৮. ৰরুণৰগ্গো

৭১. যো পুব্বে করণীযানি, পচ্ছা সো কাতুমিচ্ছতি;

ৰরুণকট্ঠ [ৰরণকট্ঠ (সী. পী.)] ভঞ্জোৰ, স পচ্ছা মনুতপ্পতীতি.

ৰরুণজাতকং পঠমং.

৭২. অকতঞ্ঞুস্স পোসস্স, নিচ্চং ৰিৰরদস্সিনো;

সব্বং চে পথৰিং [পঠৰিং (সী. স্যা. পী.)] দজ্জা, নেৰ নং অভিরাধযেতি.

সীলৰহত্থিজাতকং দুতিযং.

৭৩. সচ্চং কিরেৰমাহংসু, নরা একচ্চিযা ইধ;

কট্ঠং নিপ্লৰিতং [ৰিপ্লাৰিতং (সী. পী.)] সেয্যো, ন ত্ৰেৰেকচ্চিযো নরোতি.

সচ্চংকিরজাতকং ততিযং.

৭৪. সাধূ সম্বহুলা ঞাতী, অপি রুক্খা অরঞ্ঞজা;

ৰাতো ৰহতি একট্ঠং, ব্রহন্তম্পি ৰনপ্পতিন্তি.

রুক্খধম্মজাতকং চতুত্থং.

৭৫. অভিত্থনয পজ্জুন্ন, নিধিং কাকস্স নাসয;

কাকং সোকায রন্ধেহি, মঞ্চ সোকা পমোচযাতি.

মচ্ছজাতকং পঞ্চমং.

৭৬. অসঙ্কিযোম্হি গামম্হি, অরঞ্ঞে নত্থি মে ভযং;

উজুং মগ্গং সমারূল়্হো, মেত্তায করুণায চাতি.

অসঙ্কিযজাতকং ছট্ঠং.

৭৭. উসভা রুক্খা গাৰিযো গৰা চ, অস্সো কংসো সিঙ্গালী [সিগাসী (সী. স্যা. পী.)] চ কুম্ভো;

পোক্খরণী চ অপাকচন্দনং, লাবূনি সীদন্তি সিলা প্লৰন্তি.

মণ্ডূকিযো কণ্হসপ্পে গিলন্তি, কাকং সুপণ্ণা পরিৰারযন্তি;

তসা ৰকা এল়কানং ভযাহি, ৰিপরিযাসো [ৰিপরিযাযো (স্যা. ক.)] ৰত্ততি নযিধ মত্থীতি.

মহাসুপিনজাতকং সত্তমং.

৭৮. উভো খঞ্জা উভো কুণী, উভো ৰিসমচক্খুকা [চক্খুলা (সী. পী.)];

উভিন্নং পিল়কা [পীল়কা (স্যা.)] জাতা, নাহং পস্সামি ইল্লিসন্তি.

ইল্লিসজাতকং অট্ঠমং.

৭৯. যতো ৰিলুত্তা চ হতা চ গাৰো, দড্ঢানি গেহানি জনো চ নীতো;

অথাগমা পুত্তহতায পুত্তো, খরস্সরং ডিণ্ডিমং [দেণ্ডিমং (সী. স্যা. পী.), ডিন্দিমং (ক.)] ৰাদযন্তোতি.

খরস্সরজাতকং নৰমং.

৮০. যং তে পৰিকত্থিতং পুরে, অথ তে পূতিসরা সজন্তি পচ্ছা;

উভযং ন সমেতি ভীমসেন, যুদ্ধকথা চ ইদঞ্চ তে ৰিহঞ্ঞন্তি.

ভীমসেনজাতকং দসমং.

ৰরুণৰগ্গো [ৰরণৰগ্গো (সী. পী.)] অট্ঠমো.

তস্সুদ্দানং –

ৰরুণা অকতঞ্ঞূৰরে তু সচ্চৰরং, সৰনপ্পতিনা চ অভিত্থনয;

করুণায সিলাপ্লৰ ইল্লিসতো, পুন ডিণ্ডিমপূতিসরেন দসাতি.