৬. পণ্ডিতৰগ্গো

৭৬. নিধীনংৰ পৰত্তারং, যং পস্সে ৰজ্জদস্সিনং;

নিগ্গয্হৰাদিং মেধাৰিং, তাদিসং পণ্ডিতং ভজে;

তাদিসং ভজমানস্স, সেয্যো হোতি ন পাপিযো.

৭৭. ওৰদেয্যানুসাসেয্য, অসব্ভা চ নিৰারযে;

সতঞ্হি সো পিযো হোতি, অসতং হোতি অপ্পিযো.

৭৮. ন ভজে পাপকে মিত্তে, ন ভজে পুরিসাধমে;

ভজেথ মিত্তে কল্যাণে, ভজেথ পুরিসুত্তমে.

৭৯. ধম্মপীতি সুখং সেতি, ৰিপ্পসন্নেন চেতসা;

অরিযপ্পৰেদিতে ধম্মে, সদা রমতি পণ্ডিতো.

৮০. উদকঞ্হি নযন্তি নেত্তিকা, উসুকারা নমযন্তি [দমযন্তি (ক.)] তেজনং;

দারুং নমযন্তি তচ্ছকা, অত্তানং দমযন্তি পণ্ডিতা.

৮১. সেলো যথা একঘনো [একগ্ঘনো (ক.)], ৰাতেন ন সমীরতি;

এৰং নিন্দাপসংসাসু, ন সমিঞ্জন্তি পণ্ডিতা.

৮২. যথাপি রহদো গম্ভীরো, ৰিপ্পসন্নো অনাৰিলো;

এৰং ধম্মানি সুত্ৰান, ৰিপ্পসীদন্তি পণ্ডিতা.

৮৩. সব্বত্থ ৰে সপ্পুরিসা চজন্তি, ন কামকামা লপযন্তি সন্তো;

সুখেন ফুট্ঠা অথ ৰা দুখেন, ন উচ্চাৰচং [নোচ্চাৰচং (সী. অট্ঠ.)] পণ্ডিতা দস্সযন্তি.

৮৪. ন অত্তহেতু ন পরস্স হেতু, ন পুত্তমিচ্ছে ন ধনং ন রট্ঠং;

ন ইচ্ছেয্য [নযিচ্ছে (পী.), নিচ্ছে (?)] অধম্মেন সমিদ্ধিমত্তনো, স সীলৰা পঞ্ঞৰা ধম্মিকো সিযা.

৮৫. অপ্পকা তে মনুস্সেসু, যে জনা পারগামিনো;

অথাযং ইতরা পজা, তীরমেৰানুধাৰতি.

৮৬. যে চ খো সম্মদক্খাতে, ধম্মে ধম্মানুৰত্তিনো;

তে জনা পারমেস্সন্তি, মচ্চুধেয্যং সুদুত্তরং.

৮৭. কণ্হং ধম্মং ৰিপ্পহায, সুক্কং ভাৰেথ পণ্ডিতো;

ওকা অনোকমাগম্ম, ৰিৰেকে যত্থ দূরমং.

৮৮. তত্রাভিরতিমিচ্ছেয্য, হিত্ৰা কামে অকিঞ্চনো;

পরিযোদপেয্য [পরিযোদাপেয্য (?)] অত্তানং, চিত্তক্লেসেহি পণ্ডিতো.

৮৯. যেসং সম্বোধিযঙ্গেসু, সম্মা চিত্তং সুভাৰিতং;

আদানপটিনিস্সগ্গে, অনুপাদায যে রতা;

খীণাসৰা জুতিমন্তো, তে লোকে পরিনিব্বুতা.

পণ্ডিতৰগ্গো ছট্ঠো নিট্ঠিতো.