২. ভূরিদত্তচরিযা

১১. ‘‘পুনাপরং যদা হোমি, ভূরিদত্তো মহিদ্ধিকো;

ৰিরূপক্খেন মহারঞ্ঞা, দেৰলোকমগঞ্ছহং.

১২. ‘‘তত্থ পস্সিত্ৰাহং দেৰে, একন্তং সুখসমপ্পিতে;

তং সগ্গগমনত্থায, সীলব্বতং সমাদিযিং.

১৩. ‘‘সরীরকিচ্চং কত্ৰান, ভুত্ৰা যাপনমত্তকং;

চতুরো অঙ্গে অধিট্ঠায, সেমি ৰম্মিকমুদ্ধনি.

১৪. ‘‘ছৰিযা চম্মেন মংসেন, নহারুঅট্ঠিকেহি ৰা;

যস্স এতেন করণীযং, দিন্নংযেৰ হরাতু সো.

১৫. ‘‘সংসিতো অকতঞ্ঞুনা, আলম্পাযনো [আলম্বণো (সী.)] মমগ্গহি;

পেল়ায পক্খিপিত্ৰান, কীল়েতি মং তহিং তহিং.

১৬. ‘‘পেল়ায পক্খিপন্তেপি, সম্মদ্দন্তেপি পাণিনা;

আলম্পাযনে [আলম্বণে (সী.)] ন কুপ্পামি, সীলখণ্ডভযা মম.

১৭. ‘‘সকজীৰিতপরিচ্চাগো, তিণতো লহুকো মম;

সীলৰীতিক্কমো ময্হং, পথৰীউপ্পতনং ৰিয.

১৮. ‘‘নিরন্তরং জাতিসতং, চজেয্যং মম জীৰিতং;

নেৰ সীলং পভিন্দেয্যং, চতুদ্দীপান হেতুপি.

১৯. ‘‘অপি চাহং সীলরক্খায, সীলপারমিপূরিযা;

ন করোমি চিত্তে অঞ্ঞথত্তং, পক্খিপন্তম্পি পেল়কে’’তি.

ভূরিদত্তচরিযং দুতিযং.