৪২৭. গিজ্ঝজাতকং (১)

১. পরিসঙ্কুপথো নাম, গিজ্ঝপন্থো সনন্তনো;

তত্রাসি মাতাপিতরো, গিজ্ঝো পোসেসি জিণ্ণকে;

তেসং অজগরমেদং, অচ্চহাসি বহুত্তসো [পহুত্ততো (ক. সী.), পহূতসো (স্যা. পী.), বহুধসো (ক.)].

২. পিতা চ পুত্তং অৰচ, জানং উচ্চং পপাতিনং;

সুপত্তং থামসম্পন্নং [পক্খসম্পন্নং (সী. স্যা. পী.)], তেজস্সিং দূরগামিনং.

৩. পরিপ্লৰন্তং পথৰিং, যদা তাত ৰিজানহি;

সাগরেন পরিক্খিত্তং, চক্কংৰ পরিমণ্ডলং;

ততো তাত নিৰত্তস্সু, মাস্সু এত্তো পরং গমি.

৪. উদপত্তোসি [উদ্ধং পত্তোসি (ক. সী.)] ৰেগেন, বলী পক্খী দিজুত্তমো;

ওলোকযন্তো ৰক্কঙ্গো, পব্বতানি ৰনানি চ.

৫. অদ্দস্স পথৰিং গিজ্ঝো, যথাসাসি [যথাস্সাসি (স্যা. অট্ঠ. পাঠন্তরং)] পিতুস্সুতং;

সাগরেন পরিক্খিত্তং, চক্কংৰ পরিমণ্ডলং.

৬. তঞ্চ সো সমতিক্কম্ম, পরমেৰচ্চৰত্তথ [পরমেৰ পৰত্তথ (সী. স্যা.)];

তঞ্চ ৰাতসিখা তিক্খা, অচ্চহাসি বলিং দিজং.

৭. নাসক্খাতিগতো পোসো, পুনদেৰ নিৰত্তিতুং;

দিজো ব্যসনমাপাদি, ৰেরম্ভানং [ৰেরম্বানং (সী. পী.)] ৰসং গতো.

৮. তস্স পুত্তা চ দারা চ, যে চঞ্ঞে অনুজীৰিনো;

সব্বে ব্যসনমাপাদুং, অনোৰাদকরে দিজে.

৯. এৰম্পি ইধ ৰুড্ঢানং, যো ৰাক্যং নাৰবুজ্ঝতি;

অতিসীমচরো দিত্তো, গিজ্ঝোৰাতীতসাসনো;

স ৰে ব্যসনং পপ্পোতি, অকত্ৰা ৰুড্ঢসাসনন্তি.

গিজ্ঝজাতকং পঠমং.