৫. ওপৰয্হত্থেরঅপদানং

৩৩. ‘‘পদুমুত্তরবুদ্ধস্স, আজানীযমদাসহং;

নিয্যাদেত্ৰান সম্বুদ্ধে [সম্বুদ্ধং (সী. ক.)], অগমাসিং সকং ঘরং.

৩৪. ‘‘দেৰলো নাম নামেন, সত্থুনো অগ্গসাৰকো;

ৰরধম্মস্স দাযাদো, আগচ্ছি মম সন্তিকং.

৩৫. ‘‘সপত্তভারো ভগৰা, আজানেয্যো ন কপ্পতি;

তৰ সঙ্কপ্পমঞ্ঞায, অধিৰাসেসি চক্খুমা.

৩৬. ‘‘অগ্ঘাপেত্ৰা ৰাতজৰং, সিন্ধৰং সীঘৰাহনং;

পদুমুত্তরবুদ্ধস্স, খমনীযমদাসহং.

৩৭. ‘‘যং যং যোনুপপজ্জামি, দেৰত্তং অথ মানুসং [দেৰে চ মানুসে ভৰে (সী. ক.)];

খমনীযং ৰাতজৰং, চিত্তং নিব্বত্ততে [আজানীযা ৰাতজৰা, ৰিত্তি নিব্বত্তরে (স্যা.), খমনীযা ৰাতজৰা, চিত্তা নিব্বত্তরে (সী.)] মম.

৩৮. ‘‘লাভং তেসং সুলদ্ধংৰ, যে লভন্তুপসম্পদং;

পুনপি পযিরুপাসেয্যং, বুদ্ধো লোকে সচে ভৰে.

৩৯. ‘‘অট্ঠৰীসতিক্খত্তুংহং, রাজা আসিং মহব্বলো;

চাতুরন্তো ৰিজিতাৰী, জম্বুসণ্ডস্স [জম্বুদীপস্স (স্যা.), জম্বুমণ্ডস্স (ক.)] জম্বুইস্সরো.

৪০. ‘‘ইদং পচ্ছিমকং ময্হং, চরিমো ৰত্ততে ভৰো;

পত্তোস্মি অচলং ঠানং, হিত্ৰা জযপরাজযং.

৪১. ‘‘চতুতিংসসহস্সম্হি, মহাতেজোসি খত্তিযো;

সতরতনসম্পন্নো, চক্কৰত্তী মহব্বলো.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ওপৰয্হো থেরো ইমা গাথাযো অভাসিত্থাতি.

ওপৰয্হত্থেরস্সাপদানং পঞ্চমং.