৪৫৬. জুণ্হজাতকং (২)

১৩. সুণোহি ময্হং ৰচনং জনিন্দ, অত্থেন জুণ্হম্হি ইধানুপত্তো;

ন ব্রাহ্মণে অদ্ধিকে তিট্ঠমানে, গন্তব্ব [গন্তব্য (ক.)] মাহু দ্ৰিপদিন্দ [দিপদান (সী. পী.), দ্ৰিপদান (স্যা.)] সেট্ঠ.

১৪. সুণোমি তিট্ঠামি ৰদেহি ব্রহ্মে, যেনাসি [যেনাপি (স্যা. ক.)] অত্থেন ইধানুপত্তো;

কং ৰা ত্ৰমত্থং মযি পত্থযানো, ইধাগমা ব্রহ্মে তদিঙ্ঘ ব্রূহি.

১৫. দদাহি মে গামৰরানি পঞ্চ, দাসীসতং সত্ত গৰংসতানি;

পরোসহস্সঞ্চ সুৰণ্ণনিক্খে, ভরিযা চ মে সাদিসী দ্ৰে দদাহি.

১৬. তপো নু তে ব্রাহ্মণ ভিংসরূপো, মন্তা নু তে ব্রাহ্মণ চিত্তরূপা;

যক্খা নু [যক্খা ৰ (সী. পী.)] তে অস্সৰা সন্তি কেচি, অত্থং ৰা মে অভিজানাসি কত্তং.

১৭. ন মে তপো অত্থি ন চাপি মন্তা, যক্খাপি মে অস্সৰা নত্থি কেচি;

অত্থম্পি তে নাভিজানামি কত্তং, পুব্বে চ খো [পুব্বেৰ খো (স্যা. ক.)] সঙ্গতিমত্তমাসি.

১৮. পঠমং ইদং দস্সনং জানতো মে, ন তাভিজানামি ইতো পুরত্থা;

অক্খাহি মে পুচ্ছিতো এতমত্থং, কদা কুহিং ৰা অহু সঙ্গমো নো.

১৯. গন্ধাররাজস্স পুরম্হি রম্মে, অৰসিম্হসে তক্কসীলাযং দেৰ;

তত্থন্ধকারম্হি তিমীসিকাযং [তিমিস্সিকাযং (সী. অট্ঠ.), তিমিস্সকাযং (স্যা.)], অংসেন অংসং সমঘট্টযিম্হ.

২০. তে তত্থ ঠত্ৰান উভো জনিন্দ, সারাণিযং [সারণীযং (ক.)] ৰীতিসারযিম্হ [ৰীতিসারিম্হ (সী. স্যা. পী.)] তত্থ;

সাযেৰ নো সঙ্গতিমত্তমাসি, ততো ন পচ্ছা ন পুরে অহোসি.

২১. যদা কদাচি মনুজেসু ব্রহ্মে, সমাগমো সপ্পুরিসেন হোতি;

ন পণ্ডিতা সঙ্গতিসন্থৰানি, পুব্বে কতং ৰাপি ৰিনাসযন্তি.

২২. বালাৰ [বালা চ (সী. স্যা. পী.)] খো সঙ্গতিসন্থৰানি, পুব্বে কতং ৰাপি ৰিনাসযন্তি;

বহুম্পি বালেসু কতং ৰিনস্সতি, তথা হি বালা অকতঞ্ঞুরূপা.

২৩. ধীরা চ খো সঙ্গতিসন্থৰানি, পুব্বে কতং ৰাপি ন নাসযন্তি;

অপ্পম্পি ধীরেসু কতং ন নস্সতি, তথা হি ধীরা সুকতঞ্ঞুরূপা.

২৪. দদামি তে গামৰরানি পঞ্চ, দাসীসতং সত্ত গৰংসতানি;

পরোসহস্সঞ্চ সুৰণ্ণনিক্খে, ভরিযা চ তে সাদিসী দ্ৰে দদামি.

২৫. এৰং সতং হোতি সমেচ্চ রাজ, নক্খত্তরাজারিৰ তারকানং;

আপূরতী কাসিপতী তথাহং, তযাপি মে সঙ্গমো অজ্জ লদ্ধোতি.

জুণ্হজাতকং দুতিযং.