খগ্গৰিসাণসুত্তনিদ্দেসো

পঠমৰগ্গো

১২১. সব্বেসু ভূতেসু নিধায দণ্ডং,অৰিহেঠযং অঞ্ঞতরম্পি তেসং;

ন পুত্তমিচ্ছেয্য কুতো সহাযং, একো চরে খগ্গৰিসাণকপ্পো.

সব্বেসু ভূতেসু নিধায দণ্ডন্তি. সব্বেসূতি সব্বেন সব্বং সব্বথা সব্বং অসেসং নিস্সেসং পরিযাদিযনৰচনমেতং – সব্বেসূতি. ভূতেসূতি ভূতা ৰুচ্চন্তি তসা চ থাৰরা চ. তসাতি যেসং তসিততণ্হা অপ্পহীনা, যেসঞ্চ ভযভেরৰা অপ্পহীনা. কিংকারণা ৰুচ্চন্তি তসা? তে তসন্তি উত্তসন্তি পরিতসন্তি ভাসন্তি সন্তাসং আপজ্জন্তি, তংকারণা ৰুচ্চন্তি তসা. থাৰরাতি যেসং তসিততণ্হা পহীনা, যেসঞ্চ ভযভেরৰা পহীনা. কিংকারণা ৰুচ্চন্তি থাৰরা? তে ন তসন্তি ন উত্তসন্তি ন পরিতসন্তি ন ভাযন্তি ন সন্তাসং আপজ্জন্তি, তংকারণা ৰুচ্চন্তি থাৰরা. দণ্ডন্তি তযো দণ্ডা – কাযদণ্ডো ৰচীদণ্ডো মনোদণ্ডো. তিৰিধং কাযদুচ্চরিতং কাযদণ্ডো, চতুব্বিধং ৰচীদুচ্চরিতং ৰচীদণ্ডো, তিৰিধং মনোদুচ্চরিতং মনোদণ্ডো. সব্বেসু ভূতেসু নিধায দণ্ডন্তি সব্বেসু ভূতেসু দণ্ডং নিধায নিদহিত্ৰা.

অৰিহেঠযং অঞ্ঞতরম্পি তেসন্তি একমেকম্পি সত্তং পাণিনা ৰা লেড্ডুনা ৰা দণ্ডেন ৰা সত্থেন ৰা অন্দুযা [অরুযা (স্যা.), অদ্দুযা (ক.)] ৰা রজ্জুযা ৰা অৰিহেঠযন্তো, সব্বেপি সত্তে পাণিনা ৰা লেড্ডুনা ৰা দণ্ডেন ৰা সত্থেন ৰা অন্দুযা ৰা রজ্জুযা ৰা অৰিহেঠযন্তোতি – অৰিহেঠযং অঞ্ঞতরম্পি তেসং.

ন পুত্তমিচ্ছেয্য কুতো সহাযন্তি. নাতি পটিক্খেপো; পুত্তাতি চত্তারো পুত্তা – অত্রজো পুত্তো, খেত্তজো পুত্তো, দিন্নকো পুত্তো, অন্তেৰাসিকো পুত্তো. সহাযন্তি সহাযা ৰুচ্চন্তি যেহি সহ আগমনং ফাসু, গমনং ফাসু, গমনাগমনং ফাসু, ঠানং ফাসু, নিসজ্জনং ফাসু, সযনং [নিপজ্জনং (স্যা.)] ফাসু, আলপনং ফাসু, সল্লপনং ফাসু, উল্লপনং ফাসু, সমুল্লপনং ফাসু. ন পুত্তমিচ্ছেয্য কুতো সহাযন্তি পুত্তম্পি ন ইচ্ছেয্য ন সাদিযেয্য ন পত্থযেয্য ন পিহযেয্য নাভিজপ্পেয্য, কুতো মিত্তং ৰা সন্দিট্ঠং ৰা সম্ভত্তং ৰা সহাযং ৰা ইচ্ছেয্য [ইচ্ছিস্সতি (স্যা.) এৰমীদিসেসু পদেসু অনাগতৰিভত্তিযা] সাদিযেয্য পত্থযেয্য পিহযেয্য অভিজপ্পেয্যাতি – ন পুত্তমিচ্ছেয্য কুতো সহাযং.

একো চরে খগ্গৰিসাণকপ্পোতি. একোতি সো পচ্চেকসম্বুদ্ধো পব্বজ্জাসঙ্খাতেন একো, অদুতিযট্ঠেন একো, তণ্হায পহানট্ঠেন [তণ্হাপহানট্ঠেন (স্যা.) মহানি. ১৯১] একো, একন্তৰীতরাগোতি একো, একন্তৰীতদোসোতি একো, একন্তৰীতমোহোতি একো, একন্তনিক্কিলেসোতি একো, একাযনমগ্গং গতোতি একো, একো অনুত্তরং পচ্চেকসম্বোধিং অভিসম্বুদ্ধোতি একো.

কথং সো পচ্চেকসম্বুদ্ধো পব্বজ্জাসঙ্খাতেন একো? সো পচ্চেকসম্বুদ্ধো সব্বং ঘরাৰাসপলিবোধং ছিন্দিত্ৰা পুত্তদারপলিবোধং ছিন্দিত্ৰা ঞাতিপলিবোধং ছিন্দিত্ৰা সন্নিধিপলিবোধং ছিন্দিত্ৰা কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিত্ৰা অকিঞ্চনভাৰং উপগন্ত্ৰা একো চরতি ৰিহরতি ইরিযতি ৰত্তেতি পালেতি যপেতি যাপেতীতি – এৰং সো পচ্চেকসম্বুদ্ধো পব্বজ্জাসঙ্খাতেন একো.

কথং সো পচ্চেকসম্বুদ্ধো অদুতিযট্ঠেন একো? সো এৰং পব্বজিতো সমানো একো অরঞ্ঞৰনপত্থানি পন্তানি সেনাসনানি পটিসেৰতি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানি. সো একো গচ্ছতি, একো তিট্ঠতি, একো নিসীদতি, একো সেয্যং কপ্পেতি, একো গামং পিণ্ডায পৰিসতি, একো অভিক্কমতি, একো পটিক্কমতি, একো রহো নিসীদতি, একো চঙ্কমং অধিট্ঠাতি, একো চরতি ৰিহরতি ইরিযতি ৰত্তেতি পালেতি যপেতি যাপেতীতি – এৰং সো পচ্চেকসম্বুদ্ধো অদুতিযট্ঠেন একো.

কথং সো পচ্চেকসম্বুদ্ধো তণ্হায পহানট্ঠেন একো? সো এৰং একো অদুতিযো অপ্পমত্তো আতাপী পহিতত্তো ৰিহরন্তো মহাপধানং পদহন্তো মারং সসেনকং নমুচিং কণ্হং পমত্তবন্ধুং ৰিধমেত্ৰা চ তণ্হাজালিনিং ৰিসরিতং ৰিসত্তিকং পজহি ৰিনোদেসি ব্যন্তীঅকাসি অনভাৰংগমেসি.

‘‘তণ্হাদুতিযো পুরিসো, দীঘমদ্ধান সংসরং;

ইত্থভাৰঞ্ঞথাভাৰং, সংসারং নাতিৰত্ততি.

‘‘এতমাদীনৰং ঞত্ৰা, তণ্হং দুক্খস্স সম্ভৰং;

ৰীততণ্হো অনাদানো, সতো ভিক্খু পরিব্বজে’’তি.

এৰং সো পচ্চেকসম্বুদ্ধো তণ্হায পহানট্ঠেন একো.

কথং সো পচ্চেকসম্বুদ্ধো একন্তৰীতরাগোতি একো? রাগস্স পহীনত্তা একন্তৰীতরাগোতি একো, দোসস্স পহীনত্তা একন্তৰীতদোসোতি একো, মোহস্স পহীনত্তা একন্তৰীতমোহোতি একো, কিলেসানং পহীনত্তা একন্তনিক্কিলেসোতি একো. এৰং সো পচ্চেকসম্বুদ্ধো একন্তৰীতরাগোতি একো.

কথং সো পচ্চেকসম্বুদ্ধো একাযনমগ্গং গতোতি একো? একাযনমগ্গো ৰুচ্চতি চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, পঞ্চিন্দ্রিযানি, পঞ্চ বলানি, সত্ত বোজ্ঝঙ্গা অরিযো অট্ঠঙ্গিকো মগ্গো.

‘‘একাযনং জাতিখযন্তদস্সী, মগ্গং পজানাতি হিতানুকম্পী;

এতেন মগ্গেন তরিংসু পুব্বে, তরিস্সন্তি যে চ তরন্তি ওঘ’’ন্তি.

এৰং সো পচ্চেকসম্বুদ্ধো একাযনমগ্গং গতোতি একো.

কথং সো পচ্চেকসম্বুদ্ধো একো অনুত্তরং পচ্চেকসম্বোধিং অভিসম্বুদ্ধোতি একো? বোধি ৰুচ্চতি চতূসু মগ্গেসু ঞাণং. পঞ্ঞা পঞ্ঞিন্দ্রিযং পঞ্ঞাবলং ধম্মৰিচযসম্বোজ্ঝঙ্গো ৰীমংসা ৰিপস্সনা সম্মাদিট্ঠি. সো পচ্চেকসম্বুদ্ধো মগ্গপচ্চেকসম্বুদ্ধো ঞাণপচ্চেকসম্বুদ্ধো ‘‘সব্বে সঙ্খারা অনিচ্চা’’তি বুজ্ঝি, ‘‘সব্বে সঙ্খারা দুক্খা’’তি বুজ্ঝি, ‘‘সব্বে ধম্মা অনত্তা’’তি বুজ্ঝি, ‘‘অৰিজ্জাপচ্চযা সঙ্খারা’’তি বুজ্ঝি, ‘‘সঙ্খারপচ্চযা ৰিঞ্ঞাণ’’ন্তি বুজ্ঝি, ‘‘ৰিঞ্ঞাণপচ্চযা নামরূপ’’ন্তি বুজ্ঝি, ‘‘নামরূপপচ্চযা সল়াযতন’’ন্তি বুজ্ঝি, ‘‘সল়াযতনপচ্চযা ফস্সো’’তি বুজ্ঝি, ‘‘ফস্সপচ্চযা ৰেদনা’’তি বুজ্ঝি, ‘‘ৰেদনাপচ্চযা তণ্হা’’তি বুজ্ঝি, ‘‘তণ্হাপচ্চযা উপাদান’’ন্তি বুজ্ঝি, ‘‘উপাদানপচ্চযা ভৰো’’তি বুজ্ঝি, ‘‘ভৰপচ্চযা জাতী’’তি বুজ্ঝি, ‘‘জাতিপচ্চযা জরামরণ’’ন্তি বুজ্ঝি; ‘‘অৰিজ্জানিরোধা সঙ্খারনিরোধো’’তি বুজ্ঝি, ‘‘সঙ্খারনিরোধা ৰিঞ্ঞাণনিরোধো’’তি বুজ্ঝি, ‘‘ৰিঞ্ঞাণনিরোধা নামরূপনিরোধো’’তি বুজ্ঝি, ‘‘নামরূপনিরোধা সল়াযতননিরোধো’’তি বুজ্ঝি, ‘‘সল়াযতননিরোধা ফস্সনিরোধো’’তি বুজ্ঝি, ‘‘ফস্সনিরোধা ৰেদনানিরোধো’’তি বুজ্ঝি, ‘‘ৰেদনানিরোধা তণ্হানিরোধো’’তি বুজ্ঝি, ‘‘তণ্হানিরোধা উপাদাননিরোধো’’তি বুজ্ঝি, ‘‘উপাদাননিরোধা ভৰনিরোধো’’তি বুজ্ঝি, ‘‘ভৰনিরোধা জাতিনিরোধো’’তি বুজ্ঝি, ‘‘জাতিনিরোধা জরামরণনিরোধো’’তি বুজ্ঝি; ‘‘ইদং দুক্খ’’ন্তি বুজ্ঝি, ‘‘অযং দুক্খসমুদযো’’তি বুজ্ঝি, ‘‘অযং দুক্খনিরোধো’’তি বুজ্ঝি, ‘‘অযং দুক্খনিরোধগামিনী পটিপদা’’তি বুজ্ঝি; ‘‘ইমে আসৰা’’তি বুজ্ঝি, ‘‘অযং আসৰসমুদযো’’তি বুজ্ঝি…পে… ‘‘অযং আসৰনিরোধগামিনী পটিপদা’’তি বুজ্ঝি; ‘‘ইমে ধম্মা অভিঞ্ঞেয্যা’’তি বুজ্ঝি, ‘‘ইমে ধম্মা পহাতব্বা’’তি বুজ্ঝি, ‘‘ইমে ধম্মা সচ্ছিকাতব্বা’’তি বুজ্ঝি, ‘‘ইমে ধম্মা ভাৰেতব্বা’’তি বুজ্ঝি; ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ বুজ্ঝি, পঞ্চন্নং উপাদানক্খন্ধানং সমুদযঞ্চ…পে… নিস্সরণঞ্চ বুজ্ঝি, চতুন্নং মহাভূতানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ বুজ্ঝি, ‘‘যং কিঞ্চি সমুদযধম্মং সব্বং তং নিরোধধম্ম’’ন্তি বুজ্ঝি.

অথ ৰা, যং বুজ্ঝিতব্বং অনুবুজ্ঝিতব্বং পটিবুজ্ঝিতব্বং সম্বুজ্ঝিতব্বং অধিগন্তব্বং ফস্সিতব্বং সচ্ছিকাতব্বং, সব্বং তং তেন পচ্চেকবোধিঞাণেন বুজ্ঝি অনুবুজ্ঝি পটিবুজ্ঝি সম্বুজ্ঝি অধিগচ্ছি ফস্সেসি সচ্ছাকাসীতি এৰং সো পচ্চেকসম্বুদ্ধো একো অনুত্তরং পচ্চেকসম্বোধিং অভিসম্বুদ্ধোতি – একো.

চরেতি অট্ঠ চরিযাযো – ইরিযাপথচরিযা, আযতনচরিযা, সতিচরিযা, সমাধিচরিযা, ঞাণচরিযা, মগ্গচরিযা, পত্তিচরিযা, লোকত্থচরিযা. ইরিযাপথচরিযাতি চতূসু ইরিযাপথেসু. আযতনচরিযাতি ছসু অজ্ঝত্তিকবাহিরেসু আযতনেসু. সতিচরিযাতি চতূসু সতিপট্ঠানেসু. সমাধিচরিযাতি চতূসু ঝানেসু. ঞাণচরিযাতি চতূসু অরিযসচ্চেসু. মগ্গচরিযাতি চতূসু অরিযমগ্গেসু. পত্তিচরিযাতি চতূসু সামঞ্ঞফলেসু. লোকত্থচরিযাতি তথাগতেসু অরহন্তেসু সম্মাসম্বুদ্ধেসু পদেসতো পচ্চেকসম্বুদ্ধেসু পদেসতো সাৰকেসু. ইরিযাপথচরিযা চ পণিধিসম্পন্নানং, আযতনচরিযা চ ইন্দ্রিযেসু গুত্তদ্ৰারানং, সতিচরিযা চ অপ্পমাদৰিহারীনং, সমাধিচরিযা চ অধিচিত্তমনুযুত্তানং, ঞাণচরিযা চ বুদ্ধিসম্পন্নানং, মগ্গচরিযা চ সম্মাপটিপন্নানং, পত্তিচরিযা চ অধিগতফলানং, লোকত্থচরিযা চ তথাগতানং অরহন্তানং সম্মাসম্বুদ্ধানং পদেসতো পচ্চেকবুদ্ধানং পদেসতো সাৰকানং. ইমা অট্ঠ চরিযাযো. অপরাপি অট্ঠ চরিযাযো – অধিমুচ্চন্তো সদ্ধায চরতি, পগ্গণ্হন্তো ৰীরিযেন চরতি, উপট্ঠপেন্তো সতিযা চরতি, অৰিক্খেপং করোন্তো সমাধিনা চরতি, পজানন্তো পঞ্ঞায চরতি, ৰিজানন্তো ৰিঞ্ঞাণচরিযায চরতি. এৰং পটিপন্নস্স কুসলা ধম্মা আযাপেন্তীতি – আযতনচরিযায চরতি. এৰং পটিপন্নো ৰিসেসমধিগচ্ছতীতি – ৰিসেসচরিযায চরতি. ইমা অট্ঠ চরিযাযো.

অপরাপি অট্ঠ চরিযাযো – দস্সনচরিযা চ সম্মাদিট্ঠিযা, অভিরোপনচরিযা চ সম্মাসঙ্কপ্পস্স, পরিগ্গহচরিযা চ সম্মাৰাচায, সমুট্ঠানচরিযা চ সম্মাকম্মন্তস্স, ৰোদানচরিযা চ সম্মাআজীৰস্স, পগ্গহচরিযা চ সম্মাৰাযামস্স, উপট্ঠানচরিযা চ সম্মাসতিযা, অৰিক্খেপচরিযা চ সম্মাসমাধিস্স. ইমা অট্ঠ চরিযাযো.

খগ্গৰিসাণকপ্পোতি যথা খগ্গস্স নাম ৰিসাণং একং হোতি অদুতিযং, এৰমেৰ সো পচ্চেকসম্বুদ্ধো তক্কপ্পো তস্সদিসো তপ্পটিভাগো. যথা অতিলোণং ৰুচ্চতি লোণকপ্পো, অতিতিত্তকং ৰুচ্চতি তিত্তকপ্পো, অতিমধুরং ৰুচ্চতি মধুরকপ্পো, অতিউণ্হং ৰুচ্চতি অগ্গিকপ্পো, অতিসীতলং ৰুচ্চতি হিমকপ্পো, মহাউদকক্খন্ধো ৰুচ্চতি সমুদ্দকপ্পো, মহাভিঞ্ঞাবলপ্পত্তো সাৰকো ৰুচ্চতি সত্থুকপ্পোতি; এৰমেৰ সো পচ্চেকসম্বুদ্ধো তত্থ তক্কপ্পো তস্সদিসো তপ্পটিভাগো একো অদুতিযো মুত্তবন্ধনো সম্মা লোকে চরতি ৰিহরতি ইরিযতি ৰত্তেতি পালেতি যপেতি যাপেতীতি – একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘সব্বেসু ভূতেসু নিধায দণ্ডং, অৰিহেঠযং অঞ্ঞতরম্পি তেসং;

ন পুত্তমিচ্ছেয্য কুতো সহাযং, একো চরে খগ্গৰিসাণকপ্পো’’তি.

১২২. সংসগ্গজাতস্স ভৰন্তি স্নেহা,স্নেহন্ৰযং দুক্খমিদং পহোতি;

আদীনৰং স্নেহজং পেক্খমানো, একো চরে খগ্গৰিসাণকপ্পো.

সংসগ্গজাতস্স ভৰন্তি স্নেহাতি. সংসগ্গাতি দ্ৰে সংসগ্গা – দস্সনসংসগ্গো চ সৰনসংসগ্গো চ. কতমো দস্সনসংসগ্গো? ইধেকচ্চো পস্সতি ইত্থিং ৰা কুমারিং ৰা অভিরূপং দস্সনীযং পাসাদিকং পরমায ৰণ্ণপোক্খরতায সমন্নাগতং. দিস্ৰা পস্সিত্ৰা অনুব্যঞ্জনসো নিমিত্তং গণ্হাতি – কেসা ৰা সোভনা [সোভণা (স্যা.)] মুখং ৰা সোভনং অক্খী ৰা সোভনা কণ্ণা ৰা সোভনা নাসা ৰা সোভনা ওট্ঠা ৰা সোভনা দন্তা ৰা সোভনা মুখং ৰা সোভনং গীৰা ৰা সোভনা থনা ৰা সোভনা উরং ৰা সোভনং উদরং ৰা সোভনং কটি ৰা সোভনা ঊরূ ৰা সোভনা জঙ্ঘা ৰা সোভনা হত্থা ৰা সোভনা পাদা ৰা সোভনা অঙ্গুলিযো ৰা সোভনা নখা ৰা সোভনাতি. দিস্ৰা পস্সিত্ৰা অভিনন্দতি অভিৰদতি অভিপত্থেতি অনুপ্পাদেতি [অনুস্সরতি (ক.)] অনুবন্ধতি রাগবন্ধনং – অযং দস্সনসংসগ্গো.

কতমো সৰনসংসগ্গো? ইধেকচ্চো সুণাতি – ‘‘অসুকস্মিং নাম গামে ৰা নিগমে ৰা ইত্থী ৰা কুমারী ৰা অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা’’তি. সুত্ৰা সুণিত্ৰা অভিনন্দতি অভিৰদতি অভিপত্থেতি অনুপ্পাদেতি অনুবন্ধতি রাগবন্ধনং – অযং সৰনসংসগ্গো.

স্নেহাতি দ্ৰে স্নেহা – তণ্হাস্নেহো চ দিট্ঠিস্নেহো চ. কতমো তণ্হাস্নেহো? যাৰতা তণ্হাসঙ্খাতেন সীমকতং [সীমকতং মরিযাদিকতং (স্যা.)] ওধিকতং পরিযন্তিকতং পরিগ্গহিতং মমাযিতং – ‘‘ইদং মম, এতং মম, এত্তকং মম, এত্তাৰতা মম’’. রূপা সদ্দা গন্ধা রসা ফোট্ঠব্বা অত্থরণা পাৰুরণা দাসিদাসা অজেল়কা কুক্কুটসূকরা হত্থিগৰাস্সৰল়ৰা খেত্তং ৰত্থু হিরঞ্ঞং সুৰণ্ণং গামনিগমরাজধানিযো রট্ঠঞ্চ জনপদো চ কোসো চ কোট্ঠাগারঞ্চ, কেৰলম্পি মহাপথৰিং তণ্হাৰসেন মমাযতি, যাৰতা অট্ঠসততণ্হাৰিচরিতং – অযং তণ্হাস্নেহো.

কতমো দিট্ঠিস্নেহো? ৰীসতিৰত্থুকা সক্কাযদিট্ঠি, দসৰত্থুকা মিচ্ছাদিট্ঠি, দসৰত্থুকা অন্তগ্গাহিকাদিট্ঠি. যা এৰরূপা দিট্ঠি দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকাযিকং দিট্ঠিৰিপ্ফন্দিতং দিট্ঠিসংযোজনং গাহো পটিগ্গাহো [পতিট্ঠাহো (ক.)] অভিনিৰেসো পরামাসো কুম্মগ্গো মিচ্ছাপথো মিচ্ছত্তং তিত্থাযতনং ৰিপরিযাসগ্গাহো ৰিপরীতগ্গাহো ৰিপল্লাসগ্গাহো মিচ্ছাগাহো অযাথাৰকস্মিং যাথাৰকন্তি গাহো, যাৰতা দ্ৰাসট্ঠি দিট্ঠিগতানি – অযং দিট্ঠিস্নেহো.

সংসগ্গজাতস্স ভৰন্তি স্নেহাতি দস্সনসংসগ্গপচ্চযা চ সৰনসংসগ্গপচ্চযা চ তণ্হাস্নেহো চ দিট্ঠিস্নেহো চ ভৰন্তি সম্ভৰন্তি জাযন্তি সঞ্জাযন্তি নিব্বত্তন্তি অভিনিব্বত্তন্তি পাতুভৰন্তীতি – সংসগ্গজাতস্স ভৰন্তি স্নেহা.

স্নেহন্ৰযং দুক্খমিদং পহোতীতি. স্নেহোতি দ্ৰে স্নেহা – তণ্হাস্নেহো চ দিট্ঠিস্নেহো চ…পে… অযং তণ্হাস্নেহো…পে… অযং দিট্ঠিস্নেহো. দুক্খমিদং পহোতীতি ইধেকচ্চো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি, পাণম্পি হনতি, অদিন্নম্পি আদিযতি, সন্ধিম্পি ছিন্দতি, নিল্লোপম্পি [ৰিলোপম্পি (স্যা.) পস্স মহানি. ১৭০] হরতি, একাগারিকম্পি করোতি, পরিপন্থেপি তিট্ঠতি, পরদারম্পি গচ্ছতি, মুসাপি ভণতি. তমেনং গহেত্ৰা রঞ্ঞো দস্সেন্তি – ‘‘অযং, দেৰ, চোরো আগুচারী. ইমস্স যং ইচ্ছসি তং দণ্ডং পণেহী’’তি. তমেনং রাজা তং পরিভাসতি. সো পরিভাসপচ্চযাপি দুক্খং দোমনস্সং [দুক্খদোমনস্সং (স্যা.)] পটিসংৰেদেতি. এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং.

এত্তকেনপি রাজা ন তুস্সতি. তমেনং রাজা বন্ধাপেতি – অন্দুবন্ধনেন ৰা রজ্জুবন্ধনেন ৰা সঙ্খলিকবন্ধনেন ৰা ৰেত্তবন্ধনেন ৰা লতাবন্ধনেন ৰা পক্খেপবন্ধনেন ৰা পরিক্খেপবন্ধনেন ৰা গামবন্ধনেন ৰা নিগমবন্ধনেন ৰা রট্ঠবন্ধনেন ৰা জনপদবন্ধনেন ৰা, অন্তমসো সৰচনীযম্পি করোতি – ‘‘ন তে লব্ভা ইতো পক্কমিতু’’ন্তি. সো বন্ধনপচ্চযাপি দুক্খং দোমনস্সং পটিসংৰেদেতি. এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং.

এত্তকেনপি রাজা ন তুস্সতি. তমেনং রাজা তস্সেৰ [তস্স (স্যা.)] ধনং আহরাপেতি – সতং ৰা সহস্সং ৰা সতসহস্সং ৰা. সো ধনজানিপচ্চযাপি দুক্খং দোমনস্সং পটিসংৰেদেতি. এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং.

এত্তকেনপি রাজা ন তুস্সতি. তমেনং রাজা ৰিৰিধা কম্মকারণা [ৰিৰিধানি কম্মকরণানি (ক.)] কারাপেতি – কসাহিপি তাল়েতি, ৰেত্তেহিপি তাল়েতি, অড্ঢদণ্ডেহিপি তাল়েতি, হত্থম্পি ছিন্দতি, পাদম্পি ছিন্দতি, হত্থপাদম্পি ছিন্দতি, কণ্ণম্পি ছিন্দতি, নাসম্পি ছিন্দতি, কণ্ণনাসম্পি ছিন্দতি, বিলঙ্গথালিকম্পি করোতি, সঙ্খমুণ্ডিকম্পি করোতি, রাহুমুখম্পি করোতি, জোতিমালিকম্পি করোতি, হত্থপজ্জোতিকম্পি করোতি, এরকৰত্তিকম্পি [এরকৰট্টিকম্পি (স্যা. ক.) পস্স ম. নি. ১.১৬৯] করোতি, চীরকৰাসিকম্পি করোতি, এণেয্যকম্পি করোতি, বল়িসমংসিকম্পি করোতি, কহাপণিকম্পি করোতি, খারাপতচ্ছিকম্পি [খারাপটিচ্ছিকম্পি (ক.)] করোতি, পলিঘপরিৰত্তিকম্পি করোতি, পলালপীঠকম্পি করোতি, তত্তেনপি তেলেন ওসিঞ্চতি, সুনখেহিপি খাদাপেতি, জীৰন্তম্পি সূলে উত্তাসেতি, অসিনাপি সীসং ছিন্দতি. সো কম্মকারণপচ্চযাপি দুক্খং দোমনস্সং পটিসংৰেদেতি. এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং. রাজা ইমেসং চতুন্নং দণ্ডানং ইস্সরো.

সো সকেন কম্মেন কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. তমেনং নিরযপালা পঞ্চৰিধবন্ধনং নাম কম্মকারণং করোন্তি [কারেন্তি (স্যা. ক.) পস্স ম. নি. ৩.২৬৭] – তত্তং অযোখিলং হত্থে গমেন্তি, তত্তং অযোখিলং দুতিযে হত্থে গমেন্তি, তত্তং অযোখিলং পাদে গমেন্তি, তত্তং অযোখিলং দুতিযে পাদে গমেন্তি, তত্তং অযোখিলং মজ্ঝে উরস্মিং গমেন্তি. সো তত্থ দুক্খা তিব্বা [তিপ্পা (স্যা.)] খরা কটুকা ৰেদনা ৰেদেতি; ন চ তাৰ কালং করোতি যাৰ ন তং পাপকম্মং ব্যন্তীহোতি. এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং.

তমেনং নিরযপালা সংৰেসেত্ৰা [সংৰেসিত্ৰা (স্যা. ক.) পস্স ম. নি. ৩.২৬৭] কুঠারীহি [কুধারীহি (স্যা. ক.)] তচ্ছন্তি…পে… তমেনং নিরযপালা উদ্ধংপাদং অধোসিরং গহেত্ৰা ৰাসীহি তচ্ছন্তি. তমেনং নিরযপালা রথে যোজেত্ৰা আদিত্তায পথৰিযা সম্পজ্জলিতায সজোতিভূতায [সঞ্জোতিভূতায (স্যা.)] সারেন্তিপি পচ্চাসারেন্তিপি. তমেনং নিরযপালা মহন্তং অঙ্গারপব্বতং আদিত্তং সম্পজ্জলিতং সজোতিভূতং আরোপেন্তিপি ওরোপেন্তিপি. তমেনং নিরযপালা উদ্ধংপাদং অধোসিরং গহেত্ৰা তত্তায লোহকুম্ভিযা পক্খিপন্তি আদিত্তায সম্পজ্জলিতায সজোতিভূতায. সো তত্থ ফেণুদ্দেহকং পচ্চতি. সো তত্থ ফেণুদ্দেহকং পচ্চমানো সকিম্পি উদ্ধং গচ্ছতি, সকিম্পি অধো গচ্ছতি, সকিম্পি তিরিযং গচ্ছতি. সো তত্থ দুক্খা তিব্বা খরা কটুকা ৰেদনা ৰেদেতি; ন চ তাৰ কালঙ্করোতি যাৰ ন তং পাপকম্মং ব্যন্তীহোতি. এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং.

তমেনং নিরযপালা মহানিরযে পক্খিপন্তি. সো খো পন মহানিরযো –

চতুক্কণ্ণো চতুদ্ৰারো, ৰিভত্তো ভাগসো মিতো;

অযোপাকারপরিযন্তো, অযসা পটিকুজ্জিতো.

তস্স অযোমযা ভূমি, জলিতা তেজসা যুতা;

সমন্তা যোজনসতং, ফরিত্ৰা তিট্ঠতি সব্বদা.

কদরিযাতপনা [কদরিযা তাপনা (ক.) মহানি. ১৭০] ঘোরা, অচ্চিমন্তো দুরাসদা;

লোমহংসনরূপা চ, ভেস্মা পটিভযা দুখা.

পুরত্থিমায চ ভিত্তিযা, অচ্চিক্খন্ধো সমুট্ঠিতো;

ডহন্তো পাপকম্মন্তে, পচ্ছিমায পটিহঞ্ঞতি.

পচ্ছিমায চ ভিত্তিযা, অচ্চিক্খন্ধো সমুট্ঠিতো;

ডহন্তো পাপকম্মন্তে, পুরিমায পটিহঞ্ঞতি.

দক্খিণায চ ভিত্তিযা, অচ্চিক্খন্ধো সমুট্ঠিতো;

ডহন্তো পাপকম্মন্তে, উত্তরায পটিহঞ্ঞতি.

উত্তরায চ ভিত্তিযা, অচ্চিক্খন্ধো সমুট্ঠিতো;

ডহন্তো পাপকম্মন্তে, দক্খিণায পটিহঞ্ঞতি.

হেট্ঠতো চ সমুট্ঠায, অচ্চিক্খন্ধো ভযানকো;

ডহন্তো পাপকম্মন্তে, ছদনস্মিং পটিহঞ্ঞতি.

ছদনম্হা সমুট্ঠায, অচ্চিক্খন্ধো ভযানকো;

ডহন্তো পাপকম্মন্তে, ভূমিযং পটিহঞ্ঞতি.

অযোকপালমাদিত্তং, সন্তত্তং জলিতং যথা;

এৰং অৰীচিনিরযো, হেট্ঠা উপরি পস্সতো.

তত্থ সত্তা মহালুদ্দা, মহাকিব্বিসকারিনো;

অচ্চন্তপাপকম্মন্তা, পচ্চন্তি ন চ মিয্যরে [মীযরে (ক.)].

জাতৰেদসমো কাযো, তেসং নিরযৰাসিনং;

পস্স কম্মানং দল়্হত্তং, ন ভস্মা হোতি নপি মসি.

পুরত্থিমেনপি ধাৰন্তি, ততো ধাৰন্তি পচ্ছিমং;

উত্তরেনপি ধাৰন্তি, ততো ধাৰন্তি দক্খিণং.

যং যং দিসং পধাৰন্তি, তং তং দ্ৰারং পিধীযতি;

অভিনিক্খমিতাসা তে, সত্তা মোক্খগৰেসিনো.

ন তে ততো নিক্খমিতুং, লভন্তি কম্মপচ্চযা;

তেসঞ্চ পাপকম্মন্তং, অৰিপক্কং কতং বহুন্তি.

এতং ভযং দুক্খং দোমনস্সং কুতো জাতং? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ জাতং.

যানি চ নেরযিকানি দুক্খানি যানি চ তিরচ্ছানযোনিকানি দুক্খানি যানি চ পেত্তিৰিসযিকানি দুক্খানি যানি চ মানুসিকানি দুক্খানি, তানি কুতো জাতানি কুতো সঞ্জাতানি কুতো নিব্বত্তানি কুতো অভিনিব্বত্তানি কুতো পাতুভূতানি? তস্স স্নেহপচ্চযা চ নন্দিপচ্চযা চ রাগপচ্চযা চ নন্দিরাগপচ্চযা চ ভৰন্তি সম্ভৰন্তি জাযন্তি সঞ্জাযন্তি নিব্বত্তন্তি অভিনিব্বত্তন্তি পাতুভৰন্তীতি – স্নেহন্ৰযং দুক্খমিদং পহোতি.

আদীনৰং স্নেহজং পেক্খমানোতি. স্নেহোতি দ্ৰে স্নেহা – তণ্হাস্নেহো চ দিট্ঠিস্নেহো চ…পে… অযং তণ্হাস্নেহো…পে… অযং দিট্ঠিস্নেহো. আদীনৰং স্নেহজং পেক্খমানোতি তণ্হাস্নেহো চ দিট্ঠিস্নেহো চ আদীনৰং স্নেহজং পেক্খমানো দক্খমানো ওলোকযমানো নিজ্ঝাযমানো উপপরিক্খমানোতি – আদীনৰং স্নেহজং পেক্খমানো, একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘সংসগ্গজাতস্স ভৰন্তি স্নেহা, স্নেহন্ৰযং দুক্খমিদং পহোতি;

আদীনৰং স্নেহজং পেক্খমানো, একো চরে খগ্গৰিসাণকপ্পো’’তি.

১২৩. মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো [পটিবন্ধচিত্তো (ক.)] ;

এতং ভযং সন্থৰে [সন্ধৰে (ক.)] পেক্খমানো, একো চরে খগ্গৰিসাণকপ্পো.

মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তোতি. মিত্তাতি দ্ৰে মিত্তা – অগারিকমিত্তো চ অনাগারিকমিত্তো [পব্বজিতমিত্তো (ক.) এৰমুপরিপি] চ. কতমো অগারিকমিত্তো? ইধেকচ্চো দুদ্দদং দদাতি, দুচ্চজং চজতি, দুক্করং করোতি, দুক্খমং খমতি, গুয্হমস্স আচিক্খতি, গুয্হমস্স পরিগূহতি [পরিগুয্হতি (স্যা. ক.)], আপদাসু ন ৰিজহতি, জীৰিতম্পিস্স অত্থায পরিচ্চত্তং হোতি, খীণে নাতিমঞ্ঞতি – অযং অগারিকমিত্তো.

কতমো অনাগারিকমিত্তো? ইধ ভিক্খু পিযো চ হোতি মনাপো চ গরু চ ভাৰনীযো চ ৰত্তা চ ৰচনক্খমো চ গম্ভীরঞ্চ কথং কত্তা, নো চ অট্ঠানে নিযোজেতি অধিসীলে সমাদপেতি, চতুন্নং সতিপট্ঠানানং ভাৰনানুযোগে সমাদপেতি, চতুন্নং সম্মপ্পধানানং…পে… চতুন্নং ইদ্ধিপাদানং… পঞ্চন্নং ইন্দ্রিযানং… পঞ্চন্নং বলানং… সত্তন্নং বোজ্ঝঙ্গানং… অরিযস্স অট্ঠঙ্গিকস্স মগ্গস্স ভাৰনানুযোগে সমাদপেতি – অযং অনাগারিকমিত্তো.

সুহজ্জা ৰুচ্চন্তি যেহি সহ আগমনং ফাসু গমনং ফাসু ঠানং ফাসু নিসজ্জনং [নিসজ্জা (ক.)] ফাসু সযনং ফাসু আলপনং ফাসু সল্লপনং ফাসু উল্লপনং ফাসু সমুল্লপনং ফাসু. মিত্তে সুহজ্জে অনুকম্পমানো হাপেতি অত্থন্তি মিত্তে চ সুহজ্জে চ সন্দিট্ঠে চ সম্ভত্তে চ সহাযে চ অনুকম্পমানো অনুপেক্খমানো অনুগণ্হমানো অত্তত্থম্পি পরত্থম্পি উভযত্থম্পি হাপেতি, দিট্ঠধম্মিকম্পি অত্থং হাপেতি, সম্পরাযিকম্পি অত্থং হাপেতি, পরমত্থম্পি হাপেতি পহাপেতি পরিহাপেতি পরিধংসেতি পরিৰজ্জেতি [পরিসজ্জেতি (স্যা.)] অন্তরধাপেতীতি – মিত্তে সুহজ্জে অনুকম্পমানো হাপেতি অত্থং.

পটিবদ্ধচিত্তোতি দ্ৰীহি কারণেহি পটিবদ্ধচিত্তো হোতি – অত্তানং ৰা নীচং ঠপেন্তো পরং উচ্চং ঠপেন্তো পটিবদ্ধচিত্তো হোতি, অত্তানং ৰা উচ্চং ঠপেন্তো পরং নীচং ঠপেন্তো পটিবদ্ধচিত্তো হোতি. কথং অত্তানং নীচং ঠপেন্তো পরং উচ্চং ঠপেন্তো পটিবদ্ধচিত্তো হোতি? তুম্হে মে বহূপকারা, অহং তুম্হে নিস্সায লভামি চীৰরপিণ্ডপাতসেনাসনগিলানপচ্চযভেসজ্জপরিক্খারং. যম্পি [যেপি (ক.) এৰং চূল়নি. খগ্গৰিসাণসুত্তনিদ্দেস ১৫১] মে অঞ্ঞে দাতুং ৰা কাতুং ৰা মঞ্ঞন্তি তুম্হে নিস্সায তুম্হে সম্পস্সন্তা. যম্পি মে পোরাণং মাতাপেত্তিকং নামগোত্তং, তম্পি মে অন্তরহিতং. তুম্হেহি অহং ঞাযামি – অসুকস্স কুলুপকো, অসুকায কুলুপকোতি. এৰং অত্তানং নীচং ঠপেন্তো পরং উচ্চং ঠপেন্তো পটিবদ্ধচিত্তো হোতি.

কথং অত্তানং উচ্চং ঠপেন্তো পরং নীচং ঠপেন্তো পটিবদ্ধচিত্তো হোতি? অহং তুম্হাকং বহূপকারো, তুম্হে মং আগম্ম বুদ্ধং সরণং গতা, ধম্মং সরণং গতা, সঙ্ঘং সরণং গতা, পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপমাদট্ঠানা পটিৰিরতা; অহং তুম্হাকং উদ্দেসং দেমি, পরিপুচ্ছং দেমি, উপোসথং আচিক্খামি, নৰকম্মং অধিট্ঠামি. অথ পন তুম্হে মং উজ্ঝিত্ৰা [পরিচ্চজিত্ৰা (স্যা.)] অঞ্ঞে সক্করোথ গরুং করোথ মানেথ পূজেথাতি. এৰং অত্তানং উচ্চং ঠপেন্তো পরং নীচং ঠপেন্তো পটিবদ্ধচিত্তো হোতীতি – মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো.

এতং ভযং সন্থৰে পেক্খমানোতি. ভযন্তি জাতিভযং জরাভযং ব্যাধিভযং মরণভযং রাজভযং চোরভযং অগ্গিভযং উদকভযং অত্তানুৰাদভযং পরানুৰাদভযং দণ্ডভযং দুগ্গতিভযং ঊমিভযং কুম্ভিলভযং আৰট্টভযং সুসুমারভযং [সুংসুমারভযং (স্যা.)] আজীৰিকভযং অসিলোকভযং পরিসসারজ্জভযং মদনভযং ভযানকং ছম্ভিতত্তং লোমহংসো চেতসো উব্বেগো উত্রাসো. সন্থৰেতি দ্ৰে সন্থৰা – তণ্হাসন্থৰো চ দিট্ঠিসন্থৰো চ…পে… অযং তণ্হাসন্থৰো…পে… অযং দিট্ঠিসন্থৰো. এতং ভযং সন্থৰে পেক্খমানোতি এতং ভযং সন্থৰে পেক্খমানো দক্খমানো ওলোকযমানো নিজ্ঝাযমানো উপপরিক্খমানোতি – এতং ভযং সন্থৰে পেক্খমানো, একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো;

এতং ভযং সন্থৰে পেক্খমানো, একো চরে খগ্গৰিসাণকপ্পো’’তি.

১২৪. ৰংসো ৰিসালোৰ যথা ৰিসত্তো,পুত্তেসু দারেসু চ যা অপেক্খা;

ৰংসক্কল়ীরোৰ [ৰংসে কল়ীরোৰ (ক.)] অসজ্জমানো, একো চরে খগ্গৰিসাণকপ্পো.

ৰংসো ৰিসালোৰ যথা ৰিসত্তোতি ৰংসো ৰুচ্চতি ৰেল়ুগুম্বো. যথা ৰেল়ুগুম্বস্মিং পোরাণকা ৰংসা সত্তা [ৰেল়ুগুম্বস্মিং কণ্টকা জটিতা সংসিব্বিতা (স্যা.)] ৰিসত্তা আসত্তা লগ্গা লগ্গিতা পলিবুদ্ধা, এৰমেৰ ৰিসত্তিকা ৰুচ্চতি তণ্হা. যো রাগো সারাগো অনুনযো অনুরোধো নন্দী নন্দিরাগো চিত্তস্স সারাগো ইচ্ছা মুচ্ছা অজ্ঝোসানং গেধো পলিগেধো সঙ্গো পঙ্কো এজা মাযা জনিকা সঞ্জননী সিব্বিনী জালিনী সরিতা ৰিসত্তিকা সুত্তং ৰিসটা আযূহনী দুতিযা পণিধি ভৰনেত্তি ৰনং ৰনথো সন্থৰো সিনেহো অপেক্খা পটিবন্ধু আসা আসীসনা আসীসিতত্তং রূপাসা সদ্দাসা গন্ধাসা রসাসা ফোট্ঠব্বাসা লাভাসা ধনাসা পুত্তাসা জীৰিতাসা জপ্পা পজপ্পা অভিজপ্পা জপ্পনা জপ্পিতত্তং লোলুপ্পং লোলুপ্পাযনা লোলুপ্পাযিতত্তং পুচ্ছঞ্জিকতা সাধুকম্যতা অধম্মরাগো ৰিসমলোভো নিকন্তি নিকামনা পত্থনা পিহনা সম্পত্থনা কামতণ্হা ভৰতণ্হা ৰিভৰতণ্হা রূপতণ্হা অরূপতণ্হা নিরোধতণ্হা রূপতণ্হা সদ্দতণ্হা গন্ধতণ্হা রসতণ্হা ফোট্ঠব্বতণ্হা ধম্মতণ্হা ওঘো যোগো গন্থো উপাদানং আৰরণং নীৰরণং ছদনং বন্ধনং উপক্কিলেসো অনুসযো পরিযুট্ঠানং লতা ৰেৰিচ্ছং দুক্খমূলং দুক্খনিদানং দুক্খপ্পভৰো মারপাসো মারবল়িসং মারৰিসযো মারনিৰাসো মারবন্ধনং তণ্হানদী তণ্হাজালং তণ্হাগদ্দুলং তণ্হাসমুদ্দো অভিজ্ঝা লোভো অকুসলমূলং.

ৰিসত্তিকাতি কেনট্ঠেন ৰিসত্তিকা? ৰিসালাতি ৰিসত্তিকা ৰিসতাতি ৰিসত্তিকা, ৰিসটাতি ৰিসত্তিকা, ৰিসমাতি ৰিসত্তিকা, ৰিসক্কতীতি ৰিসত্তিকা, ৰিসংহরতীতি ৰিসত্তিকা, ৰিসংৰাদিকাতি ৰিসত্তিকা, ৰিসমূলাতি ৰিসত্তিকা, ৰিসফলাতি ৰিসত্তিকা, ৰিসপরিভোগাতি ৰিসত্তিকা. ৰিসালা ৰা পন তণ্হা রূপে সদ্দে গন্ধে রসে ফোট্ঠব্বে কুলে গণে আৰাসে লাভে যসে পসংসায সুখে চীৰরে পিণ্ডপাতে সেনাসনে গিলানপচ্চযভেসজ্জপরিক্খারে কামধাতুযা রূপধাতুযা অরূপধাতুযা কামভৰে রূপভৰে অরূপভৰে সঞ্ঞাভৰে অসঞ্ঞাভৰে নেৰসঞ্ঞানাসঞ্ঞাভৰে একৰোকারভৰে চতুৰোকারভৰে পঞ্চৰোকারভৰে অতীতে অনাগতে পচ্চুপ্পন্নে দিট্ঠসুতমুতৰিঞ্ঞাতব্বেসু ধম্মেসু ৰিসতা ৰিত্থতাতি – ৰিসত্তিকাতি – ৰংসো ৰিসালোৰ যথা ৰিসত্তো.

পুত্তেসু দারেসু চ যা অপেক্খাতি. পুত্তাতি চত্তারো পুত্তা – অত্রজো পুত্তো, খেত্তজো পুত্তো, দিন্নকো পুত্তো, অন্তেৰাসিকো পুত্তো. দারা ৰুচ্চন্তি ভরিযাযো. অপেক্খা ৰুচ্চন্তি তণ্হা. যো রাগো সারাগো…পে… অভিজ্ঝা লোভো অকুসলমূলন্তি – পুত্তেসু দারেসু চ যা অপেক্খা.

ৰংসক্কল়ীরোৰ অসজ্জমানোতি ৰংসো ৰুচ্চতি ৰেল়ুগুম্বো. যথা ৰেল়ুগুম্বস্মিং তরুণকা কল়ীরকা [তরুণকল়ীরা (স্যা.)] অসত্তা অলগ্গা অগধিতা [অপলিৰেট্ঠিতা (স্যা.)] অপলিবুদ্ধা নিক্খন্তা নিস্সটা ৰিপ্পমুত্তা এৰমেৰ. সজ্জাতি দ্ৰে সজ্জনা – তণ্হাসজ্জনা চ দিট্ঠিসজ্জনা চ…পে… অযং তণ্হাসজ্জনা…পে… অযং দিট্ঠিসজ্জনা. তস্স পচ্চেকসম্বুদ্ধস্স তণ্হাসজ্জনা পহীনা, দিট্ঠিসজ্জনা পটিনিস্সট্ঠা. তণ্হাসজ্জনায পহীনত্তা দিট্ঠিসজ্জনায পটিনিস্সট্ঠত্তা সো পচ্চেকসম্বুদ্ধো রূপে ন সজ্জতি সদ্দে ন সজ্জতি গন্ধে ন সজ্জতি রসে ন সজ্জতি ফোট্ঠব্বে ন সজ্জতি কুলে…পে… গণে… আৰাসে… লাভে… যসে… পসংসায… সুখে… চীৰরে… পিণ্ডপাতে… সেনাসনে… গিলানপচ্চযভেসজ্জপরিক্খারে… কামধাতুযা… রূপধাতুযা… অরূপধাতুযা… কামভৰে… রূপভৰে… অরূপভৰে… সঞ্ঞাভৰে… অসঞ্ঞাভৰে… নেৰসঞ্ঞানাসঞ্ঞাভৰে… একৰোকারভৰে… চতুৰোকারভৰে… পঞ্চৰোকারভৰে… অতীতে… অনাগতে… পচ্চুপ্পন্নে… দিট্ঠসুতমুতৰিঞ্ঞাতব্বেসু ধম্মেসু ন সজ্জতি ন গণ্হাতি ন বজ্ঝতি ন পলিবজ্ঝতি ন মুচ্ছতি; নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – ৰংসক্কল়ীরোৰ অসজ্জমানো, একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘ৰংসো ৰিসালোৰ যথা ৰিসত্তো, পুত্তেসু দারেসু চ যা অপেক্খা;

ৰংসক্কল়ীরোৰ অসজ্জমানো, একো চরে খগ্গৰিসাণকপ্পো’’তি.

১২৫. মিগো অরঞ্ঞম্হি যথা অবদ্ধো [অবন্ধো (স্যা. ক.)], যেনিচ্ছকং গচ্ছতি গোচরায;

ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো.

মিগো অরঞ্ঞম্হি যথা অবদ্ধো, যেনিচ্ছকং গচ্ছতি গোচরাযাতি. মিগোতি দ্ৰে মিগা – এণিমিগো চ পসদমিগো চ. যথা আরঞ্ঞিকো [আরঞ্ঞকো (স্যা. ক.)] মিগো অরঞ্ঞে পৰনে চরমানো [অরঞ্ঞে ৰসমানো (স্যা.)] ৰিস্সত্থো গচ্ছতি ৰিস্সত্থো তিট্ঠতি ৰিস্সত্থো নিসীদতি ৰিস্সত্থো সেয্যং কপ্পেতি.

ৰুত্তঞ্হেতং ভগৰতা – ‘‘সেয্যথাপি, ভিক্খৰে, আরঞ্ঞিকো মিগো অরঞ্ঞে পৰনে চরমানো ৰিস্সত্থো গচ্ছতি ৰিস্সত্থো তিট্ঠতি ৰিস্সত্থো নিসীদতি ৰিস্সত্থো সেয্যং কপ্পেতি. তং কিস্স হেতু? অনাপাথগতো, ভিক্খৰে, লুদ্দস্স. এৰমেৰ খো, ভিক্খৰে, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্ধমকাসি মারং, অপদং [পরং (ক.) ম. নি. ১.২৭১] ৰধিত্ৰা মারচক্খুং অদস্সনং গতো পাপিমতো’.

‘‘পুন চপরং, ভিক্খৰে, ভিক্খু ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো’.

‘‘পুন চপরং, ভিক্খৰে, ভিক্খু পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো’.

‘‘পুন চপরং, ভিক্খৰে, ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো’.

‘‘পুন চপরং, ভিক্খৰে, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো’.

‘‘পুন চপরং, ভিক্খৰে, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি…পে….

‘‘পুন চপরং, ভিক্খৰে, সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি…পে….

‘‘পুন চপরং, ভিক্খৰে, সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি…পে….

‘‘পুন চপরং, ভিক্খৰে, সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি, ভিক্খৰে, ‘ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো’, তিণ্ণো লোকে ৰিসত্তিকং. সো ৰিস্সত্থো গচ্ছতি ৰিস্সত্থো তিট্ঠতি ৰিস্সত্থো নিসীদতি ৰিস্সত্থো সেয্যং কপ্পেতি. তং কিস্স হেতু? অনাপাথগতো, ভিক্খৰে, পাপিমতো’’তি – মিগো অরঞ্ঞম্হি যথা অবদ্ধো, যেনিচ্ছকং গচ্ছতি গোচরায.

ৰিঞ্ঞূ নরো সেরিতং পেক্খমানোতি. ৰিঞ্ঞূতি পণ্ডিতো পঞ্ঞৰা বুদ্ধিমা ঞাণী ৰিভাৰী মেধাৰী. নরোতি সত্তো মাণৰো পোসো পুগ্গলো জীৰো জাগু জন্তু ইন্দগু মনুজো. সেরীতি দ্ৰে সেরী – ধম্মোপি সেরী পুগ্গলোপি সেরী. কতমো ধম্মো সেরী? চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গো – অযং ধম্মো সেরী. কতমো পুগ্গলো সেরী? যো ইমিনা সেরিনা ধম্মেন সমন্নাগতো, সো ৰুচ্চতি পুগ্গলো সেরী. ৰিঞ্ঞূ নরো সেরিতং পেক্খমানোতি ৰিঞ্ঞূ নরো সেরিতং ধম্মং পেক্খমানো, দক্খমানো ওলোকযমানো নিজ্ঝাযমানো উপপরিক্খমানোতি – ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘মিগো অরঞ্ঞম্হি যথা অবদ্ধো, যেনিচ্ছকং গচ্ছতি গোচরায;

ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো’’তি.

১২৬. আমন্তনা হোতি সহাযমজ্ঝে,ৰাসে ঠানে গমনে চারিকায;

অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো.

আমন্তনা হোতি সহাযমজ্ঝে, ৰাসে ঠানে গমনে চারিকাযাতি সহাযা ৰুচ্চন্তি যেহি সহ আগমনং ফাসু গমনং ফাসু গমনাগমনং ফাসু ঠানং ফাসু নিসজ্জনং ফাসু সযনং ফাসু আলপনং ফাসু সল্লপনং ফাসু উল্লপনং ফাসু সমুল্লপনং ফাসু. আমন্তনা হোতি সহাযমজ্ঝে, ৰাসে ঠানে গমনে চারিকাযাতি সহাযমজ্ঝে ৰাসেপি ঠানেপি গমনেপি চারিকাযপি অত্তত্থমন্তনা পরত্থমন্তনা উভযত্থমন্তনা দিট্ঠধম্মিকত্থমন্তনা সম্পরাযিকত্থমন্তনা পরমত্থমন্তনা [উভযত্থমন্তনা (ক.)] তি – আমন্তনা হোতি সহাযমজ্ঝে, ৰাসে ঠানে গমনে চারিকায.

অনভিজ্ঝিতং সেরিতং পেক্খমানোতি অনভিজ্ঝিতং এতং ৰত্থু বালানং অসপ্পুরিসানং তিত্থিযানং তিত্থযসাৰকানং, যদিদং – ভণ্ডুকাসাযৰত্থৰসনতা. অভিজ্ঝিতং এতং ৰত্থু পণ্ডিতানং সপ্পুরিসানং বুদ্ধসাৰকানং পচ্চেকবুদ্ধানং, যদিদং – ভণ্ডুকাসাযৰত্থৰসনতা. সেরীতি দ্ৰে সেরী – ধম্মোপি সেরী পুগ্গলোপি সেরী. কতমো ধম্মো সেরী? চত্তারো সতিপট্ঠানা …পে… অরিযো অট্ঠঙ্গিকো মগ্গো – অযং ধম্মো সেরী. কতমো পুগ্গলো সেরী? যো ইমিনা সেরিনা ধম্মেন সমন্নাগতো, সো ৰুচ্চতি পুগ্গলো সেরী. অনভিজ্ঝিতং সেরিতং পেক্খমানোতি সেরিতং ধম্মং পেক্খমানো দক্খমানো ওলোকযমানো নিজ্ঝাযমানো উপপরিক্খমানোতি – অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘আমন্তনা হোতি সহাযমজ্ঝে, ৰাসে ঠানে গমনে চারিকায;

অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো’’তি.

১২৭. খিড্ডা [খিট্টা (ক.)] রতী হোতি সহাযমজ্ঝে,পুত্তেসু চ ৰিপুলং হোতি পেমং;

পিযৰিপ্পযোগং [ৰিপ্পযোগম্পি (ক.)] ৰিজিগুচ্ছমানো, একো চরে খগ্গৰিসাণকপ্পো.

খিড্ডা রতী হোতি সহাযমজ্ঝেতি. খিড্ডাতি দ্ৰে খিড্ডা – কাযিকা চ খিড্ডা ৰাচসিকা চ খিড্ডা. কতমা কাযিকা খিড্ডা? হত্থীহিপি কীল়ন্তি, অস্সেহিপি কীল়ন্তি, রথেহিপি কীল়ন্তি, ধনূহিপি কীল়ন্তি, থরূহিপি কীল়ন্তি, অট্ঠপদেহিপি কীল়ন্তি, দসপদেহিপি কীল়ন্তি, আকাসেপি কীল়ন্তি, পরিহারপথেপি কীল়ন্তি, সন্তিকাযপি কীল়ন্তি, খলিকাযপি কীল়ন্তি, ঘটিকাযপি কীল়ন্তি, সলাকহত্থেনপি কীল়ন্তি, অক্খেনপি কীল়ন্তি, পঙ্গচীরেনপি কীল়ন্তি, ৰঙ্ককেনপি কীল়ন্তি, মোক্খচিকাযপি কীল়ন্তি, চিঙ্গুলকেনপি কীল়ন্তি, পত্তাল়্হকেনপি কীল়ন্তি, রথকেনপি কীল়ন্তি, ধনুকেনপি কীল়ন্তি, অক্খরিকাযপি কীল়ন্তি, মনেসিকাযপি কীল়ন্তি, যথাৰজ্জেনপি কীল়ন্তি. অযং কাযিকা খিড্ডা.

কতমা ৰাচসিকা খিড্ডা? মুখভেরিকং মুখালম্বরং মুখডিণ্ডিমকং [মুখদেণ্ডিমকং (স্যা.), মুখদিন্দিমকং (ক.)] মুখচলিমকং মুখকেরকং [মুখভেরুকং (স্যা.)] মুখদদ্দরিকং নাটকং লাসং গীতং দৰকম্মং. অযং ৰাচসিকা খিড্ডা.

রতীতি অনুক্কণ্ঠিতাধিৰচনমেতং রতীতি. সহাযা ৰুচ্চন্তি যেহি সহ আগমনং ফাসু গমনং ফাসু গমনাগমনং ফাসু ঠানং ফাসু নিসজ্জনং ফাসু সযনং ফাসু আলপনং ফাসু সল্লপনং ফাসু উল্লপনং ফাসু সমুল্লপনং ফাসু. খিড্ডা রতী হোতি সহাযমজ্ঝেতি খিড্ডা চ রতি চ সহাযমজ্ঝে হোতীতি – খিড্ডা রতী হোতি সহাযমজ্ঝে.

পুত্তেসু চ ৰিপুলং হোতি পেমন্তি. পুত্তাতি চত্তারো পুত্তা – অত্রজো পুত্তো, খেত্তজো পুত্তো, দিন্নকো পুত্তো, অন্তেৰাসিকো পুত্তো. পুত্তেসু চ ৰিপুলং হোতিং পেমন্তি পুত্তেসু চ অধিমত্তং হোতি পেমন্তি – পুত্তেসু চ ৰিপুলং হোতি পেমং.

পিযৰিপ্পযোগং ৰিজিগুচ্ছমানোতি দ্ৰে পিযা – সত্তা ৰা সঙ্খারা ৰা. কতমে সত্তা পিযা? ইধ যস্স তে হোন্তি অত্থকামা হিতকামা ফাসুকামা যোগক্খেমকামা মাতা ৰা পিতা ৰা ভাতা ৰা ভগিনী ৰা পুত্তো ৰা ধীতা ৰা মিত্তা ৰা অমচ্চা ৰা ঞাতী ৰা সালোহিতা ৰা, ইমে সত্তা পিযা.

কতমে সঙ্খারা পিযা? মনাপিকা রূপা মনাপিকা সদ্দা মনাপিকা গন্ধা মনাপিকা রসা মনাপিকা ফোট্ঠব্বা, ইমে সঙ্খারা পিযা. পিযৰিপ্পযোগং ৰিজিগুচ্ছমানোতি পিযানং ৰিপ্পযোগং ৰিজিগুচ্ছমানো অট্টিযমানো হরাযমানোতি – পিযৰিপ্পযোগং ৰিজিগুচ্ছমানো, একো চরে খগ্গৰিসাণকপ্পো. তেনাহ সো পচ্চেকসম্বুদ্ধো –

‘‘খিড্ডা রতী হোতি সহাযমজ্ঝে, পুত্তেসু চ ৰিপুলং হোতি পেমং;

পিযৰিপ্পযোগং ৰিজিগুচ্ছমানো, একো চরে খগ্গৰিসাণকপ্পো’’তি.

১২৮. চাতুদ্দিসো অপ্পটিঘো চ হোতি,সন্তুস্সমানো ইতরীতরেন;

পরিস্সযানং সহিতা অছম্ভী, একো চরে খগ্গৰিসাণকপ্পো.

চাতুদ্দিসো অপ্পটিঘো চ হোতীতি. চাতুদ্দিসোতি সো পচ্চেকসম্বুদ্ধো মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন [অব্যাপজ্ঝেন (স্যা.) পস্স দী. নি. ৩.৩০৮] ফরিত্ৰা ৰিহরতি. করুণাসহগতেন…পে… মুদিতাসহগতেন…পে… উপেক্খাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং…পে… অব্যাপজ্জেন ফরিত্ৰা ৰিহরতি. চাতুদ্দিসো অপ্পটিঘো চ হোতীতি মেত্তায ভাৰিতত্তা যে পুরত্থিমায দিসায সত্তা তে অপ্পটিকূলা [অপ্পটিকুলা (বহূসু)] হোন্তি, যে দক্খিণায দিসায সত্তা তে অপ্পটিকূলা হোন্তি, যে পচ্ছিমায দিসায সত্তা তে অপ্পটিকূলা হোন্তি, যে উত্তরায দিসায সত্তা তে অপ্পটিকূলা হোন্তি, যে পুরত্থিমায অনুদিসায সত্তা তে অপ্পটিকূলা হোন্তি, যে দক্খিণায অনুদিসায সত্তা তে অপ্পটিকূলা হোন্তি, যে পচ্ছিমায অনুদিসায সত্তা তে অপ্পটিকূলা হোন্তি, যে উত্তরায অনুদিসায সত্তা তে অপ্পটিকূলা হোন্তি, যে হেট্ঠিমায দিসায সত্তা তে অপ্পটিকূলা হোন্তি, যে উপরিমায দিসায সত্তা তে অপ্পটিকূলা হোন্তি, যে দিসাসু ৰিদিসাসু সত্তা তে অপ্পটিকূলা হোন্তি; করুণায ভাৰিতত্তা মুদিতায ভাৰিতত্তা উপেক্খায ভাৰিতত্তা যে পুরত্থিমায দিসায সত্তা তে অপ্পটিকূলা হোন্তি…পে… যে দিসাসু ৰিদিসাসু সত্তা তে অপ্পটিকূলা হোন্তীতি – চাতুদ্দিসো অপ্পটিঘো চ হোতি.

সন্তুস্সমানো ইতরীতরেনাতি সো পচ্চেকসম্বুদ্ধো সন্তুট্ঠো হোতি ইতরীতরেন চীৰরেন, ইতরীতরচীৰরসন্তুট্ঠিযা চ ৰণ্ণৰাদী, ন চ চীৰরহেতু অনেসনং অপ্পতিরূপং [অপ্পটিরূপং (স্যা.)] আপজ্জতি. অলদ্ধা চ চীৰরং ন পরিতস্সতি, লদ্ধা চ চীৰরং অগধিতো অমুচ্ছিতো অনজ্ঝাপসন্নো [অনজ্ঝোপন্নো (স্যা.)] আদীনৰদস্সাৰী নিস্সরণপঞ্ঞো পরিভুঞ্জতি. তায চ পন ইতরীতরচীৰরসন্তুট্ঠিযা নেৰত্তানুক্কংসেতি ন পরং ৰম্ভেতি. যো হি তত্থ দক্খো অনলসো সম্পজানো পতিস্সতো, অযং ৰুচ্চতি পচ্চেকসম্বুদ্ধো পোরাণে অগ্গঞ্ঞে অরিযৰংসে ঠিতো. সন্তুট্ঠো হোতি ইতরীতরেন পিণ্ডপাতেন…পে…

সন্তুট্ঠো হোতি ইতরীতরেন সেনাসনেন…পে… সন্তুট্ঠো হোতি ইতরীতরেন গিলানপচ্চযভেসজ্জপরিক্খারেন, ইতরীতরগিলানপচ্চযভেসজ্জপরিক্খারসন্তুট্ঠিযা চ ৰণ্ণৰাদী, ন চ গিলানপচ্চযভেসজ্জপরিক্খারহেতু অনেসনং অপ্পতিরূপং আপজ্জতি. অলদ্ধা চ গিলানপচ্চযভেসজ্জপরিক্খারানং ন পরিতস্সতি. লদ্ধা চ গিলানপচ্চযভেসজ্জপরিক্খারং অগধিতো অমুচ্ছিতো অনজ্ঝাপন্নো আদীনৰদস্সাৰী নিস্সরণপঞ্ঞো পরিভুঞ্জতি. তায চ ইতরীতরগিলানপচ্চযভেসজ্জপরিক্খারসন্তুট্ঠিযা নেৰত্তানুক্কংসেতি ন পরং ৰম্ভেতি. যো হি তত্থ দক্খো অনলসো সম্পজানো পতিস্সতো, অযং ৰুচ্চতি পচ্চেকসম্বুদ্ধো পোরাণে অগ্গঞ্ঞে অরিযৰংসে ঠিতোতি – সন্তুস্সমানো ইতরীতরেন.

পরিস্সযানং সহিতা অছম্ভীতি. পরিস্সযাতি দ্ৰে পরিস্সযা – পাকটপরিস্সযা চ পটিচ্ছন্নপরিস্সযা চ. কতমে পাকটপরিস্সযা? সীহা ব্যগ্ঘা দীপী অচ্ছা তরচ্ছা কোকা মহিংসা [গোমহিসা (স্যা.) মহানি. ৫] হত্থী অহী ৰিচ্ছিকা সতপদী, চোরা ৰা অস্সু মানৰা ৰা কতকম্মা ৰা অকতকম্মা ৰা, চক্খুরোগো সোতরোগো ঘানরোগো জিৰ্হারোগো কাযরোগো সীসরোগো কণ্ণরোগো মুখরোগো দন্তরোগো কাসো সাসো পিনাসো ডাহো জরো কুচ্ছিরোগো মুচ্ছা পক্খন্দিকা সূলা ৰিসূচিকা কুট্ঠং গণ্ডো কিলাসো সোসো অপমারো দদ্দু কণ্ডু কচ্ছু রখসা ৰিতচ্ছিকা লোহিতপিত্তং মধুমেহো অংসা পিল়কা ভগন্দলা, পিত্তসমুট্ঠানা আবাধা সেম্হসমুট্ঠানা আবাধা ৰাতসমুট্ঠানা আবাধা সন্নিপাতিকা আবাধা উতুপরিণামজা আবাধা ৰিসমপরিহারজা আবাধা ওপক্কমিকা আবাধা কম্মৰিপাকজা আবাধা, সীতং উণ্হং জিঘচ্ছা পিপাসা উচ্চারো পস্সাৰো ডংসমকসৰাতাতপসরীসপসম্ফস্সা ইতি ৰা. ইমে ৰুচ্চন্তি পাকটপরিস্সযা.

কতমে পটিচ্ছন্নপরিস্সযা? কাযদুচ্চরিতং ৰচীদুচ্চরিতং মনোদুচ্চরিতং কামচ্ছন্দনীৰরণং ব্যাপাদনীৰরণং থিনমিদ্ধনীৰরণং উদ্ধচ্চকুক্কুচ্চনীৰরণং ৰিচিকিচ্ছানীৰরণং রাগো দোসো মোহো কোধো উপনাহো মক্খো পল়াসো ইস্সা মচ্ছরিযং মাযা সাঠেয্যং থম্ভো সারম্ভো মানো অতিমানো মদো পমাদো, সব্বে কিলেসা সব্বে দুচ্চরিতা সব্বে দরথা সব্বে পরিল়াহা সব্বে সন্তাপা সব্বাকুসলাভিসঙ্খারা. ইমে ৰুচ্চন্তি পটিচ্ছন্নপরিস্সযা.

পরিস্সযাতি কেনট্ঠেন পরিস্সযা? পরিসহন্তীতি পরিস্সযা, পরিহানায সংৰত্তন্তীতি পরিস্সযা, তত্রাসযাতি পরিস্সযা. কথং পরিসহন্তীতি পরিস্সযা? তে পরিস্সযা তং পুগ্গলং সহন্তি পরিসহন্তি অভিভৰন্তি অজ্ঝোত্থরন্তি পরিযাদিযন্তি মদ্দন্তি. এৰং পরিসহন্তীতি – পরিস্সযা.

কথং পরিহানায সংৰত্তন্তীতি পরিস্সযা? তে পরিস্সযা কুসলানং ধম্মানং অন্তরাযায পরিহানায সংৰত্তন্তি. কতমেসং কুসলানং ধম্মানং? সম্মাপটিপদায অনুলোমপটিপদায অপচ্চনীকপটিপদায অন্ৰত্থপটিপদায ধম্মানুধম্মপটিপদায সীলেসু পরিপূরকারিতায ইন্দ্রিযেসু গুত্তদ্ৰারতায ভোজনে মত্তঞ্ঞুতায জাগরিযানুযোগস্স সতিসম্পজঞ্ঞস্স চতুন্নং সতিপট্ঠানানং ভাৰনানুযোগস্স, চতুন্নং সম্মপ্পধানানং… চতুন্নং ইদ্ধিপাদানং… পঞ্চন্নং ইন্দ্রিযানং… পঞ্চন্নং বলানং… সত্তন্নং বোজ্ঝঙ্গানং… অরিযস্স অট্ঠঙ্গিকস্স মগ্গস্স ভাৰনানুযোগস্স – ইমেসং কুসলানং ধম্মানং অন্তরাযায পরিহানায সংৰত্তন্তি. এৰং পরিহানায সংৰত্তন্তীতি – পরিস্সযা.

কথং তত্রাসযাতি পরিস্সযা? তত্থেতে [তত্র তে (ক.)] পাপকা অকুসলা ধম্মা উপ্পজ্জন্তি অত্তভাৰসন্নিস্সযা. যথা বিলে বিলাসযা পাণা সযন্তি, দকে দকাসযা [উদকে উদকাসযা (স্যা.)] পাণা সযন্তি, ৰনে ৰনাসযা পাণা সযন্তি, রুক্খে রুক্খাসযা পাণা সযন্তি; এৰমেৰ তত্থেতে পাপকা অকুসলা ধম্মা উপ্পজ্জন্তি অত্তভাৰসন্নিস্সযাতি. এৰম্পি তত্রাসযাতি – পরিস্সযা.

ৰুত্তঞ্হেতং ভগৰতা – ‘‘সান্তেৰাসিকো, ভিক্খৰে, ভিক্খু সাচরিযকো দুক্খং ন ফাসু ৰিহরতি. কথঞ্চ, ভিক্খৰে, ভিক্খু সান্তেৰাসিকো সাচরিযকো দুক্খং ন ফাসু ৰিহরতি? ইধ, ভিক্খৰে, ভিক্খু চক্খুনা রূপং দিস্ৰা উপ্পজ্জন্তি যে পাপকা অকুসলা ধম্মা, সরসঙ্কপ্পা সংঞ্ঞোজনীযা [সঞ্ঞোজনিকা (ক.)], ত্যস্স অন্তো ৰসন্তি অন্ৰাস্সৰন্তি পাপকা অকুসলা ধম্মাতি. তস্মা সান্তেৰাসিকো ৰুচ্চতি. তেন সমুদাচরেন সমুদাচরন্তি নং পাপকা অকুসলা ধম্মাতি. তস্মা সাচরিযকোতি ৰুচ্চতি.

‘‘পুন চপরং, ভিক্খৰে, ভিক্খুনো সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায উপ্পজ্জন্তি যে পাপকা অকুসলা ধম্মা সরসঙ্কপ্পা সংযোজনীযা, ত্যস্স অন্তো ৰসন্তি অন্ৰাস্সৰন্তি পাপকা অকুসলা ধম্মাতি. তস্মা সান্তেৰাসিকোতি ৰুচ্চতি. তেন সমুদাচরেন সমুদাচরন্তি নং পাপকা অকুসলা ধম্মাতি. তস্মা সাচরিযকোতি ৰুচ্চতি. এৰং খো, ভিক্খৰে, ভিক্খু সান্তেৰাসিকো সাচরিযকো দুক্খং ন ফাসু ৰিহরতী’’তি. এৰম্পি, তত্রাসযাতি – পরিস্সযা.

ৰুত্তঞ্হেতং ভগৰতা – ‘‘তযোমে, ভিক্খৰে, অন্তরামলা অন্তরাঅমিত্তা অন্তরাসপত্তা অন্তরাৰধকা অন্তরাপচ্চত্থিকা. কতমে তযো? লোভো, ভিক্খৰে, অন্তরামলো [অন্তরামলং (স্যা. ক.) পস্স ইতিৰু. ৮৮] অন্তরাঅমিত্তো অন্তরাসপত্তো অন্তরাৰধকো অন্তরাপচ্চত্থিকো, দোসো, ভিক্খৰে…পে… মোহো, ভিক্খৰে, অন্তরামলো অন্তরাঅমিত্তো অন্তরাসপত্তো অন্তরাৰধকো অন্তরাপচ্চত্থিকো. ইমে খো, ভিক্খৰে, তযো অন্তরামলা অন্তরাঅমিত্তা অন্তরাসপত্তা অন্তরাৰধকা অন্তরাপচ্চত্থিকা’’তি.

অনত্থজননো লোভো, লোভো চিত্তপ্পকোপনো;

ভযমন্তরতো জাতং, তং জনো নাৰবুজ্ঝতি.

লুদ্ধো অত্থং ন জানাতি, লুদ্ধো ধম্মং ন পস্সতি;

অন্ধতমং তদা হোতি, যং লোভো সহতে নরং.

অনত্থজননো দোসো, দোসো চিত্তপ্পকোপনো;

ভযমন্তরতো জাতং, তং জনো নাৰবুজ্ঝতি.

দুট্ঠো অত্থং ন জানাতি, দুট্ঠো ধম্মং ন পস্সতি;

অন্ধতমং তদা হোতি, যং দোসো সহতে নরং.

অনত্থজননো মোহো, মোহো চিত্তপ্পকোপনো;

ভযমন্তরতো জাতং, তং জনো নাৰবুজ্ঝতি.

মূল়্হো অত্থং ন জানাতি, মূল়্হো ধম্মং ন পস্সতি;