনিন্নামেতি. সো অনেকৰিহিতং ইদ্ধিৰিধং পচ্চনুভোতি.

১০২. একোপি হুত্ৰা বহুধা হোতি, বহুধাপি হুত্ৰা একো হোতি; আৰিভাৰং তিরোভাৰং; তিরোকুট্টং [তিরোকুড্ডং (স্যা.)] তিরোপাকারং তিরোপব্বতং অসজ্জমানো গচ্ছতি, সেয্যথাপি আকাসে; পথৰিযাপি উম্মুজ্জনিমুজ্জং করোতি, সেয্যথাপি উদকে; উদকেপি অভিজ্জমানে গচ্ছতি, সেয্যথাপি পথৰিযং; আকাসেপি পল্লঙ্কেন কমতি [চঙ্কমতি (স্যা.) দী. নি. ১.২৩৮ পস্সিতব্বা] সেয্যথাপি পক্খী সকুণো ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরামসতি [পরিমসতি (স্যা.)] পরিমজ্জতি; যাৰ ব্রহ্মলোকাপি কাযেন ৰসং ৰত্তেতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘কাযম্পি চিত্তম্পি একৰৰত্থানতা সুখসঞ্ঞঞ্চ লহুসঞ্ঞঞ্চ অধিট্ঠানৰসেন ইজ্ঝনট্ঠে পঞ্ঞা ইদ্ধিৰিধে ঞাণং’’.

ইদ্ধিৰিধঞাণনিদ্দেসো পঞ্ঞাসমো.