২. সঙ্খচরিযা

১১. ‘‘পুনাপরং যদা হোমি, ব্রাহ্মণো সঙ্খসৰ্হযো;

মহাসমুদ্দং তরিতুকামো, উপগচ্ছামি পট্টনং.

১২. ‘‘তত্থদ্দসং পটিপথে, সযম্ভুং অপরাজিতং;

কন্তারদ্ধানং পটিপন্নং [কন্তারদ্ধানপটিপন্নং (সী. স্যা.)], তত্তায কঠিনভূমিযা.

১৩. ‘‘তমহং পটিপথে দিস্ৰা, ইমমত্থং ৰিচিন্তযিং;

‘ইদং খেত্তং অনুপ্পত্তং, পুঞ্ঞকামস্স জন্তুনো.

১৪. ‘‘‘যথা কস্সকো পুরিসো, খেত্তং দিস্ৰা মহাগমং;

তত্থ বীজং ন রোপেতি, ন সো ধঞ্ঞেন অত্থিকো.

১৫. ‘‘‘এৰমেৰাহং পুঞ্ঞকামো, দিস্ৰা খেত্তৰরুত্তমং;

যদি তত্থ কারং ন করোমি, নাহং পুঞ্ঞেন অত্থিকো.

১৬. ‘‘‘যথা অমচ্চো মুদ্দিকামো, রঞ্ঞো অন্তেপুরে জনে;

ন দেতি তেসং ধনধঞ্ঞং, মুদ্দিতো পরিহাযতি.

১৭. ‘‘‘এৰমেৰাহং পুঞ্ঞকামো, ৰিপুলং দিস্ৰান দক্খিণং;

যদি তস্স দানং ন দদামি, পরিহাযিস্সামি পুঞ্ঞতো’.

১৮. ‘‘এৰাহং চিন্তযিত্ৰান, ওরোহিত্ৰা উপাহনা;

তস্স পাদানি ৰন্দিত্ৰা, অদাসিং ছত্তুপাহনং.

১৯. ‘‘তেনেৰাহং সতগুণতো, সুখুমালো সুখেধিতো;

অপি চ দানং পরিপূরেন্তো, এৰং তস্স অদাসহ’’ন্তি.

সঙ্খচরিযং দুতিযং.