৪৫৮. উদযজাতকং (৪)

৩৭. একা নিসিন্না সুচি সঞ্ঞতূরূ, পাসাদমারুয্হ অনিন্দিতঙ্গী;

যাচামি তং কিন্নরনেত্তচক্খু, ইমেকরত্তিং উভযো ৰসেম.

৩৮. ওকিণ্ণন্তরপরিখং, দল়্হমট্টালকোট্ঠকং;

রক্খিতং খগ্গহত্থেহি, দুপ্পৰেসমিদং পুরং.

৩৯. দহরস্স যুৰিনো চাপি, আগমো চ ন ৰিজ্জতি;

অথ কেন নু ৰণ্ণেন, সঙ্গমং ইচ্ছসে মযা.

৪০. যক্খোহমস্মি কল্যাণি, আগতোস্মি তৰন্তিকে [তৰন্তিকং (সী. পী.)];

ত্ৰং মং নন্দয [নন্দস্সু (স্যা. ক.)] ভদ্দন্তে, পুণ্ণকংসং দদামি তে.

৪১. দেৰং ৰ যক্খং অথ ৰা মনুস্সং, ন পত্থযে উদযমতিচ্চ অঞ্ঞং;

গচ্ছেৰ ত্ৰং যক্খ মহানুভাৰ, মা চস্সু গন্ত্ৰা পুনরাৰজিত্থ.

৪২. যা সা রতি উত্তমা কামভোগিনং, যং হেতু সত্তা ৰিসমং চরন্তি;

মা তং রতিং জীযি তুৰং সুচিম্হি তে, দদামি তে রূপিযং কংসপূরং.

৪৩. নারিং নরো নিজ্ঝপযং ধনেন, উক্কংসতী যত্থ করোতি ছন্দং;

ৰিপচ্চনীকো তৰ দেৰধম্মো, পচ্চক্খতো থোকতরেন এসি.

৪৪. আযু চ ৰণ্ণো চ [আযুং চ ৰণ্ণং চ (ক. সী. পী.)] মনুস্সলোকে, নিহীযতি মনুজানং সুগ্গত্তে;

তেনেৰ ৰণ্ণেন ধনম্পি তুয্হং, নিহীযতি জিণ্ণতরাসি অজ্জ.

৪৫. এৰং মে পেক্খমানস্স, রাজপুত্তি যসস্সিনি;

হাযতেৰ তৰ [হাযতে ৰত তে (সী. স্যা. ক.), হাযতেৰ ততো (পী.)] ৰণ্ণো, অহোরত্তানমচ্চযে.

৪৬. ইমিনাৰ ত্ৰং ৰযসা, রাজপুত্তি সুমেধসে;

ব্রহ্মচরিযং চরেয্যাসি, ভিয্যো ৰণ্ণৰতী সিযা.

৪৭. দেৰা ন জীরন্তি যথা মনুস্সা, গত্তেসু তেসং ৰলিযো ন হোন্তি;

পুচ্ছামি তং যক্খ মহানুভাৰ, কথং নু দেৰান [কথং ন দেৰানং (পী.)] সরীরদেহো.

৪৮. দেৰা ন জীরন্তি যথা মনুস্সা, গত্তেসু তেসং ৰলিযো ন হোন্তি;

সুৰে সুৰে ভিয্যতরোৰ [ভিয্যতরো চ (ক.)] তেসং, দিব্বো চ ৰণ্ণো ৰিপুলা চ ভোগা.

৪৯. কিংসূধ ভীতা জনতা অনেকা, মগ্গো চ নেকাযতনং পৰুত্তো;

পুচ্ছামি তং যক্খ মহানুভাৰ, কত্থট্ঠিতো পরলোকং ন ভাযে.

৫০. ৰাচং মনঞ্চ পণিধায সম্মা, কাযেন পাপানি অকুব্বমানো;

বহুন্নপানং ঘরমাৰসন্তো, সদ্ধো মুদূ সংৰিভাগী ৰদঞ্ঞূ;

সঙ্গাহকো সখিলো সণ্হৰাচো, এত্থট্ঠিতো পরলোকং ন ভাযে.

৫১. অনুসাসসি মং যক্খ, যথা মাতা যথা পিতা;

উল়ারৰণ্ণং পুচ্ছামি, কো নু ত্ৰমসি সুব্রহা.

৫২. উদযোহমস্মি কল্যাণি, সঙ্করত্তা ইধাগতো [সঙ্গরত্থা ইধাগতো (সী. পী.), সঙ্গরত্থাযিধাগতো (স্যা.)];

আমন্ত খো তং গচ্ছামি, মুত্তোস্মি তৰ সঙ্করা [সঙ্গরা (সী. স্যা. পী.)].

৫৩. সচে খো ত্ৰং উদযোসি, সঙ্করত্তা ইধাগতো;

অনুসাস মং রাজপুত্ত, যথাস্স পুন সঙ্গমো.

৫৪. অতিপততি [অধিপততী (সী. পী.)] ৰযো খণো তথেৰ, ঠানং নত্থি ধুৰং চৰন্তি সত্তা;

পরিজিয্যতি অদ্ধুৰং সরীরং, উদযে মা পমাদ [মা পমাদং (সী.)] চরস্সু ধম্মং.

৫৫. কসিণা পথৰী ধনস্স পূরা, একস্সেৰ সিযা অনঞ্ঞধেয্যা;

তঞ্চাপি জহতি [জহাতি (সী. স্যা. পী.), জহাতী (?)] অৰীতরাগো, উদযে মা পমাদ চরস্সু ধম্মং.

৫৬. মাতা চ পিতা চ ভাতরো চ, ভরিযা যাপি ধনেন হোতি কীতা [ভরিযাপি ধনেন হোন্তি অতিত্তা (ক.)];

তে চাপি জহন্তি অঞ্ঞমঞ্ঞং, উদযে মা পমাদ চরস্সু ধম্মং.

৫৭. কাযো পরভোজনন্তি ঞত্ৰা [কাযো চ পরভোজনং ৰিদিত্ৰা (ক.)], সংসারে সুগতিঞ্চ দুগ্গতিঞ্চ [সুগতী চ দুগ্গতী চ (সী. স্যা. পী.), সুগ্গতিং দুগ্গতিঞ্চ (ক.)];

ইত্তরৰাসোতি জানিযান, উদযে মা পমাদ চরস্সু ধম্মং.

৫৮. সাধু ভাসতিযং [ভাসতযং (সী. পী.)] যক্খো, অপ্পং মচ্চান জীৰিতং;

কসিরঞ্চ পরিত্তঞ্চ, তঞ্চ দুক্খেন সংযুতং;

সাহং একা পব্বজিস্সামি, হিত্ৰা কাসিং সুরুন্ধনন্তি.

উদযজাতকং চতুত্থং.