৭. নিব্বানধাতুসুত্তং

৪৪. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘দ্ৰেমা, ভিক্খৰে, নিব্বানধাতুযো. কতমে দ্ৰে? সউপাদিসেসা চ নিব্বানধাতু, অনুপাদিসেসা চ নিব্বানধাতু.

‘‘কতমা চ, ভিক্খৰে, সউপাদিসেসা নিব্বানধাতু? ইধ, ভিক্খৰে, ভিক্খু অরহং হোতি খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো. তস্স তিট্ঠন্তেৰ পঞ্চিন্দ্রিযানি যেসং অৰিঘাতত্তা [অৰিগতত্তা (সী. অট্ঠ.)] মনাপামনাপং পচ্চনুভোতি, সুখদুক্খং পটিসংৰেদেতি. তস্স যো রাগক্খযো, দোসক্খযো, মোহক্খযো – অযং ৰুচ্চতি, ভিক্খৰে, সউপাদিসেসা নিব্বানধাতু.

‘‘কতমা চ, ভিক্খৰে, অনুপাদিসেসা নিব্বানধাতু? ইধ, ভিক্খৰে, ভিক্খু অরহং হোতি খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো. তস্স ইধেৰ, ভিক্খৰে, সব্বৰেদযিতানি অনভিনন্দিতানি সীতি ভৰিস্সন্তি [সীতীভৰিস্সন্তি (?)]. অযং ৰুচ্চতি, ভিক্খৰে, অনুপাদিসেসা নিব্বানধাতু. ইমা খো, ভিক্খৰে, দ্ৰে নিব্বানধাতুযো’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘দুৰে ইমা চক্খুমতা পকাসিতা, নিব্বানধাতূ অনিস্সিতেন তাদিনা;

একা হি ধাতু ইধ দিট্ঠধম্মিকা, সউপাদিসেসা ভৰনেত্তিসঙ্খযা;

অনুপাদিসেসা পন সম্পরাযিকা, যম্হি নিরুজ্ঝন্তি ভৰানি সব্বসো.

‘‘যে এতদঞ্ঞায পদং অসঙ্খতং, ৰিমুত্তচিত্তা ভৰনেত্তিসঙ্খযা;

তে ধম্মসারাধিগমা খযে রতা, পহংসু তে সব্বভৰানি তাদিনো’’তি.

অযম্পি অত্থো ৰুত্তো ভগৰতা, ইতি মে সুতন্তি. সত্তমং.