৪২৯. মহাসুৰজাতকং (৩)

২০. দুমো যদা হোতি ফলূপপন্নো, ভুঞ্জন্তি নং ৰিহঙ্গমা [ৰিহগা (সী. পী.)] সম্পতন্তা;

খীণন্তি ঞত্ৰান দুমং ফলচ্চযে [ঞত্ৰা দুমপ্ফলচ্চযেন (ক.)], দিসোদিসং যন্তি ততো ৰিহঙ্গমা.

২১. চর চারিকং লোহিততুণ্ড মামরি, কিং ত্ৰং সুৰ সুক্খদুমম্হি ঝাযসি;

তদিঙ্ঘ মং ব্রূহি ৰসন্তসন্নিভ, কস্মা সুৰ সুক্খদুমং ন রিঞ্চসি.

২২. যে ৰে সখীনং সখারো ভৰন্তি, পাণচ্চযে [পাণং চজে (ক.), পাণচ্চযে মরণকালে চ সুখদুক্খেসু চ ন জহন্তীতি সম্বন্ধো] দুক্খসুখেসু হংস;

খীণং অখীণন্তি ন তং জহন্তি, সন্তো সতং ধম্মমনুস্সরন্তা.

২৩. সোহং সতং অঞ্ঞতরোস্মি হংস, ঞাতী চ মে হোতি সখা চ রুক্খো;

তং নুস্সহে জীৰিকত্থো পহাতুং, খীণন্তি ঞত্ৰান ন হেস ধম্মো [ন সোস (ক.), ন এস (স্যা.)].

২৪. সাধু সক্খি কতং হোতি, মেত্তি সংসতি সন্থৰো [মিত্তং সঙ্গতি সন্ধৰো (ক.)];

সচেতং ধম্মং রোচেসি, পাসংসোসি ৰিজানতং.

২৫. সো তে সুৰ ৰরং দম্মি, পত্তযান ৰিহঙ্গম;

ৰরং ৰরস্সু ৰক্কঙ্গ, যং কিঞ্চি মনসিচ্ছসি.

২৬. ৰরঞ্চ মে হংস ভৰং দদেয্য, অযঞ্চ রুক্খো পুনরাযুং লভেথ;

সো সাখৰা ফলিমা সংৰিরূল়্হো, মধুত্থিকো তিট্ঠতু সোভমানো.

২৭. তং পস্স সম্ম ফলিমং উল়ারং, সহাৰ তে হোতু উদুম্বরেন;

সো সাখৰা ফলিমা সংৰিরূল়্হো, মধুত্থিকো তিট্ঠতু সোভমানো.

২৮. এৰং সক্ক সুখী হোহি, সহ সব্বেহি ঞাতিভি;

যথাহমজ্জ সুখিতো, দিস্ৰান সফলং দুমং.

২৯. সুৰস্স চ ৰরং দত্ৰা, কত্ৰান সফলং দুমং;

পক্কামি সহ ভরিযায, দেৰানং নন্দনং ৰনন্তি.

মহাসুৰজাতকং ততিযং.