৪. চূল়বোধিচরিযা

২৬. ‘‘পুনাপরং যদা হোমি, চূল়বোধি সুসীলৰা;

ভৰং দিস্ৰান ভযতো, নেক্খম্মং অভিনিক্খমিং.

২৭. ‘‘যা মে দুতিযিকা আসি, ব্রাহ্মণী কনকসন্নিভা;

সাপি ৰট্টে অনপেক্খা, নেক্খম্মং অভিনিক্খমি.

২৮. ‘‘নিরালযা ছিন্নবন্ধূ, অনপেক্খা কুলে গণে;

চরন্তা গামনিগমং, বারাণসিমুপাগমুং.

২৯. ‘‘তত্থ ৰসাম নিপকা, অসংসট্ঠা কুলে গণে;

নিরাকুলে অপ্পসদ্দে, রাজুয্যানে ৰসামুভো.

৩০. ‘‘উয্যানদস্সনং গন্ত্ৰা, রাজা অদ্দস ব্রাহ্মণিং;

উপগম্ম মমং পুচ্ছি, ‘তুয্হেসা কা কস্স ভরিযা’.

৩১. ‘‘এৰং ৰুত্তে অহং তস্স, ইদং ৰচনমব্রৰিং;

‘ন ময্হং ভরিযা এসা, সহধম্মা একসাসনী’.

৩২. ‘‘তিস্সা [তস্সা (সী.)] সারত্তগধিতো, গাহাপেত্ৰান চেটকে;

নিপ্পীল়যন্তো বলসা, অন্তেপুরং পৰেসযি.

৩৩. ‘‘ওদপত্তকিযা ময্হং, সহজা একসাসনী;

আকড্ঢিত্ৰা নযন্তিযা, কোপো মে উপপজ্জথ.

৩৪. ‘‘সহ কোপে সমুপ্পন্নে, সীলব্বতমনুস্সরিং;

তত্থেৰ কোপং নিগ্গণ্হিং, নাদাসিং ৰড্ঢিতূপরি.

৩৫. ‘‘যদি নং ব্রাহ্মণিং কোচি, কোট্টেয্য তিণ্হসত্তিযা;

নেৰ সীলং পভিন্দেয্যং, বোধিযাযেৰ কারণা.

৩৬. ‘‘ন মেসা ব্রাহ্মণী দেস্সা, নপি মে বলং ন ৰিজ্জতি;

সব্বঞ্ঞুতং পিযং ময্হং, তস্মা সীলানুরক্খিস’’ন্তি.

চূল়বোধিচরিযং চতুত্থং.