১৩. উদযমাণৰপুচ্ছা

১৩০. ‘‘ঝাযিং ৰিরজমাসীনং, [ইচ্চাযস্মা উদযো]

কতকিচ্চং অনাসৰং;

পারগুং সব্বধম্মানং, অত্থি পঞ্হেন আগমং;

অঞ্ঞাৰিমোক্খং পব্রূহি, অৰিজ্জায পভেদনং’’.

১৩১. ‘‘পহানং কামচ্ছন্দানং, [উদযাতি ভগৰা]

দোমনস্সান চূভযং;

থিনস্স চ পনূদনং, কুক্কুচ্চানং নিৰারণং.

১৩২. ‘‘উপেক্খাসতিসংসুদ্ধং, ধম্মতক্কপুরেজৰং;

অঞ্ঞাৰিমোক্খং পব্রূমি, অৰিজ্জায পভেদনং’’.

১৩৩. ‘‘কিংসু সংযোজনো লোকো, কিংসু তস্স ৰিচারণং;

কিস্সস্স ৰিপ্পহানেন, নিব্বানং ইতি ৰুচ্চতি’’.

১৩৪. ‘‘নন্দিসংযোজনো লোকো, ৰিতক্কস্স ৰিচারণং;

তণ্হায ৰিপ্পহানেন, নিব্বানং ইতি ৰুচ্চতি’’.

১৩৫. ‘‘কথং সতস্স চরতো, ৰিঞ্ঞাণং উপরুজ্ঝতি;

ভগৰন্তং পুট্ঠুমাগম্ম, তং সুণোম ৰচো তৰ’’.

১৩৬. ‘‘অজ্ঝত্তঞ্চ বহিদ্ধা চ, ৰেদনং নাভিনন্দতো;

এৰং সতস্স চরতো, ৰিঞ্ঞাণং উপরুজ্ঝতী’’তি.

উদযমাণৰপুচ্ছা তেরসমা.