৪. ধম্মট্ঠিতিঞাণনিদ্দেসো

৪৫. কথং পচ্চযপরিগ্গহে পঞ্ঞা ধম্মট্ঠিতিঞাণং? অৰিজ্জা সঙ্খারানং উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৰহাকারেহি অৰিজ্জা পচ্চযো, সঙ্খারা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৰিজ্জা সঙ্খারানং উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৰহাকারেহি অৰিজ্জা পচ্চযো, সঙ্খারা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

সঙ্খারা ৰিঞ্ঞাণস্স…পে… ৰিঞ্ঞাণং নামরূপস্স… নামরূপং সল়াযতনস্স… সল়াযতনং ফস্সস্স… ফস্সো ৰেদনায… ৰেদনা তণ্হায… তণ্হা উপাদানস্স… উপাদানং ভৰস্স… ভৰো জাতিযা… জাতি জরামরণস্স উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৰহাকারেহি জাতি পচ্চযো, জরামরণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি জরামরণস্স উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৰহাকারেহি জাতি পচ্চযো, জরামরণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

৪৬. অৰিজ্জা হেতু, সঙ্খারা হেতুসমুপ্পন্না. উভোপেতে ধম্মা হেতুসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৰিজ্জা হেতু, সঙ্খারা হেতুসমুপ্পন্না. উভোপেতে ধম্মা হেতুসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

সঙ্খারা হেতু, ৰিঞ্ঞাণং হেতুসমুপ্পন্নং…পে… ৰিঞ্ঞাণং হেতু, নামরূপং হেতুসমুপ্পন্নং… নামরূপং হেতু, সল়াযতনং হেতুসমুপ্পন্নং… সল়াযতনং হেতু, ফস্সো হেতুসমুপ্পন্নো… ফস্সো হেতু, ৰেদনা হেতুসমুপ্পন্না… ৰেদনা হেতু, তণ্হা হেতুসমুপ্পন্না… তণ্হা হেতু, উপাদানং হেতুসমুপ্পন্নং… উপাদানং হেতু, ভৰো হেতুসমুপ্পন্নো… ভৰো হেতু, জাতি হেতুসমুপ্পন্না… জাতি হেতু, জরামরণং হেতুসমুপ্পন্নং. উভোপেতে ধম্মা হেতুসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি হেতু, জরামরণং হেতুসমুপ্পন্নং. উভোপেতে ধম্মা হেতুসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

অৰিজ্জা পটিচ্চা, সঙ্খারা পটিচ্চসমুপ্পন্না. উভোপেতে ধম্মা পটিচ্চসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৰিজ্জা পটিচ্চা, সঙ্খারা পটিচ্চসমুপ্পন্না. উভোপেতে ধম্মা পটিচ্চসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

সঙ্খারা পটিচ্চা, ৰিঞ্ঞাণং পটিচ্চসমুপ্পন্নং…পে… ৰিঞ্ঞাণং পটিচ্চা, নামরূপং পটিচ্চসমুপ্পন্নং… নামরূপং পটিচ্চা, সল়াযতনং পটিচ্চসমুপ্পন্নং… সল়াযতনং পটিচ্চা, ফস্সো পটিচ্চসমুপ্পন্নো… ফস্সো পটিচ্চা, ৰেদনা পটিচ্চসমুপ্পন্না… ৰেদনা পটিচ্চা, তণ্হা পটিচ্চসমুপ্পন্না… তণ্হা পটিচ্চা, উপাদানং পটিচ্চসমুপ্পন্নং… উপাদানং পটিচ্চা, ভৰো পটিচ্চসমুপ্পন্নো… ভৰো পটিচ্চা, জাতি পটিচ্চসমুপ্পন্না… জাতি পটিচ্চা, জরামরণং পটিচ্চসমুপ্পন্নং. উভোপেতে ধম্মা পটিচ্চসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি পটিচ্চা, জরামরণং পটিচ্চসমুপ্পন্নং. উভোপেতে ধম্মা পটিচ্চসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

অৰিজ্জা পচ্চযো, সঙ্খারা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৰিজ্জা পচ্চযো, সঙ্খারা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

সঙ্খারা পচ্চযা, ৰিঞ্ঞাণং পচ্চযসমুপ্পন্নং…পে… ৰিঞ্ঞাণং পচ্চযো, নামরূপং পচ্চযসমুপ্পন্নং… নামরূপং পচ্চযো, সল়াযতনং পচ্চযসমুপ্পন্নং… সল়াযতনং পচ্চযো, ফস্সো পচ্চযসমুপ্পন্নো… ফস্সো পচ্চযো, ৰেদনা পচ্চযসমুপ্পন্না… ৰেদনা পচ্চযো, তণ্হা পচ্চযসমুপ্পন্না… তণ্হা পচ্চযো, উপাদানং পচ্চযসমুপ্পন্নং… উপাদানং পচ্চযো, ভৰো পচ্চযসমুপ্পন্নো… ভৰো পচ্চযো, জাতি পচ্চযসমুপ্পন্না… জাতি পচ্চযো, জরামরণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি পচ্চযো, জরামরণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপরিগ্গহে পঞ্ঞা ধম্মট্ঠিতিঞাণং.

৪৭. পুরিমকম্মভৰস্মিং মোহো অৰিজ্জা, আযূহনা সঙ্খারা, নিকন্তি তণ্হা, উপগমনং উপাদানং, চেতনা ভৰো. ইমে পঞ্চ ধম্মা পুরিমকম্মভৰস্মিং ইধ পটিসন্ধিযা পচ্চযা. ইধ পটিসন্ধি ৰিঞ্ঞাণং, ওক্কন্তি নামরূপং, পসাদো আযতনং, ফুট্ঠো ফস্সো, ৰেদযিতং ৰেদনা. ইমে পঞ্চ ধম্মা ইধুপপত্তিভৰস্মিং পুরেকতস্স কম্মস্স পচ্চযা. ইধ পরিপক্কত্তা আযতনানং মোহো অৰিজ্জা, আযূহনা সঙ্খারা, নিকন্তি তণ্হা উপগমনং উপাদানং, চেতনা ভৰো. ইমে পঞ্চ ধম্মা ইধ কম্মভৰস্মিং আযতিং পটিসন্ধিযা পচ্চযা. আযতিং পটিসন্ধি ৰিঞ্ঞাণং, ওক্কন্তি নামরূপং, পসাদো আযতনং, ফুট্ঠো ফস্সো, ৰেদযিতং ৰেদনা. ইমে পঞ্চ ধম্মা আযতিং উপপত্তিভৰস্মিং ইধ কতস্স কম্মস্স পচ্চযা. ইতিমে চতুসঙ্খেপে তযো অদ্ধে তিসন্ধিং ৰীসতিযা আকারেহি পটিচ্চসমুপ্পাদং জানাতি পস্সতি অঞ্ঞাতি পটিৰিজ্ঝতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘পচ্চযপরিগ্গহে পঞ্ঞা ধম্মট্ঠিতিঞাণং’’.

ধম্মট্ঠিতিঞাণনিদ্দেসো চতুত্থো.