২. সীলৰগ্গো

১১. হোতি সীলৰতং অত্থো, পটিসন্থার [পটিসন্ধার (ক.)] ৰুত্তিনং;

লক্খণং পস্স আযন্তং, ঞাতিসঙ্ঘপুরক্খতং [পুরক্খিতং (স্যা.), পুরেক্খিতং (ক.)];

অথ পস্সসিমং কাল়ং, সুৰিহীনংৰ ঞাতিভীতি.

লক্খণমিগজাতকং পঠমং.

১২. নিগ্রোধমেৰ সেৰেয্য, ন সাখমুপসংৰসে;

নিগ্রোধস্মিং মতং সেয্যো, যঞ্চে সাখস্মি [সাখস্মিং (সী. পী.)] জীৰিতন্তি.

নিগ্রোধমিগজাতকং দুতিযং.

১৩. ধিরত্থু কণ্ডিনং সল্লং, পুরিসং গাল়্হৰেধিনং;

ধিরত্থু তং জনপদং, যত্থিত্থী পরিণাযিকা;

তে চাপি ধিক্কিতা [ধিক্কতা (?)] সত্তা, যে ইত্থীনং ৰসংগতাতি.

কণ্ডিজাতকং ততিযং.

১৪. ন কিরত্থি রসেহি পাপিযো, আৰাসেহি ৰ [ৰা (সব্বত্থ)] সন্থৰেহি ৰা;

ৰাতমিগং গহননিস্সিতং [গেহনিস্সিতং (সী. পী.)], ৰসমানেসি রসেহি সঞ্জযোতি.

ৰাতমিগজাতকং চতুত্থং.

১৫. অট্ঠক্খুরং খরাদিযে, মিগং ৰঙ্কাতিৰঙ্কিনং;

সত্তহি কালাতিক্কন্তং [সত্তহি কলাহ’তিক্কন্তং (সী.), সত্তকালেহ’তিক্কন্তং (স্যা.), সত্তহি কালাহ’তিক্কন্তং (পী.)], ন নং ওৰদিতুস্সহেতি.

খরাদিযজাতকং পঞ্চমং.

১৬. মিগং তিপল্লত্থ [তিপল্লত্ত (ক.)] মনেকমাযং, অট্ঠক্খুরং অড্ঢরত্তাপপাযিং [অড্ঢরত্তাৰপাযিং (সী. পী.)];

একেন সোতেন ছমাস্সসন্তো, ছহি কলাহিতিভোতি [কলাহতিভোতি (সী. স্যা. পী.)] ভাগিনেয্যোতি.

তিপল্লত্থমিগজাতকং ছট্ঠং.

১৭. কাল়ে ৰা যদি ৰা জুণ্হে, যদা ৰাযতি মালুতো;

ৰাতজানি হি সীতানি, উভোত্থমপরাজিতাতি.

মালুতজাতকং সত্তমং.

১৮. এৰং চে সত্তা জানেয্যুং, দুক্খাযং জাতিসম্ভৰো;

ন পাণো পাণিনং হঞ্ঞে, পাণঘাতী হি সোচতীতি.

মতকভত্তজাতকং অট্ঠমং.

১৯. সচে মুচ্চে [মুঞ্চে (সী. স্যা. পী.)] পেচ্চ মুচ্চে [মুঞ্চে (সী. স্যা. পী.)], মুচ্চমানো হি বজ্ঝতি;

ন হেৰং ধীরা মুচ্চন্তি, মুত্তি বালস্স বন্ধনন্তি.

আযাচিতভত্তজাতকং নৰমং.

২০. দিস্ৰা পদমনুত্তিণ্ণং, দিস্ৰানোতরিতং পদং;

নল়েন ৰারিং পিস্সাম [পিৰিস্সাম (সী. স্যা. পী.)], নেৰ [ন চ (ক.)] মং ত্ৰং ৰধিস্সসীতি.

নল়পানজাতকং দসমং.

সীলৰগ্গো দুতিযো.

তস্সুদ্দানং –

অথ লক্খণ সাখ ধিরত্থু পুন, ন কিরত্থি রসেহি খরাদিযা;

অতিভোতি ৰর [রস (সব্বত্থ)] মালুত পাণ, মুচ্চেন নল়অৰ্হযনেন ভৰন্তি দসাতি.