৪৩৪. চক্কৰাকজাতকং (৮)

৬৯. কাসাযৰত্থে সকুণে ৰদামি, দুৰে দুৰে নন্দমনে [নন্দিমনে (সী. পী.)] চরন্তে;

কং অণ্ডজং অণ্ডজা মানুসেসু, জাতিং পসংসন্তি তদিঙ্ঘ ব্রূথ.

৭০. অম্হে মনুস্সেসু মনুস্সহিংস, অনুব্বতে [অনুপুব্বকে (ক.)] চক্কৰাকে ৰদন্তি;

কল্যাণভাৰম্হে [ভাৰ’ম্হ (সী. পী.)] দিজেসু সম্মতা, অভিরূপা [অভীতরূপা (সী. স্যা. পী.)] ৰিচরাম অণ্ণৰে. ( ) [(ন ঘাসহেতূপি করোম পাপং) (ক.)]

৭১. কিং অণ্ণৰে কানি ফলানি ভুঞ্জে, মংসং কুতো খাদথ চক্কৰাকা;

কিং ভোজনং ভুঞ্জথ ৰো অনোমা [অভিণ্হং (ক.)], বলঞ্চ ৰণ্ণো চ অনপ্পরূপা [অনপ্পরূপো (সী. স্যা. পী.)].

৭২. ন অণ্ণৰে সন্তি ফলানি ধঙ্ক, মংসং কুতো খাদিতুং চক্কৰাকে;

সেৰালভক্খম্হ [ভক্খিম্হ (ক.)] অপাণভোজনা [অৰাকভোজনা (সী. পী.)], ন ঘাসহেতূপি করোম পাপং.

৭৩. ন মে ইদং রুচ্চতি চক্কৰাক, অস্মিং ভৰে ভোজনসন্নিকাসো;

অহোসি পুব্বে ততো মে অঞ্ঞথা, ইচ্চেৰ মে ৰিমতি এত্থ জাতা.

৭৪. অহম্পি মংসানি ফলানি ভুঞ্জে, অন্নানি চ লোণিযতেলিযানি;

রসং মনুস্সেসু লভামি ভোত্তুং, সূরোৰ সঙ্গামমুখং ৰিজেত্ৰা;

ন চ মে তাদিসো ৰণ্ণো, চক্কৰাক যথা তৰ.

৭৫. অসুদ্ধভক্খোসি খণানুপাতী, কিচ্ছেন তে লব্ভতি অন্নপানং;

ন তুস্সসী রুক্খফলেহি ধঙ্ক, মংসানি ৰা যানি সুসানমজ্ঝে.

৭৬. যো সাহসেন অধিগম্ম ভোগে, পরিভুঞ্জতি ধঙ্ক খণানুপাতী;

ততো উপক্কোসতি নং সভাৰো, উপক্কুট্ঠো ৰণ্ণবলং জহাতি.

৭৭. অপ্পম্পি চে নিব্বুতিং ভুঞ্জতী যদি, অসাহসেন অপরূপঘাতী [অসাহসেনানুপঘাতিনো (ক.)];

বলঞ্চ ৰণ্ণো চ তদস্স হোতি, ন হি সব্বো আহারমযেন ৰণ্ণোতি.

চক্কৰাকজাতকং অট্ঠমং.