১২. ওতরণহারসম্পাতো

৭৪. তত্থ কতমো ওতরণো হারসম্পাতো?

‘‘তস্মা রক্খিতচিত্তস্স, সম্মাসঙ্কপ্পগোচরো’’তি গাথা. ‘‘তস্মা রক্খিতচিত্তস্স, সম্মাসঙ্কপ্পগোচরো’’. ‘‘সম্মাদিট্ঠিপুরেক্খারো’’তি সম্মাদিট্ঠিযা গহিতায গহিতানি ভৰন্তি পঞ্চিন্দ্রিযানি, অযং ইন্দ্রিযেহি ওতরণা.

তানিযেৰ ইন্দ্রিযানি ৰিজ্জা, ৰিজ্জুপ্পাদা অৰিজ্জানিরোধো, অৰিজ্জানিরোধা সঙ্খারনিরোধো, সঙ্খারনিরোধা ৰিঞ্ঞাণনিরোধো, এৰং সব্বং, অযং পটিচ্চসমুপ্পাদেন ওতরণা.

তানিযেৰ পঞ্চিন্দ্রিযানি তীহি খন্ধেহি সঙ্গহিতানি – সীলক্খন্ধেন সমাধিক্খন্ধেন পঞ্ঞাক্খন্ধেন. অযং খন্ধেহি ওতরণা.

তানি যেৰ পঞ্চিন্দ্রিযানি সঙ্খারপরিযাপন্নানি. যে সঙ্খারা অনাসৰা নো চ ভৰঙ্গা, তে সঙ্খারা ধম্মধাতুসঙ্গহিতা, অযং ধাতূহি ওতরণা.

সা ধম্মধাতু ধম্মাযতনপরিযাপন্না, যং আযতনং অনাসৰং নো চ ভৰঙ্গং, অযং আযতনেহি ওতরণা.

নিযুত্তো ওতরণো হারসম্পাতো.