১৩. লোকৰগ্গো

১৬৭. হীনং ধম্মং ন সেৰেয্য, পমাদেন ন সংৰসে;

মিচ্ছাদিট্ঠিং ন সেৰেয্য, ন সিযা লোকৰড্ঢনো.

১৬৮. উত্তিট্ঠে নপ্পমজ্জেয্য, ধম্মং সুচরিতং চরে;

ধম্মচারী সুখং সেতি, অস্মিং লোকে পরম্হি চ.

১৬৯. ধম্মং চরে সুচরিতং, ন নং দুচ্চরিতং চরে;

ধম্মচারী সুখং সেতি, অস্মিং লোকে পরম্হি চ.

১৭০. যথা পুব্বুল়কং [পুব্বুল়কং (সী. পী.)] পস্সে, যথা পস্সে মরীচিকং;

এৰং লোকং অৰেক্খন্তং, মচ্চুরাজা ন পস্সতি.

১৭১. এথ পস্সথিমং লোকং, চিত্তং রাজরথূপমং;

যত্থ বালা ৰিসীদন্তি, নত্থি সঙ্গো ৰিজানতং.

১৭২. যো চ পুব্বে পমজ্জিত্ৰা, পচ্ছা সো নপ্পমজ্জতি;

সোমং লোকং পভাসেতি, অব্ভা মুত্তোৰ চন্দিমা.

১৭৩. যস্স পাপং কতং কম্মং, কুসলেন পিধীযতি [পিতীযতি (সী. স্যা. পী.)];

সোমং লোকং পভাসেতি, অব্ভা মুত্তোৰ চন্দিমা.

১৭৪. অন্ধভূতো [অন্ধীভূতো (ক.)] অযং লোকো, তনুকেত্থ ৰিপস্সতি;

সকুণো জালমুত্তোৰ, অপ্পো সগ্গায গচ্ছতি.

১৭৫. হংসাদিচ্চপথে যন্তি, আকাসে যন্তি ইদ্ধিযা;

নীযন্তি ধীরা লোকম্হা, জেত্ৰা মারং সৰাহিনিং [সৰাহনং (স্যা. ক.)].

১৭৬. একং ধম্মং অতীতস্স, মুসাৰাদিস্স জন্তুনো;

ৰিতিণ্ণপরলোকস্স, নত্থি পাপং অকারিযং.

১৭৭. ন ৰে কদরিযা দেৰলোকং ৰজন্তি, বালা হৰে নপ্পসংসন্তি দানং;

ধীরো চ দানং অনুমোদমানো, তেনেৰ সো হোতি সুখী পরত্থ.

১৭৮. পথব্যা একরজ্জেন, সগ্গস্স গমনেন ৰা;

সব্বলোকাধিপচ্চেন, সোতাপত্তিফলং ৰরং.

লোকৰগ্গো তেরসমো নিট্ঠিতো.