৮. বোধিসম্মজ্জকত্থেরঅপদানং

৪৮. ‘‘অহং পুরে বোধিপত্তং, উজ্ঝিতং চেতিযঙ্গণে;

তং গহেত্ৰান ছড্ডেসিং, অলভিং ৰীসতীগুণে.

৪৯. ‘‘তস্স কম্মস্স তেজেন, সংসরন্তো ভৰাভৰে;

দুৰে ভৰে সংসরামি, দেৰত্তে চাপি মানুসে.

৫০. ‘‘দেৰলোকা চৰিত্ৰান, আগন্ত্ৰা মানুসং ভৰং;

দুৰে কুলে পজাযামি, খত্তিযে চাপি ব্রাহ্মণে.

৫১. ‘‘অঙ্গপচ্চঙ্গসম্পন্নো, আরোহপরিণাহৰা;

অভিরূপো সুচি হোমি, সম্পুণ্ণঙ্গো অনূনকো.

৫২. ‘‘দেৰলোকে মনুস্সে ৰা, জাতো ৰা যত্থ কত্থচি;

ভৰে সুৰণ্ণৰণ্ণো চ, উত্তত্তকনকূপমো.

৫৩. ‘‘মুদুকা মদ্দৰা স্নিদ্ধা [মুদু মদ্দৰা সিনিদ্ধা (স্যা.)], সুখুমা সুকুমারিকা;

ছৰি মে সব্বদা হোতি, বোধিপত্তে সুছড্ডিতে [সুছড্ডিনে (সী.)].

৫৪. ‘‘যতো কুতোচি গতীসু, সরীরে সমুদাগতে;

ন লিম্পতি রজোজল্লং, ৰিপাকো পত্তছড্ডিতে.

৫৫. ‘‘উণ্হে ৰাতাতপে তস্স, অগ্গিতাপেন ৰা পন;

গত্তে সেদা ন মুচ্চন্তি, ৰিপাকো পত্তছড্ডিতে.

৫৬. ‘‘কুট্ঠং গণ্ডো কিলাসো চ, তিলকা পিল়কা তথা;

ন হোন্তি কাযে দদ্দু চ, ৰিপাকো পত্তছড্ডিতে.

৫৭. ‘‘অপরম্পি গুণং তস্স, নিব্বত্ততি ভৰাভৰে;

রোগা ন হোন্তি কাযস্মিং, ৰিপাকো পত্তছড্ডিতে.

৫৮. ‘‘অপরম্পি গুণং তস্স, নিব্বত্ততি ভৰাভৰে;

ন হোতি চিত্তজা পীল়া, ৰিপাকো পত্তছড্ডিতে.

৫৯. ‘‘অপরম্পি গুণং তস্স, নিব্বত্ততি ভৰাভৰে;

অমিত্তা ন ভৰন্তস্স, ৰিপাকো পত্তছড্ডিতে.

৬০. ‘‘অপরম্পি গুণং তস্স, নিব্বত্ততি ভৰাভৰে;

অনূনভোগো ভৰতি, ৰিপাকো পত্তছড্ডিতে.

৬১. ‘‘অপরম্পি গুণং তস্স, নিব্বত্ততি ভৰাভৰে;

অগ্গিরাজূহি চোরেহি, ন হোতি উদকে ভযং.

৬২. ‘‘অপরম্পি গুণং তস্স, নিব্বত্ততি ভৰাভৰে;

দাসিদাসা অনুচরা, হোন্তি চিত্তানুৰত্তকা.

৬৩. ‘‘যম্হি আযুপ্পমাণম্হি, জাযতে মানুসে ভৰে;

ততো ন হাযতে আযু, তিট্ঠতে যাৰতাযুকং.

৬৪. ‘‘অব্ভন্তরা চ বাহিরা [বহিচরা (সী. পী. ক.)], নেগমা চ সরট্ঠকা;

নুযুত্তা হোন্তি সব্বেপি, ৰুদ্ধিকামা সুখিচ্ছকা.

৬৫. ‘‘ভোগৰা যসৰা হোমি, সিরিমা ঞাতিপক্খৰা;

অপেতভযসন্তাসো, ভৰেহং সব্বতো ভৰে.

৬৬. ‘‘দেৰা মনুস্সা অসুরা, গন্ধব্বা যক্খরক্খসা;

সব্বে তে পরিরক্খন্তি, ভৰে সংসরতো সদা.

৬৭. ‘‘দেৰলোকে মনুস্সে চ, অনুভোত্ৰা উভো যসে;

অৰসানে চ নিব্বানং, সিৰং পত্তো অনুত্তরং.

৬৮. ‘‘সম্বুদ্ধমুদ্দিসিত্ৰান, বোধিং ৰা তস্স সত্থুনো;

যো পুঞ্ঞং পসৰে পোসো, তস্স কিং নাম দুল্লভং.

৬৯. ‘‘মগ্গে ফলে আগমে চ, ঝানাভিঞ্ঞাগুণেসু চ;

অঞ্ঞেসং অধিকো হুত্ৰা, নিব্বাযামি অনাসৰো.

৭০. ‘‘পুরেহং বোধিযা পত্তং, ছড্ডেত্ৰা হট্ঠমানসো;

ইমেহি ৰীসতঙ্গেহি, সমঙ্গী হোমি সব্বদা.

৭১. ‘‘কিলেসা ঝাপিতা ময্হং…পে… ৰিহরামি অনাসৰো.

৭২. ‘‘স্ৰাগতং ৰত মে আসি…পে… কতং বুদ্ধস্স সাসনং.

৭৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বোধিসম্মজ্জকো থেরো ইমা গাথাযো

অভাসিত্থাতি.

বোধিসম্মজ্জকত্থেরস্সাপদানং অট্ঠমং.