৮. ধম্মদেৰপুত্তচরিযা

৬৬. ‘‘পুনাপরং যদা হোমি, মহাপক্খো মহিদ্ধিকো;

ধম্মো নাম মহাযক্খো, সব্বলোকানুকম্পকো.

৬৭. ‘‘দসকুসলকম্মপথে, সমাদপেন্তো মহাজনং;

চরামি গামনিগমং, সমিত্তো সপরিজ্জনো.

৬৮. ‘‘পাপো কদরিযো যক্খো, দীপেন্তো দস পাপকে;

সোপেত্থ মহিযা চরতি, সমিত্তো সপরিজ্জনো.

৬৯. ‘‘ধম্মৰাদী অধম্মো চ, উভো পচ্চনিকা মযং;

ধুরে ধুরং ঘট্টযন্তা, সমিম্হা পটিপথে উভো.

৭০. ‘‘কলহো ৰত্ততী ভেস্মা, কল্যাণপাপকস্স চ;

মগ্গা ওক্কমনত্থায, মহাযুদ্ধো উপট্ঠিতো.

৭১. ‘‘যদিহং তস্স কুপ্পেয্যং, যদি ভিন্দে তপোগুণং;

সহপরিজনং তস্স, রজভূতং করেয্যহং.

৭২. ‘‘অপিচাহং সীলরক্খায, নিব্বাপেত্ৰান মানসং;

সহ জনেনোক্কমিত্ৰা, পথং পাপস্স দাসহং.

৭৩. ‘‘সহ পথতো ওক্কন্তে, কত্ৰা চিত্তস্স নিব্বুতিং;

ৰিৰরং অদাসি পথৰী, পাপযক্খস্স তাৰদে’’তি.

ধম্মদেৰপুত্তচরিযং অট্ঠমং.