৩৭৫. কপোতজাতকং (৫-৩-৫)

১৩৫. ইদানি খোম্হি সুখিতো অরোগো, নিক্কণ্টকো নিপ্পতিতো কপোতো;

কাহামি দানী হদযস্স তুট্ঠিং, তথাহিমং মংসসাকং বলেতি.

১৩৬. কাযং বলাকা সিখিনো, চোরী লঙ্ঘিপিতামহা;

ওরং বলাকে আগচ্ছ, চণ্ডো মে ৰাযসো সখা.

১৩৭. অলঞ্হি তে জগ্ঘিতাযে, মমং দিস্ৰান এদিসং;

ৰিলূনং সূদপুত্তেন, পিট্ঠমণ্ডেন [পিট্ঠমদ্দেন (সী. স্যা. পী.)] মক্খিতং.

১৩৮. সুন্হাতো সুৰিলিত্তোসি, অন্নপানেন তপ্পিতো;

কণ্ঠে চ তে ৰেল়ুরিযো, অগমা নু কজঙ্গলং.

১৩৯. মা তে মিত্তো অমিত্তো ৰা, অগমাসি কজঙ্গলং;

পিঞ্ছানি তত্থ লাযিত্ৰা, কণ্ঠে বন্ধন্তি ৰট্টনং.

১৪০. পুনপাপজ্জসী সম্ম, সীলঞ্হি তৰ তাদিসং;

ন হি মানুসকা ভোগা, সুভুঞ্জা হোন্তি পক্খিনাতি.

কপোতজাতকং পঞ্চমং.

অড্ঢৰগ্গো ততিযো.

তস্সুদ্দানং –

অথ ৰণ্ণ সসীল হিরি লভতে, সুমুখা ৰিস সাল়িযমিত্তৰরো;

অথ চক্ক পলাস সরাজ সতো, যৰ বাল কপোতক পন্নরসাতি.

অথ ৰগ্গুদ্দানং –

জীনঞ্চ ৰণ্ণং অসমংৰগুপ্পরি, সুদেসিতা জাতকন্তি সন্তি ৰীসতি [জাতক পঞ্চৰীসতি (?)];

মহেসিনো ব্রহ্মচরিত্তমুত্ত-মৰোচ গাথা অত্থৰতী সুব্যঞ্জনাতি.

পঞ্চকনিপাতং নিট্ঠিতং.