৩. দীপঙ্করবুদ্ধৰংসো

১. তদা তে ভোজযিত্ৰান, সসঙ্ঘং লোকনাযকং;

উপগচ্ছুং সরণং তস্স, দীপঙ্করস্স সত্থুনো.

২. সরণাগমনে কঞ্চি, নিৰেসেসি তথাগতো;

কঞ্চি পঞ্চসু সীলেসু, সীলে দসৰিধে পরং.

৩. কস্সচি দেতি সামঞ্ঞং, চতুরো ফলমুত্তমে;

কস্সচি অসমে ধম্মে, দেতি সো পটিসম্ভিদা.

৪. কস্সচি ৰরসমাপত্তিযো, অট্ঠ দেতি নরাসভো;

তিস্সো কস্সচি ৰিজ্জাযো, ছল়ভিঞ্ঞা পৰেচ্ছতি.

৫. তেন যোগেন জনকাযং, ওৰদতি মহামুনি;

তেন ৰিত্থারিকং আসি, লোকনাথস্স সাসনং.

৬. মহাহনুসভক্খন্ধো, দীপঙ্করস্স নামকো;

বহূ জনে তারযতি, পরিমোচেতি দুগ্গতিং.

৭. বোধনেয্যং জনং দিস্ৰা, সতসহস্সেপি যোজনে;

খণেন উপগন্ত্ৰান, বোধেতি তং মহামুনি.

৮. পঠমাভিসমযে বুদ্ধো, কোটিসতমবোধযি;

দুতিযাভিসমযে নাথো, নৰুতিকোটিমবোধযি.

৯. যদা চ দেৰভৰনম্হি, বুদ্ধো ধম্মমদেসযি;

নৰুতিকোটিসহস্সানং, ততিযাভিসমযো অহু.

১০. সন্নিপাতা তযো আসুং, দীপঙ্করস্স সত্থুনো;

কোটিসতসহস্সানং, পঠমো আসি সমাগমো.

১১. পুন নারদকূটম্হি, পৰিৰেকগতে জিনে;

খীণাসৰা ৰীতমলা, সমিংসু সতকোটিযো.

১২. যম্হি কালে মহাৰীরো, সুদস্সনসিলুচ্চযে;

নৰকোটিসহস্সেহি, পৰারেসি মহামুনি.

১৩. দসৰীসসহস্সানং, ধম্মাভিসমযো অহু;

একদ্ৰিন্নং অভিসমযা, গণনাতো অসঙ্খিযা.

১৪. ৰিত্থারিকং বাহুজঞ্ঞং, ইদ্ধং ফীতং অহূ তদা;

দীপঙ্করস্স ভগৰতো, সাসনং সুৰিসোধিতং.

১৫. চত্তারি সতসহস্সানি, ছল়ভিঞ্ঞা মহিদ্ধিকা;

দীপঙ্করং লোকৰিদুং, পরিৰারেন্তি সব্বদা.

১৬. যে কেচি তেন সমযেন, জহন্তি মানুসং ভৰং;

অপত্তমানসা সেখা, গরহিতা ভৰন্তি তে.

১৭. সুপুপ্ফিতং পাৰচনং, অরহন্তেহি তাদিহি;

খীণাসৰেহি ৰিমলেহি, উপসোভতি সব্বদা.

১৮. নগরং রম্মৰতী নাম, সুদেৰো নাম খত্তিযো;

সুমেধা নাম জনিকা, দীপঙ্করস্স সত্থুনো.

১৯. দসৰস্সসহস্সানি, অগারং অজ্ঝ সো ৰসি [অজ্ঝাৰসী জিনো (স্যা. ক.)];

হংসা কোঞ্চা মযূরা চ, তযো পাসাদমুত্তমা.

২০. তীণিসতসহস্সানি, নারিযো সমলঙ্কতা;

পদুমা নাম সা নারী, উসভক্খন্ধো অত্রজো.

২১. নিমিত্তে চতুরো দিস্ৰা, হত্থিযানেন নিক্খমি;

অনূনদসমাসানি, পধানে পদহী জিনো.

২২. পধানচারং চরিত্ৰান, অবুজ্ঝি মানসং মুনি;

ব্রহ্মুনা যাচিতো সন্তো, দীপঙ্করো মহামুনি.

২৩. ৰত্তি চক্কং মহাৰীরো, নন্দারামে সিরীঘরে [সিরীধরে (সী.)];

নিসিন্নো সিরীসমূলম্হি, অকা তিত্থিযমদ্দনং.

২৪. সুমঙ্গলো চ তিস্সো চ, অহেসুং অগ্গসাৰকা;

সাগতো [সোভিতো (ক.)] নামুপট্ঠাকো, দীপঙ্করস্স সত্থুনো.

২৫. নন্দা চেৰ সুনন্দা চ, অহেসুং অগ্গসাৰিকা;

বোধি তস্স ভগৰতো, পিপ্ফলীতি পৰুচ্চতি.

২৬. তপুস্সভল্লিকা [তপস্সুভল্লিকা (সী.)] নাম, অহেসুং অগ্গুপট্ঠকা;

সিরিমা কোণা উপট্ঠিকা, দীপঙ্করস্স সত্থুনো.

২৭. অসীতিহত্থমুব্বেধো, দীপঙ্করো মহামুনি;

সোভতি দীপরুক্খোৰ, সালরাজাৰ ফুল্লিতো.

২৮. সতসহস্সৰস্সানি, আযু তস্স মহেসিনো;

তাৰতা তিট্ঠমানো সো, তারেসি জনতং বহুং.

২৯. জোতযিত্ৰান সদ্ধম্মং, সন্তারেত্ৰা মহাজনং;

জলিত্ৰা অগ্গিক্খন্ধোৰ, নিব্বুতো সো সসাৰকো.

৩০. সা চ ইদ্ধি সো চ যসো, তানি চ পাদেসু চক্করতনানি;

সব্বং তমন্তরহিতং [সমন্তরহিতং (সী. স্যা. ক.)], ননু রিত্তা সব্বসঙ্খারা [সব্বসঙ্খারাতি (সব্বত্থ)].

৩১. দীপঙ্করো জিনো সত্থা, নন্দারামম্হি নিব্বুতো;

তত্থেৰস্স জিনথূপো, ছত্তিংসুব্বেধযোজনোতি.

দীপঙ্করস্স ভগৰতো ৰংসো পঠমো.