১৫. সুখৰগ্গো

১৯৭. সুসুখং ৰত জীৰাম, ৰেরিনেসু অৰেরিনো;

ৰেরিনেসু মনুস্সেসু, ৰিহরাম অৰেরিনো.

১৯৮. সুসুখং ৰত জীৰাম, আতুরেসু অনাতুরা;

আতুরেসু মনুস্সেসু, ৰিহরাম অনাতুরা.

১৯৯. সুসুখং ৰত জীৰাম, উস্সুকেসু অনুস্সুকা;

উস্সুকেসু মনস্সেসু, ৰিহরাম অনুস্সুকা.

২০০. সুসুখং ৰত জীৰাম, যেসং নো নত্থি কিঞ্চনং;

পীতিভক্খা ভৰিস্সাম, দেৰা আভস্সরা যথা.

২০১. জযং ৰেরং পসৰতি, দুক্খং সেতি পরাজিতো;

উপসন্তো সুখং সেতি, হিত্ৰা জযপরাজযং.

২০২. নত্থি রাগসমো অগ্গি, নত্থি দোসসমো কলি;

নত্থি খন্ধসমা [খন্ধাদিসা (সী. স্যা. পী. রূপসিদ্ধিযা সমেতি)] দুক্খা, নত্থি সন্তিপরং সুখং.

২০৩. জিঘচ্ছাপরমা রোগা, সঙ্খারপরমা [সঙ্কারা পরমা (বহূসু)] দুখা;

এতং ঞত্ৰা যথাভূতং, নিব্বানং পরমং সুখং.

২০৪. আরোগ্যপরমা লাভা, সন্তুট্ঠিপরমং ধনং;

ৰিস্সাসপরমা ঞাতি [ৰিস্সাসপরমো ঞাতি (ক. সী.), ৰিস্সাসপরমা ঞাতী (সী. অট্ঠ.), ৰিস্সাসা পরমা ঞাতি (ক.)], নিব্বানং পরমং [নিব্বাণপরমং (ক. সী.)] সুখং.

২০৫. পৰিৰেকরসং পিত্ৰা [পীত্ৰা (সী. স্যা. কং. পী.)], রসং উপসমস্স চ;

নিদ্দরো হোতি নিপ্পাপো, ধম্মপীতিরসং পিৰং.

২০৬. সাহু দস্সনমরিযানং, সন্নিৰাসো সদা সুখো;

অদস্সনেন বালানং, নিচ্চমেৰ সুখী সিযা.

২০৭. বালসঙ্গতচারী [বালসঙ্গতিচারী (ক.)] হি, দীঘমদ্ধান সোচতি;

দুক্খো বালেহি সংৰাসো, অমিত্তেনেৰ সব্বদা;

ধীরো চ সুখসংৰাসো, ঞাতীনংৰ সমাগমো.

২০৮. তস্মা হি –

ধীরঞ্চ পঞ্ঞঞ্চ বহুস্সুতঞ্চ, ধোরয্হসীলং ৰতৰন্তমরিযং;

তং তাদিসং সপ্পুরিসং সুমেধং, ভজেথ নক্খত্তপথংৰ চন্দিমা [তস্মা হি ধীরং পঞ্ঞঞ্চ, বহুস্সুতঞ্চ ধোরয্হং; সীলং ধুতৰতমরিযং, তং তাদিসং সপ্পুরিসং; সুমেধং ভজেথ নক্খত্তপথংৰ চন্দিমা; (ক.)].

সুখৰগ্গো পন্নরসমো নিট্ঠিতো.