৪. মেত্তগূমাণৰপুচ্ছা

৭৪. ‘‘পুচ্ছামি তং ভগৰা ব্রূহি মেতং, [ইচ্চাযস্মা মেত্তগূ]

মঞ্ঞামি তং ৰেদগুং ভাৰিতত্তং;

কুতো নু দুক্খা সমুদাগতা ইমে, যে কেচি লোকস্মিমনেকরূপা’’.

৭৫. ‘‘দুক্খস্স ৰে মং পভৰং অপুচ্ছসি, [মেত্তগূতি ভগৰা]

তং তে পৰক্খামি যথা পজানং;

উপধিনিদানা পভৰন্তি দুক্খা, যে কেচি লোকস্মিমনেকরূপা.

৭৬. ‘‘যো ৰে অৰিদ্ৰা উপধিং করোতি, পুনপ্পুনং দুক্খমুপেতি মন্দো;

তস্মা পজানং উপধিং ন কযিরা, দুক্খস্স জাতিপ্পভৰানুপস্সী’’.

৭৭. ‘‘যং তং অপুচ্ছিম্হ অকিত্তযী নো, অঞ্ঞং তং পুচ্ছাম তদিঙ্ঘ ব্রূহি;

‘কথং নু ধীরা ৰিতরন্তি ওঘং, জাতিং জরং সোকপরিদ্দৰঞ্চ’;

তং মে মুনি সাধু ৰিযাকরোহি, তথা হি তে ৰিদিতো এস ধম্মো’’.

৭৮. ‘‘কিত্তযিস্সামি তে ধম্মং, [মেত্তগূতি ভগৰা]

দিট্ঠে ধম্মে অনীতিহং;

যং ৰিদিত্ৰা সতো চরং, তরে লোকে ৰিসত্তিকং’’.

৭৯. ‘‘তঞ্চাহং অভিনন্দামি, মহেসি ধম্মমুত্তমং;

যং ৰিদিত্ৰা সতো চরং, তরে লোকে ৰিসত্তিকং’’.

৮০. ‘‘যং কিঞ্চি সম্পজানাসি, [মেত্তগূতি ভগৰা]

উদ্ধং অধো তিরিযঞ্চাপি মজ্ঝে;

এতেসু নন্দিঞ্চ নিৰেসনঞ্চ, পনুজ্জ ৰিঞ্ঞাণং ভৰে ন তিট্ঠে.

৮১. ‘‘এৰংৰিহারী সতো অপ্পমত্তো, ভিক্খু চরং হিত্ৰা মমাযিতানি;

জাতিং জরং সোকপরিদ্দৰঞ্চ, ইধেৰ ৰিদ্ৰা পজহেয্য দুক্খং’’.

৮২. ‘‘এতাভিনন্দামি ৰচো মহেসিনো, সুকিত্তিতং গোতমনূপধীকং;

অদ্ধা হি ভগৰা পহাসি দুক্খং, তথা হি তে ৰিদিতো এস ধম্মো.

৮৩. ‘‘তে চাপি নূনপ্পজহেয্যু দুক্খং, যে ত্ৰং মুনি অট্ঠিতং ওৰদেয্য;

তং তং নমস্সামি সমেচ্চ নাগ, অপ্পেৰ মং ভগৰা অট্ঠিতং ওৰদেয্য’’.

৮৪. ‘‘যং ব্রাহ্মণং ৰেদগুমাভিজঞ্ঞা, অকিঞ্চনং কামভৰে অসত্তং;

অদ্ধা হি সো ওঘমিমং অতারি, তিণ্ণো চ পারং অখিলো অকঙ্খো.

৮৫. ‘‘ৰিদ্ৰা চ যো ৰেদগূ নরো ইধ, ভৰাভৰে সঙ্গমিমং ৰিসজ্জ;

সো ৰীততণ্হো অনীঘো নিরাসো, অতারি সো জাতিজরন্তি ব্রূমী’’তি.

মেত্তগূমাণৰপুচ্ছা চতুত্থী.