২৫-২৮. পটিসম্ভিদাঞাণনিদ্দেসো

৭৬. কথং অত্থনানত্তে পঞ্ঞা অত্থপটিসম্ভিদে ঞাণং, ধম্মনানত্তে পঞ্ঞা ধম্মপটিসম্ভিদে ঞাণং, নিরুত্তিনানত্তে পঞ্ঞা নিরুত্তিপটিসম্ভিদে ঞাণং, পটিভাননানত্তে পঞ্ঞা পটিভানপটিসম্ভিদে ঞাণং? সদ্ধিন্দ্রিযং ধম্মো, ৰীরিযিন্দ্রিযং ধম্মো, সতিন্দ্রিযং ধম্মো, সমাধিন্দ্রিযং ধম্মো, পঞ্ঞিন্দ্রিযং ধম্মো. অঞ্ঞো সদ্ধিন্দ্রিযং ধম্মো, অঞ্ঞো ৰীরিযিন্দ্রিযং ধম্মো, অঞ্ঞো সতিন্দ্রিযং ধম্মো, অঞ্ঞো সমাধিন্দ্রিযং ধম্মো, অঞ্ঞো পঞ্ঞিন্দ্রিযং ধম্মো. যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি. তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

অধিমোক্খট্ঠো অত্থো, পগ্গহট্ঠো অত্থো, উপট্ঠানট্ঠো অত্থো, অৰিক্খেপট্ঠো অত্থো, দস্সনট্ঠো অত্থো. অঞ্ঞো অধিমোক্খট্ঠো অত্থো, অঞ্ঞো পগ্গহট্ঠো অত্থো, অঞ্ঞো উপট্ঠানট্ঠো অত্থো, অঞ্ঞো অৰিক্খেপট্ঠো অত্থো, অঞ্ঞো দস্সনট্ঠো অত্থো. যেন ঞাণেন ইমে নানা অত্থা ঞাতা, তেনেৰ ঞাণেন ইমে নানা অত্থা পটিৰিদিতাতি. তেন ৰুচ্চতি ‘‘অত্থনানত্তে পঞ্ঞা অত্থপটিসম্ভিদে ঞাণং’’.

পঞ্চ ধম্মে সন্দস্সেতুং ব্যঞ্জননিরুত্তাভিলাপা, পঞ্চ অত্থে সন্দস্সেতুং ব্যঞ্জননিরুত্তাভিলাপা. অঞ্ঞা ধম্মনিরুত্তিযো, অঞ্ঞা অত্থনিরুত্তিযো. যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি. তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’.

পঞ্চসু ধম্মেসু ঞাণানি, পঞ্চসু অত্থেসু ঞাণানি, দসসু নিরুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি. তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’.

৭৭. সদ্ধাবলং ধম্মো, ৰীরিযবলং ধম্মো, সতিবলং ধম্মো, সমাধিবলং ধম্মো, পঞ্ঞাবলং ধম্মো. অঞ্ঞো সদ্ধাবলং ধম্মো, অঞ্ঞো ৰীরিযবলং ধম্মো, অঞ্ঞো সতিবলং ধম্মো, অঞ্ঞো সমাধিবলং ধম্মো, অঞ্ঞো পঞ্ঞাবলং ধম্মো. যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি. তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

অস্সদ্ধিযে অকম্পিযট্ঠো অত্থো. কোসজ্জে অকম্পিযট্ঠো অত্থো. পমাদে অকম্পিযট্ঠো অত্থো. উদ্ধচ্চে অকম্পিযট্ঠো অত্থো. অৰিজ্জায অকম্পিযট্ঠো অত্থো. অঞ্ঞো অস্সদ্ধিযে অকম্পিযট্ঠো অত্থো, অঞ্ঞো কোসজ্জে অকম্পিযট্ঠো অত্থো, অঞ্ঞো পমাদে অকম্পিযট্ঠো অত্থো, অঞ্ঞো উদ্ধচ্চে অকম্পিযট্ঠো অত্থো, অঞ্ঞো অৰিজ্জায অকম্পিযট্ঠো অত্থো. যেন ঞাণেন ইমে নানা অত্থা ঞাতা, তেনেৰ ঞাণেন ইমে নানা অত্থা পটিৰিদিতাতি. তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’.

পঞ্চ ধম্মে সন্দস্সেতুং ব্যঞ্জননিরুত্তাভিলাপা, পঞ্চ অত্থে সন্দস্সেতুং ব্যঞ্জননিরুত্তাভিলাপা. অঞ্ঞা ধম্মনিরুত্তিযো, অঞ্ঞা অত্থনিরুত্তিযো. যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি. তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’.

পঞ্চসু [পঞ্চ (?)] ধম্মেসু ঞাণানি, পঞ্চসু [পঞ্চ (?)] অত্থেসু ঞাণানি, দসসু [দস (?)] নিরুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি. তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’.

সতিসম্বোজ্ঝঙ্গো ধম্মো, ধম্মৰিচযসম্বোজ্ঝঙ্গো ধম্মো, ৰীরিযসম্বোজ্ঝঙ্গো ধম্মো, পীতিসম্বোজ্ঝঙ্গো ধম্মো, পস্সদ্ধিসম্বোজ্ঝঙ্গো ধম্মো, সমাধিসম্বোজ্ঝঙ্গো ধম্মো, উপেক্খাসম্বোজ্ঝঙ্গো ধম্মো. অঞ্ঞো সতিসম্বোজ্ঝঙ্গো ধম্মো, অঞ্ঞো ধম্মৰিচযসম্বোজ্ঝঙ্গো ধম্মো, অঞ্ঞো ৰীরিযসম্বোজ্ঝঙ্গো ধম্মো, অঞ্ঞো পীতিসম্বোজ্ঝঙ্গো ধম্মো, অঞ্ঞো পস্সদ্ধিসম্বোজ্ঝঙ্গো ধম্মো, অঞ্ঞো সমাধিসম্বোজ্ঝঙ্গো ধম্মো, অঞ্ঞো উপেক্খাসম্বোজ্ঝঙ্গো ধম্মো. যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি. তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

উপট্ঠানট্ঠো অত্থো, পৰিচযট্ঠো অত্থো, পগ্গহট্ঠো অত্থো, ফরণট্ঠো অত্থো, উপসমট্ঠো অত্থো, অৰিক্খেপট্ঠো অত্থো, পটিসঙ্খানট্ঠো অত্থো. অঞ্ঞো উপট্ঠানট্ঠো অত্থো, অঞ্ঞো পৰিচযট্ঠো অত্থো, অঞ্ঞো পগ্গহট্ঠো অত্থো, অঞ্ঞো ফরণট্ঠো অত্থো, অঞ্ঞো উপসমট্ঠো অত্থো, অঞ্ঞো অৰিক্খেপট্ঠো অত্থো, অঞ্ঞো পটিসঙ্খানট্ঠো অত্থো. যেন ঞাণেন ইমে নানা অত্থা ঞাতা, তেনেৰ ঞাণেন ইমে নানা অত্থা পটিৰিদিতাতি. তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’.

সত্ত ধম্মে সন্দস্সেতুং ব্যঞ্জননিরুত্তাভিলাপা, সত্ত অত্থে সন্দস্সেতুং ব্যঞ্জননিরুত্তাভিলাপা. অঞ্ঞা ধম্মনিরুত্তিযো, অঞ্ঞা অত্থনিরুত্তিযো. যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি. তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’.

সত্তসু ধম্মেসু ঞাণানি, সত্তসু অত্থেসু ঞাণানি, চুদ্দসসু নিরুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি. তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’.

সম্মাদিট্ঠি ধম্মো, সম্মাসঙ্কপ্পো ধম্মো, সম্মাৰাচা ধম্মো, সম্মাকম্মন্তো ধম্মো, সম্মাআজীৰো ধম্মো, সম্মাৰাযামো ধম্মো, সম্মাসতি ধম্মো, সম্মাসমাধি ধম্মো. অঞ্ঞো সম্মাদিট্ঠি ধম্মো, অঞ্ঞো সম্মাসঙ্কপ্পো ধম্মো, অঞ্ঞো সম্মাৰাচা ধম্মো, অঞ্ঞো সম্মাকম্মন্তো ধম্মো, অঞ্ঞো সম্মাআজীৰো ধম্মো, অঞ্ঞো সম্মাৰাযামো ধম্মো, অঞ্ঞো সম্মাসতি ধম্মো, অঞ্ঞো সম্মাসমাধি ধম্মো. যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি. তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

দস্সনট্ঠো অত্থো, অভিনিরোপনট্ঠো অত্থো, পরিগ্গহট্ঠো অত্থো, সমুট্ঠানট্ঠো অত্থো, ৰোদানট্ঠো অত্থো, পগ্গহট্ঠো অত্থো, উপট্ঠানট্ঠো অত্থো, অৰিক্খেপট্ঠো অত্থো. অঞ্ঞো দস্সনট্ঠো অত্থো, অঞ্ঞো অভিনিরোপনট্ঠো অত্থো, অঞ্ঞো পরিগ্গহট্ঠো অত্থো, অঞ্ঞো সমুট্ঠানট্ঠো অত্থো, অঞ্ঞো ৰোদানট্ঠো অত্থো, অঞ্ঞো পগ্গহট্ঠো অত্থো, অঞ্ঞো উপট্ঠানট্ঠো অত্থো, অঞ্ঞো অৰিক্খেপট্ঠো অত্থো. যেন ঞাণেন ইমে নানা অত্থা ঞাতা তেনেৰ ঞাণেন ইমে নানা অত্থা পটিৰিদিতাতি. তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’.

অট্ঠ ধম্মে সন্দস্সেতুং ব্যঞ্জননিরুত্তাভিলাপা, অট্ঠ অত্থে সন্দস্সেতুং ব্যঞ্জননিরুত্তাভিলাপা. অঞ্ঞা ধম্মনিরুত্তিযো, অঞ্ঞা অত্থনিরুত্তিযো. যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি. তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’.

অট্ঠসু ধম্মেসু ঞাণানি, অট্ঠসু অত্থেসু ঞাণানি সোল়সসু নিরুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি. তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং. ধম্মনানত্তে পঞ্ঞা ধম্মপটিসম্ভিদে ঞাণং. নিরুত্তিনানত্তে পঞ্ঞা নিরুত্তিপটিসম্ভিদে ঞাণং. পটিভাননানত্তে পঞ্ঞা পটিভানপটিসম্ভিদে ঞাণং’’.

পটিসম্ভিদাঞাণনিদ্দেসো অট্ঠৰীসতিমো.