৯. পানধিদাযকত্থেরঅপদানং

৭১. ‘‘অনোমদস্সী ভগৰা, লোকজেট্ঠো নরাসভো;

দিৰাৰিহারা নিক্খম্ম, পথমারুহি [পীতিমারুয্হি (স্যা.)] চক্খুমা.

৭২. ‘‘পানধিং সুকতং গয্হ, অদ্ধানং পটিপজ্জহং;

তত্থদ্দসাসিং সম্বুদ্ধং, পত্তিকং চারুদস্সনং.

৭৩. ‘‘সকং চিত্তং পসাদেত্ৰা, নীহরিত্ৰান পানধিং;

পাদমূলে ঠপেত্ৰান, ইদং ৰচনমব্রৰিং.

৭৪. ‘‘‘অভিরূহ মহাৰীর, সুগতিন্দ ৰিনাযক;

ইতো ফলং লভিস্সামি, সো মে অত্থো সমিজ্ঝতু’.

৭৫. ‘‘অনোমদস্সী ভগৰা, লোকজেট্ঠো নরাসভো;

পানধিং অভিরূহিত্ৰা, ইদং ৰচনমব্রৰি.

৭৬. ‘‘‘যো পানধিং মে অদাসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো’.

৭৭. ‘‘বুদ্ধস্স গিরমঞ্ঞায, সব্বে দেৰা সমাগতা;

উদগ্গচিত্তা সুমনা, ৰেদজাতা কতঞ্জলী.

৭৮. ‘‘পানধীনং পদানেন, সুখিতোযং ভৰিস্সতি;

পঞ্চপঞ্ঞাসক্খত্তুঞ্চ, দেৰরজ্জং করিস্সতি.

৭৯. ‘‘সহস্সক্খত্তুং রাজা চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

৮০. ‘‘অপরিমেয্যে ইতো কপ্পে, ওক্কাককুলসম্ভৰো;

গোতমো নাম গোত্তেন [নামেন (সব্বত্থ)], সত্থা লোকে ভৰিস্সতি.

৮১. ‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

৮২. ‘‘দেৰলোকে মনুস্সে ৰা, নিব্বত্তিস্সতি পুঞ্ঞৰা;

দেৰযানপটিভাগং, যানং পটিলভিস্সতি.

৮৩. ‘‘পাসাদা সিৰিকা ৰয্হং, হত্থিনো সমলঙ্কতা;

রথা ৰাজঞ্ঞসংযুত্তা, সদা পাতুভৰন্তি মে.

৮৪. ‘‘অগারা নিক্খমন্তোপি, রথেন নিক্খমিং অহং;

কেসেসু ছিজ্জমানেসু, অরহত্তমপাপুণিং.

৮৫. ‘‘লাভা ময্হং সুলদ্ধং মে, ৰাণিজ্জং সুপ্পযোজিতং;

দত্ৰান পানধিং একং, পত্তোম্হি অচলং পদং.

৮৬. ‘‘অপরিমেয্যে ইতো কপ্পে, যং পানধিমদাসহং;

দুগ্গতিং নাভিজানামি, পানধিস্স ইদং ফলং.

৮৭. ‘‘কিলেসা ঝাপিতা ময্হং…পে… ৰিহরামি অনাসৰো.

৮৮. ‘‘স্ৰাগতং ৰত মে আসি…পে… কতং বুদ্ধস্স সাসনং.

৮৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পানধিদাযকো থেরো ইমা গাথাযো

অভাসিত্থাতি.

পানধিদাযকত্থেরস্সাপদানং নৰমং.